San Lucas 18

1Y ri Jesús xutzijuoj jun parábola (c'amb'al-tzij) chica ri ru-discípulos chi nuc'ut chiquivach chi nic'atzin chi siempre niqui'an orar y man tiquimalij. 2Jaja' xu'ej chica: Chupan jun tanamet c'o jun juez ri man nuxi'ij ta ri' choch ri Dios, y man jun je' quikalien nu'on chica ri vinak. 3Y chupan je' ri tanamet re', c'o jun malca'n-ixok ri ntiel-ntuoc riq'uin ri jun juez re', y nu'ej cha: Tab'ana' justicia chirij ri b'anayuon itziel chuva. 4Y q'uiy tiempo xak'ax y ri juez re' man nrajo' ta nu'on arreglar ri ru-problema ri malca'n-ixok. Pero jun k'ij ri juez re' xu'ej-ka pa ránima: Mesque man nixi'ij ta vi' choch ri Dios, ni man jun je' quikalien ni'an chica ri vinak, 5pero ruma ri ixok re' ntiel-ntuoc viq'uin, mejor ni'an arreglar. Ruma xa man ni'an ta, xtak'ax nuc'u'x riq'uin ruma siempre xtalka. 6Y ri Ajaf Jesús xu'ej: Xivaxaj ri xu'ej ri juez re', mesque jaja' man otz ta nu'on. 7¿Y será que ri Dios man nca'ruto' ta came ri i-rucho'n chic, ri chi pak'ij chi chak'a' niqui'an orar? ¿Ri Dios man cha'nin ta came xca'ruto-pa? 8Inre' ni'ej chiva chi cha'nin xca'ruto-pa. Y antok ri Xtak-pa chicaj chi xalax chi'icajol xtipa chic jun b'ay vave' ri choch-ulief, ¿c'a ic'o came quicukub'an quic'u'x riq'uin ri Dios? xcha' ri Jesús. 9Y ri Jesús xu'ej chic c'a jun parábola (c'amb'al-tzij) chiquivach ri vinak, ruma ic'o chiquivach ijeje' ri niquina' chi i-choj tak vinak, y xa itziel nca'quitz'at ri nic'aj chic. Rumare' ri Jesús xu'ej: 10Ic'o ica'ye' achi'a' ri xa'b'aka pa templo chi niquina' orar: Jun fariseo, y jun maloy-impuestos. 11Ri ache fariseo pa'l nu'on orar, y nu'ej chupan ri ru-oración: Dios, tiox b'a' niya' chava ruma inre' man in junan ta quiq'uin ri nic'aj chic. Ruma ri nic'aj chic i-alak'oma', nca'quicanuj je' nic'aj chic ixoki' mesque i-c'ulan, y man quic'uan ta jun choj c'aslien. Ni man in junan ta je' riq'uin ri jun ache maloy-impuestos la. 12Ruma inre' ca'ye' k'ij chupan jun semana ni'an ayuno. Y nojiel ri nich'ec, nic'an-el ri décima parte cha, y niya' chava atre', xcha' ri ache fariseo chupan ri ru-oración. 13Pero ri ache maloy-impuestos c'a naj c'o can chi nu'on orar. Pero rulucub'an rujaluon; ruma choch jaja' man otz ta chi nitzu'n-el chicaj, y nutin c'a roch-ruc'u'x cha ri ruk'a' y nu'ej c'a: Dios, tajoyovaj noch, ruma inre' in jun ache pecador chavach. 14Y ri Jesús xu'ej je': Can ni'ej chiva chi ri ache maloy-impuestos xtzalaj chirachuoch, man jun chic ru-pecado choch ri Dios. Pero ri ache fariseo man quire' ta xtzalaj. Ruma chica-na c'a ri nuna' chi altíra rakalien, xa xti'an cha chi manak rakalien. Pero ri nuna' chi manak-oc rakalien, nem xti'an cha, xcha' ri Jesús. 15Y ri vinak nca'quic'am-pa ri ac'ola' riq'uin ri Jesús, chi nuya' ruk'a' pa quive' chi nca'ru'on bendecir. Pero ri discípulos xquitz'at y xa'quich'olij ri vinak chi man tiqui'an quire'. 16Pero ri Jesús xa'rayuoj ri ac'ola' y xu'ej chica ri ru-discípulos: Tiya' permiso chica ri ac'ola' chi nca'pa viq'uin inre', y man qui'ik'at. Ruma ri ru-reino ri Dios xa quichin ri i-inche'l ac'ola'. 17Y can ketzij ri ni'ej chiva, chi xa jun man nu'on ta recibir ri ru-reino ri Dios inche'l nu'on jun ac'ual, man xtuoc ta chupan. 18Y c'o jun c'ajol ache principal xuc'utuj cha ri Jesús: Utzulaj Maestro, ¿chica ni'an chi nivil ri c'aslien ri man niq'uis ta? xcha' cha. 19Y ri Jesús xu'ej cha: ¿Karruma na'ej otz chuva inre'? Ruma man jun vinak otz, xa jo'c ri Dios otz. 20Avata'n ri mandamientos ri xuya' ri Dios cha ri Moisés ri ojier can, ri nu'ej: Ri at-c'ulan, man tavuc'uaj-avi' riq'uin jun chic; man caquimisan; man catalak'; man tatz'ak tzij chirij jun chic; ca'b'ana' respetar ri atie-atata'. 21Y ri c'ajol ache xu'ej cha ri Jesús: Nojiel re' c'a in co'l-oc nutz'amuon-pa rub'anic, xcha'. 22Antok ri Jesús xra'xaj re', xu'ej: C'a c'o jun kax ri man ab'anun ta. Tac'ayij nojiel ri c'o aviq'uin y ri rajal tajacha' chiquivach ri i-puobra, chi quire' nic'ujie' ab'ayomal chicaj. Y catam-pa viq'uin y nca'a chuvij, xcha' cha. 23Y antok ri c'ajol ache xra'xaj ri xu'ej ri Jesús, altíra xb'isuon-ka, ruma q'uiy ri rub'ayomal c'o. 24Y antok ri Jesús xutz'at chi altíra xb'isuon-ka, xu'ej: ¡Ri c'o q'uiy quib'ayomal, can cuesta chi nca'uoc pa ru-reino ri Dios! 25Ruma xa más fácil nak'ax jun camello chupan jun ruvaruol jun acúxa, que choch jun b'ayuon chi ntuoc pa ru-reino ri Dios. 26Ri xa'c'axan ri xu'ej ri Jesús, xqui'ej: ¿Chica c'a xticolotaj? xa'cha'. 27Y ri Jesús xu'ej chica: Ri vinak man nojiel ta nca'tiquir niqui'an, pero ri Dios nojiel nitiquir nu'on, xcha' chica. 28Y jare' antok ri Pedro xu'ej: Ojre' kayo'n can ri kax kichin y oj-b'anak chavij. 29Y ri Jesús xu'ej chica: Can ketzij ri ni'ej chiva, chi chica-na ri ruyo'n can rachuoch, o rutie-rutata', o runimal, o ruchak', o raxjayil, o ralc'ual, chi nu'on rusamaj ri Dios y nca'ruto' ri nca'uoc pa ru-reino ri Dios; 30can q'uiy yan ri xtiyo'x cha chupan ri tiempo vacame. Y chupan-apa ri jun chic tiempo ri chakavach-apa, can xtiyo'x cha ri c'aslien ri man niq'uis ta. 31Y ri Jesús xa'ruc'uaj aparte ri doce (cab'alajuj) discípulos chi nich'o' quiq'uin, y xu'ej: Ixre' ivata'n chi c'a pa tanamet Jerusalén nku'a-ve-el, y chire' q'uiy ri xti'an cha ri Xtak-pa chicaj chi xalax chi'icajol. Ruma chire' xtib'anataj nojiel ri tz'ib'an can chirij cuma ri profetas ri xa'c'ujie' ojier can tiempo. 32Xtijach pa quik'a' ri vinak ri man israelitas ta. Y ri vinak re' xca'tze'n chirij, xtiqui'ej pakon tak tzij cha y xtiquichub'aj. 33Después antok quich'ayuon chic, xtiquiquimisaj. Pero chi oxe' k'ij xtic'astaj-pa chiquicajol ri quiminaki', xcha' ri Jesús. 34Pero ri ru-discípulos man xi'ka ta pa quive' (man xqui'an ta entender) ri xu'ej. Ri tzij re' xa avan chiquivach, rumare' jo'c xca'xaj y man cata'n ta ri chica xrajo' xu'ej chica. 35Antok ri Jesús ya ntuoc pa tanamet Jericó, chuchi-b'ay tz'uyul jun ache muoy chi nuc'utuj ru-limosna. 36Y antok ri muoy re' xra'xaj chi q'uiy vinak nca'k'ax, xuc'utuj chi chica re'. 37Y xqui'ej cha chi ja ri Jesús ri aj-Nazaret ri nak'ax chire'. 38Y ri ache muoy riq'uin ruchuk'a' xch'o', y xu'ej: ¡Jesús, ri at Rumáma can ri rey David, tajoyovaj noch! xcha'. 39Y ri vinak ri i-k'axnak choch ri Jesús, xquich'olij ri ache chi man chic tich'o-pa. Pero jaja' xa riq'uin más ruchuk'a' xch'o-pa y xu'ej: ¡Atre' ri at Rumáma can ri rey David, tajoyovaj noch! xcha'. 40Y ri Jesús xpi'ie-ka y xu'ej chi tic'amar-pa choch. Y antok c'o chic ri ache choch, xuc'utuj cha: 41¿Chica navajo' chi ni'an? Y ri ache muoy xu'ej cha: Ajaf, inre' nivajo' nquitzu'n, xcha'. 42Y ri Jesús xu'ej cha: Catzu'n c'a. Ruma xacukub'a' ac'u'x viq'uin, xac'achoj. 43Y ri ache muoy ja xtzu'n y x'a chirij ri Jesús, y nuya' ruk'ij ri Dios. Y quinojiel ri vinak ri xa'tz'ato chi ri muoy xtzu'n, can xquiya' je' ruk'ij ri Dios.

will be added

X\