San Mateo 16

1Ri achi'a' fariseos y ri achi'a' saduceos xa'lka riq'uin ri Jesús chi niqui'an tentar, y xqui'ej cha chi tub'ana' jun señal chicaj. 2Pero ri Jesús xu'ej chica ri achi'a' re': Antok ixre' ntitz'at chi can quiak rub'anun ri mukul chicaj antok nika-ka ri k'ij, nti'ej chi otz k'ij nu'on chua'k. 3Y quire' je' ri mac'ajan yan, antok ntitz'at chi ri rocaj mukul y quiak ri mukul, nti'ej: Vacame nika job', nquixcha'. ¡Ixre' xa ca'ye' ipalaj! Ruma can ivata'n chica nirub'ana' antok ntitz'at ri rocaj, pero man ivata'n ta ntitz'at ri señales richin ri tiempo ri ojc'o. 4Ri vinak richin ri tiempo vacame altíra i-itziel y man niquinimaj ta ri Dios, rumare' nicajo' chi ni'an jun señal chiquivach chi nquinquinimaj. Pero ri señal ri nicajo' man xtiyo'x ta chica. Xa ja ri xb'anataj riq'uin ri Jonás, ri jun profeta ri xc'ujie' ojier can tiempo, jare' ri señal ri xtiyo'x chica. Y ja xa'ruya' can ri achi'a' re' y x'a. 5Antok ri Jesús y ri ru-discípulos xa'b'aka c'a juc'an ruchi' ri ya', ri discípulos xa xmastaj chica chi xquic'uaj simíta. 6Y ri Jesús xu'ej chica ri ru-discípulos: Tib'ana' cuenta-ivi' choch ri levadura quichin ri achi'a' fariseos y ri achi'a' saduceos. 7Ijeje' xqui'ej-ka pa cánima: Jaja' xu'ej quire' ruma manak simíta xkac'am-pa, xa'cha'. 8Pero ri Jesús can rata'n ri niqui'an pensar ri ru-discípulos, mare' xu'ej chica: ¿Karruma ixre' nti'an pensar chi ruma manak simíta xic'am-pa mare' xin'ej quire'? Man icukub'an ta ic'u'x viq'uin. 9¿C'a maja' ti'ka pan ive' (ti'an entender) ri xin'ej? ¿Man nalka ta chic pan ive' antok xa'ntzuk ri ivu'uo' mil achi'a' riq'uin ri vu'uo' simíta y jane' (jaro') chacach ximol can? 10¿Man nalka ta je' pan ive' antok xa'ntzuk ri icaje' mil riq'uin ri siete (vuku') simíta y jane' (jaro') chacach ximol can? 11¿Karruma ixre' man xi'ka ta pan ive' (man xi'an ta entender) chi inre' man xich'o' ta chirij ri simíta ri ximastaj can? Ri xin'ej inre' chiva, ja chi tib'ana' cuenta-ivi' choch ri levadura quichin ri achi'a' fariseos y ri achi'a' saduceos, xcha' ri Jesús chica. 12C'ajare' ri discípulos xi'ka pa quive' (xqui'an entender) chi man nu'ej ta chi tiquib'ana' cuenta-qui' choch ri levadura ri nicusas riq'uin ri simíta. Xa choch ri niquic'ut ri achi'a' fariseos y ri achi'a' saduceos. 13Y ri Jesús junan quiq'uin ri ru-discípulos xalka jun lugar ri c'o cierca ri tanamet Cesarea richin ri Filipo; y xuc'utuj chica ri ru-discípulos: ¿Chica niqui'ej ri achi'a' chirij ri Xtak-pa chicaj chi xalax chi'icajol; chi chica jaja'? 14Y ijeje' xqui'ej cha: Ic'o nca'e'n chi jaja' ri Juan el Bautista. Ic'o nic'aj chic niqui'ej chi jaja' ri Elías. Ic'o je' ri nca'e'n chi jaja' ri Jeremías o jun chiquivach ri profetas ri xa'c'ujie' ojier can tiempo, xa'cha' cha. 15Y jaja' xuc'utuj chica: ¿Y ixre', in chica inre' nti'ej? 16Y ri Simón Pedro ja xu'ej cha ri Jesús: Atre' ri Cristo, ri Ruc'ajuol ri c'aslic Dios, xcha' cha. 17Y jo'c xra'xaj quire' ri Jesús, can ja xu'ej cha: Atre' Simón Pedro ri at ruc'ajuol ri Jonás, can ja'al caquicuot; ruma ri xa'ej, man vinak ta x'e'n chava, xa ja ri Nata' ri c'o chicaj. 18Y nivajo' ni'ej chava: Atre' Pedro ab'e'; y paro' ri ab'aj nem re' xtinpab'a-ve ri nu-iglesia. Y ri camic man xtitiquir ta chirij. 19Can pan ak'a' atre' xtinya-ve chi najak ri puerta chiquivach ri nca'uoc chupan ri reino ri c'o chicaj; rumare' nojiel ri xtaxim o xtaquir vave' choch-ulief, can quire' je' xti'an cha chila chicaj. 20Y ri Jesús xu'on mandar chica ri ru-discípulos chi man jun choj cha tiqui'ej-ve chi jaja' ri Cristo. 21Y chupan ri tiempo re' ri Jesús xutz'om c'a rutzijoxic chiquivach ri ru-discípulos, chi nic'atzin chi ni'a pa tanamet Jerusalén y nuk'asaj q'uiy sufrimiento pa quik'a' ri mama'a' tak achi'a' ri niqui'an gobernar, pa quik'a' ri principales sacerdotes y pa quik'a' ri achi'a' escribas; y xtiquimisas, pero chi oxe' k'ij xtic'astaj-pa chiquicajol ri quiminaki'. 22Ri Pedro xuc'uaj jub'a' aparte ri Jesús, y xuch'olij y xu'ej cha: Man ta xtirajo' ri Dios chi xtib'anataj inche'l ri xa'ej chavij atre' Ajaf, xcha' ri Pedro. 23Pero antok ri Jesús xra'xaj quire', xtzu'n-apa riq'uin y xu'ej cha ri Pedro: ¡Catiel-el chinoch Satanás! Atre' xa ncatuoc k'atoy-nub'iey. Ruma ri na'an pensar atre' xa junan riq'uin ri niqui'an pensar ri vinak y man inche'l ta ri nrajo' ri Dios. 24Y ri Jesús xch'o' chica ri nic'aj chic ru-discípulos y xu'ej: Vi xa c'o jun nrajo' ni'a chuvij, man tu'on ri nurayij jaja', y can tutz'ama' y tuc'uaj ri ru-cruz. Xa quire' nu'on, otz tipa viq'uin chi ni'a chuvij. 25Ruma xa c'o jun ri altíra nrajo' ri ruc'aslien vave' choch-ulief, man xticolotaj ta. Pero ri jun, mesque niquimisas vuma inre', can xtiril ri c'aslien ri man niq'uis ta. 26Ruma ¿chica nuch'ec jun vinak xa nic'ujie' ta riq'uin nojiel ri b'ayomal ri c'o choch-ulief y xa man nicolotaj ta? Mesque altíra b'ayomal c'o riq'uin, pero man nitiquir ta nulok' ri c'aslien ri man niq'uis ta. 27Ruma ri Xtak-pa chicaj chi xalax chi'icajol can xtipa chic jun b'ay, y junan chic ruk'ij riq'uin ri Rutata' y xca'pa je' ri ru-ángeles riq'uin. Y ja xtuya' ruc'axiel chica chiquijunal conforme ri xqui'an. 28Y can ketzij ri ni'ej chiva, chi ri Xtak-pa chicaj chi xalax chi'icajol, can xtipa riq'uin chic ruk'ij, y ic'o jujun chivach ixre' ri man xca'con ta yan, c'a xtiquitz'at-na re', xcha' ri Jesús.

will be added

X\