San Marcos 3

1Y ri Jesús xuoc chic jun b'ay ri pa sinagoga, y chiquicajol ri vinak ri quimaluon-qui', c'o jun ache chake'j jun ruk'a'. 2Pero ic'o ri jo'c niquitz'at-apa ri Jesús y quiyo'ien chi xa xtu'on sanar ri ache, chi quire' niqui'an acusar chi xsamaj chupan jun k'ij richin uxlanien. 3Pero ri Jesús xu'ej cha ri ache chake'j ri ruk'a': Capalaj y capi'ie' pa nic'aj, xcha' cha. 4Y ri Jesús xu'ej chica ri vinak ri ic'o chire': ¿Chica ri más otz ni'an chupan jun k'ij richin uxlanien, ja ri otz o ja ri man otz ta? ¿Ri nicuol jun vinak choch ri camic o niquimisas? xcha' chica. Pero quinojiel man jun tzij ri xqui'ej. 5Y ri Jesús xa'ruca'yiej ri quimaluon-qui' chire', xpa rayoval y xb'isuon-ka, ruma xutz'at chi cof quib'anun cha ri cánima y man nicajo' ta niquinimaj. Después xu'ej cha ri ache ri chake'j jun ruk'a': Tayuku' la ak'a'. Y ri ache xuyuk ri ruk'a', y ja otz xu'on ri ruk'a'. 6Y ri achi'a' fariseos xa'iel chire' chi xb'aquimalo-qui' quiq'uin ri i-ruvinak ri rey Herodes, chi niqui'an pensar ri chica niqui'an cha ri Jesús, ruma nicajo' niquiquimisaj. 7Y ri Jesús y ri ru-discípulos xa'a chuchi' ri mar y chirij ri Jesús xa'a iq'uiy vinak aj-chire' Galilea. Y nic'aj ri xa'pa Judea, 8ri Jerusalén, ri Idumea, ri juc'an chic ruchi' ri río Jordán, y cierca ri ca'ye' tanamet ri Tiro y ri Sidón. Can quinojiel ri vinak ri xa'lka riq'uin ri Jesús, xa'pa ruma caxan ri milagros ri nca'ru'on. Can iq'uiy ri vinak ri xa'lka. 9Y ruma iq'uiy ri vinak nca'lka riq'uin, ri Jesús xu'ej chica ri ru-discípulos chi tiquiya-pa jun ch'iti barco cierca, chi quire' xa ri vinak xtiquipitz', ntuoc chupan ri ch'iti barco. 10Ri Jesús can iq'uiy ri xa'ru'on sanar. Rumare' ri nca'yavaj quimaluon-qui' chirij, y niquitej quik'ij chi niquitz'om-apa. 11Y ri itziel tak espíritus antok niquitz'at ri Jesús, nca'xuquie' choch y can riq'uin quichuk'a' nca'ch'o' y niqui'ej: Atre' ri Ruc'ajuol ri Dios, nca'cha'. 12Pero ri Jesús nca'ruch'olij altíra chi man tiquitzijuoj chi chica jaja'. 13Ri Jesús xjotie-el paro' jun juyu' y xa'rayuoj-el ri xa'rajo' jaja' chi xa'ruc'uaj y ijeje' xa'a riq'uin. 14I-doce (cab'alajuj) ri xa'rucha' chi nca'c'ujie' riq'uin y chi nca'rutak-el chi niquitzijuoj ri ruch'ab'al ri Dios. 15Y can xuya' poder chica chi nca'qui'an sanar ri nca'yavaj y chi nca'quilasaj itziel tak espíritus. 16Ri i-doce (cab'alajuj) ri xa'rucha' ri Jesús, ja ri Simón ri xu'ej Pedro cha, 17ri Jacobo y ri Juan ri i-ruc'ajuol ri Zebedeo, ri xu'ej je' Boanerges chica; ri tzij Boanerges ntiel: I-ralc'ual ráya. 18Ri Andrés, ri Felipe, ri Bartolomé, ri Mateo, ri Tomás, ri Jacobo ri ruc'ajuol ri Alfeo, ri Tadeo, ri Simón ri c'o quiq'uin ri achi'a' ri ni'e'x cananistas chica, 19y ri Judas Iscariote ri xjacho richin ri Jesús. Ri Jesús y ri xa'rucha' xa'a chupan jun jay. 20Y ruma altíra iq'uiy vinak ri xquimol-qui' jun chic b'ay, ri Jesús y ri ru-discípulos manak che'l xa'va'. 21Y antok ri rach'alal ri Jesús xquina'iej nojiel re', ja xa'lka chi nalquima', ruma ijeje' xqui'an pensar chi ri Jesús xu'on-ka ch'u'j. 22Pero ri achi'a' escribas ri i-patanak pa tanamet Jerusalén, niquitzijuoj chiquivach chi ri Jesús c'o ri Beelzebú riq'uin, ri quijaval ri itziel tak espíritus y niqui'ej chi jare' ri nib'ano cha chi nitiquir nca'ralasaj ri itziel tak espíritus. 23Y rumare' ri Jesús xa'rayuoj chi xa'jiel-apa riq'uin y xutzijuoj jun parábola (c'amb'al-tzij) chiquivach, y quire' xu'ej chica: ¿Che'l re' chi ja mismo ri Satanás nca'ralasaj-el ri rusamajiel? 24Ruma xa ri vinak richin jun reino ca'ye' grupo niqui'an-ka, nipa ayoval chiquicajol y ri reino re' xa nitzak. 25Y quire' je' chupan jun jay, xa ca'ye' grupo niqui'an-ka, nipa ayoval chiquicajol y ri jay re' xa niq'uis. 26Y xa ri Satanás nu'on-ka ayoval quiq'uin ri i-rusamajiel, xa nipalaj chirij jaja' mismo. Ruma xa quire' nu'on, ruyuon nic'ujie' can y cha'nin nitzak. 27Y xa c'o jun ri nrajo' nu'on alak' pa rachuoch jun ache ri altíra ruchuk'a', na'ay nuxim, c'ajare' c'o che'l nucanuj-el nojiel ri nrajo' nuc'uaj. 28Y can ketzij c'a ri ni'ej chiva, chi xa chica-na pecados niqui'an ri vinak choch ri ulief, c'a nca'an perdonar. Hasta ri itziel nca'ch'o' chirij ri Dios, c'a nca'an perdonar. 29Pero ri itziel nich'o' chirij ri Espíritu Santo, man ni'an ta perdonar sino que xti'an castigar richin nojiel tiempo. 30Ri Jesús quire' xu'ej chica ri achi'a' escribas, ruma ijeje' niqui'ej chirij jaja' chi c'o itziel espíritu riq'uin. 31Y ri rutie' y ri i-ruchak' ri Jesús xa'pa c'a pache' c'o-ve jaja'. Pero xa juviera xa'c'ujie-ve. Xa xquitak royoxic chi nicajo' nca'ch'o' cha. 32Y ri vinak ri i-tz'uyul riq'uin ri Jesús xqui'ej-apa cha: Ri atie' y ri achak' ic'o juviera y ncatquicanuj. 33Pero ri Jesús xu'ej: ¿Chica ri ntie' y ri nchak'? 34Y xa'ruca'yiej quinojiel ri i-tz'uyul riq'uin y xu'ej chica: Jare' ri ntie' y ri nchak'. 35Ruma quinojiel ri nca'b'ano ri nrajo' ri Dios, jare' ri ntie', ri vana' y ri nchak', xcha' ri Jesús.

will be added

X\