1 Y ri Jesús xa'rayuoj ri i-doce (cab'alajuj) ru-discípulos y xuya' autoridad chica chi nca'tiquir nca'calasaj itziel tak espíritus y chi niqui'an sanar nojiel roch yab'il y k'axomal ri ntuoc chica ri vinak. 2 Jare' quib'e' ri doce (cab'alajuj) apóstoles: Ri na'ay ja ri Simón ri ni'e'x je' Pedro cha, y ri Andrés ri quichak'-quinimal-qui' riq'uin ri Simón. Ri Jacobo y ri Juan ri i-ruc'ajuol ri Zebedeo. 3 Ri Felipe, ri Bartolomé, ri Tomás, ri Mateo ri maloy-impuestos, ri Jacobo ri ruc'ajuol ri Alfeo, ri Lebeo ri ni'e'x je' Tadeo cha. 4 Ri Simón ri c'o quiq'uin ri achi'a' ri ni'e'x cananistas chica, y ri Judas Iscariote ri xjacho richin ri Jesús. 5 Y ja ri doce (cab'alajuj) re' xa'rutak-el ri Jesús, y quire' ri instrucciones ri xu'ej-el chica: Man quix'a chupan quib'iey ri vinak ri man israelitas ta. Y man c'a quixuoc pa tak tanamet richin ri Samaria. 6 Xa quix'in na'ay quiq'uin ri israelitas, ri inche'l ri ovejas ri i-sachnak can. 7 Y antok ix-b'anak, can titzijuoj ri ruch'ab'al ri Dios. Ti'ej c'a: Xa cierca chic c'o-ve-pa ri ru-reino ri Dios, quixcha' chica. 8 Qui'b'ana' sanar ri nca'yavaj, y ri c'o ri yab'il lepra chiquij, tib'ana' chica chi sak nu'on can ri qui-cuerpo. Qui'ic'asuoj quiminaki', qui'ivalasaj itziel tak espíritus. Ruma xa sipan chiva chi quire' nti'an, man tic'utuj ivajal ri nti'an. 9 Man c'a tivuc'uaj miera ri b'anun cha oro, ni plata, ni cobre pa tak ximb'al-ipan. 10 Ni man tivuc'uaj i-buolsa antok nquix'a. Man tivuc'uaj jun chic jal itziak; xa jo'c ri icusan. Man tivuc'uaj jun chic par ixajab', ni ich'ame'y. Can man jun kax tivuc'uaj. Ruma ri samajiel can nic'atzin chi nitzuk. 11 Y antok nquixb'aka chupan jun tanamet nem o chupan jun aldea, ticanuj jun vinak otz. Y pa rachuoch jaja' quixc'ujie-ve-ka, y c'aja' antok nquixiel-pa chupan ri tanamet re', c'ajare' xtiya' can ri jay ri pache' xixc'ujie-ve. 12 Y antok nquixuoc chupan ri jay re', qui'b'ana' saludar ri ic'o chupan. 13 Y xa otz chi nquixc'ujie-ka chupan ri jay re', ri paz richin ri Dios can xtika c'a paro'. Pero xa man otz ta, ri paz xa xtitzalaj-pa iviq'uin ixre'. 14 Y xa man nquixqui'an ta recibir y man nicajo' ta nica'xaj ri ruch'ab'al ri Dios ri ntitzijuoj ixre' chica, quixiel-pa chupan ri jay re' o chupan ri quitanamit y titota' can ri pokolaj ri c'o pa tak ivakan chiquivach ri vinak re', chi quire' ticatamaj chi man otz ta ri xqui'an. 15 Inre' ketzij c'a ni'ej chiva, chi antok xtalka ri k'ij richin ri juicio ri nu'on ri Dios, ri vinak richin ri tanamet pache' man xix'an ta recibir, más nem ri castigo ri xtika pa quive', que choch ri xtiyo'x pa quive' ri aj-Sodoma y ri aj-Gomorra. 16 Vacame nquixtak-el, xa ix inche'l ovejas ri nquixb'aka chiquicajol vinak ri inche'l utif. Pero tib'ana' inche'l nu'on ri cumatz; jaja' cha'nin nuna' antok c'o jun patanak. Y tib'ana' je' inche'l nu'on jun paluomix, ruma jaja' man jun itziel nu'on. 17 Can tib'ana' cuenta-ivi' chiquivach ri vinak ri man otz ta nquixquitz'at. Ruma ijeje' xquixquijach pa quik'a' ri autoridades quichin ri tanamet y xquixquich'ey je' pa tak sinagogas. 18 Y xquixquic'uaj chiquivach gobernadores y chiquivach reyes ruma iyo'n ivánima viq'uin, pero ixre' xquixtiquir c'a xquinitzijuoj chiquivach ijeje' y chiquivach je' ri vinak ri man israelitas ta. 19 Antok xquixquijach pa quik'a' ri autoridades, man ti'an preocupar-ivi' ri chica xti'ej chica y ri chica tzij xticusaj chi nquixch'o' chiquivach. Ruma chupan ri misma huora re', ri Dios xtuya-pa chiva ri tzij ri xti'ej-apa. 20 Ruma can ja ri Ru-Espíritu ri Itata' ri c'o chicaj ri xtiyo'n chiva ri chica tzij ri nti'ej-apa. Y man ixre' ta ri xquixch'o'. 21 Y chiquicajol ri quichak'-quinimal-qui', jun chiquivach ijeje' xtujach ri jun chic chi niquimisas, y ri tata'j xca'quijach ri calc'ual chi nca'quimisas, y ri calc'ual xca'palaj chiquij ri quitie-quitata' y xca'quijach chi nca'quimisas. 22 Can quinojiel vinak, itziel xquixquitz'at ruma iyo'n ivánima viq'uin. Pero ri man xtitzalaj ta chirij y xtucoch' nojiel re' hasta el fin, can xticolotaj. 23 Y antok ri vinak chupan jun tanamet nquixqui'an perseguir, quixnumaj jun chic tanamet. Y can ketzij ni'ej chiva chi c'a maja' quixak'ax chupan nojiel tanamet ri ic'o Israel, antok ri Xtak-pa chicaj chi xalax chi'icajol xtipa chic jun b'ay. 24 Man jun discípulo c'o más ruk'ij choch ri ru-maestro. Y man jun samajiel más nem choch ri rajaf. 25 Jun discípulo tiquicuot ruma ntiel inche'l ri ru-maestro, y quire' je' jun samajiel tiquicuot ruma ntiel inche'l ri rajaf. Xa chuva inre' ri Tata'j chi'icajol niqui'ej Beelzebú chuva, can más peor xtiqui'ej chiva ixre'. 26 Pero man tixi'ij-ivi' chiquivach ri xca'b'ano quire' chiva, ruma man jun kax ri man k'alaj ta, ri man ta xtib'ak'alajin-pa. Y man jun kax ri avan-can, ri man ta xtina'ax. 27 Nojiel ri ni'ej chiva pa k'aku'n, can ti'ej pa sakil. Ri ni'e'x chiva pa tak ixiquin, xa paro' ivachuoch titzijuoj chiquivach ri vinak. 28 Man tixi'ij-ivi' chiquivach ri niquiquimisaj ri i-cuerpo, pero ri iv-espíritu man nca'tiquir ta niquiquimisaj. Tixi'ij-ivi' choch ri Jun ri nitiquir nuya' ri iv-espíritu y ri i-cuerpo pan infierno. 29 ¿Man nca'c'ayix ta came ca'ye' ch'itak chicop ri c'o quixic' por jun len cajal? Y mesque ri chicop re' manak-oc cajal, man jun chiquivach ijeje' xtitzak ta pan ulief xa ri Itata' ri c'o chicaj man nrajo' ta. 30 Y hasta ri ive' i-jilan nojiel. 31 Mare' man tixi'ij-ivi'; ixre' más ivakalien que chiquivach iq'uiy ch'itak chicop ri c'o quixic'. 32 Y chica-na ri man niq'uix ta nu'ej chi in-runiman, inre' je' man xquiq'uix ta xtin'ej choch ri Nata' ri c'o chicaj chi jaja' vichin inre'. 33 Pero ri nu'ej chi man in-runiman ta, inre' je' xtin'an negar choch ri Nata' ri c'o chicaj. 34 Man ti'an pensar chi inre' xipa chi niya' paz ri choch-ulief. Man quire' ta. Xa vuma inre' xtipa ayoval. 35 Inre' xipa richin chi ri ala' xtipalaj chirij ri rutata'; ri xtan xtipalaj chirij ri rutie'; y quire' je' ri alib'atz xtipalaj chirij ri ralitie'. 36 Ri itziel xca'tz'ato richin jun ri in-runiman inre', can ja mismo ri ic'o riq'uin pa rachuoch. 37 Ri más nca'rajo' ri rutie-rutata' que chinoch inre', man nuc'ul ta chi ntuoc vichin. Ri más nca'rajo' ri ralc'ual que chinoch inre', man nuc'ul ta chi ntuoc vichin. 38 Ri man nutz'om ta y nuc'uaj ri ru-cruz y ni'a chuvij, man nuc'ul ta chi ntuoc vichin inre'. 39 Ri nrajo' ri ruc'aslien vave' ri choch-ulief, man xticolotaj ta. Pero ri jun, mesque niquimisas vuma inre', can xtiril ri c'aslien ri man niq'uis ta. 40 Ri jun c'a ri nquixru'on recibir ixre', can inre' ri nquiru'on recibir; y ri xquiru'on recibir inre', can nu'on recibir ri takayuon-pa vichin. 41 Ri ja'al nu'on recibir jun profeta, ruma can profeta, can junan ruc'axiel xtiyo'x cha riq'uin ri profeta. Y ri nu'on recibir ja'al jun ri choj ruc'aslien choch ri Dios, ruma can choj ruc'aslien choch ri Dios, can junan ruc'axiel xtiyo'x cha riq'uin ri choj ruc'aslien choch ri Dios. 42 Y chica-na ri nuya' jun vaso ya' ch'ich' cha jun nu-discípulo ri manak-oc ruk'ij, can ketzij ni'ej chiva; chi can c'o ruc'axiel xtiyo'x cha. Quire' ri xu'ej ri Jesús.
