1 Y antok k'axnak chic vaki' k'ij, ri Jesús xa'rucha' ri Pedro, ri Jacobo y ri Juan ri quichak'-quinimal-qui' y xa'ruc'uaj c'a ri iyoxe' re' paro' jun juyu' nem. 2 Y ri Jesús xc'axtaj rutzub'al chiquivach. Ri rutzub'al can xch'ich'an inche'l ri k'ij. Y ri rutziak can altíra sak xu'on, can inche'l ri luz. 3 Y antok ri iyoxe' discípulos xquitz'at, ic'o yan chic ri Moisés y ri Elías, nca'tzijuon riq'uin ri Jesús. 4 Y ri Pedro xu'ej cha ri Jesús: Ajaf, otz chi ojc'o vave' ojre'. Xa atre' navajo', naka'an oxe' ch'itak enramadas; jun avichin atre', jun richin ri Moisés y jun richin ri Elías. 5 Y c'a nich'o' ri Pedro cha ri Jesús, antok jun mukul can nich'ich'an xka-pa pa quive'. Y chupan ri mukul re', c'o Jun ri xch'o-pa y xu'ej: Jare' ri Nuc'ajuol; altíra nivajo' y niquicuot vánima riq'uin. Can tivaxaj ri nu'ej jaja'. 6 Y antok ri iyoxe' discípulos xca'xaj re', xa'xuquie' y xquikasaj-ka ri quijaluon c'a pan ulief. Y altíra xquixi'ij-qui'. 7 Y ri Jesús xjiel-apa quiq'uin ri ru-discípulos, xa'rutz'om-ka y xu'ej chica: Quixpalaj y man tixi'ij-ivi'. 8 Antok ri discípulos xa'tzu'n chic apa, man jun chic más xquitz'at, xa ruyuon chic ri Jesús c'o can. 9 Y antok ijeje' i-xulan-pa choch ri juyu', ri Jesús xu'on mandar chica ri ru-discípulos: Man jun choj cha ti'ej ri xitz'at. Otz nti'ej pero c'a antok ri Xtak-pa chicaj chi xalax chi'icajol ya c'astajnak chic pa chiquicajol ri quiminaki', xcha' chica. 10 Entonces ri discípulos xquic'utuj cha ri Jesús: ¿Karruma niqui'ej ri achi'a' escribas chi nic'atzin chi ja ri Elías nipa na'ay? xa'cha'. 11 Y ri Jesús xu'ej chica: Can ketzij chi ri Elías nipa na'ay y nalruchojmij nojiel ri nic'atzin chi nichojmix. 12 Pero inre' ni'ej chiva chi ri Elías ya xpa, y man xquina'iej ta chica re'. Can nojiel ri xcajo', can quire' xqui'an cha. Y can quire' xtiqui'an je' cha ri Xtak-pa chicaj chi xalax chi'icajol, can xtu'on sufrir pa quik'a', xcha' ri Jesús. 13 Y c'ajare' ri discípulos xi'ka pa quive' (xqui'an entender) chi ri Jesús chirij ri Juan el Bautista xch'o-ve. 14 Antok ri Jesús y ri iyoxe' discípulos xa'lka pache' quimaluon-qui' iq'uiy vinak, c'o jun ache xalka riq'uin ri Jesús y xalxuquie' choch. Ri ache xu'ej cha ri Jesús: 15 Ajaf, tajoyovaj roch ri nuc'ajuol, ruma jaja' altíra nu'on sufrir ruma ri ataque, y q'uiy mul tzaknak pa k'ak' y pa ya'. 16 Xinc'am-pa chi xalya' chiquivach ri a-discípulos, pero ijeje' man xa'tiquir ta xqui'an sanar, xcha' ri ache. 17 Y ri Jesús xu'ej: ¡Man jun vinak chupan ri tiempo vacame ruyo'n ta ránima riq'uin ri Dios, xa quinojiel i-sachnak! ¿Ixre' nti'an pensar chi inre' nojiel k'ij xquic'ujie' iviq'uin? ¿Y jane' (jaro') tiempo xquixcoch'? Tic'ama-pa ri ala' vave', xcha' ri Jesús. 18 Ri Jesús cof xch'o' cha ri itziel espíritu y xu'ej cha chi tiel-el y ja xiel riq'uin ri ala'. Y ri ala' can ja chupan ri huora re' xu'on sanar. 19 Y antok ri Jesús y ri ru-discípulos quiyuon chic ic'o can, xa'pa ijeje' xquic'utuj cha: ¿Karruma ojre' man xojtiquir ta xkalasaj-el ri itziel espíritu? 20 Y ri Jesús xu'ej chica: Man xixtiquir ta xivalasaj-el ruma man can ta icukub'an ic'u'x riq'uin ri Dios. Y can ketzij ri ni'ej chiva: Xa ta icukub'an ic'u'x riq'uin ri Dios, mesque inche'l-oc jun ch'iti ija'tz richin ri mostaza, nti'ej cha la juyu' la chi tiel-el vave' y tak'ax chic jun lugar, y can xtak'ax y man jun c'a kax ri man ta xquixtiquir xti'an. 21 Pero ri jun clase espíritu re' ntiel-el, jo'c riq'uin ayuno y oración, xcha' chica. 22 Y antok ri Jesús y ri ru-discípulos ic'o chic Galilea, xpa ri Jesús xu'ej chic jun b'ay chica: Ri Xtak-pa chicaj chi xalax chi'icajol can xtijach pa quik'a' ri vinak, 23 y xtiquiquimisaj, pero chi oxe' k'ij xtic'astaj-pa chiquicajol ri quiminaki'. Y antok ri discípulos xca'xaj ri xu'ej ri Jesús, can altíra xa'b'isuon. 24 Y antok ri Jesús y ri ru-discípulos xa'lka pa tanamet Capernaum, ri nca'malo ri impuestos xa'lka riq'uin ri Pedro y xquic'utuj cha: ¿Ri I-Maestro nutoj ri ca'ye' dracmas? xa'cha' cha. 25 Y ri Pedro xu'ej: Nutoj. Y antok ri Pedro xuoc pa jay, ja ri Jesús xb'ach'o-pa cha na'ay y xu'ej cha: ¿Chica na'ej atre' Simón Pedro? ¿Ri reyes ri ic'o choch-ulief, choj chica niquic'utuj ri impuestos y ri contribuciones? ¿Chica ri calc'ual o chica ri man calc'ual ta? xcha' ri Jesús. 26 Y ri Pedro xu'ej cha ri Jesús: Ri reyes chica ri man i-calc'ual ta niquic'utuj-ve, xcha'. Y ri Jesús xu'ej: Ja ri calc'ual ri manak niquitoj. 27 Pero xa man nakatoj ta, xa man xti'ka ta pa quive' (man xtiqui'an ta entender) karruma man nakatoj ta. Ca'in c'a chuchi' ri mar chi natz'ama' car; y ri na'ay car ri xtavalasaj-pa, tajaka' pa ruchi' y chire' xtavil-ve ri miera chi natoj ri impuesto ri vichin inre' y ri avichin atre', xcha' ri Jesús cha ri Pedro.
