San Lucas 17

1Y ri Jesús xu'ej chica ri ru-discípulos: Can siempre ic'o ri xca'b'ano chica nic'aj chic chi nca'tzak. ¡Pero juye' roch ri nib'ano cha jun chic chi nitzak! 2Más otz nixim jun nem ab'aj (ca') chukul y nic'ak chupan ri mar, que nu'on chi nitzak jun ri in-runiman mesque manak-oc ruk'ij. 3Rumare' ixre' tib'ana' cuenta-ivi'. Y xa c'o jun hermano nu'on jun itziel chava, tach'olij. Y xa ri nib'ano quire' chava nuc'ax runo'j y nalru'ej chava chi tab'ana' perdonar, can tab'ana' perdonar. 4Y xa chupan jun k'ij siete (vuku') mul nu'on itziel chava y siete (vuku') mul je' nipa aviq'uin y nalru'ej chava: Tab'ana' perdonar ri nuch'o'j; can tab'ana' perdonar ri ruch'o'j, xcha' ri Jesús. 5Y ri apóstoles xqui'ej cha ri Ajaf Jesús: Tab'ana' chika chi nakacukub'a' más kac'u'x riq'uin ri Dios. 6Pero ri Ajaf Jesús xu'ej chica: Xa ta icukub'an ic'u'x riq'uin ri Dios, mesque inche'l-oc jun ch'iti ija'tz richin ri mostaza, nquixcovin nti'ej cha la chie' sicómoro la: Catiel-el vave' y atica-avi' chupan ri mar, y ri chie' re' can nunimaj itzij. 7Y xa ta jun chivach ixre' c'o ta jun ru-esclavo, y rutakuon-el pan avan chi xb'arub'ana' arar ri ulief o chi xa'b'aruchajij váquix, ¿ja came antok nitzalaj-pa, nu'ej cha: Catuoc-pa, catz'uye' chirij ri mesa y cava'? 8Pa ruc'axiel re' nu'ej cha: Tachojmij ri nu-cena, y tachojmij je' avi' atre' chi naya-pa ri xtintej, y c'a xquiva' na inre', c'ajare' xcava' atre'. 9¿Y nuya' came tiox b'a' cha ri esclavo ruma xu'on ri xu'ej cha? Manak. 10Y inche'l ri esclavo re', quire' je' ixre'. Antok ib'anun chic ri samaj ri nu'ej ri Dios chiva, ti'ej: Ojre' oj esclavos ri man jun nkojc'atzin-ve. Ruma xa jo'c ri e'n chika, jo'c re' ri xka'an, quixcha', xcha' ri Jesús chica ri ru-discípulos. 11Y antok ri Jesús xutz'om chic el b'ay chi ni'a Jerusalén, xak'ax chiquicajol ri Samaria y ri Galilea. 12Y antok xb'aka jun aldea, i-diez (lajuj) achi'a' ri c'o ri yab'il lepra chiquij xa'b'a'iel-pa pa rub'iey ri Jesús y c'a naj xa'pi'ie-ve-pa. 13Y cof xa'ch'o-pa cha y xqui'ej: ¡Jesús, Maestro, tajoyovaj kavach! xa'cha'. 14Y ri Jesús xa'rutz'at y xu'ej chica: Quix'in y ic'utu-ivi' chiquivach ri sacerdotes, xcha' ri Jesús chica. Y antok i-b'anak, ri quiyab'il xq'uis-el chiquij y sak xqui'an-ka. 15Y jun chiquivach ri i-diez (lajuj) achi'a', antok xutz'at chi xc'achoj riq'uin ri ruyab'il, ja xtzalaj-pa chirij. Y can nuya' ruk'ij ri Dios, y can cof nich'o' antok nuya' ruk'ij ri Dios. 16Y antok xalka riq'uin ri Jesús, xxuquie' chukul rakan y xulucub'a-ka-ri' c'a pan ulief y nuya' tiox b'a' cha. Ri ache re' aj-Samaria. 17Y ri Jesús xu'ej: ¿Man i-diez (lajuj) ta came ri xq'uis-el ri quiyab'il chiquij? ¿Y ri i-nueve (b'ilijie') pache' ic'o-ve? 18¿Man jun chic c'a ri xtzalaj-pa chi nalruya' ruk'ij ri Dios? ¿Xa ja ri jun ri man israelita ta ri xtzalaj-pa? xcha' ri Jesús. 19Y ri Jesús xu'ej cha ri ache aj-Samaria: Capalaj y ca'in. Xac'achoj ruma xacukub'a' ac'u'x viq'uin, xcha' cha. 20Y ri achi'a' fariseos xquic'utuj cha ri Jesús chi jampe' c'a xtalka ri ru-reino ri Dios. Y ri Jesús xu'ej chica: Man jun xtina'ien jampe' xtalka ri ru-reino ri Dios. 21Y man jun xti'e'n chi ja c'o vave', o ja c'o chila, ruma ri ru-reino ri Dios c'o chic iviq'uin, xcha' ri Jesús. 22Y jaja' xch'o' chica ri ru-discípulos y xu'ej: Xtipa tiempo antok ixre' xtirayij chi nic'ujie' ta iviq'uin mesque jo'c jun k'ij, ri Xtak-pa chicaj chi xalax chi'icajol; pero man xtitz'at ta chic. 23Y ic'o ri xca'e'n chiva: Ja c'o vave' o ja c'o chila. Pero ixre' man quix'a quiq'uin, ni man quix'a je' chiquij. 24Ruma antok ri Xtak-pa chicaj chi xalax chi'icajol xtipa chic jun b'ay, can xtik'alajin-ve ja'al. Can xtib'anataj c'a inche'l nu'on ri yocopa', ri nu'on cala pache' ntiel-pa ri k'ij, y c'a k'alaj pache' nika-ka ri k'ij. 25Pero na'ay c'o chi xtuk'asaj q'uiy sufrimiento, y itziel xtitz'iet je' cuma ri vinak richin ri tiempo vacame. 26Can inche'l xb'anataj pa ru-tiempo ri Noé, can quire' je' xtib'anataj antok xtipa ri Xtak-pa chicaj chi xalax chi'icajol. 27Pa ru-tiempo ri Noé, ri vinak jo'c nca'va' y nca'kumun, jo'c re' niqui'an pensar, nca'c'ulie' y nca'yo'x chi nca'c'ulie', y c'a quire' niqui'an chupan ri k'ij antok ri Noé xuoc chupan ri arca (ri inche'l jun nem barco), y xpa c'a ri diluvio, y quinojiel ri vinak xa'con. 28Y quire' je' xb'anataj pa ru-tiempo ri Lot. Ri vinak nca'va' y nca'kumun, nca'lak'o, nca'c'ayin, nca'tico y nca'qui'an jay. 29Y ri k'ij antok ri Lot y ri ru-familia xquiya' can ri tanamet Sodoma, xka-pa chicaj k'ak' y azufre paro' ri tanamet. Can inche'l job' xu'on, y quinojiel ri vinak ri ic'o chire' xa'q'uis. 30Y quire' xtib'anataj antok ri Xtak-pa chicaj chi xalax chi'icajol xtalka chic vave' choch-ulief. 31Ri c'o paro' ri rachuoch antok xtalka ri k'ij re', man tika-pa chi ntuoc pa rachuoch chi c'o niruma-pa. Y ri c'o pan avan quire' je', man titzalaj-pa chirachuoch. 32Talka pan ive' ri xu'on ri raxjayil ri Lot, antok ri Dios xuparuoj ri tanamet Sodoma. 33Ri altíra c'a nrajo' ri ruc'aslien vave' ri choch-ulief, man xticolotaj ta. Pero ri jun, mesque niquimisas vuma inre', can xticolotaj. 34Ni'ej c'a chiva chi chupan ri ak'a' re', ic'o ica'ye' nca'var choch jun ch'at, jun xtuc'uax y ri jun chic xtic'ujie' can. 35Ic'o ica'ye' ixoki' ri junan nca'que'n, jun xtuc'uax y ri jun chic xtic'ujie' can. 36Y xa ic'o ica'ye' achi'a' ri junan nca'samaj pan avan, jun xtuc'uax y ri jun chic xtic'ujie' can. 37Y antok ri discípulos caxan chic ri xu'ej ri Jesús, xquic'utuj cha: Ajaf, ¿pache' xtib'anataj-ve re'? Y ri Jesús xu'ej chica: Pache' c'o-ve jun quiminak, chire' je' nca'ka-ve ri c'uch.

will be added

X\