San Marcos 15

1Y c'a cumaj yan, ri principales sacerdotes xquimol-qui' quiq'uin ri mama'a' tak achi'a' ri niqui'an gobernar y ri achi'a' escribas. Quinojiel ri autoridades quichin ri israelitas ya xqui'an pensar che'l niqui'an cha ri Jesús, y mare' xquixim-el y xb'aquijacha' pa ruk'a' ri Pilato. 2Y ri Pilato xuc'utuj cha ri Jesús: ¿Atre' ri Qui-Rey ri israelitas? Y ri Jesús xu'ej cha: Atre' nca'e'n, xcha' cha. 3Y ri principales sacerdotes q'uiy ri niqui'ej-apa cha ri Pilato, chi niqui'an-apa acusar ri Jesús. 4Y ri Pilato xuc'utuj chic cha ri Jesús y xu'ej cha: ¿Man jun tzij na'ej? Ijeje' q'uiy niqui'ej-pa chavij chi ncatqui'an acusar, xcha' ri Pilato cha. 5Pero ri Jesús man jun tzij ri xu'ej. Rumare' ri Pilato can xchapataj. 6Y juna-juna' antok nalka ri namak'ej Pascua, ri gobernador nutzokopij-el jun chiquivach ri ic'o pa cárcel; ja ri nicajo' ri vinak chi ntiel-el. 7Y chupan ri tiempo re', c'o pa cárcel jun ache rub'inan Barrabás. Junan c'o pa cárcel quiq'uin nic'aj chic rach'il ruma xa'palaj chirij ri gobierno y quib'anun camic. 8Ri vinak xquic'utuj cha ri gobernador chi tutzokopij-el jun chiquivach ri ic'o pa cárcel, inche'l ri ranun-pa juna-juna'. 9Y ri Pilato xu'ej c'a chica: ¿Ntivajo' ixre' chi nitzokopij-el ri I-Rey ixre' ri israelitas? 10Ri Pilato quire' xu'ej ruma jaja' rata'n chi ri principales sacerdotes quiyo'n ri Jesús pa ruk'a', ruma itziel niquitz'at. 11Pero ri principales sacerdotes xa'quitakche'j ri vinak, chi tiqui'ej-apa chi ja ri Barrabás titzokopes-el. 12Y ri Pilato xch'o' chic jun b'ay y xuc'utuj chica: ¿Chica ntivajo' ixre' chi ni'an cha ri nti'ej chi I-Rey ixre' ri israelitas? xcha' jaja' chica. 13Y ri vinak xa'ch'o-apa chic riq'uin nojiel quichuk'a': ¡Ti'an crucificar! xa'cha'. 14Ri Pilato xuc'utuj chica: ¿Chica ruch'o'j rub'anun? Pero ri vinak man nca'tanie' ta ka. Xa riq'uin más quichuk'a' xqui'ej-apa: ¡Ti'an crucificar! 15Y ri Pilato chi otz nitz'iet cuma ri vinak, mare' xutzokopij-el ri Barrabás; y xutak ruch'ayic ri Jesús, después xujach-el chi tiquimisas choch cruz. 16Y ri soldados xquicusaj-apa ri Jesús chojay richin ri palacio; y xa'cayuoj quinojiel ri nic'aj chic soldados. 17Y ri soldados re' xquiya' jun tziak morado chirij ri Jesús. Y xquiya' pa rujaluon jun corona ri pach'un cha jun k'ayis ri altíra ruq'uixal. 18Y niqui'an cha chi c'o ruk'ij y niqui'ej cha: ¡Caquicuot, atre' ri Qui-Rey ri israelitas! 19Y niquib'uj rujaluon cha jun aj y niquichub'aj. Can nca'xuquie' je' choch, inche'l can niquiya' ruk'ij niqui'an cha. 20Y antok ijeje' xa'tanie-ka chi nca'tze'n chirij, xquilasaj-el ri tziak morado ri quiyo'n ijeje' chirij, y xquiya-el ri rutziak jaja', y xquilasaj-el chi niquib'ajij choch cruz. 21Antok i-b'anak pa b'ay, xquic'ul jun ache aj-Cirene, ri patanak pan avan. Ri ache re' Simón rub'e', quitata' ri Alejandro y ri Rufo. Y ri soldados xqui'an cha ri ache re' chi tuc'uaj ri cruz. 22Y ri soldados xquic'uaj ri Jesús chupan ri lugar rub'inan Gólgota. Ri tzij Gólgota nrajo' nu'ej: Rujaluon Quiminak (Calavera). 23Y antok ic'o chic chire', xquiya' cha ri Jesús vino xaluon riq'uin ruya'l mirra. Pero jaja' man xrajo' ta xukun. 24Y antok ri soldados quib'ajin chic ri Jesús choch ri cruz, xquilasaj suerte chirij ri rutziak chi niquitz'at chica tziak ri niquic'uaj chiquijunal. 25A las nueve ri mac'ajan antok xquib'ajij ri Jesús choch cruz. 26Y paro' ri cruz, xquiya' jun letrero ri nu'ej karruma niquimisas. Choch ri letrero re' nu'ej: RI QUI-REY RI ISRAELITAS. 27Ic'o je' ica'ye' alak'oma' ri xa'b'ajix choch cruz riq'uin ri Jesús. Jun xyo'x pa ru-derecha y ri jun chic pa ru-izquierda. 28Y riq'uin re' nu'on cumplir ri tz'ib'an can chupan ri ruch'ab'al ri Dios, ri nu'ej: Jaja' can jun aj-b'anoy-ch'o'j x'an cha. Quire' ri tz'ib'an can. 29Ri vinak ri nca'k'ax ri pache' c'o-ve ri Jesús niquisiluoj can quijaluon choch, y c'o tzij ri man otz ta ri nca'qui'ej can cha. Ri vinak re' niqui'ej cha ri Jesús: ¡Ah! Atre' xa'ej chi navulij ri ru-templo ri Dios y chi oxe' k'ij napab'a' chic jun b'ay, 30tacalo-avi' ayuon y caka-pa choch ri cruz, nca'cha' can cha. 31Y quire' je' niqui'an ri principales sacerdotes y ri achi'a' escribas, ijeje' altíra nca'tze'n-apa chirij ri Jesús y niqui'ej chiquivach: Jaja' can iq'uiy xa'rucol, pero jaja' man nitiquir ta nucol-ri' ruyuon. 32Xa jaja' ri Cristo, ri Qui-Rey ri israelitas, tika-pa choch ri cruz vacame c'a, chi quire' nakatz'at y nakanimaj, nca'cha' chiquivach. Y quire' je' ri alak'oma' ri i-b'ajin choch qui-cruz riq'uin ri Jesús, can c'o tzij ri man otz ta ri nca'qui'ej-apa cha. 33Y pa nic'aj-k'ij, nojiel ri roch-ulief xu'on k'aku'n. Y ri k'aku'n re' xq'uis-el hasta c'a a las tres ri nakak'ij. 34Y a las tres, ri Jesús xurak ruchi' y xu'ej: Eloi, Eloi, ¿lama sabactani? xcha'. Y ri tzij re' quire' nu'ej: Nu-Dios, Nu-Dios, ¿karruma xinaya' can? 35Y ic'o jujun ri ic'o-apa cierca ri Jesús, antok xca'xaj ri xu'ej, ja xqui'ej: Tivaxaj, ja ri Elías ri nrayuoj, xa'cha'. 36Y c'o jun ri jun-anin xb'arumub'a-pa jun esponja chupan vinagre, y xuya' ri esponja chutza'n jun aj, chi xuya' cha ri Jesús chi nutz'u', y xu'ej: Kayo'iej, katz'ata' xa nalka ri Elías chi nukasaj-pa, xcha'. 37Pero ri Jesús xurak ruchi' y ja xcon-ka. 38Y ri tziak ri choj cha jachuon-ve rupan ri templo xk'ach'itaj pa nic'aj, c'a paro' c'a chuxie' ka. 39Y ri capitán ri pa'l-apa choch ri cruz ri pache' c'o-ve ri Jesús, antok xutz'at ri Jesús chi xurak ruchi' y ja xcon, cava xu'ej: Can ketzij chi la ache la, can Ruc'ajuol ri Dios, xcha'. 40Y ic'o je' nic'aj ixoki' ri chi-naj nca'tzu'n-apa. Chiquicajol ri ixoki' re', c'o ri María Magdalena, ri María quitie' ri Jacobo ri ch'ute'n y ri José, y ri ixok Salomé. 41Antok ri Jesús c'a c'o Galilea, ri ixoki' re' i-b'anak chirij y quilin-pa. Y ic'o je' q'uiy chic ixoki' ri i-b'anak chirij ri Jesús hasta c'a Jerusalén. 42Antok xkak'ij-ka (después ri a las tres), ri vinak niquichojmij c'a nojiel ri xtic'atzin chica chupan ri k'ij richin uxlanien. 43Jare' antok xalka ri José ri aj-Arimatea. Jaja' jun chiquivach ri achi'a' ri autoridades quichin ri israelitas y utzulaj ache. Jaja' royo'ien je' ri ru-reino ri Dios. Y jaja' xuoc riq'uin ri Pilato, y man jun chic xib'inre'l choch xuc'utuj ri ru-cuerpo ri Jesús. 44Pero ri Pilato can xchapataj chi cha'nin yan xcon ri Jesús. Rumare' jaja' xrayuoj ri capitán, y xuc'utuj cha xa ketzij chi ya xcon ri Jesús. 45Y antok ri Pilato rata'n chic ruma ri xu'ej ri capitán cha, mare' xu'ej c'a chi tiyo'x ri ru-cuerpo ri Jesús cha ri José. 46Y ri José xulok' jun tziak nem. Y antok rukasan chic pa ri ru-cuerpo ri Jesús choch ri cruz, xub'ol c'a chupan ri tziak re'. Y chupan jun jul ri c'atuon choch jun nem ab'aj xb'aruya-ve ri ru-cuerpo ri Jesús. Jaja' xutz'apij can ri ruchi' ri jul cha jun nem ab'aj. 47Y ri María Magdalena y ri María ri rutie' ri José, xquitz'at pache' xyo'x-ve can ri Jesús.

will be added

X\