San Marcos 1

1Quire' xtiquir-pa ri evangelio richin ri Jesucristo ri Ruc'ajuol ri Dios. 2Ri profeta Isaías rutz'ib'an can ri x'e'x cha ruma ri Dios. Quire' nu'ej: Inre' xtintak jun ache na'ay chavach, chi nuchojmij ri ab'iey chavach. 3Ri ache re' xtic'ujie' chupan jun lugar desierto, y jaja' xturak c'a ruchi' chi xtu'ej chica ri vinak ri xca'b'aka riq'uin: Tichojmij-apa rub'iey ri Ajaf, y can choj tib'ana' cha. Quire' nu'ej ri tz'ib'an can. 4Ri ache ri xtak-pa, ja ri Juan el Bautista. Y jaja' nca'ru'on bautizar ri vinak chupan jun lugar desierto. Y nu'ej chica ri vinak ri nca'b'aka riq'uin chi titzalaj-pa cánima riq'uin ri Dios y tiquib'ana' ri nrajo' ri Dios y tiquib'ana' bautizar-qui', chi quire' ni'an perdonar ri qui-pecados ruma ri Dios. 5Y ri vinak ri nca'b'aka riq'uin, can iq'uiy. Ic'o ri i-patanak Jerusalén, y ic'o ri i-patanak nic'aj chic tanamet richin ri Judea, y jaja' nca'ru'on bautizar chire' chupan ri río Jordán. Y niqui'ej c'a ri qui-pecados ri i-quib'anun-pa. 6Ri rutziak ri Juan el Bautista b'anun cha ruve' camello, y jutz'it tz'un rucusan chi ruximuon rupan. Y ri ruti', ja ri sac' y ri cab' ri niril pa tak k'ayis. 7Ri Juan nu'ej chica ri vinak: C'o Jun ri xtipa chuvij inre' ri nixta nuc'ul chi inre' nquiluquie-ka chi niquir ri ximb'al-roch ri ruxajab', ruma jaja' c'o nojiel poder riq'uin que chinoch inre'. 8Inre', ya' ri nicusaj chi nquix'an bautizar. Pero ri Jun ri xtipa, xquixru'on bautizar riq'uin ri Espíritu Santo. 9Ja tiempo re' antok ri Jesús alanak-pa pa tanamet Nazaret ri c'o Galilea y xalka riq'uin ri Juan. Y jaja' x'an bautizar ruma ri Juan chupan ri río Jordán. 10Y antok ri Jesús xiel-pa chupan ri ya', xutz'at chi xjakataj ri rocaj, y ri Espíritu Santo nika-pa inche'l jun paluomix; y choj xka-pa paro' jaja'. 11Y jare' antok c'o Jun ri xch'o-pa chicaj y xu'ej: Atre' ri at Nuc'ajuol; altíra ncanvajo' y niquicuot vánima aviq'uin. Quire' ri xu'ej-pa. 12Y ri Jesús x'an cha ruma ri Espíritu Santo chi x'a chupan jun lugar desierto. 13Y chire' chupan ri lugar desierto xc'ujie-ve, pache' jo'c c'uxuniel tak chicop ic'o. Chire' xc'ujie-ve cuarenta k'ij. Y antok c'o chire', ri Satanás xu'on tentar. Y ri ángeles xqui'an servir ri Jesús. 14C'o chic ri Juan el Bautista pa cárcel antok ri Jesús xtzalaj chic Galilea. Ri Jesús nutzijuoj ri evangelio ri nich'o' chirij ri ru-reino ri Dios, 15y nu'ej: Vacame c'a, ja xalka ri tiempo ri ru'e'n ri Dios; xa cierca chic c'o-ve-pa ri ru-reino. Titzalaj-pa ivánima riq'uin ri Dios y tib'ana' ri nrajo' jaja' y tinimaj ri evangelio, ncha' chica. 16Y jun k'ij antok ri Jesús b'anak chuchi' ri mar Galilea, xa'rutz'at ica'ye' achi'a' ri quichak'-quinimal-qui'; jun ja ri Simón y ri jun chic ja ri Andrés; ijeje' i-tz'amoy-car, mare' niquiya-ka ri quiya'l chupan ri ya'. 17Y ri Jesús xch'o-apa chica ri ica'ye' achi'a' re' y xu'ej chica: Jo' viq'uin, y xtinc'ut chivach che'l nqui'canuj vinak chi nquinquinimaj. 18Ri ica'ye' achi'a' re', ja xquiya' can ri quiya'l y xa'a riq'uin ri Jesús. 19Y c'a jub'a' oc ca'in, ri Jesús xa'rutz'at chic ica'ye' ri quichak'-quinimal-qui' je', ja ri Jacobo y ri Juan, ri i-ruc'ajuol ri Zebedeo. Ijeje' ic'o chupan ri barco niquic'ajuoj ri ya'l richin niquitz'om car. 20Y xpa ri Jesús xa'rayuoj chi nca'a riq'uin. Y ri Jacobo y ri Juan xquiya' can ri quitata' Zebedeo quiq'uin ri muosa chupan ri barco, y xa'a riq'uin. 21Ri Jesús y ri i-b'anak riq'uin xa'lka pa tanamet Capernaum. Y antok nalka ri k'ij richin uxlanien, ri Jesús ni'a pa sinagoga. Jaja' chire' nuc'ut ri ruch'ab'al ri Dios chiquivach ri vinak. 22Y ri xa'c'axan richin, can xa'chapataj ruma ri tzij ri xca'xaj, ruma antok nca'rutijuoj, can k'alaj chi can c'o autoridad pa ruk'a' y man inche'l ta ri achi'a' escribas. 23Y chire' chupan ri sinagoga, c'o-apa jun ache ri c'o jun itziel espíritu riq'uin. Y ri itziel espíritu ri c'o riq'uin ri ache, can xsiq'uin, 24y xu'ej cha ri Jesús: ¿Chica navajo' chika, atre' Jesús aj-Nazaret? ¿Xapa chi nkojaq'uis? Inre' vata'n chica atre', chi at Santo richin ri Dios, xcha' cha. 25Pero ri Jesús xuch'olij ri itziel espíritu: ¡Man chic cach'o' y catiel-el riq'uin ri ache! 26Y ri itziel espíritu xuquiyica-can ri ru-cuerpo ri ache, y nisiq'uin antok xiel-el riq'uin. 27Y ri vinak ri quimaluon-qui' chire', can xa'chapataj antok xquitz'at ri xu'on ri Jesús, y niqui'ej c'a chiquivach: ¿Chica c'a va? Ruma ri nuc'ut jaja' can c'ac'ac'. Antok nich'o', can riq'uin autoridad, y ri itziel tak espíritus can niquinimaj rutzij, nca'cha' ri vinak chiquivach. 28Y cha'nin x'a rutzijoxic ri Jesús ri pa tak tanamet ri ic'o cierca ri Galilea. 29Antok ri Jesús, ri Jacobo y ri Juan xa'iel-pa chupan ri sinagoga, xa'lka chicachuoch ri Simón y ri Andrés. 30Pero antok xa'lka, x'e'x cha ri Jesús chi ri rujitie' ri Simón catz'ol choch ruch'at, ruma c'o c'atan chirij. 31Y ri Jesús xjiel-apa riq'uin ri niyavaj, xutz'om ruk'a' y xupilisaj. Y jo'c quire' xu'on cha, ja xq'uis-el ri c'atan chirij. Y ri ixok re' xa'rutzuk ri Jesús y ri i-b'anak riq'uin. 32Antok ya xka-ka ri k'ij y xcok'a-ka, ri vinak ri ic'o nca'yavaj quiq'uin xa'quic'am-pa choch ri Jesús. Ri nca'yavaj re', diferente roch yab'il ri ntuoc chica y ic'o je' ri c'o itziel tak espíritus quiq'uin. 33Y jub'a' ma quinojiel ri vinak ri ic'o chupan ri jun tanamet re' ri xquimol-qui' chuchi' ri jay pache' c'o-ve ri Jesús. 34Y xa'ru'on sanar iq'uiy ri nca'yavaj, ri diferente roch yab'il ri ntuoc chica. Y xa'ralasaj-el iq'uiy itziel tak espíritus ri ic'o quiq'uin ri vinak. Ri Jesús man xuya' ta permiso chica ri itziel tak espíritus chi xa'ch'o', ruma cata'n chica jaja'. 35Cumaj yan, can c'a k'aku'n, ri Jesús xiel-el pa tanamet y x'a chupan jun lugar pache' man jun vinak chi xb'arub'ana' orar. 36Y ri Simón y ri ic'o riq'uin xa'a chi xi'quicanuj ri Jesús. 37Y antok xquil, xqui'ej cha: Quinojiel ri vinak ncatquicanuj, xa'cha' cha. 38Y jaja' xu'ej chica: Jo' nic'aj chic tanamet ri ic'o cierca, chi nitzijuoj je' ri ruch'ab'al ri Dios chire', ruma richin re' xipa, xcha' ri Jesús. 39Y jaja' nutzijuoj ri ruch'ab'al ri Dios pa tak sinagogas chupan nojiel ri Galilea. Y can xa'ralasaj-el ri itziel tak espíritus ri ic'o quiq'uin ri vinak. 40Xalka riq'uin ri Jesús jun ache niyavaj riq'uin ri yab'il lepra, ja xxuquie-ka choch y nuc'utuj favor xu'ej cha: Xa navajo', c'o che'l nquina'an sanar. 41Y ri Jesús xujoyovaj roch ri ache re'; xuyuk-apa ri ruk'a' y xutz'om-apa y xu'ej cha: Nivajo' chi ncac'achoj. Tiq'uis-el ri yab'il re' chavij, xcha' cha. 42Y can jo'c quire' xu'ej ri Jesús, ri yab'il lepra ri c'o chirij ri ache xq'uis-el y xc'achoj ri ache. 43Entonces ri Jesús xu'ej cha ri ache chi ti'a, pero xu'on mandar cha ri chica nic'atzin chi nu'on. 44Ri Jesús xu'ej cha: Man tatzijuoj chica ri vinak ri xb'anataj aviq'uin, choj ca'in, ac'utu-avi' choch ri sacerdote, y taya' ri nu'ej chupan ri ru-ley ri Moisés, chi quire' nik'alajin chiquivach chi at otz chic vacame, xcha-el cha. 45Pero ri ache can jo'c xuya' can ri Jesús, xutz'om rutzijoxic ri xb'anataj riq'uin jaja'. Y rumare' ri Jesús cha'nin xiel rutzijoxic, y man nitiquir ta chic c'a ntuoc-apa ri pa tak tanamet ri pache' nalka-ve, ruma can iq'uiy vinak ri nca'c'ulu-apa richin. Y rumare' ri Jesús nic'ujie' juviera ri tanamet. Y ri vinak ri nca'lka riq'uin, can nojiel lugar nca'pa-ve.

will be added

X\