San Lucas 22

1Y xa cierca chic ri k'ij richin ri namak'ej Pascua, antok nic'ux ri simíta ri manak levadura riq'uin. 2Y ri principales sacerdotes y ri achi'a' escribas niquicanuj ri chica manera niqui'an chi niquiquimisaj ri Jesús. Pero xa niquixi'ij-qui' chiquivach ri vinak. 3Y ri Judas, jun chiquivach ri i-doce (cab'alajuj) ru-discípulos ri Jesús, ri x'e'x je' Iscariote cha, xuoc ri Satanás pa ránima. 4Rumare' x'a quiq'uin ri principales sacerdotes y quiq'uin je' ri qui-jefes ri nca'chajin ri templo, y xu'ej chica che'l xtu'on chi nujach ri Jesús pa quik'a'. 5Y ijeje' xa'quicuot antok xca'xaj re', y xquisuj miera cha. 6Y jaja' xu'on ri trato y ja nucanuj chica manera nu'on chi nujach ri Jesús antok man quimaluon ta qui' vinak riq'uin. 7Xalka ri k'ij richin nic'ux ri simíta ri manak levadura riq'uin, y antok nic'atzin je' chi nca'quimisas ri alaj tak ovejas richin ri Pascua. 8Ri Jesús xa'rutak-el ri Pedro y ri Juan, y xu'ej-el chica: Quix'in, tichojmij ri xtakac'ux chupan ri Pascua. 9Y ri ica'ye' discípulos xquic'utuj cha: ¿Pache' navajo-ve chi nakachojmij? 10Y ri Jesús xu'ej chica: Antok xquixuoc pa tanamet Jerusalén, chire' xtic'ul jun ache ruc'uan ya' chupan jun cántaro. Quix'in chirij hasta ri jay pache' xtuoc-ve. 11Y ti'ej cha ri tata'j chupan ri jay re': Ri Maestro ru'e'n-pa: ¿Pache' c'o-ve ri cuarto ri pache' ni'an-ve ri va'en richin ri Pascua quiq'uin ri nu-discípulos? quixcha' cha. 12Y ri tata'j re' xquixruc'uaj ruca'n piso ri rachuoch. Y chire' c'o jun cuarto nem rupan ri chojmin chic ri rupan; chire' tib'ana-ve ri chica xtakac'ux richin ri Pascua, xcha-el chica. 13Y ri discípulos re' xa'a. Y inche'l ri ru'e'n-el ri Jesús chica, can quire' xb'anataj. Y ijeje' can xquichojmij nojiel ri nic'atzin chica richin ri Pascua re'. 14Y antok xalka ri huora, ri Jesús y ri doce (cab'alajuj) apóstoles xa'tz'uye-apa chirij ri mesa. 15Y ri Jesús xu'ej chica: ¡Altíra nurayin-pa chi antes chi nquicon, nquiva' iviq'uin chupan va jun Pascua va! 16Ruma ni'ej chiva chi man chic xquiva' ta chupan jun chic Pascua, hasta c'a nu'on cumplir chupan ri ru-reino ri Dios, c'ajare' xtin'an chic. 17Y ri Jesús xuc'an-apa ri copa, xuya' tiox b'a' cha ri Dios y xu'ej: Titz'ama' y tikumu' ixvonojiel. 18Can ni'ej chiva chi man chic xtinkun ta ri ruya'l ri uva, hasta c'a ri ru-reino ri Dios xtipa. 19Y xuc'an-apa jun simíta y xuya' tiox b'a' cha ri Dios, y xuper y xuya' chica ri ru-discípulos y xu'ej chica: Va, jare' ri nu-cuerpo ri xtijach pan i-cuenta ixre'. Can tib'ana' cava siempre richin nquininataj. 20Y antok ya i-vi'nak chic, ri Jesús xuc'an-apa ri copa, y xu'ej: Jare' ri nuquiq'uiel ri xti'in antok xquiquimisas. Riq'uin ri nuquiq'uiel, ja xtic'achoj ri c'ac'ac' pacto ri rajo'n-pa ri Dios chi nu'on quiq'uin ri vinak, chi quire' ixre' nquixcolotaj. 21Y ri ache ri xtijacho vichin c'o-pa viq'uin chirij ri mesa. 22Can ketzij chi ri Xtak-pa chicaj chi xalax chi'icajol can ni'a, ruma jare' ri ranun-pa pensar ri Dios chi nib'anataj. ¡Pero juye' roch ri ache ri xtijacho richin! xcha' ri Jesús. 23Entonces ri ru-discípulos ri Jesús ja xquib'ila-ka chiquivach chi chica chiquivach xta'no re'. 24Y ri discípulos xa'yovar-ka chiquivach ijeje' chi chica ri xtuoc más nem. 25Pero ri Jesús xu'ej chica: Ri reyes quichin ri naciones, ruma ic'o ri vinak pa quik'a', rumare' niquina' chi ijeje' ri i-cajaf. Y ri achi'a' ri c'o qui-autoridad pa quive' ri vinak, can utzulaj tak achi'a' ni'e'x chica. 26Pero chi'icajol ixre' man quire' ta. Ruma ri más nem chi'icajol, can tub'ana' más ch'ute'n. Y ri jun chivach ri nic'ujie' pan ive' ixre', tub'ana' inche'l nu'on ri nib'ano servir. 27Ruma, ¿chica ri más nem, ja came ri c'o chirij ri mesa, o ja ri nib'ano servir? ¿Man ja ta came ri c'o chirij ri mesa? Pero inre' inc'o chi'icajol inche'l ri nib'ano servir. 28Ixre' ixc'o viq'uin chupan nojiel ri sufrimientos ri nuk'asan. 29Rumare', inre' xtinya' jun reino pan ik'a' inche'l ri rub'anun ri Nata' Dios chuva inre', 30richin quire' xquixva' y xtikun iya' viq'uin choch ri nu-mesa chupan ri nu-reino. Y ixre' xquixtz'uye' chupan tronos chi nti'an juzgar ri doce (cab'alajuj) tribus richin ri Israel. 31Y ri Ajaf Jesús xu'ej je' cha jun chiquivach ri ru-discípulos: Simón, Simón, ni'ej chava chi ri Satanás ya xixruc'utuj richin xquixru'on tentar. Nrajo' nquixrusiluoj inche'l ni'an cha ri trigo. 32Pero inre' ya xin'an orar pan a-cuenta, chi quire' atre' xtacukub'a' ac'u'x viq'uin siempre. Can xcaka pa ruk'a' ri Satanás. Pero antok ya at-k'axnak chic chupan re', xca'to' ri nic'aj chic nu-discípulos chi quire' xtiquicukub'a' quic'u'x viq'uin siempre, xcha' ri Jesús. 33Y ri Simón xu'ej cha: Ajaf, xa atre' xcatuc'uax pa cárcel, inre' je' nqui'a aviq'uin. Y xa xcaquimisas, inre' je' nquicon aviq'uin, xcha'. 34Y ri Jesús xu'ej cha: Pedro, inre' ni'ej chava chi chupan va ak'a' va, maja' titzirin-pa ri mama', antok atre' oxe' yan mul ta'ej chica ri nca'c'utun chava, chi man avata'n ta noch, xcha' ri Jesús cha ri Pedro. 35Y ri Jesús xuc'utuj chica ri ru-discípulos: Antok xixtak-el y man xinvajo' ta chi xivuc'uaj i-buolsa, ni i-miera, ni jun chic par ixajab', ¿c'o xu'on falta chivach? xcha' chica. Y ijeje' xqui'ej: Man jun. 36Y ri Jesús xu'ej chica: Pero vacame ri c'o ru-buolsa, tuc'uaj. Ri c'o ru-miera, tuc'uaj je'. Y ri manak ru-espada, tuc'ayij ri ru-capa ri nuk'u'j y tulak'o' jun. 37Quire' ni'ej chiva, ruma chi nu'on cumplir ri nu'ej chupan ri ruch'ab'al ri Dios ri tz'ib'an can. Chire' nu'ej: Inche'l jun aj-b'anoy-ch'o'j x'an cha. Quire' ri tz'ib'an can. Y xtu'on cumplir nojiel ri tz'ib'an can chuvij, xcha' ri Jesús. 38Y ri discípulos xqui'ej cha ri Jesús: Ajaf, vave' c'o ca'ye' espadas. Y ri Jesús xu'ej chica: Xa riq'uin re', xcha'. 39Antok ri Jesús xiel-el chire', x'a c'a ri pache' can ti'a-ve siempre, choch ri juyu' Olivos. Y ri ru-discípulos i-b'anak chirij. 40Y antok xb'aka chupan ri lugar re', xu'ej chica: Tib'ana' orar richin chi man quixtzak chupan ri tentación. 41Y ri Jesús x'in chic apa jub'a' chiquivach, y xxuquie-ka chi nu'on orar. 42Y nu'ej chupan ri ru-oración: Nata', xa atre' navajo', chi man ta nik'asaj ri sufrimiento; pero man ta'an ri nivajo' inre', xa ja ri navajo' atre', xcha'. 43Y jun ángel ri patanak chicaj xuc'ut-ri' choch, chi xalruya-ka ruchuk'a'. 44Y altíra nik'axo ránima ri Jesús. Rumare' riq'uin nojiel ránima nu'on orar. Y ri ya' ri ntiel chirij inche'l nima'k tak gotas quic' ri nca'ka pan ulief. 45Antok ri Jesús xpalaj-pa pache' xucul-ve nu'on orar, xpa c'a quiq'uin ri ru-discípulos, y xa'lrila' xa nca'var, ruma nca'b'isuon. 46Y ri Jesús xu'ej chica ri ru-discípulos: ¿Karruma nquixvar? Quixpalaj y tib'ana' orar richin chi man quixtzak chupan ri tentación. 47Y c'a nitzijuon ri Jesús, antok xa'lka iq'uiy vinak riq'uin. Y ri jun chiquivach ri doce (cab'alajuj) discípulos ri rub'inan Judas, jare' ri k'axnak-pa chiquivach ri vinak re'. Y ri Judas xjiel-apa riq'uin ri Jesús chi xutz'ub'aj ruchi'. 48Entonces ri Jesús xu'ej cha: Judas, ¿xatz'ub'aj ri Xtak-pa chicaj chi xalax chi'icajol, chi najach pa quik'a' ri itziel nca'tz'ato richin? xcha' ri Jesús cha. 49Y antok ri discípulos xuya' cuenta chiquivach ri chica ri xtib'anataj, xqui'ej cha: Ajaf, ¿nkojoyovar quiq'uin cha espada? xa'cha'. 50Y jun chiquivach ri discípulos xusoc ri ru-esclavo ri sacerdote ri más c'o ruk'ij, y xralasaj-el ri ruxiquin derecha. 51Y ri Jesús xu'ej chica ri ru-discípulos: Man jun chic chica ti'an. Ca'c'ujie' chire'. Y xpa jaja' xutz'om ri ruxiquin y xu'on sanar. 52Y ri Jesús xu'ej chica ri principales sacerdotes, ri qui-jefes ri nca'chajin ri templo, y ri mama'a' tak achi'a' ri niqui'an gobernar, ri i-patanak tz'amoy-richin: ¿Ixre' ix-patanak inche'l chirij jun alak'uon; mare' ic'amun-pa chie' y espadas? 53Can k'ij-k'ij xic'ujie' iviq'uin pa templo y man jun kax xi'an chuva. Pero ja huora va ri yo'n chiva ixre', chi ja ri k'aku'n ri nich'acuon, xcha' ri Jesús. 54Xquitz'om-el y xquic'uaj c'a chirachuoch ri sacerdote ri más c'o ruk'ij. Y ri Pedro b'anak chirij, pero c'a naj c'o can. 55Y chire' pa nic'aj ri chojay, xquib'ox k'ak' y xa'tz'uye' chirij. Y ri Pedro je' xtz'uye-apa chiquicajol. 56Y jun xtan aj-chi-ic' richin ri sacerdote ri más c'o ruk'ij, antok xutz'at ri Pedro tz'uyul chire' rumak'uon-ri', xutz'at otz y xu'ej: Va ache va rach'il je' ri Jesús, xcha'. 57Pero ri Pedro man xu'ej ta ri ketzij, ruma xu'ej: Xtan, inre' man vata'n ta roch, xcha'. 58Y c'a jub'a' oc tiempo tak'ax, antok c'o chic jun ri xtz'ato chic pa ri Pedro, y xu'ej cha: Atre' at jun chiquivach ri ic'o riq'uin ri Jesús, xcha' cha. Y ri Pedro xu'ej: Ache, man inre' ta, xcha'. 59Jun la'k huora tak'ax, c'o chic jun ri x'e'n chirij ri Pedro: Ri ache va, ketzij chi rach'il je' ri Jesús, ruma aj-Galilea, xcha'. 60Y ri Pedro xu'ej cha: Ache, man vata'n ta chica ri na'ej. Y c'a nich'o' ri Pedro antok ri mama' xtzirin-pa. 61Y ri Ajaf Jesús xtzu'n can chirij y xutz'at-pa ri Pedro. Y ri Pedro xalka paro' ri tzij ri ru'e'n ri Ajaf cha: Antes c'a maja' titzirin-pa ri mama', antok atre' oxe' yan mul ta'ej chica ri nca'c'utun chava, chi man avata'n ta noch. 62Y ri Pedro xiel-el juviera y xuok' amargamente. 63Y ri achi'a' ri i-chajiyuon richin ri Jesús nca'tze'n chirij y niquich'ey je'. 64Y xquitz'apij nak'aroch y xquipaj rutzub'al y niquic'utuj cha: Ta'ej chika: ¿Chica ri xch'ayo avichin? nca'cha' cha. 65Y q'uiy je' pakon tak tzij ri niqui'ej cha. 66Antok xsakar-pa, xquimol-qui' ri mama'a' tak achi'a' ri niqui'an gobernar chiquicajol ri israelitas, ri principales sacerdotes, y ri achi'a' escribas; ruma ijeje' ri autoridades quichin ri israelitas. Ri Jesús xuc'uax chiquivach ijeje', y xquic'utuj cha: 67Ta'ej chika: ¿Atre' ri Cristo? xa'cha'. Pero ri Jesús xu'ej chica: Xa ta ni'ej chiva chi inre', man ntinimaj ta. 68Y quire' je', xa ta c'o ri nic'utuj-apa chiva, ixre' man xti'ej ta pa chuva, y man xquinitzokopij ta el je'. 69Pero desde vacame, ri Xtak-pa chicaj chi xalax chi'icajol, xtib'atz'uye' pa ru-derecha ri Dios ri nitiquir nu'on nojiel. 70Y quinojiel xquic'utuj cha ri Jesús: ¿Atre' ri Ruc'ajuol ri Dios? xa'cha'. Y ri Jesús xu'ej chica: Ixre' nquix'e'n chi inre', xcha' chica. 71Y ijeje' xqui'ej: Man chic nic'atzin ta chi nalka jun chic chi nalru'ej chika chi man otz ta ri i-rub'anun. Ruma ojre' mismo xkaxaj ri xu'ej, xa'cha'.

will be added

X\