1 Y chupan ri tiempo re' ri discípulos xa'jiel-apa riq'uin ri Jesús, y xquic'utuj cha: ¿Chica ri más nem xtu'on chupan ri ru-reino ri Dios? xa'cha' cha. 2 Y ri Jesús xrayuoj jun ac'ual y xuya' pa nic'aj. 3 Y jaja' xu'ej chica ri ru-discípulos: Can ketzij ri ni'ej chiva, chi xa man ntic'ax ta ri ino'j, y xa man nti'an ta inche'l jun ac'ual, man xquixuoc ta chupan ri ru-reino ri Dios. 4 Jo'c ri nuna' chi man jun oc ruk'ij inche'l ri jun ac'ual re', jare' ri más nem ruk'ij xtic'ujie' pa ru-reino ri Dios. 5 Y chica-na ri nu'on recibir jun ac'ual inche'l va pa nub'e', xa can inre' nquiru'on recibir. 6 Xa c'o ta jun ri in-runiman mesque manak-oc ruk'ij y nipa jun chic vinak y nu'on cha ri jun re' chi nitzak, ri nib'ano quire' más otz nixim jun nem ab'aj (ca') chukul y nic'ak-ka c'a chuxie' ri mar. 7 ¡Juye' quivach ri vinak ri ic'o choch-ulief, ruma ic'o ri nca'b'ano chica chi nca'tzak chupan pecado! Can c'o-ve chi quire' niquic'ul choch-ulief. ¡Pero can juye' roch ri vinak ri nib'ano cha jun chic chi nitzak chupan pecado! 8 Rumare' xa jun ak'a' o jun avakan ri nib'ano chava chi ncatzak, más otz takupij-el y tac'aka-el. Ruma más otz jun oc ak'a' o jun oc avakan c'o ncatuoc chupan ri c'aslien ri man niq'uis ta, que c'o ca'ye' ak'a' y ca'ye' avakan y xa ncayo'x chupan ri k'ak' ri man nichup ta. 9 Y xa jun anak'avach ri nib'ano chava chi ncatzak, más otz tavalasaj-el y tac'aka-el. Ruma más otz jun oc anak'avach c'o ncatuoc chupan ri c'aslien ri man niq'uis ta, que c'o ca'ye' anak'avach y xa ncayo'x chupan ri infierno, ri k'ak' ri man nichup ta. 10 Man ti'an chica chi man jun quikalien ri man jun oc quik'ij, ruma chivach ixre' can i-co'l-oc. Inre' ni'ej chiva chi ijeje' ic'o ángeles ri nca'chajin quichin, y ri ángeles re' can siempre ic'o riq'uin ri Nata' ri c'o chicaj. 11 Y ri Xtak-pa chicaj chi xalax chi'icajol, can xpa chi nca'rucanuj y chi nca'rucol ri i-sachnak chupan ri pecado. 12 Tib'ana' pensar otz ri xtin'ej chiva. Xa jun ache ic'o ta i-cien ru-ovejas y nisach ta can jun, ¿man nca'ruya' ta came can b'a' ri i-noventa y nueve y ni'a pa tak k'ayis chucunuxic ri jun ri sachnak can? 13 Y xa ri ache re' nirila-pa ri jun ru-oveja ri sachnak can, can ketzij ni'ej chiva chi jaja' más niquicuot riq'uin ri ru-oveja ri nirila-pa que chiquivach ri i-noventa y nueve ri man xa'sach ta. 14 Can quire' nib'anataj riq'uin ri Itata' ri c'o chicaj, can man nrajo' ta jaja' chi nisach ta can jun vinak chupan ri pecado, mesque manak-oc ruk'ij. 15 Xa c'o jun hermano c'o jun kax itziel ri nu'on chava, ayuon ca'in riq'uin y ta'ej cha ri xu'on chava. Y xa nra'xaj ri na'ej cha, can xach'ec ri hermano. 16 Pero xa man ncara'xaj ta, ca'vuc'uaj jun o ica'ye' testigos aviq'uin, chi quire' chiquivach ijeje' na'ej cha ri hermano chi man otz ta ri xu'on chava. 17 Y xa ri hermano man nrajo' ta nra'xaj ri niqui'ej cha, ta'ej cha ri iglesia. Y xa man nra'xaj ta ri nu'ej ri iglesia cha, entonces tab'ana' cha inche'l jun maloy-impuestos o inche'l jun vinak ri man runiman ta ri Dios. 18 Y can ketzij ni'ej chiva, chi nojiel ri xtixim vave' choch-ulief, can xtinxim chila chicaj, y ri xtiquir vave' choch-ulief, can xtinquir chila chicaj. 19 Ni'ej je' chiva: Xa choch-ulief ic'o ica'ye' hermanos ri nca'c'ujie' de acuerdo chi niquic'utuj chica-na kax, ri Nata' Dios ri c'o chicaj can xtuya-pa ri nic'utux cha cuma ri ica'ye' re'. 20 Ruma pache' na quimaluon-qui' ica'ye' o iyoxe' pa nub'e' inre', can inc'o inre' chiquicajol, xcha' ri Jesús. 21 Y ri Pedro can ja xjiel-apa riq'uin ri Jesús y xu'ej cha: Ajaf, ¿jane' (jaro') mul ni'an perdonar ri nu-hermano ri nu'on itziel chuva? ¿Siete (vuku') mul came ni'an perdonar? xcha' ri Pedro cha ri Jesús. 22 Ri Jesús xu'ej cha ri Pedro: Inre' man ni'ej ta chava chi jo'c siete (vuku') mul otz na'an perdonar jun av-hermano ri nu'on itziel chava. Inre' ni'ej chava chi hasta setenta veces siete na'an perdonar ri av-hermano. 23 Ri reino ri c'o chicaj can junan riq'uin ri xu'on jun rey ri xrajo' xuna'iej jane' (jaro') quic'as chiquijunal ri rusamajiel. 24 Y antok ri rey re' xutz'om rub'anic ri cuentas, c'o jun rusamajiel xpab'ax choch ri c'o diez (lajuj) mil talentos ruc'as. 25 Y ruma ri samajiel re' man nitiquir ta nutzoliej ri ruc'as, ri rey xu'ej chi tic'ayix ri samajiel, ri raxjayil y ri ralc'ual. Y tic'ayix je' nojiel ri kax richin, chi quire' nitzalaj ri ruc'as. 26 Ri samajiel can ja xxuquie-ka pan ulief choch ri rey, y altíra nu'on rogar cha. Ri samajiel nu'ej cha ri rey: Tab'ana' favor quinavoyo'iej chic b'a'. Inre' can xtintzoliej chava nojiel ri nuc'as, xcha' jaja'. 27 Y ri rey ri rajaf ri samajiel, can altíra xujoyovaj roch, rumare' xutzokopij-el y xu'on perdonar ri ruc'as. 28 Pero antok xiel-pa ri samajiel re', xb'aruc'ulu' c'a jun chic samajiel ri c'o ruc'as rub'anun riq'uin jaja'. Ri ruc'as ri rub'anun ri jun rach'il riq'uin xa cien denarios oc, pero jaja' xutz'om chukul ri rach'il y can ja nujitz'-ka pa rukul y nu'ej cha: Taya' c'a ri ac'as ri ab'anun viq'uin, nicha' cha. 29 Y ri rach'il ja xxuquie-ka chukul rakan, y can nuc'utuj favor cha, y nu'ej: Quinavoyo'iej chic b'a' y inre' xtintzoliej nojiel chava, xcha'. 30 Pero ri ache samajiel ri c'o c'as b'anun riq'uin, man xka ta choch ri x'e'x cha y rumare' xuc'uaj y xuya' pa cárcel, hasta c'a nutzoliej-na ri ruc'as. 31 Y ri nic'aj chic aj-samajiel antok xquitz'at nojiel ri xb'anataj, can altíra xa'b'isuon-ka. Y ijeje' xa'a riq'uin ri rey ri cajaf y xb'aquitzijuoj nojiel ri xu'on ri jun samajiel riq'uin ri jun chic. 32 Y ri rey xutak royoxic ri samajiel ri man otz ta xu'on y xu'ej cha: Atre' xa at jun itziel nusamajiel. Inre' xin'an perdonar nojiel ri ac'as, ruma xa'an rogar chinoch. 33 ¿Karruma man xajoyovaj ta roch ri avach'il pa samaj, inche'l ri xin'an inre' aviq'uin chi xinjoyovaj avach? 34 Y ri rey, ri cajaf ri aj-samajiel, xpa royoval, y xujach-el ri itziel rusamajiel pa quik'a' ri achi'a' chi xquitz'apij pa cárcel, hasta c'a nutzoliej-na nojiel ri ruc'as. 35 Can quire' xtu'on ri Nata' Dios ri c'o chicaj iviq'uin ixre', xa man riq'uin ta nojiel ivánima nti'an perdonar ri iv-hermano antok c'o itziel niqui'an chiva, xcha' ri Jesús.
