San Lucas 19

1Y ri Jesús xuoc pa tanamet Jericó, y choj nak'ax chire'. 2Y chupan ri tanamet re' c'o jun ache b'ayuon rub'inan Zaqueo. Ri ache re', jare' ri qui-jefe ri maloy-impuestos. 3Y jaja' nutej ruk'ij chi nutz'at ri Jesús, pero ruma iq'uiy vinak ic'o y xa co'l-oc rakan, rumare' man nicovin ta nutz'at. 4Rumare' jaja' jun-anin xak'ax y xb'ajotie' chuk'a' jun chie' sicómoro chi quire' nutz'at-el ri Jesús, ruma tiene que nak'ax chire'. 5Y antok ri Jesús xb'aka chire', xtzu'n-el chicaj chuk'a' ri chie', y xu'ej cha: Zaqueo, cha'nin caka-pa, ruma vacame nic'atzin chi nquib'aka chavachuoch chi nquinuxlan jub'a' chire', xcha' cha. 6Y ri Zaqueo cha'nin xka-pa, y can niquicuot xu'on recibir ri Jesús pa rachuoch. 7Antok ri vinak quire' xquitz'at, xqui'ej-ka chi ri Jesús xa pa rachuoch jun ache pecador xb'ac'ujie-ve. 8Y ri Zaqueo xpi'ie' y xu'ej cha ri Ajaf Jesús: Ajaf, vacame la mitad ri nub'ayomal niya' chica ri i-puobra. Y xa c'o valak'an cha jun, can caje' chic más ruc'axiel xtintzoliej cha. 9Y ri Jesús xu'ej cha: Vacame xalka ri salvación (colotajic) chupan va jay va, ruma jaja' jun rumáma can ri Abraham. 10Ruma ri Xtak-pa chicaj chi xalax chi'icajol, can xpa chi nca'rucanuj y chi nca'rucol ri i-sachnak chupan ri pecado, xcha' ri Jesús. 11Antok ri Jesús ru'e'n chic nojiel re' chica ri vinak, xutzijuoj jun parábola (c'amb'al-tzij) chica, ruma cierca chic c'o-ve chi ni'ka Jerusalén y ruma je' ri vinak ri nca'c'axan richin, niqui'an pensar chi antok jaja' xti'ka pa tanamet, can ja xtik'alajin ri ru-reino ri Dios. 12Y jaja' xu'ej: C'o jun utzulaj ache x'a jun chic nación ri naj c'o-ve, chi ni'an-pa rey cha y c'ajare' nitzalaj-pa. 13Pero antok c'a maja' ti'a, xa'rayuoj i-diez (lajuj) rusamajiel y xuya' can diez (lajuj) minas chica, y xu'ej chica: Quixsamaj chirij ri xinya' can chiva hasta c'a antok xquitzalaj-pa inre', xcha' can chica. 14Pero ri ruvanakil ri ache re' itziel niquitz'at, y rumare' xa'quitak-el nic'aj achi'a' chupan ri nación ri pache' ni'an-pa rey cha. Y x'e'x-el chica: Ojre' man nakajo' ta chi ri ache re' ntuoc ka-rey, xa'cha'. 15Pero ri jun ache re' x'an-pa rey cha, y después xtzalaj-pa. Y antok c'o chic ri pa ru-nación, xutak quiyoxic ri rusamajiel ri ruyo'n can miera chica, ruma nrajo' nuna'iej jane' (jaro') miera quich'acuon chiquijunal. 16Antok xalka ri na'ay samajiel, xu'ej: Ajaf, ri mina ri xaya' can chuva xinch'ec diez (lajuj) más, xcha'. 17Y ri ache, rey chic, xu'ej cha: Otz ri xa'an. At jun utzulaj nusamajiel. Y ruma otz xa'an riq'uin ri jub'a' xinya' can pan ak'a', vacame niya' diez (lajuj) tanamet pan ak'a' chi nca'an gobernar, xcha' ri rey cha. 18Antok xalka jun chic samajiel, xu'ej: Ajaf, ri mina ri xaya' can chuva xinch'ec vu'uo' más, xcha'. 19Y ri rey xu'ej je' cha: Ruma otz ri xa'an riq'uin ri jub'a' ri xinya' can chava, vacame niya' vu'uo' tanamet pan ak'a' chi nca'an gobernar, xcha' ri rey cha. 20Xalka jun chic, xu'ej: Ajaf, ja a-mina va; xinya' chupan jun pañuelo y xinyac 21ruma inre' nixi'ij-vi' chavach. Ruma atre' at jun ache altíra at ruquiy. Xa nac'an-el ri man avichin ta. Y navajo' na'an cosechar ri xa man atre' ta ri at-tiquiyuon, xcha' cha ri rey. 22Y ri rey xu'ej cha: Atre' at jun itziel samajiel. Ri tzij ri xa'ej, jare' ri xtincusaj chi ncan'an juzgar. Ruma xa avata'n chi inre' in altíra ruquiy, chi inre' nic'an-el ri man vichin ta, y quire' je' nivajo' ni'an cosechar ri man inre' ta in-tiquiyuon; 23¿karruma man xaya' ta ri nu-miera pa banco chi quire' vacame antok xitzalaj-pa ni'an ta recibir ri nu-miera y ri interés (ralab'al)? xcha'. 24Y ri rey xu'ej chica ri ic'o chire': Tic'ama-el ri mina cha, y tiya' cha ri jun ri c'o diez (lajuj) minas riq'uin. 25Y ri ic'o chire' xqui'ej: Ajaf, pero jaja' c'o chic diez (lajuj) pa ruk'a', xa'cha'. 26Pero jaja' xu'ej chica: Inre' ni'ej chiva, chi ri c'o riq'uin, xtiyo'x más cha. Pero ri xa man q'uiy ta c'o riq'uin, hasta re' xtalasas-el cha. 27Vacame c'a, ri itziel nca'tz'ato vichin, ri man xcajo' ta chi inre' xinuoc rey: Qui'c'ama-pa, y tic'ama-el quijaluon chinoch, xcha' ri rey. 28Y antok ri Jesús xtanie' riq'uin ri xu'ej chica ri vinak, x'a chiquivach ri ru-discípulos chi ni'a-el pa tanamet Jerusalén. 29Y antok cierca chic ic'o-ve ri aldeas Betfagé y Betania, ri ic'o choch ri juyu' rub'inan Olivos, ri Jesús xa'rutak-el ica'ye' chiquivach ri ru-discípulos, 30y xu'ej-el chica: Quix'in chupan la aldea la, y antok xquixuoc, xtivil jun alaj burro ximil chire', ri man jun b'ay ch'acol ache chirij. Tiquira-pa y tic'ama-pa. 31Y xa c'o jun xtic'utun-pa chiva: ¿Karruma ntiquir-el ri alaj burro? ti'ej cha chi nic'atzin cha ri Ajaf, xcha-el ri Jesús chica. 32Xa'a ri ica'ye' discípulos ri xa'tak-el, y xquil ri alaj burro ri inche'l e'n-el chica ruma ri Jesús. 33Y antok ja niquiquir, ri rajaf xqui'ej-pa chica: ¿Karruma ntiquir-el ri alaj burro? xa'cha-pa chica. 34Y ri discípulos xqui'ej can chica: Xa nic'atzin cha ri Ajaf, xa'cha' chica. 35Y xquic'am-pa riq'uin ri Jesús. Y ri discípulos xquiya-el ri qui-manta chirij ri alaj burro y xquich'ocob'a-el ri Jesús chirij. 36Y antok b'anak ri Jesús, ri vinak niquilic' ri qui-manta pa rub'iey. 37Y antok xalka cierca ri lugar pache' xulan nu'on ri b'ay choch ri juyu' Olivos, quinojiel ri ru-discípulos ri Jesús, ruma niquicuot cánima, riq'uin nojiel quichuk'a' niquiya' ruk'ij ri Dios. Quire' niqui'an ruma ri milagros ri quitz'atuon. 38Ijeje' niqui'ej: ¡Bendito ri Rey ri patanak pa rub'e' ri Ajaf Dios! ¡Can paz c'a chicaj! ¡Can q'uiy c'a ruk'ij niyo'x ri Dios chicaj! nca'cha'. 39Y chiquicajol ri vinak i-b'anak nic'aj achi'a' fariseos. Y ijeje' xqui'ej cha ri Jesús: Maestro, ca'ch'olij ri a-discípulos, xa'cha' cha. 40Pero ri Jesús xu'ej chica: Can ni'ej chiva, xa nca'tanie-ka ijeje', ja ri ab'aj xca'ch'o-pa chi niquiya' nuk'ij, xcha' chica ri achi'a' fariseos. 41Y antok ri Jesús más cierca c'o-ve ri tanamet Jerusalén, xutz'at-apa y xrok'iej ri tanamet re', 42y xu'ej: ¡Ixre' ri ixc'o Jerusalén, mesque c'aja' ta vacame ntivatamaj ri chica niyo'n ri paz riq'uin ivánima! Pero xa avan chivach, rumare' man nquixtiquir ta ntitz'at. 43Ruma xtipa k'ij man otz ta chivij antok q'uiy soldados xca'palaj-pa chivij, y xtiquitz'apij rij ri itanamit cha jun chic inche'l muro, y xquixquiya' pa sufrimiento, ruma xtiquimol-qui' chivij y pa nic'aj xquixc'ujie-ve. 44Xtiquikasaj pan ulief ri itanamit y xquixquimisas ixre'. Y chupan ri itanamit man jun jay xtipi'ie' can. Can quinojiel xca'vulex ruma man xiya' ta pa cuenta chi ri Dios xalka iviq'uin, xcha'. 45Antok ri Jesús xb'aka Jerusalén, xuoc-oc pa templo y xa'rutarariej-el quinojiel ri nca'c'ayin y ri nca'lak'o chire'. 46Y xu'ej chica: Chupan ri ruch'ab'al ri Dios ri tz'ib'an can nu'ej: Ri vachuoch, jay richin oración; pero ixre' xa ib'anun cachuoch alak'oma' cha, xcha' chica. 47Y ri Jesús k'ij-k'ij nca'rutijuoj ri vinak riq'uin ri ruch'ab'al ri Dios pa templo. Pero ri principales sacerdotes y ri achi'a' escribas y ri achi'a' principales chupan ri tanamet, niquicanuj manera chi chica niqui'an chi niquiquimisaj. 48Y man niquil ta chica manera niqui'an, ruma ri vinak ja'al nica'xaj ri nu'ej ri Jesús chica.

will be added

X\