San Lucas 3

1C'o yan quince juna' tuoc-pa rey ri Tiberio César. Y pa ruk'a' jaja' ic'o icaje' gobernadores. Jun ja ri Poncio Pilato, y jaja' nu'on gobernar ri Judea. Jun ja ri Herodes, y jaja' nu'on gobernar ri Galilea. Jun ja ri Felipe ri quichak'-quinimal-qui' riq'uin ri Herodes, y jaja' nu'on gobernar ri Iturea y ri Traconite. Y ri jun chic ja ri Lisanias, y jaja' nu'on gobernar ri Abilinia. 2Y chupan je' ri tiempo re', ja ri Anás y ri Caifás ri i-sacerdotes ri más c'o quik'ij chire' Israel. Y ja tiempo re' antok xch'o' ri Dios cha ri Juan ri ruc'ajuol ri Zacarías, chupan jun lugar desierto. 3Y ri Juan x'a chupan ri lugares ri ic'o cierca ri río Jordán. Jaja' nu'ej chica ri vinak ri nca'b'aka riq'uin chi titzalaj-pa cánima riq'uin ri Dios y tiquib'ana' ri nrajo' ri Dios y tiquib'ana' bautizar-qui', chi quire' ni'an perdonar ri qui-pecados ruma ri Dios. 4Y riq'uin ri Juan xb'anataj-ve ri inche'l rutz'ib'an can ri profeta Isaías. Quire' nu'ej: C'o jun ache ri xtic'ujie' chupan jun lugar desierto, y jaja' xturak c'a ruchi' chi xtu'ej chica ri vinak ri xca'b'aka riq'uin: Tichojmij-apa rub'iey ri Ajaf, y can choj tib'ana' cha. 5Can nic'atzin chi xca'nojsas nojiel sivan. Y xca'vulex je' nojiel juyu'. Ri cotocak tak b'ay, can choj xti'an chica. Y ri cujcak tak b'ay, li'an xti'an chica. 6Y quinojiel vinak xtiquitz'at ri nu'on ri Dios chi nkojrucol. Quire' nu'ej chupan ri rutz'ib'an can ri Isaías. 7Y antok ri vinak nca'lka riq'uin ri Juan chi nca'ru'on-el bautizar, xu'ej chica: ¡Ixre' xa ix inche'l cumatz! ¿Chica x'e'n chiva chi nquixcolotaj choch ri castigo ri xtutak-pa ri Dios ri chakavach-apa? 8Ixre' nic'atzin ntic'ut chi can ketzij nitzalaj-pa ivánima riq'uin ri Dios y nti'an ri nrajo' jaja'. Y man ti'an-ka pensar ixre' chi ruma ix rumáma can ri Abraham, rumare' nquixcolotaj, man quire' ta. Inre' ni'ej chiva chi ri Dios nicovin nca'ru'on rumáma ri Abraham aún chica ri ab'aj ri ic'o vave'. 9Ri castigo ri nuya' ri Dios ya nipa. Jaja' xtu'on inche'l nu'on jun ache ri c'o chic ri icaj pa ruk'a' chi nca'rukasaj quinojiel ri chie' ri man otz ta quivach niquiya', y xca'ruya' pa k'ak'. 10Y ri vinak xquic'utuj cha ri Juan: ¿Chica naka'an? xa'cha'. 11Y jaja' xu'ej chica ri xa'c'utun-apa: Xa c'o jun c'o ca'ye' rutziak, tuya' jun cha ri manak rutziak. Y xa c'o jun c'o nutej, tuya' cha ri manak nutej, xcha' chica. 12Y riq'uin ri Juan, xalka je' nic'aj achi'a' ri i-maloy-impuestos chi nca'an bautizar. Y ri achi'a' re' xquic'utuj cha ri Juan: Maestro, ¿chica naka'an? xa'cha'. 13Y jaja' xu'ej chica: Jo'c ri impuestos ri ru'e'n ri gobierno, jo'c re' tic'utuj chica ri vinak. Man tic'utuj más. 14Y nic'aj soldados xquic'utuj je' apa cha: Y ojre', ¿chica naka'an? xa'cha'. Ri Juan xu'ej chica: Man timaj ri kax quichin ri vinak ruma c'o autoridad pan ik'a'. Ni man tik'ab'aj tzij chiquij ri vinak. Y quixquicuot riq'uin ri ntich'ec, xcha' chica. 15Y ri vinak ri ic'o-apa riq'uin ri Juan, can quiyo'ien chi nu'ej ri chica jaja', ruma ijeje' niqui'ej pa tak cánima chi ri Juan jare' ri Cristo. 16Rumare' ri Juan xu'ej chica ri vinak: Inre', ya' ri nicusaj chi nquix'an bautizar, pero c'o Jun ri xtipa chuvij inre', ri xquixru'on bautizar riq'uin ri Espíritu Santo y riq'uin k'ak'. Ri Jun ri xtipa, c'o nojiel poder riq'uin que chinoch inre'. Y nixta nuc'ul chi inre' niquir ri ximb'al-roch ri ruxajab'. 17Ri Jun ri xtipa c'o jun inche'l horqueta pa ruk'a' y xtujosk'ij ri ru-trigo pa ru-lugar. Y xtumol ri runak' ri trigo y xtuyac. Y ri q'uin xtuya' pa k'ak' ri man nichup ta. 18Q'uiy tzij inche'l re' xa'rucusaj ri Juan chi xutzijuoj ri utzulaj ruch'ab'al ri Dios chica ri vinak. 19Ri Juan xuch'olij ri gobernador Herodes, ruma man otz ta rub'anun, chi ruc'amun-ka ri Herodías, ri xa raxjayil ri Felipe ri quichak'-quinimal-qui' riq'uin ri Herodes. Y xa'runataj je' nic'aj chic ruch'o'j ri i-rub'anun. 20Y ri Herodes xa xnimar-ka más ruve' ri ruch'o'j ruma xutz'apij ri Juan pa cárcel. 21Y antok nca'an bautizar iq'uiy vinak, x'an je' bautizar ri Jesús, y ri Jesús nu'on orar, y ri rocaj xjakataj, 22y ri Espíritu Santo can xtz'iet chi xka-pa paro', inche'l jun paluomix. Y jare' antok c'o Jun ri xch'o-pa chicaj y xu'ej: Atre' ri at Nuc'ajuol; altíra ncanvajo' y niquicuot vánima aviq'uin. Quire' ri xu'ej-pa. 23Antok ri Jesús xutz'om ri rusamaj, c'o la'k treinta rujuna'. Y chiquivach ri vinak, ri Jesús ruc'ajuol ri José. Ri José ruc'ajuol can ri Elí. 24Y ri Elí ruc'ajuol can ri Matat, y ri Matat ruc'ajuol can ri Leví, y ri Leví ruc'ajuol can ri Melqui, y ri Melqui ruc'ajuol can ri Jana, y ri Jana ruc'ajuol can jun chic ri José je' rub'e'. 25Y ri José ruc'ajuol can ri Matatías, y ri Matatías ruc'ajuol can ri Amós, y ri Amós ruc'ajuol can ri Nahum, y ri Nahum ruc'ajuol can ri Esli, y ri Esli ruc'ajuol can ri Nagai. 26Y ri Nagai ruc'ajuol can ri Maat, y ri Maat ruc'ajuol can jun chic ri Matatías je' rub'e', y ri Matatías ruc'ajuol can ri Semei, y ri Semei ruc'ajuol can jun chic ri José je' rub'e', y ri José ruc'ajuol can ri Judá. 27Y ri Judá ruc'ajuol can ri Joana, y ri Joana ruc'ajuol can ri Resa, y ri Resa ruc'ajuol can ri Zorobabel, y ri Zorobabel ruc'ajuol can ri Salatiel, y ri Salatiel ruc'ajuol can ri Neri. 28Y ri Neri ruc'ajuol can jun chic ri Melqui je' rub'e', y ri Melqui ruc'ajuol can ri Adi, y ri Adi ruc'ajuol can ri Cosam, y ri Cosam ruc'ajuol can ri Elmodam, y ri Elmodam ruc'ajuol can ri Er. 29Y ri Er ruc'ajuol can ri Josué, y ri Josué ruc'ajuol can ri Eliezer, y ri Eliezer ruc'ajuol can ri Jorim, y ri Jorim ruc'ajuol can jun chic ri Matat je' rub'e'. 30Y ri Matat ruc'ajuol can jun chic ri Leví je' rub'e', y ri Leví ruc'ajuol can ri Simeón, y ri Simeón ruc'ajuol can jun chic ri Judá je' rub'e', y ri Judá ruc'ajuol can jun chic ri José je' rub'e', y ri José ruc'ajuol can ri Jonán, y ri Jonán ruc'ajuol can ri Eliaquim. 31Y ri Eliaquim ruc'ajuol can ri Melea, y ri Melea ruc'ajuol can ri Mainán, y ri Mainán ruc'ajuol can ri Matata, y ri Matata ruc'ajuol can ri Natán. 32Y ri Natán ruc'ajuol can ri David, y ri David ruc'ajuol can ri Isaí, y ri Isaí ruc'ajuol can ri Obed, y ri Obed ruc'ajuol can ri Booz, y ri Booz ruc'ajuol can ri Salmón, y ri Salmón ruc'ajuol can ri Naasón. 33Y ri Naasón ruc'ajuol can ri Aminadab, y ri Aminadab ruc'ajuol can ri Aram, y ri Aram ruc'ajuol can ri Esrom, y ri Esrom ruc'ajuol can ri Fares, y ri Fares ruc'ajuol can jun chic ri Judá je' rub'e'. 34Y ri Judá ruc'ajuol can ri Jacob, y ri Jacob ruc'ajuol can ri Isaac, y ri Isaac ruc'ajuol can ri Abraham, y ri Abraham ruc'ajuol can ri Taré, y ri Taré ruc'ajuol can ri Nacor. 35Y ri Nacor ruc'ajuol can ri Serug, y ri Serug ruc'ajuol can ri Ragau, y ri Ragau ruc'ajuol can ri Peleg, y ri Peleg ruc'ajuol can ri Heber, y ri Heber ruc'ajuol can ri Sala. 36Y ri Sala ruc'ajuol can ri Cainán, y ri Cainán ruc'ajuol can ri Arfaxad, y ri Arfaxad ruc'ajuol can ri Sem, y ri Sem ruc'ajuol can ri Noé, y ri Noé ruc'ajuol can ri Lamec. 37Y ri Lamec ruc'ajuol can ri Matusalén, y ri Matusalén ruc'ajuol can ri Enoc, y ri Enoc ruc'ajuol can ri Jared, y ri Jared ruc'ajuol can ri Mahalaleel, y ri Mahalaleel ruc'ajuol can jun chic ri Cainán je' rub'e'. 38Y ri Cainán ruc'ajuol can ri Enós, y ri Enós ruc'ajuol can ri Set, y ri Set ruc'ajuol can ri Adán, y ri Adán ralc'ual ri Dios.

will be added

X\