San Lucas 6

1Chupan jun k'ij richin uxlanien, ri Jesús y ri ru-discípulos nca'k'ax chupan jun ulief ri ticuon trigo choch. Y ri discípulos nca'quich'up-el ruve' ri trigo, y nca'quib'ir pa quik'a', y nca'quitej. 2Rumare' nic'aj achi'a' fariseos xqui'ej chica ri ru-discípulos ri Jesús: ¿Karruma nquixsamaj chupan ri k'ij richin uxlanien? Re' xajan. 3Pero ri Jesús xch'o-apa chica y xu'ej: ¿Man jun came b'ay ib'anun leer ri tz'ib'an can chirij ri xu'on ri David y ri i-rach'il chupan ri ojier can tiempo antok xnem-pa quipan? 4Ri David xuoc pa rachuoch ri Dios y can ja ri sagrada simíta ri xiruma-pa. Jaja' xuc'ux ri simíta re' y xuya' je' chica ri i-b'anak riq'uin; pero man pecado ta ri xqui'an, mesque ri simíta re' jo'c ri sacerdotes ri nca'c'uxu, xcha' ri Jesús. 5Y xu'ej je' chica: Ri Xtak-pa chicaj chi xalax chi'icajol, Rajaf ri k'ij richin uxlanien. 6Chupan jun chic k'ij richin uxlanien, ri Jesús xuoc ri pa sinagoga y nca'rutijuoj ri quimaluon-qui' chire'. Y chiquicajol ri vinak, c'o jun ache chake'j ri ruk'a' derecha. 7Y ic'o achi'a' escribas y achi'a' fariseos niquitz'at-apa ri Jesús y quiyo'ien chi xa xtu'on sanar ri ache, chi quire' niqui'an acusar chi xsamaj chupan jun k'ij richin uxlanien. 8Pero ri Jesús rata'n chic ri niqui'an pensar ri achi'a' re'. Mare' xu'ej cha ri ache chake'j ri ruk'a': Capalaj y capi'ie' pa nic'aj. Y ri ache ja xpalaj-pa ri pache' c'o-ve y xpi'ie'. 9Xpa ri Jesús xu'ej chica ri vinak ri ic'o chire': Nivajo' c'a nic'utuj chiva: ¿Chica ri más otz ni'an chupan jun k'ij richin uxlanien, ja ri otz o ja ri man otz ta? ¿Ri nicuol jun vinak choch ri camic o niquimisas? xcha' chica. 10Y ri Jesús xa'ruca'yiej quinojiel ri quimaluon-qui' chire', y xu'ej cha ri ache ri chake'j jun ruk'a': Tayuku' la ak'a'. Y ri ache xuyuk ri ruk'a' inche'l ri x'e'x cha ruma ri Jesús, y ja otz xu'on ri ruk'a'. 11Pero ri achi'a' escribas y ri achi'a' fariseos ri ic'o-apa chire' xyacataj quiyoval. Y ja niquic'utuj chiquib'il-qui' chi chica niqui'an cha ri Jesús. 12Y jun k'ij ri Jesús x'a paro' jun juyu' chi xb'arub'ana' orar. Y jun ak'a' xch'o' riq'uin ri Dios. 13Y chupan ri mac'ajan ri chuca'n k'ij, jaja' xa'rayuoj ri ru-discípulos. Chiquicajol ri achi'a' re', xa'rucha' doce (cab'alajuj) y xu'ej apóstoles chica. 14Ri i-doce (cab'alajuj) ri xa'rucha' ri Jesús, ja ri Simón ri xu'ej je' Pedro cha, ri Andrés ri quichak'-quinimal-qui' riq'uin ri Simón, ri Jacobo, ri Juan, ri Felipe, ri Bartolomé, 15ri Mateo, ri Tomás, ri Jacobo ri ruc'ajuol ri Alfeo, ri Simón ri c'o quiq'uin ri achi'a' ri ni'e'x Zelotes chica, 16ri Judas ri quichak'-quinimal-qui' riq'uin ri Jacobo, y ri Judas Iscariote ri xc'ayin richin ri Jesús. 17Y antok ri Jesús y ri ru-apóstoles xa'ka-pa paro' ri juyu', y xa'b'ac'ujie-ka quiq'uin ri nic'aj chic discípulos chupan jun lugar li'an, chire' je' iq'uiy vinak quimaluon-qui'. Ic'o i-patanak Jerusalén y nic'aj chic tanamet ri ic'o Judea, y ic'o i-patanak Tiro y Sidón ri ic'o chuchi' ri mar. Ri vinak re' i-patanak chi nica'xaj ri ruch'ab'al ri Dios ri nutzijuoj ri Jesús, y chi nca'an sanar riq'uin ri quiyab'il. 18Y xa'an je' sanar ri altíra niqui'an sufrir pa quik'a' ri itziel tak espíritus ri ic'o quiq'uin. 19Y quinojiel ri vinak ri nca'yavaj nicajo' niquitz'om-apa ri Jesús, ruma jaja' c'o poder riq'uin y nca'ru'on sanar quinojiel ri nca'yavaj. 20Y ri Jesús xa'ruca'yiej ri ru-discípulos y xu'ej chica: Can ja'al quixquicuot ixre' ri ix puobra, ruma can ivichin ri ru-reino ri Dios. 21Can ja'al quixquicuot ixre' ri ntik'asaj vi'jal, ruma ri Dios xtuya' nojiel chiva. Can ja'al quixquicuot ixre' ri nquixuok' vacame, ruma ri Dios xtuc'ax ri ivok'iej riq'uin tze'n. 22Can ja'al quixquicuot ixre' ri itziel nquixtz'iet cuma ri vinak, y nquixquilasaj-pa chiquicajol, y niqui'an cha ri ib'e' chi man jun rakalien ruma iniman ri nub'e' inre', y nojiel roch itziel ri niqui'an chiva ruma ri Xtak-pa chicaj chi xalax chi'icajol. 23Y antok xtib'anataj nojiel re', quixtze'n y quixquicuot, ruma nem ri ruc'axiel ri xtiyo'x chiva chicaj. Ruma quire' ri sufrimiento ri xquik'asaj ri profetas ri xa'c'ujie' ojier can tiempo, pa quik'a' ri cate't-quimama' ri vinak ri itziel nquixquitz'at vacame. 24Pero juye' ivach ixre' b'ayoma', ruma xixquicuot yan ri choch-ulief. 25Juye' ivach ixre' ri nquixva' ja'al vacame, ruma xtik'asaj vi'jal. Juye' ivach ixre' ri ja'al nquixtze'n vacame, ruma xquixuok' ruma b'is. 26Y juye' ivach antok quinojiel ri vinak otz nca'ch'o' chivij. Ruma ri cate't-quimama' ijeje' otz xa'ch'o' chiquij ri falsos profetas. 27Pero chiva ixre' ri nquinivaxaj, ni'ej c'a: Qui'ivajo' ri iv-enemigos; tib'ana' otz chica ri itziel nquixquitz'at; 28tic'utuj cha ri Dios chi ca'rub'ana' bendecir ri vinak ri nquixqui'an maldecir; y tib'ana' orar pa qui-cuenta ri niquik'ab'aj tzij chivij. 29Y xa c'o jun nuya' jutz'aj k'a' cha ri ak'o'tz, xa taya' chic apa ri jun chic lado choch. Y xa c'o jun numaj-el ri a-capa ri ak'u'n, xa taya' chic can jun atziak cha. 30Chica-na ri c'o nuc'utuj chava, taya' cha ri nrajo'. Y xa c'o jun ri c'o numaj-el chava, man chic c'a tac'utuj cha chi nutzoliej-pa chava. 31Y inche'l ri ntivajo' ixre' chi ri vinak niqui'an chiva, quire' je' tib'ana' quiq'uin ijeje'. 32Ruma xa ja ri nca'jo'n ivichin, xa jare' nqui'vajo', ¿c'o came ruc'axiel xtiyo'x chiva? Ruma quire' je' mismo niqui'an ri man quiniman ta ri Dios, jo'c ri nca'jo'n quichin jare' ri nca'cajo'. 33Y xa jo'c ri nca'b'ano otz chiva, jo'c chica ijeje' nti'an-ve otz je', ¿c'o came ruc'axiel xtiyo'x chiva? Ruma quire' je' mismo niqui'an ri man quiniman ta ri Dios. 34Xa ixre' ntiya' jun kax cha jun pa kajic ruma ntivoyo'iej ri kajb'al richin, ¿c'o came ruc'axiel xtiyo'x chiva? Ruma ri man quiniman ta ri Dios quire' je' mismo niqui'an, nca'quiya' pa kajic ri kax chiquivach ijeje', chi quire' c'o niquich'ec chirij. 35Pero ixre' man ti'an quire'. Xa qui'ivajo' ri iv-enemigos y tib'ana' otz chica. Y antok ixre' ntiya' pa kajic jun kax ivichin, man tivoyo'iej ri kajb'al richin; chi quire' nem ri ruc'axiel ri xtiyo'x chiva. Y xa quire' xti'an ixre', can xtik'alajin chi ixre' ix ralc'ual ri Namalaj Dios ri c'o chicaj. Jaja' otz runo'j quiq'uin ri man jun b'ay niquiya' tiox b'a' cha, y quiq'uin ri itziel quino'j. 36Tijoyovaj quivach ri vinak, inche'l ri Itata' ri c'o chicaj; jaja' can nujoyovaj kavach ojre'. 37Man qui'an juzgar ri vinak, y man xti'an ta quire' chiva ixre'. Man tirayij chiquij ri vinak chi niquik'aj ri itziel tak kax ri nca'qui'an, y ri Dios man xtu'on ta je' quire' iviq'uin ixre'. Tib'ana' perdonar ri quich'o'j ri vinak, y ri Dios quire' je' xtu'on chiva ixre'. 38Xa ixre' riq'uin nojiel ivánima nqui'to' ri vinak riq'uin ri nic'atzin chica, ri Dios xtuya' je' ruc'axiel chiva. Ri ruc'axiel ri xtuya' chiva ri Dios, can q'uiy. Can xtunojsaj, can xtupitz', y xtipulin xtuya' ri Dios chiva. Y can inche'l ri nti'an ixre', quire' xti'an chiva ixre'. 39Y xu'ej je' jun parábola (c'amb'al-tzij) chica. Jaja' xu'ej: ¿C'o came jun muoy ri nitiquir nuyukiej chuk'a' jun chic muoy, y man nca'tzak ta came pa jul? 40Man jun discípulo c'o más ruk'ij choch ri ru-maestro. Xa c'a nratamaj-na nojiel ri nuc'ut choch, después ntiel inche'l ri ru-maestro. 41¿Karruma ja ri q'uin ri c'o pa roch ri av-hermano ri natz'at cha'nin, y man nana' ta ka-avi' chi atre' xa jun chie' k'apal pan avach? 42¿O karruma na'ej cha ri av-hermano: Hermano, taya' chi nivalasaj-el ri q'uin ri k'apal pan avach, y man nana' ta chi atre' xa jun chie' k'apal pan avach? Atre' xa ca'ye' apalaj, tavalasaj-el na'ay ri chie' pan avach atre', chi quire' k'alaj xcatzu'n y xcatiquir xtavalasaj-el ri q'uin ri c'o pa roch ri av-hermano. 43Man jun utzulaj chie' xtuya' ta itziel tak roch, y man jun chie' ri man otz ta, xtuya' ta utzulaj tak roch. 44Ri chie' nina'ax riq'uin ri roch ri nuya' xa otz o man otz ta. Ruma ri chie' ri c'o quiq'uixal man xtiquiya' ta víquix, ni ri k'ayis ri c'o quiq'uixal man xtiquiya' ta uvas. 45Jun utzulaj ache can ja ri utzulaj kax ri nu'ej, ruma jo'c utzulaj tak kax c'o pa ránima. Pero jun ache ri man otz ta, ja ri itziel tak kax ri nu'ej, ruma jare' ri c'o pa ránima. Ruma jun vinak ja ri chica c'o pa ránima ri nu'ej. 46¿Y karruma ixre' nti'ej Ajaf, Ajaf, chuva y xa man nti'an ta ri ni'ej chiva? 47Ni'ej chiva, chica choj-iq'uin junan-ve ri nipa viq'uin y nra'xaj ri nutzij y nu'on ri ni'ej cha. 48Can junan riq'uin ri ache ri xu'on jun rachuoch. Na'ay xu'on-ka ri jul richin ri ru-cimiento ri jay, y paro' ab'aj xuya-ve ri ru-cimiento ri jay. Y antok c'achojnak chic ri jay, xnimar-pa ri río. Y ri río re' xb'arila' ri jay. Pero mesque ri río altíra xnimar y altíra ruchuk'a', man xcovin ta xusiluoj, ruma ri ru-cimiento ri jay re' paro' ab'aj xyo'x-ve. 49Pero ri jo'c nra'xaj ri ni'ej inre' y man nu'on ta ri ni'ej cha, junan riq'uin jun ache ri xu'on ri rachuoch choch ulief, y xa man xuya' ta ru-cimiento. Y antok ri río xnimar-pa, xb'arila-pa ri jay y ja xtzak y xvuluvu'.

will be added

X\