San Marcos 10

1Ri Jesús xiel-el chire' y x'a c'a Judea. Y xak'ax juc'an ri río Jordán. Chire', iq'uiy vinak xquimol chic qui' riq'uin. Y jaja' xuc'ut ri ruch'ab'al ri Dios, inche'l rub'anun-pa. 2Y jare' antok nic'aj achi'a' fariseos xa'jiel-apa riq'uin, chi niqui'an tentar, xquic'utuj cha xa otz chi jun ache nujach-ri' riq'uin ri raxjayil. 3Y ri Jesús xu'ej chica ri achi'a' re': ¿Chica ri ru'e'n can ri Moisés chiva chi nti'an? xcha' chica. 4Y ijeje' xqui'ej: Ri Moisés xu'on permitir chi xa jun ache nrajo' nujach-ri' riq'uin ri raxjayil, c'o che'l nu'on jun carta ri pache' nu'ej-ve chi nujach-ri' riq'uin y tuya' can, xa'cha' ijeje'. 5Y ri Jesús xu'ej chica: Ruma cof ib'anun cha ri ivánima, rumare' xu'ej chi ti'an quire'. 6Pero antok xtz'ucutaj-pa ri roch-ulief, ache y ixok xa'ru'on ri Dios. 7Rumare' ri ache xca'ruya' can ri rutie-rutata' y xtiquic'an-qui' riq'uin ri raxjayil, 8y ri ica'ye' xa jo'c jun xtiqui'an. Rumare' man chic ica'ye' ta, xa jo'c jun xtiqui'an. 9Ruma c'a re', lo que ri Dios xu'on jun cha, ri ache man tujach roch, xcha' ri Jesús. 10Antok ri Jesús y ri ru-discípulos ic'o chic pa jay, ri discípulos xquic'utuj cha chirij ri xa'ru'ej chica ri achi'a' fariseos. 11Y ri Jesús xu'ej chica: Chica-na ache ri nujach-ri' riq'uin ri raxjayil y nic'ulie' riq'uin jun chic ixok, can nu'on ruch'o'j choch ri raxjayil. 12Y xa ri ixok nujach-ri' riq'uin ri rachajil y nic'ulie' riq'uin jun chic ache, can nu'on pecado choch ri Dios, xcha' ri Jesús. 13Y ri vinak xa'quic'am-pa ac'ola' riq'uin ri Jesús, chi nuya' ruk'a' pa quive' chi nca'ru'on bendecir. Pero ri discípulos xa'quich'olij ri vinak chi man tiqui'an quire'. 14Y antok ri Jesús xutz'at ri niqui'an ri ru-discípulos, xpa rayoval, y xu'ej chica: Tiya' permiso chica ri ac'ola' chi nca'pa viq'uin inre', y man qui'ik'at. Ruma ri ru-reino ri Dios xa quichin ri i-inche'l ac'ola'. 15Y can ketzij ri ni'ej chiva, chi xa jun man nu'on ta recibir ri ru-reino ri Dios inche'l nu'on jun ac'ual, man xtuoc ta chupan, xcha' chica. 16Y xa'ruk'atiej y xuya' ri ruk'a' pa quive' ri ac'ola' chi xa'ru'on bendecir. 17Y antok ri Jesús xiel-el chire' chi xutz'om chic el rub'iey, c'o jun ri anin xalka riq'uin, xalxuquie' choch, y xuc'utuj cha: Utzulaj Maestro, ¿chica ni'an chi nivil ri c'aslien ri man niq'uis ta? xcha' cha. 18Y ri Jesús xu'ej cha: ¿Karruma na'ej otz chuva inre'? Ruma man jun vinak otz, xa jo'c Jun ri otz y re' ja ri Dios. 19Avata'n ri mandamientos ri xuya' ri Dios cha ri Moisés ri ojier can, ri nu'ej: Ri at-c'ulan, man tavuc'uaj-avi' riq'uin jun chic; man caquimisan; man catalak'; man tatz'ak tzij chirij jun chic; man ta'an maña cha jun vinak ruma c'o chica navajo' navalak'aj chuk'a'; ca'b'ana' respetar ri atie-atata'. 20Ri jun re' xu'ej cha ri Jesús: Maestro, nojiel re' c'a in co'l-oc nutz'amuon-pa rub'anic, xcha'. 21Y ri Jesús xutz'at y altíra xrajo'. Y xu'ej cha: C'a c'o jun kax ri man ab'anun ta. Ca'in, tac'ayij nojiel ri c'o aviq'uin y ri rajal tajacha' chiquivach ri i-puobra, chi quire' nic'ujie' ab'ayomal chicaj. Y catam-pa viq'uin, y nca'a chuvij y tatz'ama' ri a-cruz, xcha' cha. 22Pero antok ri jun re' xra'xaj ri tzij ri xu'ej ri Jesús, can xc'axtaj ri titzu'n y nib'isuon ránima x'a, ruma altíra rub'ayomal c'o. 23Entonces ri Jesús xtzu'n quiq'uin ri ru-discípulos y xu'ej chica: ¡Ri c'o q'uiy quib'ayomal, can cuesta chi nca'uoc pa ru-reino ri Dios! 24Y ri ru-discípulos ri Jesús can xa'chapataj ruma ri tzij ri xu'ej ri Jesús. Pero jaja' xu'ej chic jun b'ay chica: Valc'ual, ¡ri quicukub'an quic'u'x chirij ri quib'ayomal, can cuesta chi nca'uoc pa ru-reino ri Dios! 25Xa más fácil nak'ax jun camello chupan jun ruvaruol jun acúxa, que choch jun b'ayuon chi ntuoc pa ru-reino ri Dios. 26Y ri discípulos can más xa'chapataj y niqui'ej chiquivach: ¿Chica c'a xticolotaj? xa'cha'. 27Y ri Jesús xa'rutz'at-apa ri ru-discípulos y xu'ej chica: Ri vinak man nojiel ta kax nca'tiquir niqui'an, pero ri Dios nojiel kax nitiquir nu'on, xcha' chica. 28Y jare' antok ri Pedro xu'ej cha: Ojre' kayo'n can nojiel ri c'o kiq'uin, y oj-b'anak chavij. 29Pero ri Jesús xu'ej: Can ketzij ri ni'ej chiva, chi man jun ri ruyo'n can rachuoch, o runimal, o ruchak', o rana', o rutie-rutata', o raxjayil, o ralc'ual o rulief vuma inre' y ruma ri evangelio; 30man ta xtiyo'x cha cien veces más ri ruc'axiel chupan ri tiempo vacame. Xtiyo'x rachuoch, runimal, ruchak', rana', rutie', ralc'ual y rulief. Can xtu'on sufrir je' pa quik'a' ri vinak ruma b'anak viq'uin, pero chupan-apa ri jun chic tiempo ri chakavach-apa, can xtiyo'x cha ri c'aslien ri man niq'uis ta. 31Pero iq'uiy ri ic'o nab'ayal, ri xca'c'ujie' c'a pa ruq'uisb'al, y iq'uiy ri ic'o pa ruq'uisb'al, xca'c'ujie' nab'ayal, xcha' ri Jesús. 32Ri Jesús, ri ru-discípulos y nic'aj chic vinak, quitz'amuon-el b'ay chi nca'a pa tanamet Jerusalén. Y ja ri Jesús ri b'anak-el chiquivach, y ri ru-discípulos y ri vinak can i-chapatajnak y quixi'in-qui' je' i-b'anak-el chirij. Jun chic b'ay ri Jesús xa'ruc'uaj aparte ri doce (cab'alajuj) discípulos y xu'ej chic chica, ri chica sufrimiento ri xtuk'asaj. 33Jaja' xu'ej chica: Ixre' ivata'n chi c'a pa tanamet Jerusalén nku'a-ve-el, y chire' xtijach-ve ri Xtak-pa chicaj chi xalax chi'icajol pa quik'a' ri principales sacerdotes y pa quik'a' ri achi'a' escribas. Y ijeje' xtiqui'ej chi tiquimisas. Y ijeje' xtiquijach pa quik'a' vinak ri man israelitas ta. 34Y ri vinak re' xca'tze'n chirij, xtiquich'ey, xtiquichub'aj, y c'ajare' xtiquiquimisaj. Pero chi oxe' k'ij xtic'astaj-pa chiquicajol ri quiminaki', xcha' ri Jesús. 35Y ri Jacobo y ri Juan, ri i-ruc'ajuol ri Zebedeo, xa'jiel-apa riq'uin ri Jesús, y xqui'ej cha: Maestro, xa'cha' cha. Ojre' nakajo' chi na'an ri nakac'utuj chava, xa'cha' cha. 36Y jaja' xu'ej chica: ¿Chica ri ntivajo' chi ni'an? xcha'. 37Y ijeje' xqui'ej cha: Ojre' nakajo' chi chupan ri a-reino, na'an chi nkojtz'uye-apa aviq'uin; jun ta nic'ujie' pan a-derecha y jun ta pan av-izquierda. 38Pero ri Jesús xu'ej chica: Ixre' man ivata'n ta ri chica ntic'utuj. ¿Nticoch' came ixre' inche'l ri xti'an chuva inre'? ¿Y nticoch' came ixre' ri sufrimiento ri xtink'asaj inre'? 39Y ijeje' xqui'ej: Nakacoch', xa'cha'. Y ri Jesús xu'ej chic chica: Can ketzij chi ixre' xticoch' ri inche'l xti'an chuva inre'. Can xticoch' je' ri sufrimiento ri xtink'asaj inre'. 40Pero ri ntic'utuj ixre', chi jun nitz'uye' pa nu-derecha y ri jun chic pa nu-izquierda, re' man pa nuk'a' ta inre' c'o-ve chi niya' chiva. Ja ri Dios ri ru'e'n choj chica xtuya-ve chi nca'tz'uye' chire'. 41Y antok ri i-diez (lajuj) chic discípulos xca'xaj ri x'e'x, xpa quiyoval chica ri Jacobo y ri Juan. 42Pero ri Jesús xa'rayuoj ri ru-discípulos y xu'ej chica: Ixre' ja'al ivata'n chi vave' ri choch-ulief, ri nca'b'ano gobernar, ruma ic'o ri vinak pa quik'a', rumare' niquina' chi ijeje' ri i-cajaf. Y quire' je' ri principales, nicajo' chi ca'nimax y can ti'an nojiel ri niqui'ej. 43Pero chi'icajol ixre' man quire' ta. Ruma xa c'o jun ri nrajo' nu'on nem chi'icajol ixre', nic'atzin chi nquixru'on servir. 44Xa jun chivach ixre' nrajo' chi jaja' ri na'ay, can quixrub'ana' servir. 45Ruma ri Xtak-pa chicaj chi xalax chi'icajol, man xpa ta chi ni'an servir, sino chi nu'on servir, y chi nuya' ruc'aslien chi quire' iq'uiy ri nca'colotaj, xcha' ri Jesús. 46Y ri Jesús y ri ru-discípulos xa'b'aka pa tanamet Jericó. Y antok ijeje' ya nca'iel-pa chupan ri tanamet, iq'uiy vinak ri i-b'anak chiquij. Y chuchi' c'a ri b'ay c'o jun muoy Bartimeo rub'e', ruc'ajuol ri Timeo. Jaja' tz'uyul chire' chi nuc'utuj ru-limosna. 47Y antok jaja' xra'xaj chi ja ri Jesús ri aj-Nazaret ri nak'ax chire', jaja' riq'uin ruchuk'a' xch'o' y xu'ej: ¡Jesús, ri at Rumáma can ri rey David, tajoyovaj noch! xcha'. 48Y iq'uiy vinak ri xquich'olij chi man chic tich'o-pa. Pero jaja' xa riq'uin más ruchuk'a' xch'o-pa y xu'ej: ¡Atre' ri at Rumáma can ri rey David, tajoyovaj noch! xcha'. 49Y ri Jesús xra'xaj ri ache, rumare' xpi'ie-ka y xu'ej c'a chi ticayuoj-pa. Y ja xb'acayuoj-pa ri ache muoy y xqui'ej cha: Man taxi'ij-avi'; capi'ie', ri Jesús ncarayuoj, xa'cha' cha. 50Jaja' xuq'uiak can ri ru-capa ri ruk'u'n, xpalaj-pa y xpa riq'uin ri Jesús. 51Y ri Jesús xuc'utuj cha: ¿Chica navajo' chi ni'an? Y ri ache muoy xu'ej cha: Maestro, inre' nivajo' nquitzu'n chic, xcha'. 52Y ri Jesús xu'ej cha: Ca'in, ruma xacukub'a' ac'u'x viq'uin, xac'achoj. Y ja xtzu'n chic, y x'a chirij ri Jesús.

will be added

X\