San Marcos 7

1Y chirij ri Jesús xquimol-qui' ri achi'a' fariseos, y nic'aj achi'a' escribas ri i-patanak Jerusalén. 2Y ri achi'a' re' xa'quitz'at chi ic'o chiquivach ri ru-discípulos ri Jesús ri man niquich'aj ta quik'a' antok nca'va'. Chiquivach ijeje' man sak ta quik'a'. Y rumare' man otz ta ri xqui'ej chiquij, ruma man niqui'an ta inche'l niqui'an ijeje'. 3Ruma ri achi'a' fariseos y quinojiel ri nic'aj chic vinak israelitas, xa ja ri b'e'n can cuma ri cate't-quimama', xa jare' ri nca'qui'an. Ruma xa man niquich'aj ta quik'a' q'uiy mul, ja man nca'va' ta. 4Y antok nca'tzalaj-pa pa q'uiyi'al, xa man niquijosk'ij ta qui' inche'l ri b'e'n can, man nca'va' ta. Y ic'o nic'aj chic kax ri niqui'an je'; inche'l antok niquich'aj ri vasos ri richin niquikun quiya' chupan, ri xára, ri lak ri b'anun cha ch'ich' y hasta ri quich'at quire' niqui'an cha. 5Rumare' ri achi'a' fariseos y ri achi'a' escribas xquic'utuj cha ri Jesús: ¿Karruma ri a-discípulos man niqui'an ta inche'l ri b'e'n can cuma ri kate't-kamama', ruma antok nca'va' xa man niquich'aj ta quik'a'? 6Pero ri Jesús xu'ej chica ri achi'a' re': Ixre' xa ca'ye' ipalaj. Xa otz rub'ixic ru'e'n can chivij ri profeta Isaías. Ri xutz'ib'aj can, quire' nu'ej: Ri vinak re' jo'c riq'uin ri quichi' niquiya' nuk'ij, pero ri cánima xa naj c'o-ve. 7Xa man jun nic'atzin ri niqui'an antok niquiya' nuk'ij, nojiel ri nca'qui'ej antok nca'quitijuoj ri vinak, xa quino'j achi'a' y niqui'ej chi can jare' ti'an. Quire' ri rutz'ib'an can ri Isaías. 8Ixre' xa iyo'n can jun lado ri ru-mandamiento ri Dios. Xa ja ri tradición ri nti'an, che'l antok ntich'aj ri xára y ri vasos ri richin ntikun iya' chupan. Y nic'aj chic kax inche'l re' ri nti'an. 9Y ri Jesús xu'ej je' chica: Ixre' jo'c ri quic'utun can ri ivate't-imama' ri nti'an, rumare' ib'anun cha ri ru-mandamiento ri Dios chi man jun rakalien. 10Ruma ri ru-mandamiento ri Dios ri i-rutz'ib'an can ri Moisés, nu'ej: Ca'b'ana' respetar ri atie-atata'. Y jun ri nca'rukal ri rutie-rutata', tiquimisas; man tijoyovax roch. Quire' ri tz'ib'an can. 11Pero ixre' nti'ej: Basta chi jun ache nu'ej cha ri rutata' o cha ri rutie': Inre' manak che'l nquixto', ruma nojiel ri c'o viq'uin xa Corbán (ri tzij Corbán nrajo' nu'ej: Nuyo'n chic cha ri Dios). 12Y riq'uin ri nti'ej, can k'alaj chi ixre' nti'an chica ri achi'a' chi man jun chic kax tiquiya' chica ri quitie-quitata'. 13Riq'uin re', ixre' xa man jun rakalien ib'anun cha ri ruch'ab'al ri Dios. Ruma jo'c ri quic'utun can ri ivate't-imama', jo'c re' ntivajo' nti'an. Y ic'o je' nic'aj chic kax inche'l re' ri nti'an. 14Y ri Jesús xa'rayuoj-apa quinojiel ri vinak ri quimaluon-qui' chire' y xu'ej chica: Tivaxaj otz ixvonojiel ri xtin'ej chiva y ti'ka pan ive' (tib'ana' entender). 15Ri nib'ano tz'il cha jun vinak man ja ta ri kax ri nca'rutej-ka. Ri nib'ano tz'il cha jun vinak, ja ri itziel kax ri nca'iel-pa riq'uin. 16Ri c'o ruxiquin chi nra'xaj, can tira'xaj ri xin'ej. Quire' xu'ej ri Jesús chica ri vinak. 17Y jaja' xa'ruya' can ri vinak, y x'a chupan jun jay. Y ri ru-discípulos xquic'utuj cha ri chica nu'ej ri parábola (c'amb'al-tzij) re'. 18Y ri Jesús xu'ej chica: ¿Ixre' je' man ni'ka ta pan ive' (man nti'an ta entender) ri xin'ej? ¿Man ni'ka ta pan ive' (man nti'an ta entender) chi man ja ta ri nutej-ka jun vinak ri nib'ano tz'il cha? 19Nojiel ri nutej-ka jun vinak, xa man pa ránima ta ni'a-ve. Xa chupan nika-ve-ka, y después ntiel-el. Y ruma ri quire' xu'ej ri Jesús, nik'alajin chi nojiel ri nca'tij, can i-otz. 20Y ri Jesús xu'ej je' chi ja ri itziel kax ri nca'iel-pa riq'uin jun vinak, jare' ri nib'ano tz'il cha. 21Ruma xa pa cánima ri vinak nca'iel-pa ri itziel tak kax ri niqui'an pensar, ri i-c'ulan y ri man i-c'ulan ta niquicanuj-qui' chi niqui'an pecado, ri nca'quimisan, 22ri nca'lak', ri niquirayij chi nojiel ri c'o choch-ulief can ta quiq'uin ijeje' c'o-ve, ri itziel quino'j, ri niqui'an maña, ri achi'a' y ri ixoki' ja ri nurayij ri qui-cuerpo ri niqui'an, ri itziel niquitz'at jun vinak ri otz c'o, ri nca'qui'ej itziel tak tzij chiquij nic'aj chic, ri niquina' chi can altíra i-nima'k, y ri man niqui'an ta pensar otz. 23Nojiel ri itziel tak kax re', riq'uin ránima ri vinak ntiel-pa, y jare' ri nib'ano tz'il cha. Quire' xu'ej ri Jesús. 24Ri Jesús xiel-el chire', y x'a c'a chupan jun lugar cierca ri tanamet quib'inan Tiro y Sidón. Y xc'ujie' chupan jun jay. Ri Jesús man nrajo' ta chi nina'ax chi c'o chire'. Pero man xtiquir ta xravaj-ri'; 25xa xuna'iej jun ixok ri c'o jun ral-xtan, ri c'o jun itziel espíritu riq'uin, chi ri Jesús c'o chire', y jaja' xpa c'a riq'uin y xalxuquie' chukul rakan. 26Ri jun ixok re' man israelita ta. Jaja' jun aj-Sirofenicia. Pero xalxuquie' chukul rakan ri Jesús chi xuc'utuj favor cha chi talasaj-el ri itziel espíritu riq'uin ri ral. 27Pero ri Jesús xu'ej cha ri ixok: Taya' chi na'ay nca'va' ri israelitas. Ruma man otz ta nic'an-el ri qui-simíta ri ac'ola' y niyo'x chica ri tz'e'. 28Ri ixok xu'ej cha ri Jesús: Ajaf, can ketzij ri na'ej. Pero ri tz'e', chuxie' ri mesa, nca'quimol ri rupixq'uil ri simíta ri nca'quitzak-ka ri ac'ola'. 29Y ri Jesús xu'ej c'a cha ri ixok: Riq'uin ri xa'ej, vacame catzalaj chavij, ruma ri itziel espíritu ya xiel-el riq'uin ri aval, xcha' ri Jesús. 30Y antok ri ixok xtzalaj chirachuoch, xutz'at chi ri itziel espíritu man c'o ta chic riq'uin ri xtan, y ri xtan choj catz'ol choch ruch'at. 31Ri Jesús xiel-el chupan ri lugar ri cierca ri tanamet Tiro y xak'ax Sidón. Y xak'ax je' chupan ri lugar rub'inan Decápolis, y quire' xalka chuchi' ri mar Galilea. 32Chire' c'o-ve antok xc'amar-pa jun ache choch, jun ache ri man nac'axan ta y man nich'o' ta otz. Y ri i-c'amayuon-pa richin, xquic'utuj favor cha ri Jesús chi tuya' ruk'a' paro'. 33Y ri Jesús xralasaj-el ri ache chiquicajol ri vinak, xuju' ruve-ruk'a' pa tak ruxiquin, xchub'an, y xutz'om ri rak'. 34Y ri Jesús xtzu'n c'a chicaj, xjilo y xu'ej: Efata. Ri tzij Efata nrajo' nu'ej: Tijakataj. 35Y ri ache can ja xc'axan y xch'o' otz. 36Y ri Jesús xu'on mandar chica ri vinak chi man tiquitzijuoj ri xb'anataj. Pero antok jaja' quire' xu'ej chica ri vinak, ijeje' xa más niquitzijuoj. 37Ri vinak re' altíra xa'chapataj antok xquitz'at ri xb'anataj, y niqui'ej: Can ja'al ri nca'ru'on. Nu'on chica ri man nca'c'axan ta chi nca'c'axan; y nu'on je' chica ri miem chi nca'ch'o', nca'cha'.

will be added

X\