San Mateo 19

1Y antok ri Jesús xtanie' chub'ixic ri tzij re', x'a y xuya' can ri lugar re', ri rub'inan Galilea. Jaja' x'a c'a Judea, y xak'ax juc'an ri río Jordán. 2Can iq'uiy vinak ri xa'a chirij, y xa'ru'on sanar ri nca'yavaj. 3Y jare' antok nic'aj achi'a' fariseos xa'lka riq'uin chi niqui'an tentar. Y rumare' xquic'utuj cha: ¿Otz chi jun ache nujach-ri' riq'uin ri raxjayil ruma chica-na kax? 4Pero ri Jesús xu'ej chica ri achi'a' re': ¿Man ib'anun ta leer chupan ri ruch'ab'al ri Dios ri nu'ej chi pa rutz'ucb'al, ri Dios ache y ixok xa'ru'on? 5Y xu'ej: Rumare' ri ache xca'ruya' can ri rutie-rutata' y xtiquic'an-qui' riq'uin ri raxjayil, y ri ica'ye' xa jo'c jun xtiqui'an. Quire' nu'ej ri ruch'ab'al ri Dios ri tz'ib'an can. 6Y rumare' man chic ica'ye' ta, xa jo'c jun xtiqui'an. Ruma c'a re', lo que ri Dios xu'on jun cha, ri ache man tujach roch, xcha' ri Jesús. 7Y ijeje' xquic'utuj cha ri Jesús: ¿Karruma ri Moisés xu'on mandar chi xa jun ache nrajo' nujach-ri' riq'uin ri raxjayil, tub'ana' jun carta ri pache' nu'ej-ve chi nujach-ri' riq'uin y tuya' can? 8Y ri Jesús xu'ej chica: Ruma cof ib'anun cha ri ivánima, rumare' ri Moisés xu'on permitir chi jun ache c'o che'l nujach-ri' riq'uin ri raxjayil; pero pa rutz'ucb'al, man quire' ta. 9Y inre' can ni'ej c'a chiva chi chica-na ache ri nujach-ri' riq'uin ri raxjayil y xa man ruma ta ri ixok ruc'uan-ri' riq'uin jun chic ache, y nic'ulie' riq'uin jun chic ixok, ri ache re' can nu'on pecado choch ri Dios. Y ri ache ri nic'ulie' riq'uin ri ixok ri jachuon-el, can nu'on je' pecado choch ri Dios, xcha' ri Jesús. 10Y ri discípulos xqui'ej cha ri Jesús: Xa jun ache can richin xa jun tiempo ximil riq'uin ri raxjayil, más ta otz chi man ta nic'ulie', xa'cha'. 11Y ri Jesús xu'ej chica ri ru-discípulos: Man quinojiel ta nca'covin niqui'an chi man ta nca'c'ulie', ruma man chica ta quinojiel yo'n-ve chi niqui'an quire'. 12Y ic'o-na-ve alab'o, xa-jan antok xa'lax ja yan xa'k'alajin chi man xtiquicanuj ta quixjayil. Ic'o je' alab'o ri man xtiquicanuj ta quixjayil, pero xa ruma xa'an operar. Y ic'o je' alab'o ri man xtiquicanuj ta quixjayil, pero xa quiq'uin ijeje' xpa-ve chi quire' niqui'an rusamaj ri Dios y nca'quito' ri nca'uoc chupan ri reino ri c'o chicaj. Ri nuna' chi nicovin nic'ujie' ruyuon, man tucanuj raxjayil, xcha' ri Jesús. 13Y ic'o ac'ola' ri xa'c'amar-pa choch ri Jesús, chi nuya' ruk'a' pa quive' chi nca'ru'on bendecir. Pero ri discípulos xa'quich'olij ri vinak chi man tiqui'an quire'. 14Pero ri Jesús xu'ej chica ri ru-discípulos: Tiya' permiso chica ri ac'ola' chi nca'pa viq'uin inre', y man qui'ik'at. Ruma ri reino ri c'o chicaj, xa quichin ri i-inche'l ac'ola'. 15Y antok ri Jesús ruyo'n chic ruk'a' pa quive' ri ac'ola' chi xa'ru'on bendecir, jaja' xuya' can ri lugar re' y x'a. 16Y c'o jun c'ajol ache xalka riq'uin ri Jesús y xu'ej: Utzulaj Maestro, ¿chica otz ni'an chi nivil ri c'aslien ri man niq'uis ta? xcha' cha. 17Y ri Jesús xu'ej cha: ¿Karruma na'ej otz chuva inre'? Ruma man jun vinak otz, xa jo'c Jun ri otz y re' ja ri Dios. Xa atre' navajo' ncab'aka chupan ri c'aslien ri man niq'uis ta, can tab'ana' ri nu'ej ri mandamientos, xcha' cha. 18Y xpa ri c'ajol ache xuc'utuj cha ri Jesús: ¿Chica ri mandamientos re'? xcha'. Y ri Jesús xu'ej cha: Man caquimisan; ri at-c'ulan, man tavuc'uaj-avi' riq'uin jun chic; man catalak'; man tatz'ak tzij chirij jun chic; 19ca'b'ana' respetar ri atie-atata'; y can inche'l ri navajo-ka-avi' atre', can quire' je' mismo tavajo' ri a-prójimo. Jare' ri mandamientos, xcha' cha. 20Y ri c'ajol ache xu'ej cha ri Jesús: Nojiel re' c'a in co'l-oc nutz'amuon-pa rub'anic. ¿Chica nquirajo' ri man nub'anun ta? xcha'. 21Y ri Jesús xu'ej cha: Xa navajo' na'an nojiel, ca'in, tac'ayij ri c'o aviq'uin y ri rajal tajacha' chiquivach ri i-puobra, chi quire' nic'ujie' ab'ayomal chicaj. Y catam-pa viq'uin y nca'a chuvij, xcha' cha. 22Antok ri c'ajol ache xra'xaj ri tzij ri xu'ej ri Jesús, nib'isuon ránima x'a, ruma altíra rub'ayomal c'o. 23Entonces ri Jesús xu'ej chica ri ru-discípulos: Can ketzij ni'ej chiva, chi altíra cuesta chi jun b'ayuon ntuoc pa ru-reino ri Dios. 24Jun chic b'ay ni'ej chiva: Xa más fácil nak'ax jun camello chupan jun ruvaruol jun acúxa, que choch jun b'ayuon chi ntuoc pa ru-reino ri Dios. 25Y antok ri ru-discípulos xca'xaj ri tzij re', can más xa'chapataj, y niqui'ej: ¿Chica c'a xticolotaj? xa'cha'. 26Ri Jesús xa'rutz'at-apa ri ru-discípulos y xu'ej chica: Ri vinak man nojiel ta nca'tiquir niqui'an, pero ri Dios nojiel nitiquir nu'on, xcha' chica. 27Y jare' antok ri Pedro xu'ej cha ri Jesús: Ojre' kayo'n can nojiel ri c'o kiq'uin, y oj-b'anak chavij. ¿Y chica xtakach'ec ojre' rumare'? 28Ri Jesús xu'ej: Can ketzij ri ni'ej chiva, chi antok xtalka ri k'ij chi nojiel xca'uoc c'ac'ac', ri Xtak-pa chicaj chi xalax chi'icajol c'o chic ruk'ij, can xtitz'uye' pa ru-trono chi nu'on juzgar. Y ixre' je' ri ix-b'anak chuvij, xquixtz'uye' pa doce (cab'alajuj) tronos chi nti'an juzgar ri doce (cab'alajuj) tribus richin ri Israel. 29Y chica-na ri ruyo'n can rachuoch, o runimal, o ruchak', o rana', o rutie-rutata', o raxjayil, o ralc'ual o rulief vuma inre', can xtiyo'x cien veces más ri ruc'axiel cha. Y can xtiyo'x cha ri c'aslien ri man niq'uis ta. 30Pero iq'uiy ri ic'o nab'ayal, ri xca'c'ujie' c'a pa ruq'uisb'al y iq'uiy ri ic'o pa ruq'uisb'al xca'c'ujie' nab'ayal.

will be added

X\