San Lucas 2

1Y chupan ri tiempo re', ri Augusto César ri emperador xu'on mandar chi quinojiel vinak tiquib'ana' empadronar-qui'. 2Antok x'an ri na'ay censo re', ri gobernador chupan ri nación Siria ja ri Cirenio. 3Y ri vinak ri ic'o chupan ri nación Israel nca'a chi nca'an empadronar pa tak quitanamit ri cate't-quimama'. 4Y ri José xiel-el ri pa tanamet Nazaret, ri c'o chupan Galilea, y x'a c'a pa rutanamit ri rey David, ri ni'e'x Belén cha, ri c'o chupan Judea, ruma jaja' rumáma can ri rey David. 5Ri José rich'ilan ri María, ri xtan ri ruc'utun chi nic'ulie' riq'uin, xa'a c'a Belén chi xi'quina' empadronar-qui'. Y ri María c'o chic encinta (embarazada). 6Y c'a chire' pa tanamet Belén ic'o-ve antok ri María xtz'akat ri ruk'ij chi nalax ri ruxulu'. 7Y ja xalax ri na'ay ral-ala', y ja'al xumutz ri xulu' pa tziak, y xucotz'ob'a' pache' niyo'x-ve quivay ri avaj, ruma manak chic lugar chupan ri posada. 8Cierca ri Belén ri ak'a' re', ic'o ri nca'quichajij qui-ovejas pa k'ayis. 9Jare' antok xuc'ut-ri' chiquivach jun ángel ri patanak chicaj riq'uin ri Ajaf. Y ijeje' altíra xquixi'ij-qui' ruma ri ángel, y ruma je' ri rusakil ri Ajaf ri xu'on pak'ij quiq'uin. 10Pero ri ángel xu'ej chica: Man tixi'ij-ivi', ruma inre' c'o utzulaj tak tzij nuc'amun-pa chiva, y ri utzulaj tak tzij re' quichin quinojiel vinak ri ic'o choch-ulief chi xca'quicuot. 11Tivaxaj ri xtin'ej chiva: Chire' Belén, ri rutanamit ri rey David, vacame xalax ri Salvador (caloy-quichin ri vinak), ri CRISTO, ri Ajaf. 12Ri ratal ri xulu' re' ri xtivil, xtitz'at chi mutzun pa tziak y cotz'ob'an pache' niyo'x-ve quivay ri avaj, xcha' ri ángel. 13Y jun arapienta xa'b'a'iel chic pa riq'uin ri ángel nic'aj chic ángeles ri i-patanak chicaj. Can iq'uiy. Y ijeje' niquiya' ruk'ij ri Dios, y niqui'ej: 14¡Altíra niyo'x ruk'ij ri Dios chicaj! ¡Y vave' choch-ulief xalka ri paz chiquicajol ri vinak, ruma ri Dios altíra nca'rajo'! 15Y jo'c quire' xqui'ej can ri ángeles, ja xa'a chicaj. Y can jo'c xa'a ri ángeles re', ri quichajin qui-ovejas ja xqui'ej-ka chiquivach: Jo' pa tanamet Belén. Jo' chutz'atic ri xb'anataj. Ruma ri Ajaf Dios xutak-pa ri rub'ixic chika. 16Y jun-anin xa'a pa tanamet chi niquitz'ata', y xa'b'aquila' ri María, ri José y ri ac'ual cotz'ob'an pache' niyo'x-ve quivay ri avaj. 17Antok xquitz'at ri ac'ual, ja xquitz'om rutzijoxic ri x'e'x chica ruma ri ángel, chirij ri ac'ual re'. 18Y quinojiel ri nca'c'axan quichin, can xa'chapataj ruma ri utzulaj tak tzij ri niquitzijuoj ri nca'chajin ovejas. 19Y ri María can xa'ruyac c'a pa ránima nojiel ri tzij re', y nu'on je' pensar chirij ri tzij re'. 20Y ri nca'chajin ovejas xa'tzalaj chiquij niqui'an nem cha ri rub'e' ri Dios, y niquiya' je' ruk'ij ruma nojiel ri xquitz'at y xca'xaj, can xb'anataj inche'l ri xu'ej can ri ángel. 21Antok xtz'akat ocho (vakxaki') k'ij talax ri ac'ual, x'an ri circuncisión cha, y JESUS ri rub'e' ri xquiya', ruma ja b'i'aj re' ri xu'ej can ri ángel cha ri María, antok c'a maja' c'o encinta (embarazada). 22Y antok xtz'akat ri k'ij inche'l nu'ej ri ru-ley ri Moisés chi ri ixoki' ri nic'ujie' cal niqui'an purificar-qui', ri María y ri José xquic'am-pa ri ac'ual pa tanamet Jerusalén chi niqui'an presentar choch ri Ajaf Dios. 23Quire' xqui'an ruma ri ru-ley ri Ajaf Dios nu'ej: Nojiel na'ay ala' ri xtalax, can richin ri Dios. 24Ri José y ri María can xqui'an inche'l nu'ej chupan ri ru-ley ri Ajaf Dios. Ijeje' xquiya' choch ri Dios ca'ye' paluomix, ruma ri ley nu'ej: Ca'ye' paluomix nima'k o ca'ye' ch'ute'k. 25Y chire' pa tanamet Jerusalén ri tiempo re', c'o jun ache rub'inan Simeón. Ri jun ache re' can choj ruc'aslien y can nuya' ruk'ij ri Dios. Ri Simeón can c'o ri Espíritu Santo riq'uin y royo'ien chi nca'cuol ri israelitas. 26Y ri Espíritu Santo ru'e'n chic cha ri Simeón chi man nicon ta yan, c'a ja-na c'a antok rutz'atuon chic can ri Cristo ri xtutak-pa ri Ajaf Dios. 27Y chupan ri k'ij antok ri rutie-rutata' ri xulu' Jesús xquic'uaj pa templo chi niqui'an inche'l ri nu'ej ri ley, can ja k'ij re' xalka ri Simeón pa templo, ruma quire' xrajo' ri Espíritu Santo. 28Ri Simeón xuk'atiej ri xulu', y richin xuya' ruk'ij ri Dios xu'ej: 29Ajaf, vacame c'a ri in a-siervo xa can otz chic chi nquicon-el, xa can c'o chic paz viq'uin, ruma inche'l ri a'e'n chuva, can quire' xb'anataj. 30Ri nak'anoch xquitz'at can ri Salvador (caloy-kichin) ri patanak aviq'uin, 31ri xaya-pa atre' chiquivach quinojiel vinak. 32Jaja' je' ri Luz quichin ri man israelitas ta, ruma jaja' ri xtic'utu ri ab'iey chiquivach. Y ojre' ri atanamit Israel can xtic'ujie' kak'ij ruma jaja', xcha' ri Simeón. 33Ri José y ri María can xa'chapataj antok xca'xaj ri xu'ej ri Simeón chirij ri xulu'. 34Y después ri Simeón xa'ru'on bendecir ri José y ri María. Antok rub'anun chic quire', xu'ej c'a cha ri María, ri rutie' ri xulu': Tavaxaj c'a, ruma ri xulu' re', iq'uiy chiquivach ri kavanakil israelitas xca'colotaj. Y iq'uiy je' ri xca'tzak, ruma can itziel xtiquitz'at. 35Can jaja' c'a xtib'ano chi xtik'alajin-pa ri itziel ri c'o riq'uin cánima ri vinak. Y xtana' c'a atre' chi can inche'l jun espada ri xtusoc ri avánima, xcha' cha. 36Chire' pa templo c'o je' ri Ana ri profetisa. Jaja' rumi'al can jun ache Fanuel rub'e', y rumáma can ri Aser, ri jun ache ri xc'ujie' ojier can. Ri Ana re' jumul chic aviela. Jaja' c'a co'l-oc antok xc'ulie'. Y jo'c siete (vuku') juna' xquic'uaj-qui' riq'uin ri rachajil, ruma xa cha'nin xcon-el ri ache choch. 37Y jaja' malca'n durante ochenta y cuatro juna', y can k'ij-k'ij nic'ujie' pa templo. Jaja' nu'on ayuno y oración chi nuya' ruk'ij ri Dios, y quire' nu'on chi pak'ij chi chak'a'. 38Antok ri Ana xutz'at ri xulu', x'a-apa riq'uin. Y xuya' tiox b'a' cha ri Dios ruma ri xulu' re'. Y chica ri vinak aj-Jerusalén ri quiyo'ien chi nca'cuol, xutz'om rutzijoxic chirij ri ac'ual. 39Ri José y ri María xqui'an nojiel ri nu'ej ri Ajaf Dios chupan ri ru-ley, ri nic'atzin chi ni'an antok c'a jub'a' k'ij talax jun ac'ual. Después xa'tzalaj chiquij chicachuoch Nazaret, ri c'o chupan Galilea. 40Y ri ac'ual niq'uiy y nic'ujie-ka ruchuk'a' b'anak. Y nic'ujie' más runo'j, y c'o ri ru-favor ri Dios paro'. 41Ri rutie-rutata' ri Jesús, can juna-juna' nca'a pa tanamet Jerusalén antok nalka ri k'ij richin ri namak'ej Pascua. 42Y antok ri Jesús c'o chic doce (cab'alajuj) rujuna' y xalka chic jun b'ay ri namak'ej Pascua, ijeje' xa'a c'a pa tanamet Jerusalén, inche'l ri costumbre ri niqui'an quinojiel ri israelitas. 43Antok ya k'axnak chic ri namak'ej Pascua, ri María y ri José xquitz'om b'ay chi xa'tzalaj chiquij chicachuoch, pero ijeje' man cata'n ta chi ri ac'ual Jesús xa xc'ujie' can chire' pa tanamet Jerusalén. 44Ijeje' xqui'an pensar chi ri ac'ual b'anak chiquicajol ri vinak, y quire' xa'in jun k'ij y xquicanuj quiq'uin ri cach'alal y quiq'uin je' ri cata'n quivach. 45Pero ruma man xquil ta, ri José y ri María xa'tzalaj chic can chi niquicanuj ri ac'ual pa tanamet Jerusalén. 46Y k'axnak chic oxe' k'ij tisach ri ac'ual, ijeje' xquil ri ac'ual pa templo. Ri ac'ual tz'uyul-apa quiq'uin ri achi'a' maestros richin ri ley, nra'xaj ri niqui'ej y c'o je' ri nuc'utuj-apa chica. 47Y quinojiel ri nca'c'axan ri nu'ej ri ac'ual xa'chapataj, ruma jaja' can ja'al nitiquir nuya' respuesta chica. Y can k'alaj chi nojiel ni'ka paro' (nu'on entender) y c'o runo'j. 48Chire' pa templo c'o-ve ri Jesús antok ri María y ri José xb'aquila'. Ijeje' can xa'chapataj. Y ri rutie' xu'ej cha ri ral: ¿Karruma quire' xa'an chika? Tatz'ata'; la atata' y inre' can at-kacanun-pa. Y can nik'axo chic kánima ruma manak ncatkil. 49Y jaja' xu'ej chica: ¿Karruma nquinicanuj? ¿Man ivata'n ta c'a chi inre' ja ri nrajo' ri Nata' Dios, jare' ri nic'atzin chi ni'an? 50Pero ri tzij ri xu'ej ri ac'ual chica ri José y ri María man xi'ka ta pa quive' (man xqui'an ta entender). 51Y ri ac'ual x'a quiq'uin chicachuoch, pa tanamet Nazaret. Ri ac'ual can nunimaj quitzij. Y nojiel ri xb'anataj Jerusalén riq'uin ri ac'ual, ri rutie' xa'ruyac c'a riq'uin ránima. 52Y ri Jesús can niq'uiy y can quire' je' ri runo'j. Y ja'al nitz'iet ruma ri Dios, y ja'al je' nitz'iet cuma ri vinak.

will be added

X\