San Marcos 12

1Y ri Jesús xutz'om c'a riq'uin parábolas (c'amb'al-tzij) xch'o' chica ri vinak y xu'ej chica: C'o c'a jun ache ri xutic uva pa rulief, xuc'ajuoj rij, xu'on inche'l jun ch'iti pila chupan ri ulief chi niyitz' ri uva chupan, y xu'on je' jun torre. C'ajare' xuya' can pa kajic chica nic'aj aj-samajiel, y jaja' x'a naj. 2Y antok xalka ri tiempo richin ri cosecha, ri rajaf ri ulief xutak-pa jun rusamajiel quiq'uin ri i-kajayuon ri rulief richin chi nalruma' ri uva kajb'al richin ri ulief. 3Pero ri achi'a' ri i-kajayuon ri rulief xa xquitz'om y xquich'ey, y man jun uva xquiya-el cha. 4Ri rajaf ri ulief xutak chic pa jun rusamajiel quiq'uin. Pero ijeje' xa cha ab'aj xquic'ul-ve y xquisoc-el rujaluon, y chica-na ri xcajo' xqui'an-el cha y quire' xquitak-el. 5Ri rajaf ri ulief xutak chic pa jun rusamajiel. Y ri samajiel re' xquimisas cuma ri i-kajayuon ri rulief. Y iq'uiy chic rusamajiel xa'rutak-pa; ic'o xa'ch'ay, y ic'o xa'quimisas. 6Y pa ruq'uisb'al, ri rajaf ri ulief xa jo'c chic ri ruc'ajuol xc'ujie' can riq'uin y jaja' altíra nrajo' ri ruc'ajuol. Xutak-pa ri ruc'ajuol quiq'uin y xu'ej: Ri achi'a' re' can xtiqui'an respetar antok xtiquitz'at chi ja ri nuc'ajuol ri xti'ka quiq'uin, xcha'. 7Pero ri achi'a' re' xqui'ej-ka chiquivach: Jare' ri xtuoc can rajaf nojiel ri ulief ri kakajuon, quixam-pa, kaquimisaj, chi quire' pa kak'a' ojre' nic'ujie' can ri ulief, xa'cha'. 8Y ja xquitz'om, xquiquimisaj, y juviera ri ulief ri ticuon uva choch, xb'aquic'aka'. 9¿Chica came xtu'on ri rajaf ri ulief ri ticuon uva choch chica ri achi'a' re'? Ri rajaf ri ulief xtipa y xca'ruquimisaj ri achi'a' re' y ri rulief xtuya' chic pa kajic chica nic'aj chic. 10¿Man came itz'atuon ta ri tz'ib'an can chupan ri ruch'ab'al ri Dios? Ri nu'ej: Ri Ab'aj ri man xka ta chiquivach ri achi'a' ri i-b'anoy-jay, xa jare' ri xyo'x ri lugar ri más nic'atzin chi quire' ri jay man nitzak ta. 11Ja ri Ajaf ri xb'ano quire' cha, y ojre' man jun b'ay katz'atuon chi nib'anataj quire'. Quire' nu'ej ri ruch'ab'al ri Dios. 12Y ri achi'a' choj-iq'uin xch'o-ve ri Jesús can ta xcajo' xquitz'om yan el, ruma xi'ka pa quive' (xqui'an entender) chi xa chiquij ijeje' xu'ej ri parábola (c'amb'al-tzij). Pero man xqui'an ta, ruma niquixi'ij-qui' chiquivach ri vinak. Ijeje' xquiya' can ri Jesús y xa'a. 13Y ri achi'a' re' xa'quitak-pa nic'aj achi'a' fariseos y nic'aj ruvinak ri rey Herodes, ruma nicajo' chi ri Jesús nitzak ta pa quik'a' riq'uin ri tzij ri nca'ru'ej. 14Y ri achi'a' xa'pa riq'uin ri Jesús y xqui'ej cha: Maestro, ojre' kata'n chi jo'c ri ketzij ri na'ej y nac'ut ri ruch'ab'al ri Dios y can ja-ve rub'ixic na'an cha, ruma atre' man naxi'ij ta avi' choch jun vinak mesque altíra ruk'ij. ¿Chica na'ej chika? ¿Otz nakatoj ri impuestos ri nu'ej ri rey César, o xa man otz ta? xa'cha' cha. 15Pero ri Jesús can rata'n chi xa riq'uin ca'ye' quipalaj niquic'utuj quire' cha. Rumare' jaja' xu'ej chica: ¿Karruma nquini'an tentar? Tic'ama-pa jun moneda chi nitz'at, xcha' chica. 16Y ijeje' xb'aquic'ama-pa ri moneda chi niquic'ut choch. Y jaja' xuc'utuj chica: ¿Choj palaj y choj b'e' ri c'o choch? xcha' chica. Y ijeje' xqui'ej cha: Richin ri rey César, xa'cha' cha. 17Y ri Jesús xu'ej chica: Tiya' c'a cha ri César ri can richin ri César, y tiya' cha ri Dios ri can richin ri Dios, xcha' ri Jesús chica. Y ijeje' can vor chica xquina' antok xca'xaj ri xu'ej ri Jesús chica. 18Y ic'o achi'a' saduceos xa'lka riq'uin ri Jesús. Ri achi'a' re' man niquinimaj ta chi ri quiminaki' can xca'c'astaj-pa, y rumare' ijeje' xquic'utuj cha ri Jesús: 19Maestro, ri Moisés rutz'ib'an can chika, xa c'o jun ache nicon-el nuya' can ri raxjayil y xa man jun ralc'ual nic'ujie' can, jun ruchak' o runimal tic'ulie' riq'uin ri raxjayil, richin quire' nca'c'ujie' ralc'ual ri quiminak chic el. 20Y ijeje' xqui'ej c'a: Xa'c'ujie' i-siete (ivuku') ri quichak'-quinimal-qui'. Ri na'ay xc'ulie', pero xcon-el y man jun ralc'ual xc'ujie' can. 21Ri ruca'n, xc'ulie' riq'uin ri raxjayil, pero xcon-el je' y man jun ralc'ual xc'ujie' can. Ri ruox, can quire' je' mismo xu'on. 22Y quire' xqui'an-el ri i-siete (ivuku') ri quichak'-quinimal-qui'. Y man jun chiquivach ri i-siete (ivuku') re' xc'ujie' ta can ralc'ual. Y antok i-quiminak chic el ri i-siete (ivuku') ri quichak'-quinimal-qui', xcon je' ri ixok. 23Y ri achi'a' saduceos xquic'utuj cha ri Jesús: Antok xtalka ri k'ij chi xca'c'astaj-pa ri quiminaki', ¿choj axjayil xtuoc ri ixok re'? Ruma ri i-siete (ivuku') ri quichak'-quinimal-qui' xuoc caxjayil, xa'cha' cha. 24Entonces ri Jesús xu'ej chica: ¿Man came ix-sachnak ta riq'uin ri xi'ej, ruma man ivata'n ta ri nu'ej ri ruch'ab'al ri Dios? ¿Man ivata'n ta je' ri ru-poder ri Dios? 25Ruma antok ri quiminaki' xca'c'astaj-pa, man xca'c'ulie' ta chic, ni man xca'yo'x ta chi xca'c'ulie'. Ijeje' xa xca'uoc inche'l ri ángeles ri ic'o chila chicaj. 26Pero riq'uin ri quiminaki' ri xca'c'astaj-pa, ¿man itz'atuon ta c'a ri tz'ib'an can ruma ri Moisés, antok xch'o-pa ri Dios cha chupan ri jun k'ayis c'o ruq'uixal ri rub'inan zarza ri nic'at, antok ri Dios xu'ej: Inre' in Ru-Dios ri Abraham, in Ru-Dios ri Isaac y in Ru-Dios ri Jacob? xcha-pa cha. 27Ri Dios man Qui-Dios ta ri quiminaki', xa Qui-Dios ri ic'as. Rumare' inre' ni'ej chi ixre' can ix-sachnak riq'uin ri nti'ej, xcha' ri Jesús chica. 28Y xjiel-apa riq'uin ri Jesús jun chiquivach ri achi'a' escribas. Ri ache re' xra'xaj ri xqui'ej ri achi'a' saduceos cha ri Jesús, y xra'xaj je' ri xu'ej ri Jesús chica ri achi'a' re'. Y choch jaja' can k'alaj chi otz ri xu'ej ri Jesús y mare' xuc'utuj cha: ¿Chica chiquivach ri mandamientos ri xuya' ri Dios cha ri Moisés, ri na'ay? xcha' cha ri Jesús. 29Y ri Jesús xu'ej cha: Ri na'ay mandamiento nu'ej: Tivaxaj ixre' aj-Israel, ri Kajaf jo'c Jun, y re' ja ri Kajaf Dios. 30Can tavajo' ri Avajaf Dios, tavajo' riq'uin nojiel avánima, tavajo' riq'uin nojiel ri ac'aslien, tavajo' riq'uin nojiel ri ano'j y tavajo' je' riq'uin nojiel ri avuchuk'a'. Jare' ri mandamiento ri más nem. 31Y c'o chic jun ruca'n mandamiento ri casi junan riq'uin ri na'ay. Y ri mandamiento re' nu'ej: Can inche'l ri navajo-ka-avi' atre', can quire' je' mismo tavajo' ri a-prójimo. Ja ca'ye' mandamientos re' ri c'o más quikalien, xcha' ri Jesús. 32Y ri ache escriba xu'ej c'a cha ri Jesús: Maestro, can quire-ve. Can ketzij ri xa'ej chi jo'c jun Dios c'o, y man jun chic. 33Nic'atzin chi navajo' riq'uin nojiel avánima, navajo' riq'uin nojiel ri ano'j, navajo' riq'uin nojiel ri ac'aslien y navajo' je' riq'uin nojiel avuchuk'a'. Y can inche'l ri navajo-ka-avi' atre', can quire' je' mismo tavajo' ri a-prójimo; nojiel re' c'o más rakalien que choch ri chicop o jun chic kax ri nca'yo'x choch ri Dios, xcha' ri ache escriba. 34Y antok ri Jesús xra'xaj chi ja'al xi'ka paro' (xu'on entender) ri jun ache re', ri Jesús xu'ej cha: Atre' man naj ta chic atc'o-ve chi ncatuoc pa ru-reino ri Dios, xcha' cha. Y jare' antok man jun chic xutz'om rucovil chi c'o ta ri chica xuc'utuj cha ri Jesús. 35Y ri Jesús chi nca'rutijuoj ri vinak ri quimaluon-qui' riq'uin chire' pa templo, xu'ej c'a chica: ¿Karruma ri achi'a' escribas niqui'ej chi ri Cristo xa choj jun rumáma can ri rey David? 36Ruma ja mismo ri rey David xu'ej ri x'e'x cha ruma ri Espíritu Santo: Ri Ajaf Dios xu'ej cha ri Vajaf: Catz'uye' pa nu-derecha, hasta c'a xca'nya' ri av-enemigos chuxie' avakan. Quire' xu'ej. 37Y xa ri rey David xu'ej Vajaf cha ri Cristo, ¿karruma ni'e'x chi ri Cristo xa choj jun rumáma can ri rey David? xcha' ri Jesús. Y iq'uiy chiquivach ri vinak xka chiquivach ri xca'xaj ri xu'ej. 38Y ri Jesús xu'ej je' chica ri vinak antok nca'rutijuoj: Tib'ana' cuenta-ivi', man ti'an inche'l niqui'an ri achi'a' escribas. Ruma ijeje' can altíra nika chiquivach niquicusaj jucujak tak tziak, chi quire' nca'tz'iet chi utzulaj tak achi'a'. Y can altíra nika chiquivach chi nca'an saludar ri pache' niquimol-ve-qui' q'uiy vinak. 39Y can ja ri na'ay tak ch'acat nicajo' pa tak sinagogas y pa tak va'en. 40Ri achi'a' re' niquimaj nojiel kax quichin ri malca'n-ixoki', y chi ca'nimax chi ja'al quic'aslien, can nca'layuj niqui'an orar. Pero ijeje' can xtika más ri castigo pa quive', xcha' ri Jesús. 41Y ri Jesús tz'uyul choch ri pache' niyo'x-ve can ri ofrenda. Jaja' nca'rutz'at ri vinak ri niquiya' can miera chire'. Xa'rutz'at iq'uiy b'ayoma' ri q'uiy miera niquiya' can. 42Pero xalka jun malca'n-ixok ri puobra. Jaja' xuya' can ca'ye' fichas ri man q'uiy ta oc rakalien. 43Y ri Jesús xa'rayuoj ri ru-discípulos y xu'ej chica: Can ketzij ri ni'ej chiva chi ja ri malca'n-ixok puobra la ri xyo'n can más que choch ri xquiya' can quinojiel ri nic'aj chic. 44Ruma jaja' mesque man q'uiy ta ru-miera c'o, xuya' can nojiel ri c'o riq'uin. Pero ri b'ayoma', mesque q'uiy miera xquiya' can, xa ja ri nu'on suobra quiq'uin, xcha' ri Jesús.

will be added

X\