San Marcos 5

1Y ri Jesús y ri ru-discípulos xa'b'aka ri juc'an chic ruchi' ri mar, chupan ri lugar rub'inan Gadara. 2Y antok ri Jesús xiel-pa chupan ri barco, can ja xalka jun ache riq'uin, ri pa cementerio alanak-ve-pa, ri c'o itziel espíritu riq'uin. 3Ri ache re' ja ri cementerio ri acunak rachuoch, y man jun nitiquir chirij, hasta riq'uin cadena (yariena) man i-tiquirnak ta chirij. 4Ruma q'uiy mul quiyo'n cadena (yariena) y nic'aj chic ch'ich' chirij ri ruk'a-rakan, pero i-ruk'ochpin, i-ruk'ajuon nojiel. Can man jun tiquirnak chirij. 5Chi pak'ij chi chak'a' siempre nib'iej pa tak juyu' y pa cementerio, nurak ruchi' y nusocola-ri' cha ab'aj. 6Y antok jaja' xutz'at-pa ri Jesús chi-naj, xpa anin y xalxuquie' choch. 7Y riq'uin ruchuk'a' xch'o' cha ri Jesús y xu'ej: ¿Chica navajo' chuva Jesús ri Ruc'ajuol ri Namalaj Dios? Pa rub'e' ri Dios nic'utuj chava, man quinach'ujirisaj, xcha' cha ri Jesús. 8Ri ache xu'ej quire' ruma ri Jesús ru'e'n chic cha ri itziel espíritu ri c'o riq'uin chi tiel-el. 9Y ri Jesús xuc'utuj cha: ¿Che'l ab'e'? Y jaja' xu'ej-pa: Legión nub'e'; ruma oj q'uiy, xcha'. 10Y can altíra xuc'utuj c'a favor cha ri Jesús chi man ca'ralasaj-el chupan ri lugar re'. 11Y cierca-apa ri lugar re', paro' jun juyu', iq'uiy ak nca'va'. 12Y quinojiel ri itziel tak espíritus ri ic'o riq'uin ri ache xquic'utuj favor cha ri Jesús, y xqui'ej cha: Taya' permiso chika chi nkojuoc quiq'uin ri ak re', xa'cha'. 13Ri Jesús xuya' permiso chica. Y ri itziel tak espíritus ja xa'iel-el y xa'b'a'uoc quiq'uin ri ak. Ri ak re' ica'ye' mil. Y quinojiel ri ak re' jun-anin xa'b'axulie-pa choch jun juyu' can pa'l-roch, y c'a chupan ri mar xa'b'aka-ve; y chire' xa'jiek'-ve quinojiel ri ak re'. 14Y ri nca'chajin quichin ri ak xa'numaj, y xb'aquitzijuoj ri xb'anataj pa tanamet y pa tak avan. Y ri vinak xa'pa c'a chi nalquitz'ata' ri chica xb'anataj. 15Y antok ri vinak re' xa'lka riq'uin ri Jesús, xquitz'at chi ri ache ri xc'ujie' ri jun legión (6,000) itziel tak espíritus riq'uin; tz'uyul, rucusan rutziak y man nu'on ta chic c'a ri inche'l rub'anun-pa. Rumare' ri vinak xa xquixi'ij-qui'. 16Y ri vinak ri xa'tz'ato ri xb'anataj riq'uin ri ache ri xa'lasas-el ri itziel tak espíritus riq'uin y ri xb'anataj quiq'uin ri ak, xquitzijuoj c'a chica ri nic'aj chic vinak ri i-patanak chutz'atic ri xb'anataj chire'. 17Y ruma c'a re' quinojiel ri vinak xquic'utuj favor cha ri Jesús chi tiel-el chire' chupan ri qui-lugar. 18Antok ntuoc-oc ri Jesús chupan ri barco, ri ache ri xa'c'ujie' itziel tak espíritus riq'uin, nuc'utuj favor cha ri Jesús chi ni'a riq'uin. 19Pero ri Jesús man xrajo' ta. Xa xu'ej cha: Ca'in chavachuoch y atzijuoj chica ri avach'alal ri nem samaj ri xu'on ri Ajaf aviq'uin, y che'l xjoyovax avach. 20Y ri ache x'a c'a, y xutz'om rutzijoxic chupan ri lugar rub'inan Decápolis, ri nem samaj ri xu'on ri Jesús cha, y ri vinak can altíra xa'chapataj. 21Y ri Jesús xuoc chic chupan ri barco chi xak'ax juc'an chic ruchi' ri mar. Y antok xalka, altíra iq'uiy vinak ri xquimol-qui' chirij. Jaja' chuchi' ri mar xc'ujie-ve. 22Y xalka jun ache rub'inan Jairo, ri jun principal chupan ri sinagoga. Y antok xutz'at-apa ri Jesús, ja xb'axuquie' chukul rakan, 23y altíra xu'on rogar choch ri Jesús y xu'ej cha: Ri numi'al niyavaj y ya nicon. Catam-pa y ta'ya' ri ak'a' paro' chi nu'on sanar y can xtic'asie', xcha' ri ache. 24Y ri Jesús can x'a c'a riq'uin ri ache, y iq'uiy vinak xa'a chirij, rumare' niquipitz' ri Jesús i-b'anak. 25Pero jun ixok ri c'o doce (cab'alajuj) juna' ri ntiel ruquiq'uiel y man nitanie' ta, ruma jun yab'il, 26altíra rub'anun-pa sufrir ruma b'anak quiq'uin q'uiy doctores, y ya xuq'uis nojiel ri ru-miera y man jun otz ranun cha, xa más peor ranun cha. 27Ri ixok re' raxan-pa chirij ri milagros ri nca'ru'on ri Jesús y b'anak chiquicajol ri vinak ri i-b'anak chirij ri Jesús. Jaja' xjiel-apa chirij ri Jesús y xutz'om-apa ri rutziak, 28ruma nu'ej pa ránima: Xa ta riq'uin nitz'om-apa jub'a' ri rutziak, ja ni'an sanar. 29Y cha'nin xtanie' ri ruquiq'uiel ri ntiel. Y xuna' chi xu'on sanar riq'uin ri ruyab'il. 30Ri Jesús can cha'nin xuna' chi c'o jun xu'on sanar ruma ri poder ri xiel riq'uin; rumare' xtzu'n can chirij, y xu'ej chica ri vinak: ¿Chica xtz'amo ri nutziak? 31Y ri ru-discípulos xqui'ej cha: Natz'at chi iq'uiy vinak ncatquipitz' y atre' na'ej: ¿Chica xitz'amo? xa'cha' ri discípulos cha ri Jesús. 32Pero ri Jesús nca'ruca'yiej ri vinak, chi nucanuj ri chica xtz'amo ri rutziak. 33Ri ixok ruxi'in-ri' y nib'arb'uot, ruma rata'n chi xu'on sanar riq'uin ri ruyab'il, xpa c'a y xalxuquie' choch ri Jesús y xu'ej c'a cha nojiel ri xu'on. 34Y ri Jesús xu'ej cha: Numi'al, xac'achoj ruma xacukub'a' ac'u'x viq'uin. Vacame ca'in en paz. Ri ayab'il man chic xtitzalaj ta pa, xcha' cha. 35Y c'a nitzijuon ri Jesús riq'uin ri ixok, antok xa'lka nic'aj ri i-patanak chirachuoch ri ache principal chupan ri sinagoga. Ijeje' xalqui'ej cha ri ache principal: Ri ami'al ya xcon, man chic ta'an molestar ri Maestro. 36Pero ri Jesús xra'xaj ri niqui'ej, y xu'ej cha ri jun principal chupan ri sinagoga: Man taxi'ij-avi', jo'c tanimaj, xcha' cha. 37Y ri Jesús man xu'on ta permitir chi xa'a nic'aj chic chirij, xa jo'c ri Pedro, ri Jacobo y ri Juan ri quichak'-quinimal-qui' riq'uin ri Jacobo. 38Y antok xa'b'aka chirachuoch ri jun principal chupan ri sinagoga, ri Jesús xa'rutz'at chi ri vinak nca'ch'ujuyan pa jay, can altíra nca'uok' y altíra nca'b'isuon. 39Antok ri Jesús acunak chic oc pa jay, xu'ej chica: ¿Karruma nquixuok' y nquixch'ujuyan? Ri ch'iti xtan xa man quiminak ta, xa nivar, xcha' chica. 40Pero ijeje' xa xa'tze'n chirij ri Jesús. Pero ri Jesús xa'ralasaj-el juviera quinojiel ri vinak ri ic'o chire', y xa'rucusaj-oc ri rutie-rutata' ri ch'iti xtan y ri iyoxe' chic ri i-b'anak riq'uin, pache' c'o-ve ri ru-cuerpo ri ch'iti xtan. 41Y xutz'om ruk'a' ri ch'iti xtan y xu'ej cha: Talita cumi, xcha'. Ri tzij re' ntiel: Ch'iti xtan, chava atre' ni'ej chi capalaj. 42Can jo'c xu'ej quire' ri Jesús, can ja xpalaj-pa ri ch'iti xtan y x'in, ruma c'o doce (cab'alajuj) rujuna'. Y ri ic'o riq'uin altíra xa'chapataj antok xquitz'at chi xc'astaj chic pa. 43Pero ri Jesús xu'on mandar chica chi man jun choj cha tiquitzijuoj ri xb'anataj, y xu'ej chi tiyo'x ruvay ri ch'iti xtan.

will be added

X\