San Mateo 12

1Chupan ri tiempo re', chupan jun k'ij richin uxlanien, ri Jesús y ri ru-discípulos i-b'anak chupan jun ulief ri ticuon trigo choch. Y ri discípulos nca'quich'up-el ruve' ri trigo y niquitej, ruma ninem quipan. 2Y xa'quitz'at c'a ri achi'a' fariseos, ja xqui'ej cha ri Jesús: Ca'tz'ata' la a-discípulos, ruma xajan chi nca'samaj chupan jun k'ij richin uxlanien, xa'cha' cha. 3Pero ri Jesús xu'ej chica: ¿Manak came ib'anun leer ri tz'ib'an can chirij ri xu'on ri David y ri i-rach'il chupan ri ojier can tiempo antok xnem-pa quipan? 4Ri David xuoc pa rachuoch ri Dios y can ja ri sagrada simíta ri xb'ayo'x-pa cha. Jaja' xuc'ux ri simíta re' y xuya' je' chica ri i-b'anak riq'uin; pero man pecado ta ri xqui'an, mesque ri simíta re' jo'c ri sacerdotes ri nca'c'uxu. 5¿O manak came itz'atuon ri nu'ej chupan ri ley ri xuya' ri Dios cha ri Moisés? Chire' nu'ej chi ri sacerdotes can nca'samaj-ve pa templo ri k'ij richin uxlanien y man xajan ta chi quire' niqui'an ijeje'. 6Pero vacame, ixre' ntitz'at Jun ri c'o más ruk'ij choch ri templo. 7Y ixre' man ta xi'ej chi pecado ri xqui'an ri nu-discípulos, xa ta ivata'n chica nu'ej rutzij ri Dios antok nu'ej: Inre' más nika chinoch chi ntijoyovaj quivach ri vinak, que choch ri chicop ri nqui'quimisaj chi ntiya' chinoch. Quire' nu'ej ri Dios. 8Ri Xtak-pa chicaj chi xalax chi'icajol, Rajaf ri k'ij richin uxlanien, xcha' ri Jesús. 9Y antok ri Jesús xtzalaj-pa, xa'a pa sinagoga. 10Y chiquicajol ri vinak ri quimaluon-qui', c'o jun ache chake'j jun ruk'a'. Y ri vinak re' xquic'utuj cha ri Jesús chi c'o che'l niqui'an acusar: ¿Otz came chi ni'an sanar jun niyavaj chupan jun k'ij richin uxlanien? 11Pero ri Jesús xu'ej chica: ¿C'o ta jun chivach ixre' ri c'o jun ru-oveja ri nitzak-ka chupan jun jul chupan jun k'ij richin uxlanien, nuya' came can chi nic'ujie' can chire', man nralasaj ta pa came? 12Pero jun vinak más rakalien choch jun oveja, rumare' nuc'ul ni'an ri otz chupan jun k'ij richin uxlanien. 13C'ajare' ri Jesús xu'ej cha ri ache ri chake'j jun ruk'a': Tayuku' la ak'a'. Y ri ache xuyuk ri ruk'a', y ja otz xu'on, inche'l ri jun chic ruk'a'. 14Y ri achi'a' fariseos xa'iel chire' chi xb'aquimalo-qui' chi niqui'an pensar chica niqui'an, ruma nicajo' niquiquimisaj ri Jesús. 15Antok ri Jesús xuna'iej ri niqui'an pensar chirij, xiel-el chire'. Y can iq'uiy vinak ri xa'a chirij, y quinojiel ri nca'yavaj nca'ru'on sanar. 16Y xu'on mandar chica quinojiel chi man tiquitzijuoj chi chica jaja'. 17Chi quire' nu'on cumplir ri ru'e'n can ri profeta Isaías. Ri rutz'ib'an can, nu'ej: 18Jare' ri Nu-Siervo ri nucho'n. Inre' altíra nivajo' jaja'; can niquicuot vánima riq'uin. Can xtinya-pa je' Nu-Espíritu paro', y jaja' xtitzijuon chiquivach ri vinak ri man israelitas ta chi nic'atzin jun c'aslien choj. 19Man xtu'on ta ayoval, man xtisiq'uin ta chi nich'o' ruma royoval, ni man xtitzijuon ta ka chirij jaja' mismo chiquivach ri vinak pa tak b'ay. 20Y ri aj ri k'ajnak chic jub'a', jaja' man xtu'on ta cha chi nik'aj. Y xa ri ruc'aslien je' jun vinak inche'l ta jun k'ak' ri jo'c chic seb' nuya', jaja' man xtuchup ta. Y quire' xtu'on-apa, c'a antok xtalka ri k'ij chi jaja' xtu'on juzgar nojiel pa ruchojmil. 21Y ri vinak ri man israelitas ta, jaja' c'a xtiquiyo'iej chi nca'rucol. 22Y xc'amar-pa choch ri Jesús jun ache muoy y miem ri quire' rub'anun ruma c'o jun itziel espíritu riq'uin. Y ri Jesús xralasaj-el ri itziel espíritu re', y ri ache xtzu'n y xch'o'. 23Y quinojiel ri vinak can xa'chapataj y niqui'ej: ¿Man ja ta came va ri Rumáma can ri rey David ri kayo'ien? 24Pero antok ri achi'a' fariseos xca'xaj ri niqui'ej ri vinak chirij ri Jesús, ja xqui'ej: Jaja' nitiquir nca'ralasaj ri itziel tak espíritus xa ruma c'o ri Beelzebú riq'uin, ri quijaval ri itziel tak espíritus. 25Y ri Jesús can rata'n ri niqui'an pensar ri achi'a' fariseos, mare' xu'ej chica: Xa ri vinak richin jun reino ca'ye' grupo niqui'an-ka, nipa ayoval chiquicajol y ri reino re' xa nitzak. Y quire' je' chupan jun tanamet o chupan jun jay, xa ca'ye' grupo niqui'an-ka, nipa ayoval chiquicajol y ri jay re' xa niq'uis. 26Y xa ri Satanás nca'ralasaj ri i-rusamajiel jaja', xa chirij jaja' mismo nu'on-ka ayoval. Y xa quire' nu'on, ruyuon niquiya' can y cha'nin nitzak ri ru-reino. 27Y xa inre' ruma ri ru-poder ri Beelzebú nca'nvalasaj ri itziel tak espíritus, ¿chica xyo'n poder chica ri i-b'anak chivij chi nca'tiquir nca'calasaj itziel tak espíritus? Can ja ri niqui'an ijeje' nik'alajin chi ixre' man ketzij ta ri nti'ej. 28Pero xa inre' nca'nvalasaj ri itziel tak espíritus riq'uin ri Ru-Espíritu ri Dios ri c'o viq'uin, riq'uin re' ntivatamaj chi ri ru-reino ri Dios ya xalka iviq'uin ixre'. 29Y ri nrajo' nu'on alak' pa rachuoch jun ache ri altíra ruchuk'a'; na'ay nuxim, c'ajare' c'o che'l nucanuj-el nojiel ri nrajo' nuc'uaj. 30Ri man viq'uin ta inre' nisamaj-ve, xa chuvij inre' nisamaj-ve. Y ri man nito'n ta vichin, xa jare' ri nituru nojiel ri nca'n'an inre'. 31Y rumare' inre' ni'ej chiva: Nojiel pecado y ri itziel nca'ch'o' chirij ri Dios, c'a nca'an perdonar. Pero jun ri itziel nich'o' chirij ri Espíritu Santo, man ni'an ta perdonar. 32Y chica-na ri itziel nich'o' chirij ri Xtak-pa chicaj chi xalax chi'icajol, c'a ni'an perdonar. Pero ri itziel nich'o' chirij ri Espíritu Santo, man ni'an ta perdonar chupan ri tiempo vacame, ni chupan ri tiempo chakavach-apa. 33O nti'an inche'l jun chie' otz, ri can nuya' utzulaj tak roch, o nti'an inche'l jun chie' ri xa man otz ta, ri roch ri nuya' man otz ta. Ruma jun chie' ja antok nuya' roch nik'alajin chi otz o man otz ta. 34¡Ixre' xa ix inche'l cumatz! ¿Che'l nti'ej ri otz, antok xa ja ri itziel tak kax c'o pan ivánima? Ruma jun vinak ja ri chica c'o pa ránima ri nu'ej. 35Jun utzulaj ache can ja ri utzulaj kax ri nu'ej, ruma jo'c utzulaj tak kax c'o pa ránima. Pero jun ache ri man otz ta, ja ri itziel tak kax ri nu'ej, ruma jare' ri c'o pa ránima. 36Y inre' ni'ej chiva chi antok xtalka ri k'ij richin ri juicio ri nu'on ri Dios, quinojiel ri xa'e'n ri tzij ri manak rakalien, can xca'an juzgar. 37Ri Dios xca'ru'on condenar ri vinak ri itziel nca'ch'o', pero ri otz nca'ch'o', nik'alajin chi choj ri quic'aslien choch ri Dios. 38Y ic'o jujun chiquivach ri achi'a' escribas y ri achi'a' fariseos xa'ch'o-apa cha ri Jesús, y xqui'ej: Maestro, ojre' nakajo' nakatz'at chi na'an jun señal chakavach. 39Pero ri Jesús xu'ej chica: Ri vinak richin ri tiempo vacame altíra i-itziel y man niquinimaj ta ri Dios, rumare' nicajo' chi ni'an jun señal chiquivach chi nquinquinimaj. Pero ri señal ri nicajo' man xtiyo'x ta chica. Xa ja ri xb'anataj riq'uin ri Jonás, ri jun profeta ri xc'ujie' ojier can tiempo, jare' ri señal ri xtiyo'x chica. 40Ruma inche'l ri Jonás xc'ujie' oxe' k'ij y oxe' ak'a' chupan jun nem car, quire' je' ri Xtak-pa chicaj chi xalax chi'icajol xtic'ujie' chuxie-ulief oxe' k'ij y oxe' ak'a'. 41Y antok xtalka ri k'ij richin ri juicio, xca'c'astaj-pa ri vinak aj-Nínive y xtiqui'ej chi man otz ta xqui'an ri vinak ri ic'o vacame, ruma man xquinimaj ta. Ri vinak aj-Nínive jo'c xca'xaj ri ruch'ab'al ri Dios ri xutzijuoj ri Jonás chica, ja xtzalaj-pa cánima riq'uin ri Dios y xqui'an ri nrajo' jaja'. Y vacame inc'o inre' ri c'o más nuk'ij choch ri Jonás. 42Y antok xtalka ri k'ij richin ri juicio, xtic'astaj-pa ri jun reina ri xu'on gobernar ri Sabá y xtu'ej chi man otz ta xqui'an ri vinak ri ic'o vacame. Ruma antok xc'asie' ri jun reina re', altíra naj xpa-ve chi xalra'xaj runo'j ri rey Salomón. Y vacame inc'o inre' ri c'o más nuk'ij choch ri rey Salomón ri xc'ujie' ojier can. 43Antok jun itziel espíritu ntiel-el pa ránima jun vinak, ni'a pa tak lugar chake'j, nucanuj pache' nuxlan-ve, y man jun lugar niril. 44Rumare' nu'ej: Más otz nquitzalaj chic pa ránima ri vinak pache' xiniel-ve-pa, nicha'. Y antok nalka, nalrila' inche'l jun jay man jun c'o chupan, masuon y ja'al b'anun adornar. 45Y ri itziel espíritu re' nca'ruc'am-pa i-siete (ivuku') chic itziel tak espíritus ri más i-itziel, y quinojiel nca'uoc pa ránima ri vinak. Y ri vinak choj-iq'uin nca'b'ac'ujie-ve ri itziel tak espíritus re', más peor nu'on ri ruc'aslien choch ri rub'anun-pa na'ay. Quire' je' xtib'anataj quiq'uin ri vinak ri man otz ta quic'aslien ri ic'o vacame. 46Y ri Jesús c'a nich'o' quiq'uin ri vinak antok xalka ri rutie' y ri i-ruchak'. Ijeje' nicajo' nca'ch'o' cha, pero xa'c'ujie' juviera. 47Y c'o jun ri xu'ej-apa cha ri Jesús: Ri atie' y ri achak' ic'o juviera y nicajo' nca'ch'o' chava, xcha' cha. 48Pero ri Jesús xu'ej cha ri x'e'n-apa quire' cha: ¿Chica ri ntie' y ri nchak'? 49Y ri Jesús xa'ruc'ut c'a cha ruk'a' ri ru-discípulos y xu'ej: Jare' ri ntie' y ri nchak'. 50Ruma quinojiel ri nca'b'ano ri nrajo' ri Nata' ri c'o chicaj, jare' ri ntie', ri vana' y ri nchak', xcha' ri Jesús.

will be added

X\