San Mateo 13

1Chupan ri k'ij re', ri Jesús xiel-el pa jay y xb'atz'uye' chuchi' ri mar. 2Y iq'uiy vinak xquimol-apa-qui' riq'uin. Rumare' jaja' xuoc chupan jun barco y xtz'uye-ka chupan y quinojiel ri vinak xa'c'ujie' chuchi' ri ya'. 3Y jaja' q'uiy kax xu'ej chica y ruyuon riq'uin parábolas (c'amb'al-tzij). Y quire' nu'ej chica: C'o jun ache ri x'a chi xb'aruquiraj ija'tz. 4Y antok ri ache nuquiraj ri ija'tz, c'o ija'tz xa'ka pa b'ay. Y xa'pa ri chicop ri c'o quixic', xquimol-el ri ija'tz. 5Nic'aj chic ija'tz xa'ka chiquicajol ab'aj y chire' xa man q'uiy ta ri ulief c'o, rumare' cha'nin xa'iel-pa ruma man pin ta ri ulief. 6Pero antok xpa ruchuk'a' ri k'ij, xa'yamayo-ka, y ruma man naj ta b'anak-ka ri quixie', mare' xa'chakej-ka cha'nin. 7Y nic'aj chic ija'tz xa'ka chiquicajol tak q'uix. Y antok xa'iel-pa, junan xa'q'uiy quiq'uin ri q'uix, y xa'jiek' chiquicajol ri q'uix. 8Pero nic'aj chic ija'tz xa'ka pan utzulaj ulief, y ja'al xquiya' quivach; c'o ri xquiya' a treinta quivach, c'o ri xquiya' a sesenta y c'o ri xquiya' a cien quivach. 9Ri c'o ruxiquin chi nra'xaj, can tira'xaj ri xin'ej, xcha' ri Jesús. 10Y ri discípulos xa'jiel-apa riq'uin ri Jesús y xqui'ej cha: ¿Karruma riq'uin parábolas (c'amb'al-tzij) ncach'o-ve chiquivach ri vinak? 11Y jaja' xu'ej chica: Chiva ixre' yo'n permiso chi ntina'iej chirij ri reino ri c'o chicaj. Pero chica ri vinak ri man nquinquinimaj ta, man yo'n ta lugar chi niquitamaj. 12Ruma ri c'o riq'uin, can xtiyo'x más cha y can q'uiy xtu'on-ka riq'uin. Pero ri xa man q'uiy ta c'o riq'uin, hasta re' xtalasas-el cha. 13Rumare' nca'ncusaj parábolas (c'amb'al-tzij) antok nquich'o' chica; ruma man nicajo' ta niqui'an entender, mesque niquitz'at y nica'xaj. 14Quire' nu'on cumplir ri tz'ib'an can ruma ri profeta Isaías. Y quire' rutz'ib'an can jaja': Jo'c xtivaxaj y man xti'ka ta pan ive' (man xti'an ta entender) ri xtivaxaj. Choj xtitz'at y man xtiya' ta pa cuenta ri ntitz'at. 15Ruma ri cánima ri vinak re' xa cof rub'anun, y can man ntuoc ta pa quixiquin ri ni'e'x chica. Ijeje' can quiyupun ri quinak'avach, ruma man nicajo' ta nca'tzu'n. Man nicajo' ta nica'xaj ri ni'e'x chica, man nicajo' ta chi ntuoc riq'uin cánima; y can man nicajo' ta niquiya' can ri pecado chi niqui'an ri nivajo' inre', chi nic'ax ri quic'aslien. Quire' nu'ej ri Dios, ri rutz'ib'an can ri Isaías. 16Pero ixre' ri ix nu-discípulos, can ja'al quixquicuot, ruma riq'uin ri inak'avach can ja'al ntitz'at y riq'uin ixiquin can ja'al ntivaxaj. 17Ruma ketzij c'a ni'ej chiva, chi iq'uiy profetas y choj tak vinak ri xa'c'ujie' ojier can tiempo, altíra xcajo' xquitz'at ri ntitz'at ixre' vacame, y man xquitz'at ta el. Xcajo' ta je' xca'xaj ri ntivaxaj ixre' vacame, y man xca'xaj ta el. 18Y ri Jesús xu'ej chica: Tivaxaj ri chica nu'ej ri parábola (c'amb'al-tzij) ri nich'o' chirij ri xb'aruquiraj ri ija'tz. 19Antok jun nra'xaj ri ch'ab'al chirij ri ru-reino ri Dios y man ni'ka ta paro' (man nu'on ta entender), nipa ri itziel y nralasaj-el ri ch'ab'al ri xtic can pa ránima. Jare' ri ija'tz ri xa'ka pa b'ay. 20Ri ija'tz ri xa'ka chiquicajol ab'aj, jare' ri nra'xaj ri ruch'ab'al ri Dios y can altíra niquicuot antok nu'on recibir. 21Pero ruma manak ruxie' ri ruch'ab'al ri Dios riq'uin ránima, rumare' man nilayuj ta niquicuot. Ruma antok nca'pa ri sufrimientos y itziel nitz'iet ruma runiman ri ruch'ab'al ri Dios, cha'nin nitzak. 22Y ri ija'tz ri xa'ka chiquicajol tak q'uix, jare' ri nra'xaj ri ruch'ab'al ri Dios, pero xa ja ri nic'atzin cha k'ij-k'ij choch-ulief, jo'c re' ninataj cha y ni'an maña cha ruma ri b'ayomal. Jare' nib'ano chi nijiek' ri ruch'ab'al ri Dios riq'uin ránima. Rumare' man jun otz xtik'alajin pa ruc'aslien. 23Y ri ija'tz ri xa'ka pan utzulaj ulief, jare' ri nra'xaj y ni'ka paro' (nu'on entender) ri ruch'ab'al ri Dios. Ri ruc'aslien can nik'alajin ja'al, y can nuya' ru-fruto, a cien, a sesenta o a treinta, xcha' ri Jesús. 24Y ri Jesús xu'ej chic jun parábola (c'amb'al-tzij) chiquivach, y xu'ej: Ri reino ri c'o chicaj can junan riq'uin ri xu'on jun ache ri xutic jun utzulaj ija'tz pa rulief. 25Pero chak'a' antok quinojiel nca'var, xalka ri ru-enemigo ri rajaf ri ulief, xalrutica' jun k'ayis rub'inan cizaña chucajol ri trigo ri ticuon can. Y jo'c xalrub'ana' quire', y x'a. 26Y antok xa'b'aq'uiy-pa ri trigo y xuya-pa roch, c'ajare' xk'alajin-pa je' ri cizaña. 27Y ri ru-esclavos ri rajaf ri ulief xa'a riq'uin y xqui'ej cha: Ajaf, ri ija'tz ri xatic pan avulief can otz. Pero vacame c'o cizaña chucajol. ¿Pache' c'a xpa-ve ri ija'tz richin ri cizaña? xa'cha' cha. 28Y ri ache xu'ej chica ri ru-esclavos: Jun nu-enemigo xb'ano re'. Y ri ru-esclavos xqui'ej cha: ¿Navajo' chi nku'a y nakac'uku' ri cizaña? xa'cha' cha. 29Pero ri ache xu'ej chica ri ru-esclavos: Ni, ruma xa ntic'uk ri cizaña, nca'c'ukutaj je' ri trigo. 30Tiya' lugar cha ri cizaña chi junan niq'uiy-pa riq'uin ri trigo, c'a talka-na ri k'ij chi nijuk ri trigo, ruma antok xtalka ri k'ij re', inre' xtin'ej chica ri xca'juku chi tiquimalo' na'ay ri cizaña y chi manuoja tiquib'ana' cha chi niparox; c'ajare' tiquijuku' ri trigo y tiquiyaca', xcha' ri ache. Quire' xu'ej ri Jesús. 31Y ri Jesús xu'ej chic jun parábola (c'amb'al-tzij) chiquivach, y xu'ej: Ri reino ri c'o chicaj can junan riq'uin ri ija'tz richin ri mostaza ri xutic can jun ache pa rulief. 32Ruma mesque ja ri ija'tz richin ri mostaza ri más co'l-oc chiquivach nic'aj chic ija'tz, pero antok niq'uiy, jare' ri más nem ntiel chiquivach ri nic'aj chic k'ayis. Ri mostaza can inche'l jun chie' ntiel antok niq'uiy. Rumare' ri chicop ri c'o quixic' nca'lka y niqui'an quisuoc chuk'a', xcha' ri Jesús. 33Ri Jesús xu'ej chic jun parábola (c'amb'al-tzij) chiquivach, y xu'ej chica: Ri reino ri c'o chicaj xa junan riq'uin ri levadura ri niruma-pa jun ixok y nuya' chupan oxe' medida harina y ri levadura nuquiraj-ri' chupan nojiel. 34Y nojiel ri xu'ej ri Jesús chica ri vinak re', ruyuon riq'uin parábolas (c'amb'al-tzij) xch'o'. Man jun tzij ri xu'ej chica, ri man ta xucusaj parábolas (c'amb'al-tzij); 35chi quire' nu'on cumplir ri ru'e'n can ri jun profeta ri xc'ujie' ojier can tiempo. Quire' rutz'ib'an can: Antok inre' xquich'o', xca'ncusaj parábolas (c'amb'al-tzij). Xtin'ej ri kax ri avan-pa desde xtz'ucutaj-pa ri roch-ulief. Quire' nu'ej ri tz'ib'an can. 36Y antok ri Jesús xa'ru'on-el despedir ri vinak, jaja' xuoc pa jay y ri ru-discípulos xa'jiel-apa riq'uin y xqui'ej cha: Ojre' nakajo' chi atre' na'ej chika ri chica nu'ej ri parábola (c'amb'al-tzij) chirij ri trigo y ri cizaña. 37Y ri Jesús xu'ej chica: Ri ache ri nutic ri utzulaj ija'tz, ja ri Xtak-pa chicaj chi xalax chi'icajol. 38Ri ulief ri pache' xtic-ve ri ija'tz, ja ri roch-ulief. Ri utzulaj ija'tz, ja ri ic'o pa ru-reino ri Dios. Y ri cizaña, ja ri can i-richin ri itziel. 39Y ri enemigo ri xaltico ri cizaña, ja ri diablo. Ri k'ij antok xtijuk ri trigo, re' pa ruq'uisb'al ri tiempo, y ri nca'juku ri trigo, ja ri ángeles. 40Y can inche'l ni'an riq'uin ri cizaña nca'lasas-el y nca'yo'x pa k'ak', can quire' mismo xtib'anataj pa ruq'uisb'al ri tiempo. 41Ri Xtak-pa chicaj chi xalax chi'icajol, xca'rutak ri ru-ángeles chi nca'quimol chupan ri ru-reino quinojiel ri nca'b'ano itziel tak kax y ri niqui'an chica nic'aj chic chi nca'tzak chupan ri pecado. 42Y xca'b'ac'ak chupan ri k'ak'; y chire' xca'uok' y xtiquik'ach'ach'iej coray. 43Y ri choj quic'aslien choch ri Dios, can altíra xca'ch'ich'an inche'l ri k'ij chupan ri ru-reino ri Quitata' Dios. Ri c'o ruxiquin chi nra'xaj, can tira'xaj ri xin'ej. 44Ri reino ri c'o chicaj can junan riq'uin jun tesoro ri mukun can chupan jun ulief, y nirila-pa jun ache. Ri ache re' numuk chic can y altíra niquicuot nitzalaj chirachuoch, nuc'ayij nojiel ri c'o riq'uin, c'ajare' nulok' ri ulief ri pache' mukun-ve can ri tesoro re'. 45Ri reino ri c'o chicaj can junan riq'uin ri nu'on jun ache ri nca'rulok' y nca'ruc'ayij ri perlas. 46Antok niril jun perla ri altíra ja'al y nic'ayix, cha'nin nitzalaj chirachuoch y nuc'ayij nojiel ri c'o riq'uin, y nulok' ri perla re'. 47Ri reino ri c'o chicaj can junan riq'uin jun ya'l ri niyo'x-ka chupan ri mar y nca'ralasaj-pa nojiel quivach car. 48Y antok ri ya'l nojnak chic chi car, nicalasaj-pa y niquic'uaj chuchi-ya', y nca'tz'uye-ka chi nca'quicha'. Ri car i-otz nca'quiya' pa tak chacach, pero ri man i-otz ta xa nca'quic'ak-el. 49Quire' ri xtib'anataj pa ruq'uisb'al ri tiempo. Xca'pa ri ángeles y xca'quicha' ri vinak ri man otz ta rub'anun quic'aslien chiquicajol ri choj rub'anun quic'aslien choch ri Dios. 50Y xca'yo'x chupan ri k'ak', y chire' xca'uok' y xtiquik'ach'ach'iej coray. 51Ri Jesús xu'ej chica ri ru-discípulos: ¿Xi'ka pan ive' (xi'an entender) nojiel ri xin'ej chiva? xcha' chica. Y ri discípulos xqui'ej: Quire' Ajaf, xa'cha'. 52Y jaja' xu'ej chica: Jun ri rata'n chirij ri reino ri c'o chicaj, y rata'n je' ri tz'ib'an can chupan ri ruch'ab'al ri Dios, can junan riq'uin jun rajaf-jay ri nca'b'aralasaj-pa ru-tesoro ri c'o yan tiempo ruyacuon y nca'b'aralasaj-pa je' ri c'a jub'a' oc tiempo tuyac, xcha' ri Jesús. 53Y antok ri Jesús xtanie' c'a chub'ixic ri parábolas (c'amb'al-tzij) re', xuya' can ri lugar re' y x'a. 54Y xalka chupan ri rutanamit pache' xq'uiy-pa jaja', y xuc'ut ri ruch'ab'al ri Dios chupan ri sinagoga. Y ruma ri tzij ri nu'ej, ri vinak can xa'chapataj, y xqui'ej: ¿Pache' c'a ruc'amun-pa ri no'j, y chi nitiquir nca'ru'on milagros? 55¿Man ja ta came va ruc'ajuol ri jun ache carpintero, y ri rutie' María rub'e', y ri i-ruchak' ja ri Jacobo, ri José, ri Simón y ri Judas? 56¿Man ic'o ta c'a quinojiel ri rana' kiq'uin? ¿Pache' c'a xuc'am-pa nojiel ri nu'ej y ri nu'on? nca'cha'. 57Y rumare' ri vinak man xquinimaj ta y xpa quiyoval chirij ri Jesús. Pero jaja' xu'ej chica: Jun profeta jo'c ri pa rutanamit y ri pa rachuoch niqui'an cha chi man jun rakalien, xcha' chica. 58Ri Jesús man q'uiy ta milagros xa'ru'on pa rutanamit, ruma ri vinak xa man xquinimaj ta.

will be added

X\