San Marcos 13

1Y antok ri Jesús ntiel-pa pa templo, jun chiquivach ri ru-discípulos xu'ej cha: Maestro, tatz'ata' ri quib'anic ri jay richin ri templo, can ja'al b'anun chica, y ri nima'k tak ab'aj ri i-cusan, xcha'. 2Ri Jesús xu'ej cha ri ru-discípulo: ¿Natz'at va nima'k tak jay va? Xtalka jun k'ij antok nojiel va xca'vulex. Quinojiel ri nima'k tak ab'aj ri i-cusan, can xca'vulex, y man jun ab'aj ri xtic'ujie' can pa ru-lugar, xcha' cha. 3Y antok ri Jesús xtz'uye' paro' ri juyu' Olivos, ri pache' k'alaj niquitz'at-pa ri templo; ri Pedro, ri Jacobo, ri Juan y ri Andrés xa'jiel-apa riq'uin y xquic'utuj cha: 4Ta'ej chika, ¿jampe' c'a xtib'anataj ri xa'ej? ¿Y chica señal xtib'anataj antok nojiel ri kax re' xtu'on cumplir? xa'cha' cha. 5Y ri Jesús xutz'om c'a rutzijoxic y quire' xu'ej chica: Tib'ana' cuenta-ivi' chi man jun tib'ano maña chiva. 6Ruma iq'uiy ri xca'pa y xtiqui'ej: Inre' ri Cristo, xca'cha'. Y iq'uiy ri xca'qui'an maña chica. 7Pero antok xtivaxaj chi nib'anataj guerras y xtivaxaj je' chi c'o guerras ri xca'pa, man tixi'ij-ivi', ruma nic'atzin chi nojiel re' xca'b'anataj. Pero man ja ta yan re' ri ruq'uisb'al k'ij richin ri roch-ulief. 8Jun nación xtipalaj chirij jun chic nación y jun reino xtipalaj chirij jun chic reino. Xtu'on nima'k tak cub'rakan q'uiy lugar, xtu'on vi'jal, y q'uiy je' roch ayoval xca'pa chiquicajol ri vinak pa tak tanamet. Y nojiel re' xa c'a ja oc rutz'ucb'al richin ri sufrimientos ri xca'pa. 9Pero ixre' can tib'ana' cuenta-ivi'. Ruma ixre' xquixjach pa quik'a' ri autoridades quichin ri tanamet y xquixch'ay pa tak sinagogas. Y xquixuc'uax chiquivach gobernadores y chiquivach reyes ruma iyo'n ivánima viq'uin, pero ixre' xquixtiquir c'a xquinitzijuoj chiquivach ijeje'. 10Y antes chi xtalka ri ruq'uisb'al k'ij, nic'atzin chi ri evangelio nitzijos nojiel naciones. 11Pero antok xquixuc'uax chi xquixjach pa quik'a' ri autoridades, man ti'an preocupar-ivi' ri chica tzij ri xti'ej, ni man ti'an pensar. Ixre' jo'c ti'ej ri chica tzij ri xtuya' ri Dios chiva ri misma huora re', ruma man ixre' ta ri xquixch'o' chupan ri huora re', xa can ja ri Espíritu Santo ri xtich'o'. 12Y chiquicajol ri quichak'-quinimal-qui', jun chiquivach ijeje' xtujach ri jun chic chi niquimisas, y ri tata'j xca'quijach ri calc'ual chi nca'quimisas, y ri calc'ual xca'palaj chiquij ri quitie-quitata' y xca'quijach chi nca'quimisas. 13Can quinojiel vinak, itziel xquixquitz'at ruma iyo'n ivánima viq'uin. Pero ri man xtitzalaj ta chirij y xtucoch' nojiel re' hasta el fin, can xticolotaj. 14Pero antok xtitz'at chi xca'b'anataj ri itziel tak kax chupan ri lugar ri pache' man ruc'amun ta chi ni'an chire', ja xtiq'uis ri lugar re', ri inche'l tz'ib'an can ruma ri profeta Daniel, (ri nib'ano leer, can tub'ana' entender). Entonces ri ic'o Judea, ca'numaj-el pa tak juyu'. 15Ri c'o paro' ri rachuoch antok xtalka ri huora re', man tika-pa chi ntuoc pa rachuoch chi c'o niruma-pa, choj ti'a; 16y ri c'o pan avan, man titzalaj-pa chirachuoch chi nalruma' ri ru-capa. 17¡Can juye' quivach ri ixoki' ri ic'o encinta (embarazada) antok xtalka ri k'ij re', y quire' je' ri ixoki' ri c'a niquiya' quitz'un ri quixulu'! 18Rumare' tib'ana' orar chi antok xquixnumaj, man ta pa ru-tiempo job', 19ruma antok xtalka ri k'ij re', can nem ri sufrimiento ri xtipa, ri man jun b'ay quire' rub'anun xa-jan antok b'anun-pa ri roch-ulief ruma ri Dios, ni xtalka chic jun b'ay ri sufrimiento re'. 20Y xa ta ri Ajaf Dios man ta nu'on co'l cha ri tiempo richin ri sufrimiento, man jun nicolotaj. Pero cuma ri i-rucho'n chic, can xtu'on co'l cha ri tiempo re'. 21Chupan ri k'ij re', xa ic'o ri xca'e'n chiva: Titz'ata', ja c'o vave' ri Cristo, o xa niqui'ej chiva: Titz'ata', ja c'o chila, man tinimaj. 22Ruma xca'pa falsos cristos y falsos profetas. Ijeje' xca'qui'an milagros y señales chi xtiqui'an maña chica ri vinak. Y ijeje' nicajo' xtiqui'an maña chica hasta ri i-cho'n chic ruma ri Dios. 23Pero ixre' can tib'ana' cuenta-ivi'. Can ja yan xin'ej can chiva nojiel ri xca'b'anataj. 24Chupan ri tiempo re', antok k'axnak chic ri sufrimiento, ri k'ij man chic xtitzu'n ta, y ri ic' man xtuya' ta chic rusakil. 25Ri estrellas (ch'umil) xca'tzak-pa chicaj. Can nojiel c'a ri ic'o chicaj xca'silos. 26Entonces xtitz'atataj ri Xtak-pa chicaj chi xalax chi'icajol, chi xtika-pa chupan mukul riq'uin namalaj poder y namalaj ruk'ij. 27Y xca'rutak ri ru-ángeles chi nca'quimol ri i-rucho'n chic. Can xca'quimol quinojiel ri ic'o oriente, ri ic'o occidente, ri ic'o norte y ri ic'o sur. Can xca'quimol quinojiel ri i-rucho'n chic; chica-na lugar ri roch-ulief ic'o-ve. 28Chirij ri víquix tivatamaj ri parábola (c'amb'al-tzij): Antok nca'jotoyin-pa ri ruk'a' y nca'iel-pa ri ruxak, ivata'n chi ri ru-tiempo ri sak'ij ya nalka. 29Y quire' je' antok xtitz'at chi nca'b'anataj ri kax ri xin'ej, tivatamaj c'a chi ya nalka ri k'ij re'. Can cierca chic c'o-ve-pa. 30Can ketzij ni'ej chiva, chi nojiel re' xtib'anataj antok ri vinak richin ri tiempo vacame c'a ic'o ri choch-ulief. 31Ri roch-ulief y ri rocaj can xca'q'uis. Pero ri nuch'ab'al man xtiq'uis ta quire', xa can xtib'anataj ri nu'ej. 32Pero ri k'ij y ri huora antok xtipa chic, man jun ta'mayuon. Nixta ri ángeles ri ic'o chila chicaj man cata'n ta jampe'. Ni ri Ruc'ajuol ri Dios man rata'n ta, xa jo'c ri Rutata' Dios ta'mayuon re'. 33Rumare' ixre' can tib'ana' cuenta-ivi', man timastaj chiva chi ntivoyo'iej-apa y tib'ana' orar, ruma man ivata'n ta jampe' xtalka ri k'ij chi xtipa chic. 34Can junan riq'uin ri xu'on jun ache ri xuya' can ri rachuoch y ni'a naj, jaja' xuya' can autoridad pa quik'a' ri rusamajiel y xuya' can quisamaj chiquijunal. Y cha ri nuchajij can ri rachuoch, nu'ej can cha chi can tuyo'iej-apa. 35Rumare', man timastaj chiva chi ntivoyo'iej-apa, ruma man ivata'n ta jampe' xtalka ri Rajaf-jay. Ruma nak xa nalka antok nu'on-ka chak'a', o pa nic'aj-ak'a', o antok nitzirin-pa ri mama' o mac'ajan. 36Ruma antok xtipa chic jun b'ay, jun arapienta. Can tivoyo'iej-apa chi quire' man nquixalrila' ta nquixvar. 37Y inche'l ri ni'ej chiva ixre', can quire' je' ni'ej chica quinojiel, can quinivoyo'iej-apa, xcha' ri Jesús chica ri ru-discípulos.

will be added

X\