San Marcos 16

1Y antok k'axnak chic ri k'ij richin uxlanien, ri María Magdalena, ri María ri rutie' ri Jacobo, y ri ixok Salomé rub'e', xquilok' jub'ul tak ak'uon chi niquiya' chirij ri ru-cuerpo ri Jesús. 2Y mac'ajan yan ri na'ay k'ij richin ri semana, xa'a c'a chuchi' ri jul. Y ya xiel-pa ri k'ij antok xa'b'aka. 3Y ijeje' niqui'ej chiquivach: ¿Chica xtalasan-el ri ab'aj ri choj cha tz'apin can ruchi' ri jul? nca'cha'. 4Pero antok xquitz'at ri jul, xquitz'at chi ri nem ab'aj ri choj cha tz'apin can ruchi' ri jul, xa alasan-el. 5Y antok ijeje' xa'uoc chupan ri jul, xquitz'at jun ala' tz'uyul chire' ri lado derecha, rucusan jun tziak sak ri nika-ka c'a chukul rakan. Y ri ixoki' xquixi'ij-qui'. 6Pero jaja' xu'ej chica: Man tixi'ij-ivi'. Ixre' nticanuj ri Jesús ri aj-Nazaret, ri xquimisas choch ri cruz. Jaja' ya xc'astaj-el, man c'o ta chic vave'. Titz'ata' ri lugar pache' xyo'x-ve. 7Vacame c'a quix'in y ti'ej cha ri Pedro y chica ri nic'aj chic ru-discípulos, chi jaja' ni'a na'ay chivach c'a Galilea; chire' xtitz'at-ve, can inche'l ri ru'e'n can chiva. 8Y ri ixoki' re' xa'iel-pa anin chupan ri jul y xa'a anin; ijeje' nca'b'arb'uot ruma altíra quixi'in-qui'. Ijeje' man jun choj cha xquitzijuoj-ve, ruma quixi'in-qui'. 9Antok ri Jesús xc'astaj-pa chiquicajol ri quiminaki' ri mac'ajan ri na'ay k'ij richin ri semana, na'ay xuc'ut-ri' choch ri María Magdalena; ri ixok ri choj-iq'uin xa'ralasaj-el i-siete (ivuku') itziel tak espíritus. 10Y ri María Magdalena x'a chi xb'aru'ej chica quinojiel ri xa'c'ujie' riq'uin ri Jesús. Ijeje' altíra nca'b'isuon y nca'uok'. 11Ijeje' antok xca'xaj chi ri Jesús ya xc'astaj-pa chiquicajol ri quiminaki' y chi ri María Magdalena xutz'at yan, xa man xquinimaj ta. 12Después ri Jesús xuc'ut-ri' chiquivach ica'ye' ru-discípulos ri quitz'amuon b'ay chi nca'a jun chic lugar. Pero ri Jesús jun-ve chic nitzu'n antok xuc'ut-ri' chiquivach. 13Ri ica'ye' re' xb'aqui'ej chica ri nic'aj chic discípulos, pero man xa'quinimaj ta je'. 14Pa ruq'uisb'al ri Jesús xuc'ut-ri' chiquivach ri once (julajuj) ru-discípulos antok nca'va'. Jaja' xu'ej chica: ¿Karruma ixre' man xinimaj ta y cof xi'an cha ri ivánima? Quire' xu'ej chica ruma ri discípulos man xquinimaj ta quitzij ri xa'tz'ato ri Jesús, chi ya xc'astaj-pa chiquicajol ri quiminaki'. 15Y xu'ej chica: Quix'in c'a choch nojiel ri ulief y titzijuoj ri evangelio chica quinojiel vinak. 16Ri nunimaj y xti'an bautizar, xticolotaj. Pero ri man xtunimaj ta, xtika ri castigo paro'. 17Y ri xca'niman vichin, can q'uiy kax xca'tiquir xtiqui'an y re' señal chi inc'o quiq'uin. Pa nub'e' inre' xca'quilasaj itziel tak espíritus y xca'ch'o' nic'aj chic ch'ab'al ri man c'utun ta chiquivach. 18Xca'quitz'om cumatz, y xa xtiquikun vaniena, man jun kax xtu'on chica. Xtiquiya' quik'a' pa quive' ri nca'yavaj y xca'qui'an sanar, xcha' ri Jesús. 19Antok ri Ajaf Jesús ch'ovinak chic can chica ri ru-discípulos, después x'a, y x'an recibir chicaj ruma ri Dios, y xtz'uye' pa ru-derecha. 20Y ri discípulos xa'a c'a nojiel lugar chi xquitzijuoj ri ruch'ab'al ri Dios. Y ri Ajaf can c'o quiq'uin chi nca'ruto', y can xu'on chica chi q'uiy milagros ri xa'tiquir xa'qui'an chi tik'alajin chi ja ri ketzij ri niquitzijuoj. Amén.

will be added

X\