1 Ri Jesús xutz'at chi ri b'ayoma' niquiya' can miera pache' niyo'x-ve can ri ofrenda. 2 Y quire' je' xutz'at jun malca'n-ixok ri altíra puobra, xuya' can ca'ye' fichas ri man q'uiy ta oc rakalien. 3 Y mare' xu'ej chica ri ru-discípulos: Can ketzij ri ni'ej chiva chi ja ri malca'n-ixok puobra la ri xyo'n can más que chiquivach quinojiel. 4 Ruma jaja' mesque man q'uiy ta ru-miera c'o, xuya' can nojiel ri c'o riq'uin cha ri Dios. Pero ri b'ayoma', mesque q'uiy miera xquiya' can, xa ja ri nu'on suobra quiq'uin, xcha' ri Jesús. 5 Y ic'o ri quitz'amuon tzij chirij ri templo. Y niqui'ej chi altíra ja'al rub'anic b'anun cha y ja'al tak ab'aj ri i-cusan, y nojiel ri choj cha b'anun adornar, nojiel re' ja ri vinak i-sipayuon, nca'cha'. Y ri Jesús xu'ej chica: 6 Xtalka jun k'ij antok nojiel ri ntitz'at vave' xca'vulex. Quinojiel ri nima'k tak ab'aj ri i-cusan, can xca'vulex, y man jun ab'aj ri xtic'ujie' can pa ru-lugar, xcha' chica. 7 Y ri discípulos xquic'utuj cha ri Jesús: Maestro, ¿jampe' c'a xtib'anataj ri xa'ej? ¿Y chica señal xtib'anataj chi ya nu'on nojiel re'? xa'cha' cha. 8 Y ri Jesús xu'ej chica: Tib'ana' cuenta-ivi' chi man jun tib'ano maña chiva. Ruma iq'uiy ri xca'pa y xtiqui'ej: Inre' ri Cristo. Ri tiempo xa cierca chic c'o-ve, xca'cha'. Pero ixre' man quix'a chiquij. 9 Y antok xtivaxaj chi nib'anataj guerras o ri vinak pa tak tanamet nca'palaj-pa chiquij ri autoridades, man tixi'ij-ivi', ruma nic'atzin chi nojiel re' nib'anataj na'ay, pero man ja ta yan re' chi niq'uis ri roch-ulief. 10 Y ri Jesús xu'ej je': Jun nación xtipalaj chirij jun chic nación y jun reino xtipalaj chirij jun chic reino. 11 Xtu'on nima'k tak cub'rakan chica-na lugar, xtu'on vi'jal y xca'pa yab'il. Chila chicaj xca'b'anataj kax ri xtiquiya' altíra xib'inre'l y xca'tz'atataj nima'k tak señales chila chicaj. 12 Pero antok maja' ca'b'anataj nojiel re', ixre' xquixtz'am y xti'an chiva chi nti'an sufrir. Xquixjach pa quik'a' ri achi'a' i-principales pa tak sinagogas. Xquixtz'apes pa cárcel. Xquixuc'uax chiquivach reyes y chiquivach gobernadores. Nojiel re' xtik'asaj ruma iyo'n ivánima viq'uin. 13 Y antok quire' xti'an chiva, ixre' tib'ana' aprovechar chi xquinitzijuoj chiquivach ijeje'. 14 Y can tic'ujie' pa tak ivánima chi man nic'atzin ta chi nti'an pensar más ri chica tzij nticusaj chi nti'an defender-ivi', 15 ruma inre' ri xquiyo'n-pa ri tzij chiva. Y xtinya' je' ino'j chi quire', riq'uin ri no'j re', xtitz'apij quichi' ri itziel nca'tz'ato ivichin. 16 Y hasta ri itie-itata', ri ichak' o inimal, ri ivach'alal o ri iv-amigos ri xca'jacho ivichin y ic'o chivach ixre' ri xca'quimisas. 17 Can quinojiel vinak, itziel xquixquitz'at ruma iyo'n ivánima viq'uin. 18 Pero man jun ive' xtitzak-el. 19 Riq'uin ri i-paciencia xtivil ri utzulaj c'aslien ri man niq'uis ta. 20 Y antok xtitz'at chi ri tanamet Jerusalén quicholojin-qui' soldados chirij, tivatamaj c'a chi xa jub'a' chic tiempo nrajo' chi ni'an destruir. 21 Entonces ri ic'o Judea, ca'numaj-el pa tak juyu'. Ri ic'o pa tanamet Jerusalén, ca'iel-pa chupan. Y ri ic'o pa tak juyu', man chic c'a ca'uoc-oc chupan ri Jerusalén. 22 Ruma ja k'ij re' ri xtiyo'x ruc'axiel nojiel ri i-rub'anun ri tanamet re', chi quire' nu'on cumplir c'a nojiel ri tz'ib'an can chupan ri ruch'ab'al ri Dios. 23 ¡Can juye' quivach ri ixoki' ri ic'o encinta (embarazada) antok xtalka ri k'ij re', y quire' je' ri ixoki' ri c'a niquiya' quitz'un ri quixulu'! Ruma xtipa jun gran sufrimiento paro' ri roch-ulief y xtika c'a ri rayoval ri Dios paro' ri tanamet re'. 24 Iq'uiy c'a xca'con cha espada pa quik'a' ri soldados. Y nic'aj chic vinak xca'c'uax nic'aj chic naciones cuma ri soldados. Y ri tanamet Jerusalén xtixak' can cuma vinak ri man israelitas ta, hasta c'a xtitz'akat-na ri tiempo ri yo'n chica. 25 Y q'uiy c'a señales xca'b'anataj riq'uin ri k'ij, ri ic' y ri estrellas (ch'umil). Y ri vinak ri ic'o choch-ulief man xtiquil ta chica xtiqui'an, xa xtisach quino'j ruma ri mar más xtik'ajan, y más xtib'alko't riq'uin ruchuk'a'. 26 Y ri vinak, ruma niqui'an imaginar ri xtib'anataj ri choch-ulief, xtiqui'an desmayar-qui' ruma xib'inre'l. Can nojiel c'a ri ic'o chicaj xca'silos. 27 Entonces ri vinak xtiquitz'at ri Xtak-pa chicaj chi xalax chi'icajol, chi xtika-pa chupan jun mukul riq'uin namalaj poder y namalaj ruk'ij, xcha' ri Jesús. 28 Y antok xtitz'at chi nojiel re' nca'b'anataj, quixquicuot y tic'ujie' más ruchuk'a' ri ivánima, ruma ya nalka ri k'ij chi nquixcolotaj-el choch ri ulief, xcha' ri Jesús. 29 Jare' antok jaja' xu'ej je' jun parábola (c'amb'al-tzij) chica: Titz'ata' ri víquix y nojiel ri chie'. 30 Antok ya nca'iel-pa quixak, ivata'n chi ri ru-tiempo ri sak'ij ya nalka. 31 Y quire' je' antok xtitz'at chi nca'b'anataj ri kax ri xin'ej, tivatamaj c'a chi cierca chic c'o-ve ri ru-reino ri Dios. 32 Can ketzij ni'ej chiva, chi nojiel re' xtib'anataj antok ri vinak richin ri tiempo vacame c'a ic'o ri choch-ulief. 33 Ri roch-ulief y ri rocaj can xca'q'uis. Pero ri nuch'ab'al man xtiq'uis ta quire', xa can xtib'anataj ri nu'ej. 34 Tib'ana' cuenta-ivi'. Man ti'a ivánima chirij ri va'en, man quixk'ab'ar, y man jo'c ta oc ri nic'atzin chiva ri choch-ulief ri nti'an pensar, y antok xtina', xa ja xalka ri k'ij chi inre' nquinalka. 35 Xa xtalka inche'l nu'on jun trampa. Quire' xtu'on antok xtalka pa quive' quinojiel ri vinak ri ic'o choch-ulief. 36 Rumare' tib'ana' cuenta-ivi' y siempre tib'ana' orar, chi nquixcolotaj choch nojiel ri sufrimiento ri xtipa paro' ri roch-ulief, y chi quire' otz ri ic'aslien nquixalka choch ri Xtak-pa chicaj chi xalax chi'icajol, xcha' ri Jesús chica ri ru-discípulos. 37 Y ri pak'ij ri Jesús nic'ujie' pa templo, nca'rutijuoj ri vinak riq'uin ri ruch'ab'al ri Dios. Y chak'a' ni'a choch ri juyu' rub'inan Olivos, y chire' nic'ujie-ve. 38 Y iq'uiy vinak ri nca'lka mac'ajan yan ri pa templo chi nica'xaj ri nu'ej.
