1 Y antok ri Jesús xuq'uis rub'ixic ri instrucciones chica ri i-doce (cab'alajuj) ru-discípulos, jaja' x'a nic'aj chic tanamet ri ic'o chupan ri Israel, chi nuc'ut y nutzijuoj ri ruch'ab'al ri Dios. 2 Antok ri Juan el Bautista c'o pa cárcel, xra'xaj chirij ri samaj ri nu'on ri Cristo. Mare' xa'rutak-el ica'ye' ru-discípulos riq'uin ri Jesús 3 chi xb'aquic'utuj cha: ¿Atre' ri xtipa o nakayo'iej chic jun? 4 Y ri Jesús xu'ej chica: Quix'in y ti'ej cha ri Juan ri xitz'at y ri xivaxaj-el. 5 Ri muoy nca'tzu'n; ri nca'jacajot nca'in, otz nca'in; ri c'o ri yab'il lepra chiquij, nca'c'achoj; ri man nca'c'axan ta, vacame nca'c'axan; ri quiminaki' nca'c'astaj-pa; y chica ri i-puobra nitzijos ri evangelio. 6 Y ti'ej je' cha chi jun ri can rucukub'an ruc'u'x viq'uin y man nquiruya' ta can, can ja'al tiquicuot, xcha' ri Jesús chica. 7 Y antok ijeje' xa'a, ri Jesús xa'ru'ej utzulaj tak tzij chirij ri Juan el Bautista chiquivach ri vinak ri ic'o chire'. Y quire' ri xu'ej chica: ¿Chica ri xb'a'itz'ata' chupan ri lugar desierto? ¿Jun aj ri nisilos ruma ri cak'iek'? 8 ¿O chica ri xb'a'itz'ata' chire'? ¿Jun ache ri ja'al tak tziak rucusan? Ri achi'a' ri niquicusaj ja'al tak tziak, xa pa tak cachuoch ri reyes nca'c'ujie-ve. 9 Pero ¿chica ri xb'a'itz'ata'? ¿Jun profeta? Quire'. Y ri Jesús xu'ej chic chica: Pero más nem que choch jun profeta. 10 Y chirij c'a ri Juan nich'o-ve ri ruch'ab'al ri Dios ri tz'ib'an can, y nu'ej: Inre' xtintak jun ache na'ay chavach, chi nuchojmij ri ab'iey chavach. Quire' nu'ej ri tz'ib'an can. 11 Can ketzij ni'ej chiva: Chiquicajol ri profetas ri i-alaxnak choch-ulief, man jun más nem choch ri Juan el Bautista. Pero ri más co'l-oc chupan ri reino ri c'o chicaj, más nem choch ri Juan. 12 Xa-jan antok xutz'om-pa samaj ri Juan el Bautista hasta vacame, ri vinak altíra nicajo' nca'uoc chupan ri reino ri c'o chicaj, can niquitej quik'ij chi nca'uoc, y ja ri can niquitej quik'ij y riq'uin nojiel cánima nicajo' nca'uoc, jare' ri xca'uoc. 13 Quinojiel ri profetas ri xa'c'ujie' ojier can tiempo, can c'o xqui'ej can chirij ri ru-reino ri Dios. Y quire' je' b'e'n can chupan ri ru-ley ri Moisés. Pero c'a pa ru-tiempo ri Juan xb'anataj-ve. 14 Xa ixre' ntivajo' ntinimaj ri tz'ib'an can, ri nu'ej chi nipa ri Elías, xa chirij ri Juan ri tz'ib'an can. 15 Ri c'o ruxiquin chi nra'xaj, can tira'xaj ri xin'ej. 16 Pero ¿choj-iq'uin c'a ni'an comparar ri vinak richin ri tiempo vacame? Ri vinak re' xa i-junan quiq'uin ri ac'ola' ri nca'c'ujie' pa tak b'ay, y nca'siq'uin nca'ch'o' chiquivach antok nca'tz'an, 17 y niqui'ej: Xkaxupuj flautas chivach y man xixxajo ta. Xkab'ixaj b'ix richin b'is chivach y man xixuok' ta. Quire' niqui'ej ri ac'ola' chupan ri atz'anien. 18 Ruma antok xalka ri Juan el Bautista, jaja' man xutej ta utzulaj tak te'j ni man xukun ta je' vino. Y ixre' nti'ej chi jaja' c'o itziel espíritu riq'uin. 19 Y vacame xalka ri Xtak-pa chicaj chi xalax chi'icajol, nutej utzulaj tak te'j y nukun je' vino, y ixre' nti'ej chi jo'c va'en nrajo', y nti'ej chi jun k'ab'ariel, qui-amigo ri maloy-impuestos y qui-amigo ri vinak ri aj-b'anoy-pecado. Pero ri runo'j ri Dios can k'alaj pa quic'aslien ri nca'niman richin, xcha' ri Jesús. 20 Ic'o tanamet pache' xu'on-ve q'uiy milagros ri Jesús. Pero ri vinak ri ic'o chupan ri tanamet re' man xtzalaj ta pa cánima riq'uin ri Dios chi niqui'an ri nrajo' jaja'. Rumare' ri Jesús q'uiy kax xu'ej can chiquij. 21 Jaja' xu'ej: ¡Juye' ivach ri ixc'o pa tanamet Corazín! ¡Juye' je' ivach ri ixc'o pa tanamet Betsaida! Ruma xa ta chupan ri tanamet Tiro y Sidón xa'an ta ri milagros ri xa'an chivach, ri ic'o chire' xtzalaj ta pa yan ri cánima riq'uin ri Dios y xqui'an ta ri nrajo' jaja', quicusan ta chic tziak richin b'is, y quiyo'n ta chaj chiquij chi quire' nitz'iet chi nca'b'isuon. 22 Pero inre' ni'ej chiva chi antok xtalka ri k'ij richin ri juicio ri nu'on ri Dios, más nem ri castigo ri xtika pan ive', que choch ri xtiyo'x pa quive' ri aj-Tiro y ri aj-Sidón. 23 Y ri ic'o pa tanamet Capernaum niqui'an pensar chi nca'a chicaj riq'uin ri Dios, pero xa man quire' ta, xa c'a chupan ri infierno xca'b'aka-ve. Ruma xa ta nojiel ri milagros ri x'an chiquivach ijeje', ja ta re' x'an chiquivach ri aj-Sodoma, xquinimaj ta y man ta xa'q'uis. Xa c'a ic'o ta vacame. 24 Pero inre' ni'ej chiva chi antok xtalka ri k'ij richin ri juicio ri nu'on ri Dios, ri ic'o pa tanamet Capernaum más nem ri castigo ri xtika pa quive', que choch ri xtiyo'x pa quive' ri aj-Sodoma. 25 Y chupan ri tiempo re' ri Jesús xu'ej: Tiox b'a' niya' chava Nata' Dios, atre' ri Rajaf ri rocaj y ri roch-ulief, ruma xavavaj ri utzulaj atzij chiquivach ri vinak ri niquina' chi q'uiy cata'n. Xa ja chiquivach ri vinak ri manak-oc cata'n, ri inche'l ac'ola', ri xac'ut ri utzulaj atzij. 26 Can quire' Nata' Dios, ruma jare' ri xavajo' atre', xcha' ri Jesús chupan ri ru-oración. 27 Y jaja' xu'ej je': Ri Nata' Dios nojiel ruyo'n-pa pa nuk'a'. Y man jun chic ta'mayuon in chica inre', xa jo'c ri Nata'. Y man jun je' ta'mayuon chica ri Nata', xa jo'c inre' ri in Ruc'ajuol, y ri choj cha xtinvajo' xtinc'ut-ve inre' xtiratamaj chica ri Nata'. 28 Quixam-pa viq'uin ixvonojiel ri altíra ix-samajnak y ri ixc'o chuxie' ri aka'n, y inre' xquib'ano chiva chi nquixuxlan. 29 Tivuc'uaj c'a ri nu-yugo chirij ive', y tivatamaj c'a chuvij inre' chi ri c'aslien ri vuc'uan inre', can otz nuno'j quiq'uin quinojiel y nub'anun chi manak vakalien. Y can quire' tib'ana' ixre' chi quire' ri ivánima can xtiril uxlanien. 30 Ruma ri nu-yugo inre' man cuesta ta nuc'uax y man al ta ri vaka'n, xcha' ri Jesús.
