San Mateo 15

1Y ic'o nic'aj achi'a' fariseos y nic'aj achi'a' escribas ri i-patanak Jerusalén xa'jiel-apa riq'uin ri Jesús y xquic'utuj cha: 2¿Karruma ri a-discípulos man niqui'an ta inche'l ri b'e'n can cuma ri kate't-kamama'? Ruma ri a-discípulos atre' man niquich'aj ta quik'a' antok nca'va', xa'cha'. 3Y ri Jesús xuc'utuj chica ijeje': ¿Y ixre', karruma jo'c ri quic'utun can ri ivate't-imama' ri nti'an, y man nti'an ta ri ru-mandamiento ri Dios? 4Ruma ri Dios nu'on mandar: Ca'b'ana' respetar ri atie-atata'. Y jun ri nca'rukal ri rutie-rutata', tiquimisas; man tijoyovax roch. Quire' ru'e'n ri Dios. 5Pero ixre' nti'ej: Chica-na ri nu'ej chica ri rutie-rutata' chi manak che'l nca'ruto', ruma nojiel ri c'o riq'uin xa ruyo'n chic cha ri Dios; 6ri jun re' ya man nic'atzin ta chi nca'ru'on respetar ri rutie-rutata'. Riq'uin ri nti'ej, can k'alaj chi ixre' jo'c ntivajo' nti'an ri quic'utun can ri ivate't-imama', y ib'anun cha ri ru-mandamiento ri Dios chi man jun rakalien. 7Ixre' xa ca'ye' ipalaj. Xa otz rub'ixic ru'e'n can chivij ri profeta Isaías. Quire' c'a nu'ej: 8Ri vinak re' jo'c riq'uin ri quichi' niquiya' nuk'ij, pero ri cánima xa naj c'o-ve. 9Xa man jun nic'atzin ri niqui'an antok niquiya' nuk'ij, nojiel ri nca'qui'ej antok nca'quitijuoj ri vinak, xa quino'j achi'a' y niqui'ej chi can jare' ti'an. Quire' ri rutz'ib'an can ri Isaías. 10Y ri Jesús xa'rayuoj-apa ri vinak ri quimaluon-qui' chire' y xu'ej chica: Tivaxaj otz ri xtin'ej chiva y ti'ka pan ive' (tib'ana' entender). 11Ri nib'ano tz'il cha jun vinak man ja ta ri kax ri nca'rutej-ka. Ri nib'ano tz'il cha jun vinak, ja ri itziel kax ri nca'iel-pa riq'uin. 12Y ri discípulos xa'jiel-apa riq'uin ri Jesús, y xqui'ej cha: Ri achi'a' fariseos xpa quiyoval antok xca'xaj ri xa'ej, xa'cha' cha. 13Pero ri Jesús xu'ej chica ri ru-discípulos: Nojiel ri man ticuon ta ruma ri Nata' ri c'o chila chicaj, can xtic'uk-el. 14Qui'iya' can chire'. Ijeje' xa i-muoy quib'anun riq'uin ri cata'n, y nca'quic'uaj nic'aj chic muoy. Y xa ri muoy nuc'uaj jun chic muoy, junan xca'b'atzak pa jul. 15Y ri Pedro xu'ej cha ri Jesús: Tab'ana' explicar chika, chica nib'ano tz'il cha jun vinak. 16Y ri Jesús xu'ej: ¿Ixre' je' man ni'ka ta pan ive' (man nti'an ta entender) ri xin'ej? 17¿Man ni'ka ta pan ive' (man nti'an ta entender) chi nojiel ri nutej-ka xa chupan nika-ve-ka, y después ntiel-el? 18Ri nib'ano tz'il cha jun vinak, ja ri itziel tak tzij ri nca'ru'ej, ruma nojiel re' xa pa ránima ntiel-pa. 19Ruma xa pa cánima ri vinak nca'pa-ve ri itziel tak kax ri niqui'an pensar, ri nca'quimisan, ri i-c'ulan y ri man i-c'ulan ta niquicanuj-qui' chi niqui'an pecado, ri nca'lak', ri niquitz'ak tzij chiquij nic'aj chic, y ri itziel nca'ch'o' chiquij nic'aj chic. 20Nojiel re', jare' ri nib'ano tz'il cha jun vinak. Pero xa jun vinak man nuch'aj ta ruk'a' antok niva-ka, man jun tz'il nu'on cha ri ránima. Quire' xu'ej ri Jesús. 21Y ri Jesús xiel-el chire', y x'a c'a chupan jun lugar cierca ri tanamet quib'inan Tiro y Sidón. 22Y chire' c'o jun ixok aj-Canaán. Jaja' xalka riq'uin ri Jesús, y nuc'utuj favor cha y can riq'uin ruchuk'a' nu'ej: ¡Ajaf, ri at Rumáma can ri rey David, tajoyovaj noch! Ri val-xtan c'o jun itziel espíritu riq'uin, y can altíra nu'on sufrir pa ruk'a'. 23Pero ri Jesús man xch'o' ta cha ri ixok. Y ri discípulos xa'jiel-apa riq'uin ri Jesús y xqui'ej cha: Ta'ej cha ri ixok re' chi tic'ujie' can, ruma patanak chikij y can altíra nisiq'uin nich'o'. 24Y ri Jesús xu'ej: Inre' xitak-pa jo'c quichin ri israelitas, ri inche'l ri ovejas ri i-sachnak can, xcha'. 25Can ja xpa ri ixok y xalxuquie' choch, y xu'ej cha: ¡Ajaf, quinato'! xcha'. 26Ri Jesús xu'ej cha ri ixok: Man otz ta nic'an-el ri qui-simíta ri ac'ola' y niyo'x chica ri tz'e'. 27Y ri ixok xu'ej: Ajaf, can ketzij ri na'ej. Pero ri tz'e' nca'quimol ri rupixq'uil ri simíta ri nca'quitzak-ka ri cajaf choch ri mesa. 28Y ri Jesús xu'ej cha ri ixok: Can altíra acukub'an ac'u'x viq'uin. Can tib'anataj c'a ri navajo', xcha' cha. Y can chupan ri huora re', ri itziel espíritu ri c'o riq'uin ri ral-xtan ri ixok, ja xiel-el. 29Ri Jesús xuya' can ri lugar re' y x'a cierca ri mar Galilea, xjotie' paro' ri ch'iti juyu' ri c'o chire' y chire' xb'atz'uye-ve. 30Y can iq'uiy vinak xa'lka riq'uin, i-quic'amun-pa ri i-jacajic nca'in, ri i-muoy, ri i-miem, ri man otz ta quik'a' y nic'aj chic ri jun-ve chic roch yab'il ntuoc chica. Quinojiel xa'yo'x choch ri Jesús, y quinojiel xa'ru'on sanar. 31Y ruma ri xu'on ri Jesús quiq'uin ri nca'yavaj, ri vinak can xa'chapataj; ruma ri i-miem, nca'ch'o'; ri man otz ta ri quik'a', xa'c'achoj; ri nca'jacajot nca'in, can otz yan chic nca'in; y ri muoy nca'tzu'n yan chic. Rumare' ri vinak can xquiya' ruk'ij ri Ru-Dios ri Israel. 32Y ri Jesús xa'rayuoj ri ru-discípulos y xu'ej chica: Altíra nijoyovaj quivach ri vinak, ruma oxe' k'ij ic'o viq'uin y manak chic ri chica niquitej. Y xa nca'ntak ta el y xa man nca'va' ta el, man nivajo' ta; xa xca'b'atzak pa tak b'ay ruma vi'jal, xcha'. 33Y ri ru-discípulos xqui'ej cha: Chupan va lugar va manak jay. ¿Pache' nakila-pa simíta chi nca'katzuk quinojiel? 34Pero ri Jesús xuc'utuj chica: ¿Jane' (jaro') simíta c'o iviq'uin? Y ijeje' xqui'ej: C'o siete (vuku') simíta y jutz'it ch'itak car, xa'cha' cha. 35Y ri Jesús xu'ej chica ri vinak chi ca'tz'uye-ka pan ulief. 36Y xutz'om ri siete (vuku') simíta y ri car, xuya' tiox b'a' cha ri Dios, xa'ruper y xuya-el chica ri ru-discípulos y ri ru-discípulos xi'quiya' chica quinojiel ri vinak. 37Can quinojiel xa'va' otz y ja'al xnuoj quipan; y xmuol siete (vuku') chacach ri jutak pir ri xu'on suobra. 38Y ri xa'va', jo'c ri achi'a' icaje' mil. Y ri ixoki' y ri ac'ola' ri xa'va' man xa'jilax ta. 39Y antok ri Jesús i-rub'anun chic despedir ri vinak, jaja' xuoc-el chupan ri barco, y x'a c'a jun lugar rub'inan Magdala.

will be added

X\