San Marcos 9

1Y ri Jesús xu'ej je' chica ri ic'o riq'uin: Can ketzij ri ni'ej chiva, chi ic'o jujun chivach ixre' ri man xca'con ta yan, c'a xtiquitz'at-na ri ru-reino ri Dios ri xtipa riq'uin poder, xcha' ri Jesús. 2Y antok k'axnak chic vaki' k'ij, ri Jesús xa'rucha' ri Pedro, ri Jacobo y ri Juan, y xa'ruc'uaj c'a ri iyoxe' re' paro' jun juyu' nem. Y ri Jesús xc'axtaj rutzub'al chiquivach. 3Y ri rutziak can xch'ich'an. Can altíra sak xu'on, can inche'l ri hielo ri nika. Y man jun vinak ri nich'ajo tziak nitiquir nu'on sak cha jun tziak inche'l re'. 4Y antok ri iyoxe' discípulos xquitz'at, ic'o yan chic ri Elías y ri Moisés, nca'tzijuon riq'uin ri Jesús. 5Y ri Pedro xu'ej cha ri Jesús: Maestro, otz chi ojc'o vave' ojre', naka'an oxe' ch'itak enramadas, jun avichin atre', jun richin ri Moisés y jun richin ri Elías. 6Ri Pedro quire' xu'ej, pero man rata'n ta ri chica nca'ru'ej, ruma altíra xquixi'ij-qui'. 7Y jare' antok jun mukul xka-pa pa quive'. Y chupan ri mukul re', c'o Jun ri xch'o-pa y xu'ej: Jare' ri Nuc'ajuol y altíra nivajo'. Can tivaxaj ri nu'ej jaja'. 8Y antok ri discípulos xa'tzu'n chic apa, xquitz'at chi xa man jun chic c'o riq'uin ri Jesús. Xa ruyuon chic c'o can. 9Y antok ijeje' i-xulan-pa choch ri juyu', ri Jesús xu'on mandar chica ri ru-discípulos: Man jun choj cha ti'ej ri xitz'at. Otz nti'ej pero c'a antok ri Xtak-pa chicaj chi xalax chi'icajol ya c'astajnak chic pa chiquicajol ri quiminaki', xcha' chica. 10Y ijeje' man xquitzijuoj ta ri chica xquitz'at, pero niquic'utuj chiquivach ri chica xrajo' xu'ej ri Jesús antok xu'ej chi xtic'astaj chic pa chiquicajol ri quiminaki'. 11Y ri discípulos xquic'utuj cha ri Jesús: ¿Karruma niqui'ej ri achi'a' escribas chi nic'atzin chi ja ri Elías nipa na'ay? xa'cha'. 12Y ri Jesús xu'ej chica: Can ketzij chi ri Elías nipa na'ay y nalruchojmij nojiel ri nic'atzin chi nichojmix. ¿Man xtib'anataj ta came ri tz'ib'an can chupan ri ruch'ab'al ri Dios chirij ri Xtak-pa chicaj chi xalax chi'icajol, chi nuk'asaj q'uiy sufrimientos, y man jun ruk'ij xti'an cha? 13Pero inre' ni'ej chiva chi ri Elías ya xpa, y ri vinak can xqui'an cha nojiel ri xcajo' xqui'an cha, can inche'l ri tz'ib'an can chirij chupan ri ruch'ab'al ri Dios, xcha' ri Jesús chica. 14Antok ri Jesús y ri iyoxe' discípulos ya cierca chic ic'o-ve chi nca'lka quiq'uin ri nic'aj chic discípulos, jaja' xutz'at chi altíra iq'uiy vinak ri quimaluon-qui' chiquij, y nic'aj achi'a' escribas quitz'amuon-qui' chi tzij quiq'uin ri discípulos. 15Quinojiel ri vinak, antok xquitz'at chi patanak ri Jesús, can xa'chapataj, y jun-anin xb'aquic'ulu' y xqui'an saludar. 16Y ri Jesús xuc'utuj chica: ¿Choj chirij itz'amuon-ve-ivi' quiq'uin ijeje'? xcha' chica. 17Jun chiquivach ri vinak xu'ej cha ri Jesús: Maestro, inre' nuc'amun-pa ri nuc'ajuol aviq'uin, ruma c'o jun itziel espíritu riq'uin ri miem rub'anun cha. 18Y antok más nuya' ruchuk'a' chirij, pache' na c'o-ve nuquiyica' ri ru-cuerpo, ntiel ruvakuol pa ruchi', y nuk'ach'ach'iej roray. Altíra je' nu'on chie-chie' cha. Y rumare' xin'ej chica ri a-discípulos chi tiquilasaj-el ri itziel espíritu re' riq'uin ri nuc'ajuol, pero man xa'tiquir ta, xcha' ri ache. 19Y ri Jesús xu'ej chica: ¡Man jun vinak chupan ri tiempo vacame ruyo'n ta ránima riq'uin ri Dios! ¿Ixre' nti'an pensar chi inre' nojiel k'ij xquic'ujie' iviq'uin? ¿Y jane' (jaro') tiempo xquixcoch'? Tic'ama-pa ri ala', xcha' ri Jesús. 20Y xc'amar-pa ri ala' c'a choch ri Jesús. Pero antok ri itziel espíritu xutz'at ri Jesús, riq'uin ruchuk'a' xuch'ikila' ri ala' y xutzak pan ulief. Y ri ala' nub'olkotila-ri' y ntiel je' ruvakuol pa ruchi'. 21Y ri Jesús xuc'utuj cha ri rutata' ri ala': ¿Jane' (jaro') tiempo rub'anun-pa quire' ri ala'? xcha' ri Jesús cha. Y ri rutata' ri ala' xu'ej: Xa-jan c'a ac'ual quire' rub'anun-pa cha. 22Q'uiy mul rutzakuon pa k'ak', y pa ya', chi nuquimisaj. Pero xa atre' ncatiquir na'an jun kax, tajoyovaj kavach y kojato', xcha'. 23Pero ri Jesús xu'ej cha ri rutata' ri ala': Xa atre' nanimaj chi nquitiquir nito' ri ac'ajuol, can xtib'anataj. Ruma xa jun nunimaj ri nuc'utuj, can nib'anataj ri chica ri nrajo', xcha' ri Jesús. 24Y cha'nin ri rutata' ri ala' riq'uin ruchuk'a' xch'o' y xu'ej: Ninimaj. Y quinato' je' chi quire' más ninimaj, xcha'. 25Antok ri Jesús xutz'at chi ri vinak más niquimol-ka-qui', xch'olin cha ri itziel espíritu. Jaja' xu'ej cha: Atre' espíritu miem y xuorta, inre' ni'an mandar chava chi catiel-el riq'uin ri ala', y man chic catzalaj-pa riq'uin, xcha' cha. 26Y ri itziel espíritu nisiq'uin, y xuch'ikila' ri ala' xiel-el. Y ri ala' xpoq'uie' can pan ulief, inche'l quiminak xu'on can. Y rumare' iq'uiy vinak xqui'ej: Ri ala' xcon. 27Pero ri Jesús xutz'om ruk'a' ri ala' chi xupab'a'. Y ri ala' can ja xpalaj-pa. 28Y antok ri Jesús xuoc pa jay, ri ru-discípulos xquic'utuj cha quiyuon: ¿Karruma ojre' man xojtiquir ta xkalasaj-el ri itziel espíritu? 29Y ri Jesús xu'ej chica: Ri jun clase espíritu re' man jun choj cha ntiel-el, jo'c riq'uin ayuno y oración sí ntiel-el, xcha' chica. 30Y antok ijeje' ya i-alanak chic pa chire', xa'k'ax chupan Galilea. Pero ri Jesús man xrajo' ta chi nina'ax chi jaja' nak'ax chire'. 31Ruma jaja' nrajo' chi nicatamaj ri ru-discípulos, rumare' nu'ej chica: Ri Xtak-pa chicaj chi xalax chi'icajol can xtijach pa quik'a' ri vinak y xtiquiquimisaj. Pero antok quiminak chic, chi oxe' k'ij xtic'astaj-pa chiquicajol ri quiminaki'. 32Pero ri discípulos xa man xi'ka ta pa quive' (man xqui'an ta entender) ri x'e'x chica. Y niquixi'ij-qui' niquic'utuj cha. 33Y ri Jesús y ri ru-discípulos xa'b'aka pa tanamet Capernaum. Y antok ic'o chic pa jay, jaja' xuc'utuj chica ri ru-discípulos: ¿Chica ri nti'ej chivach antok oj-patanak pa b'ay? xcha' chica. 34Pero ri discípulos man xa'ch'o' ta apa cha ri Jesús, ruma antok i-patanak ri pa b'ay, xa niqui'ej chiquivach ri chica xtuoc nem chiquivach ijeje'. 35Y ri Jesús xtz'uye-ka y xa'rayuoj-apa ri doce (cab'alajuj) discípulos y xu'ej chica: Xa c'o jun ri nrajo' chi jaja' ri na'ay, can tub'ana' ri ruq'uisb'al y ca'rub'ana' servir quinojiel. 36Y ri Jesús xb'aruma-pa jun ac'ual y xuya' pa nic'aj. Y xuk'atiej y xu'ej chica ri ru-discípulos: 37Ri nu'on recibir jun ac'ual inche'l va pa nub'e', can nquiru'on recibir inre'. Y ri nquiru'on recibir inre', man jo'c ta inre' ri nquiru'on recibir, xa can nu'on je' recibir ri takayuon-pa vichin. 38Ri Juan xu'ej cha ri Jesús: Maestro, c'o jun ache xkatz'at, ri pan ab'e' atre' nca'ralasaj itziel tak espíritus. Pero ruma xa man kach'il ta, mare' xka'an prohibir cha. 39Pero ri Jesús xu'ej: Man ti'an prohibir cha. Ruma xa pa nub'e' inre' nca'ru'on milagros, man cha'nin ta xtuc'ax runo'j y después xtu'ej ta itziel tak tzij chuvij. 40Ruma ri man royoval ta chikij, can kiq'uin ojre' c'o-ve. 41Y chica-na ri nuya' jun vaso iya' pa nub'e' inre', ruma ixc'o viq'uin inre' ri Cristo, can ketzij ni'ej chiva; chi can c'o ruc'axiel xtiyo'x cha. 42Xa c'o ta jun ri in-runiman mesque manak-oc ruk'ij y nipa jun chic vinak y nu'on cha ri jun re' chi nitzak, ri nib'ano quire' más otz nixim jun nem ab'aj (ca') chukul y nic'ak chupan ri mar. 43Xa jun ak'a' ri nib'ano chava chi ncatzak, más otz takupij-el. Ruma más otz jun oc ak'a' c'o ncatuoc chupan ri c'aslien ri man niq'uis ta, que c'o ca'ye' ak'a' y xa nca'a chupan ri infierno; chupan ri k'ak' ri man nichup ta, 44ri pache' ic'o jut ri man nca'con ta ri quichin ri ic'o chire', y ri k'ak' can man nichup ta. 45Y xa jun avakan ri nib'ano chava chi ncatzak, más otz takupij-el. Ruma más otz jun oc avakan c'o ncatuoc chupan ri c'aslien ri man niq'uis ta, que c'o ca'ye' avakan y xa ncayo'x chupan ri infierno; chupan ri k'ak' ri man nichup ta, 46ri pache' ic'o jut ri man nca'con ta ri quichin ri ic'o chire', y ri k'ak' can man nichup ta. 47Y xa jun anak'avach ri nib'ano chava chi ncatzak, más otz tavalasaj-el. Ruma más otz jun oc anak'avach c'o ncatuoc chupan ri ru-reino ri Dios, que c'o ca'ye' anak'avach y xa ncayo'x chupan ri infierno, 48ri pache' ic'o jut ri man nca'con ta ri quichin ri ic'o chire', y ri k'ak' can man nichup ta. 49Antok nca'yo'x ri chicop choch ri Dios, yo'n atz'an chiquij. Quire' je' xti'an chica ri vinak, pero man chic cha ta atz'an, xa cha k'ak'. 50Ri atz'an, can otz. Pero xa ri atz'an niq'uis-el ri rutzayal, ¿chica ta nti'an chi nitzalaj chic pa rutzayal ri atz'an? Rumare' tib'ana' cuenta ri ic'aslien, chi quire' man nquixuoc ta inche'l ri atz'an ri manak chic rutzayal, y man jun ta ayoval chi'icajol. Quire' xu'ej ri Jesús.

will be added

X\