San Marcos 4

1Y ri Jesús x'a chic chuchi' ri mar y jaja' nca'rutijuoj ri vinak riq'uin ri ruch'ab'al ri Dios. Y iq'uiy vinak ri xquimol-apa-qui' riq'uin. Rumare' jaja' xuoc chupan jun barco ri c'o paro' ri mar y xtz'uye-ka chupan. Y pan ulief chuchi' ri mar ic'o ri vinak. 2Y jaja' q'uiy kax xuc'ut chiquivach ruyuon riq'uin parábolas (c'amb'al-tzij). Jaja' xu'ej chica: 3Tivaxaj ja'al ri xtin'ej chiva: C'o jun ache ri x'a chi xb'aruquiraj ija'tz. 4Y antok ri ache nuquiraj ri ija'tz, c'o ija'tz xa'ka pa b'ay. Y xa'pa ri chicop ri c'o quixic', xquimol-el ri ija'tz. 5Nic'aj chic ija'tz xa'ka chiquicajol ab'aj y chire' xa man q'uiy ta ulief c'o, rumare' cha'nin xa'iel-pa ruma man pin ta ri ulief. 6Pero antok xpa ruchuk'a' ri k'ij, xa'yamayo-ka, y ruma man naj ta b'anak-ka ri quixie', mare' xa'chakej-ka cha'nin. 7Y nic'aj chic ija'tz xa'ka chiquicajol tak q'uix. Y antok xa'iel-pa, junan xa'q'uiy quiq'uin ri q'uix, y xa'jiek' chiquicajol ri q'uix y man jun quivach xc'ujie'. 8Pero nic'aj chic ija'tz xa'ka pan utzulaj ulief y ja'al xquiya' quivach, ruma xa'iel-pa ri ticuon can y xa'q'uiy ja'al; c'o ri xquiya' a treinta quivach, c'o ri xquiya' a sesenta y c'o ri xquiya' a cien quivach. 9Ri Jesús xu'ej je': Ri c'o ruxiquin chi nra'xaj, can tira'xaj ri xin'ej, xcha' chica. 10Y antok ri Jesús y ri i-doce (cab'alajuj) ru-discípulos quiyuon xa'c'ujie' can quiq'uin ri nic'aj vinak, xquic'utuj cha chirij ri chica nrajo' nu'ej ri parábola (c'amb'al-tzij). 11Y jaja' xu'ej chica: Chiva ixre' yo'n chi ntina'iej chirij ri ru-reino ri Dios. Pero chica ri vinak ri man nquinquinimaj ta, xa riq'uin parábolas (c'amb'al-tzij) nquich'o-ve chica. 12Chi quire' xa choj niquitz'at y man niquiya' ta pa cuenta ri niquitz'at, y jo'c nica'xaj y man xti'ka ta pa quive' (man xtiqui'an ta entender) ri nica'xaj, chi quire' man niquiya' ta can ri pecado chi niqui'an ri nrajo' ri Dios, y man xti'an ta perdonar ri qui-pecados. 13Y ri Jesús xu'ej je' chica: ¿Man xi'ka ta pan ive' (man xi'an ta entender) ri parábola (c'amb'al-tzij) ri xintzijuoj chiva? ¿Che'l xti'ka pan ive' (xti'an entender) ri nic'aj chic parábolas (c'amb'al-tzij)? 14Ri ache aj-ticoniel, jare' ri rusamajiel ri Dios ri nutzijuoj ri ruch'ab'al. 15Ri ija'tz ri xa'ka pa b'ay, jare' ri nica'xaj ri ruch'ab'al ri Dios, y ri Satanás cha'nin nipa quiq'uin y nralasaj-el ri ch'ab'al ri xtic can pa cánima. 16Ri ija'tz ri xa'ka chiquicajol ab'aj, jare' ri nica'xaj ri ruch'ab'al ri Dios y can altíra nca'quicuot antok niqui'an recibir. 17Pero ruma manak ruxie' ri ruch'ab'al ri Dios riq'uin cánima, rumare' man nca'layuj ta nca'quicuot. Ruma antok nca'pa ri sufrimientos y itziel nca'tz'iet ruma quiniman ri ruch'ab'al ri Dios, cha'nin nca'tzak. 18Y ri ija'tz ri xa'ka chiquicajol tak q'uix, jare' ri nica'xaj ri ruch'ab'al ri Dios, 19pero xa ja ri nic'atzin chica k'ij-k'ij choch-ulief, jo'c re' ninataj chica y ni'an maña chica ruma ri b'ayomal. Y ruma nicajo' chi quiq'uin ta ijeje' c'o-ve ri c'o riq'uin jun chic, jare' nib'ano chi nijiek' ri ruch'ab'al ri Dios riq'uin cánima. Rumare' man jun otz xtik'alajin pa quic'aslien. 20Y ri ija'tz ri xa'ka pan utzulaj ulief, ja ri nica'xaj ri ruch'ab'al ri Dios y niqui'an recibir. Ri quic'aslien can nik'alajin ja'al, y can niquiya' qui-fruto a treinta, a sesenta o a cien. 21Y ri Jesús xu'ej je' chica: Antok nic'amar-pa jun lámpara chi nuya' sakil pa jay, ¿chuxie' came jun cajuon o chuxie' came jun ch'at niyo'x-ve? Ri lámpara chicaj niyo'x-ve, xcha' chica. 22Ruma man jun kax ri avan-can, ri man ta xtib'ak'alajin-pa. Y man jun ri tz'apin can ruve', ri man ta xtib'ak'alajin-pa choch sakil. 23Ri c'o ruxiquin chi nra'xaj, can tira'xaj ri xin'ej, xcha' ri Jesús. 24Y ri Jesús xu'ej je' chica ri vinak: Ixre' ri ntivaxaj ri ruch'ab'al ri Dios, tivaxaj otz y tib'ana' ri nu'ej. Ruma can inche'l ri nti'an ixre' chica ri vinak, quire' xti'an chiva ixre'; y man jo'c ta re', xa xtiyo'x más ruve'. 25Ruma ri c'o riq'uin, can xtiyo'x más cha. Pero ri xa man q'uiy ta c'o riq'uin, hasta re' xtalasas-el cha. 26Y ri Jesús xu'ej je': Ri ru-reino ri Dios can nib'anataj inche'l nib'anataj riq'uin ri ija'tz ri nutic can jun ache ri pan ulief. 27Jaja' nivar ri chak'a' y nipalaj-pa antok nisakar-pa, y quire' nu'on k'ij-k'ij. Y ri ija'tz ntiel-pa y niq'uiy. Pero ri ache ri tiquiyuon can, man rata'n ta chica nu'on ri ija'tz chi ntiel-pa y chica nu'on chi niq'uiy. 28Ruma xa ja ri ulief nib'ano chi ntiel-pa ri ija'tz. Na'ay antok ntiel-pa, ch'ute'n-oc k'ayis, después antok nem chic, niq'uiy-pa ri ruve'. Y pa ruq'uisb'al ninuoj-pa ri rupan ri ruve' riq'uin ri runak'. 29Y antok k'an chic, ja nijuk cha juos, ruma ja xalka ri tiempo richin ri cosecha. 30Y ri Jesús xu'ej je': ¿Choj-iq'uin junan ri ru-reino ri Dios? ¿Y chica parábola (c'amb'al-tzij) nicusaj chi ni'an comparar? 31Xa inche'l ri ija'tz richin ri mostaza antok nitic pan ulief. Y xa jare' ri ija'tz ri más co'l ri c'o choch ri ulief. 32Pero antok niq'uiy, jare' ri más nem ntiel chiquivach quinojiel k'ayis, y nu'on nima'k ri ruk'a'. Rumare' ri chicop ri c'o quixic' niqui'an quisuoc chuk'a', ruma chire' ja'al nca'mujan. 33Ri Jesús antok nutzijuoj ri ruch'ab'al ri Dios chica ri vinak, xa'rucusaj parábolas (c'amb'al-tzij) ruma nrajo' chi nica'xaj. 34Y man jun tzij ri xu'ej chica, ri man ta xucusaj parábolas (c'amb'al-tzij). Pero antok ri Jesús y ri ru-discípulos quiyuon ic'o can, jaja' can nu'ej chica ri chica nrajo' nu'ej. 35Y antok xcok'a-ka chupan ri k'ij re', ri Jesús xu'ej chica ri ru-discípulos: Kojak'ax-apa juc'an chic ruchi' ri ya'. 36Y jaja' xa'ru'on can despedir ri vinak. Y ruma can tz'uyul chic chupan ri barco, can quire' rub'anun xuc'uax cuma ri ru-discípulos. Y ic'o je' nic'aj chic barcos ri junan xa'iel-el quiq'uin. 37Y antok i-b'anak paro' ri mar, xpa jun cak'iek' ri altíra nem. Y rumare' ri ya' nipalaj chicaj y nalruquiraj-ri' chirij ri barco ri choj chupan i-b'anak-ve, y xuoc ya' chupan. Riq'uin re' jub'a' ma ni'a-ka chuxie' ri ya'. 38Pero ri Jesús xa nivar b'anak chupan ri barco. Jaja' chirij can ri barco rucanun-ve jun ruch'acave'. Y xa'pa ri discípulos, xquic'asuoj y xqui'ej cha: ¡Maestro! Vacame nkucon y atre' xa ncavar, xa'cha' cha. 39Y ri Jesús xpalaj-pa y xch'olin cha ri cak'iek' y xu'ej cha ri mar chi titanie-ka. Y quire' xb'anataj. Ri cak'iek' xq'uis-el ruchuk'a' y xtanie-ka je' ri mar. 40Ri Jesús xu'ej chica: ¿Karruma xixi'ij-ivi'? ¿Man icukub'an ta ic'u'x viq'uin c'a? 41Pero ri discípulos altíra quixi'in-qui' y niqui'ej chiquivach: ¿Chica c'a chi ache va chi ri cak'iek' y ri mar can xa'niman cha?

will be added

X\