San Lucas 4

1Ri k'ij antok x'an bautizar ri Jesús, jaja' nojnak ránima riq'uin ri Espíritu Santo xiel-pa chupan ri río Jordán. Y ri Jesús xuc'uax ruma ri Espíritu Santo chupan jun lugar desierto. 2Y chire' xc'ujie-ve cuarenta k'ij. Y ri diablo xu'on tentar. Y chupan ri k'ij ri xc'ujie' ri Jesús chupan ri lugar re', man jun kax xutej, y antok xa'k'ax ri k'ij re' xnem-pa rupan. 3Y xpa ri diablo xu'ej cha: Xa ketzij chi atre' at Ruc'ajuol ri Dios, tab'ana' cha ri ab'aj la chi ntuoc simíta. 4Pero ri Jesús xu'ej cha: Tz'ib'an can chupan ri ruch'ab'al ri Dios, chi ri ache man jo'c ta c'a riq'uin ri simíta nic'asie', xa nic'asie' je' riq'uin ri ruch'ab'al ri Dios. 5Y ri diablo xuc'uaj ri Jesús paro' jun nem juyu', y chupan jun rato xuc'ut choch nojiel naciones richin ri roch-ulief. 6Y ri diablo xu'ej cha ri Jesús: Inre' nijach pan ak'a' ri qui-gloria nojiel ri naciones re', chi na'an gobernar pa quive', ruma pa nuk'a' inre' i-jachuon-ve can, y inre' niya' cha ri choj-cha-na ri nivajo' niya-ve. 7Xa atre' ncaxuquie' chinoch chi naya' nuk'ij, nojiel re' xtuoc avichin. 8Pero ri Jesús xu'ej cha: Ca'in Satanás. Ruma ri tz'ib'an can chupan ri ruch'ab'al ri Dios nu'ej: Xa ja ri Kajaf Dios takaya' ruk'ij, y kab'ana' rusamaj jaja'. 9Y ri diablo xuc'uaj ri Jesús c'a chupan ri tanamet Jerusalén, y c'a paro' ri más naj jatol chicaj richin ri templo xb'aruya-ve-el. Y chire' xu'ej cha ri Jesús: Xa ketzij chi atre' ri at Ruc'ajuol ri Dios, tac'aka-ka-avi' vave'. 10Ruma chupan ri ruch'ab'al ri Dios ri tz'ib'an can, nu'ej: Ri Dios xca'rutak-pa ri ru-ángeles aviq'uin, chi ncatquichajij. 11Y xcatquili'iej pa quik'a', chi quire' man xtacajij ta avakan choch ab'aj. 12Pero ri Jesús xu'ej cha ri diablo: Ri ruch'ab'al ri Dios nu'ej: Man ta'an tentar ri Avajaf Dios. 13Y antok ri diablo man xril ta chic chica nu'on cha ri Jesús chi nu'on tentar, xuya' can jun tiempo. 14Y ri Jesús xtzalaj chic Galilea, nojnak ránima riq'uin ri ru-poder ri Espíritu Santo. Y chupan quinojiel tanamet ri ic'o-pa cierca ri Galilea, x'a rutzijoxic ri Jesús. 15Y jaja' nuc'ut ri ruch'ab'al ri Dios pa tak sinagogas ri tanamet ri pache' nak'ax-ve. Y ri vinak ri nca'c'axan ri nu'ej, niquiya' ruk'ij. 16Ri Jesús x'a Nazaret, ri tanamet pache' xq'uiy-pa. Y chupan ri k'ij richin uxlanien, jaja' x'a chupan ri sinagoga, ri can inche'l tu'on. Y antok c'o chic chire', jaja' xpi'ie' chi nu'on leer ri ruch'ab'al ri Dios. 17Y xyo'x pa ruk'a' ri Jesús ri libro ri rutz'ib'an can ri profeta Isaías. Y antok ri Jesús xujak ri libro re', xril ri pache' nu'ej-ve: 18Ri Espíritu richin ri Ajaf c'o pano' inre', ruma can xirucha-pa chi ni'ej ri utzulaj ruch'ab'al ri Dios chica ri i-puobra. Xirutak-pa chi nca'an sanar ri nik'axo cánima pa ruk'a' ri pecado; chi ni'ej chica ri ic'o priexa pa ruk'a' ri pecado, chi c'o che'l nca'colotaj pa ruk'a'; chi ni'an chica ri i-muoy chi nca'tzu'n; chi nca'ncol ri niqui'an sufrir; 19y chi ni'ej chica ri vinak chi ja tiempo va antok ri Ajaf Dios nu'on ri favor. 20Y ri Jesús xub'ot can ri libro y xuya' can cha jun ri nisamaj chire', y xb'atz'uye'. Y quinojiel ri ic'o chupan ri sinagoga choj niquitz'at-apa. 21Y jaja' xch'o' y xu'ej: Vacame nu'on cumplir chivach ixre' ri tz'ib'an can, xcha'. 22Y quinojiel ri vinak ri quimaluon-qui' chire', can xka chiquivach ri Jesús. Y ruma ri utzulaj tak tzij ri xa'ru'ej chica, can xa'chapataj. Y ri vinak re' niqui'ej je' chiquivach: ¿Man ja ta came va ruc'ajuol ri José? nca'cha'. 23Y ri Jesús xu'ej chica: Inre' vata'n ri nti'an pensar chuvij: Doctor, ta'na' curar-avi' atre' mismo. Ojre' kaxan chi q'uiy milagros i-ab'anun Capernaum, tab'ana' je' vave' pan atanamit. 24Y xu'ej je' chica ri quimaluon-qui' chire': Can ketzij ni'ej chiva, man jun profeta ninimax pa rutanamit. 25Inre' ni'ej chi ixre' ivata'n ri xb'anataj pa ru-tiempo ri profeta Elías ri xc'ujie' ojier can antok man xu'on ta job' oxe' juna' riq'uin vaki' ic'. Can ketzij chi iq'uiy malca'n-ixoki' ic'o vave' Israel ri tiempo re', antok xpa altíra vi'jal choch nojiel ri roch-ulief. 26Pero ri Dios man xutak ta ri Elías chi xuto' jun malca'n-ixok vave' Israel. Jaja' xa xutak ri Elías riq'uin jun malca'n-ixok ri c'o chupan ri tanamet Sarepta. Y ri tanamet Sarepta re' c'o cierca ri Sidón. 27Y pa ru-tiempo ri profeta Eliseo ri xc'ujie' ojier can, ri vave' Israel iq'uiy ri nca'yavaj riq'uin ri yab'il lepra. Pero ni jun je' chiquivach x'an sanar, jo'c c'a ri Naamán ri x'an sanar, y jaja' jun ache aj-Siria. 28Y antok ri vinak ri quimaluon-qui' chire' chupan ri sinagoga xca'xaj ri xu'ej ri Jesús chica, xyacataj quiyoval, 29y xa'b'ayacataj-pa y xquilasaj-el chuchi' ri tanamet. Ri jun tanamet re' choch jun juyu' c'o-ve. Rumare' ri vinak xquic'uaj ri Jesús c'a paro' ri juyu' chi niquinima-pa choch parar. 30Pero ri Jesús choj xak'ax chiquicajol ri vinak y x'a. 31Ri Jesús x'a-ka pa tanamet Capernaum, ri c'o Galilea. Y antok nalka ri k'ij richin uxlanien, jaja' nuc'ut ri ruch'ab'al ri Dios chiquivach ri vinak ri pa sinagoga. 32Y ri xa'c'axan richin, can xa'chapataj ruma ri tzij ri nca'ru'ej, can riq'uin autoridad. 33Y chire' chupan ri sinagoga, c'o-apa jun ache ri c'o jun itziel espíritu riq'uin. Y ri itziel espíritu re' can cof xch'o', 34y xu'ej cha ri Jesús: Kojaya' can. ¿Chica navajo' chika, atre' Jesús aj-Nazaret? ¿Xapa chi nkojaq'uis? Inre' vata'n chica atre', chi at Santo richin ri Dios, xcha' cha. 35Y ri Jesús xuch'olij ri itziel espíritu: Man chic cach'o' y catiel-el riq'uin ri ache. Y ri itziel espíritu re' xutzak ri ache pan ulief chiquicajol ri vinak ri quimaluon-qui' chire', xiel-el riq'uin y man jun chic kax xu'on can cha. 36Y ri vinak ri quimaluon-qui' chire', can xa'chapataj antok xquitz'at ri xu'on ri Jesús, y niqui'ej c'a chiquivach: ¿Chica c'a chi tzij va, chi riq'uin autoridad y poder nich'o' chica ri itziel tak espíritus y niquinimaj rutzij y nca'iel-el? nca'cha' ri vinak chiquivach. 37Y x'a rutzijoxic ri Jesús, y rumare' ri vinak ri ic'o cierca ri Capernaum xca'xaj je' ri nca'ru'on ri Jesús. 38Y chupan ri mismo k'ij richin uxlanien re', ri Jesús xiel-pa chupan ri sinagoga y x'a chirachuoch ri Simón. Ri rujitie' ri Simón nijino pa c'atan. Y ri ic'o chire' pa jay xquic'utuj favor cha ri Jesús pa ru-cuenta ri niyavaj. 39Y jaja' xluquie-ka riq'uin ri niyavaj, xuch'olij ri c'atan ri c'o chirij, y ja xq'uis-el ri c'atan ri c'o chirij. Ri ixok re' ja xpalaj-pa y xa'rutzuk ri Jesús y ri i-b'anak riq'uin. 40Antok ya xka-ka ri k'ij, quinojiel ri vinak richin ri tanamet ri ic'o nca'yavaj quiq'uin, xa'quic'am-pa choch ri Jesús. Ri nca'yavaj re', diferente roch yab'il ri ntuoc chica. Y ri Jesús xuya' ruk'a' pa quive' chiquijunal ri nca'yavaj y xa'ru'on sanar. 41Quire' je' nca'iel itziel tak espíritus quiq'uin iq'uiy. Y antok ri itziel tak espíritus nca'iel-el, can cof nca'ch'o' y niqui'ej: Atre' ri Ruc'ajuol ri Dios. Y ri Jesús nca'ruch'olij y man xuya' ta permiso chica chi xa'ch'o', ruma cata'n chi ri Jesús jare' ri Cristo. 42Y antok xsakar-pa, ri Jesús xiel-el pa tanamet y x'a chupan jun lugar pache' manak vinak. Pero ri vinak xb'aquicanuj ri Jesús, y antok xb'aquila-pa, xquik'at choch ruma man nicajo' ta chi ni'a. 43Pero jaja' xu'ej chica: Can nic'atzin je' chi nqui'a nic'aj chic tanamet chi nitzijuoj ri evangelio ri nich'o' chirij ri ru-reino ri Dios, ruma richin re' xitak-pa, xcha' ri Jesús. 44Y jaja' nutzijuoj ri ruch'ab'al ri Dios pa tak sinagogas chupan ri Galilea.

will be added

X\