1 Y quinojiel ri achi'a' i-maloy-impuestos y ri nic'aj chic vinak ri ni'e'x aj-b'anoy-pecado chica, nca'jiel-pa riq'uin ri Jesús richin nica'xaj ri nu'ej. 2 Y ri achi'a' fariseos y ri achi'a' escribas nca'tzijuon chirij ri Jesús y niqui'ej: Ri Jesús ja'al nca'ru'on recibir ri vinak ri ni'e'x aj-b'anoy-pecado chica y can ni'va' quiq'uin, nca'cha'. 3 Rumare' ri Jesús xutzijuoj jun parábola (c'amb'al-tzij) chiquivach y xu'ej: 4 Xa ta jun chivach ixre' ic'o ta i-cien ru-ovejas y nisach ta can jun, ¿man nca'ruya' ta came can b'a' ri i-noventa y nueve chire' pa k'ayis, y ni'a chi nirucanuj-pa ri jun ri sachnak can, hasta c'a niril-na? 5 Y antok nirila-pa ri ru-oveja, can niquicuot nuya-pa chutale'n. Niquicuot c'a ruma xril-pa. 6 Y antok nib'aka chirachuoch, nca'rayuoj ri ru-amigos y ri ru-vacínix, y nu'ej chica: Quixquicuot viq'uin, ruma ri jun nu-oveja ri sachnak can, vacame xinvil-pa. 7 Y can ni'ej chiva, chi can nca'quicuot ri ic'o chila chicaj antok c'o jun pecador nitzalaj-pa ránima riq'uin ri Dios y nu'on ri nrajo' jaja', que chiquivach ri i-noventa y nueve vinak ri choj quic'aslien, ri ya xtzalaj-pa cánima riq'uin ri Dios y niqui'an ri nrajo' jaja'. 8 O xa c'o ta jun ixok ri c'o diez (lajuj) dracmas riq'uin, y nutzak jun dracma pa rachuoch, ¿man nutzej ta came jun lámpara ri ixok re', y numas rupan ri rachuoch y nucanuj ri miera hasta niril? 9 Y antok niril, nca'rayuoj ri ru-amigas y ri ru-vacínix, y nu'ej chica: Quixquicuot viq'uin, ruma ri dracma ri sachnak, ya xinvil. 10 Y mare' ni'ej chiva, chi antok c'o jun pecador nitzalaj-pa ránima riq'uin ri Dios y nu'on ri nrajo' jaja', ri ángeles ri ic'o riq'uin ri Dios altíra nca'quicuot, xcha' ri Jesús. 11 Y ri Jesús xu'ej je' chica: Jun ache c'o ica'ye' ruc'ajuol. 12 Y jun k'ij ri ruc'ajuol co'l xu'ej cha ri rutata': Táta, taya' ri nu-herencia ri ab'anun pensar chi naya' chuva, xcha'. Y ri rutata', can xujach ri qui-herencia chica ri ica'ye'. 13 C'a jub'a' c'a k'ij tijach ri qui-herencia, ri co'l ruc'ajuol xuc'ayij can nojiel ri ru-herencia. Can q'uiy ri miera ri xumol-el, y x'a jun lugar ri naj c'o-ve. Y antok c'o chic chire', xuc'uaj jun itziel c'aslien y quire' xuq'uis ri ru-miera. 14 Antok ruq'uisuon chic nojiel ri ru-miera, xpa jun tremenda vi'jal chupan ri lugar ri pache' c'o-ve. Y ri ala' re' man jun chic kax nitiquir nulok' ruma manak chic ru-miera. 15 Y rumare' xb'aruc'utuj rusamaj cha jun ache aj-chire'. Y ri ache re' xutak-el chupan ri ru-finca chi nca'b'arutzuku' ak. 16 Y ri ala' altíra nurayij nutej ri niquitej ri ak. Pero man jun niyo'n cha. 17 Y ri ala' re' c'ajare' xalka paro', y xu'ej-ka: ¡Ri iru-muosa ri nata' c'o q'uiy qui-simíta; y inre' vave' nquicon riq'uin vi'jal! 18 Vacame nquipalaj y nqui'a riq'uin ri nata' y xtin'ej cha: Táta, xin'an pecar choch ri Dios y xin'an nuch'o'j chavach atre'. 19 Vacame man otz ta chic chi na'ej ac'ajuol chuva. Xa tab'ana' chuva inche'l jun a-muosa, xcha-ka pa ránima. 20 Y ja xutz'om b'ay, x'a chirachuoch ri rutata'. Y c'a naj c'o-ve chi ni'ka chirachuoch, antok xtz'iet-pa ruma ri rutata'. Y ri rutata' altíra xujoyovaj roch; rumare' jun-anin xb'aruc'ulu', xuk'atiej y xutz'ub'aj ruchi'. 21 Y ri ala' xu'ej cha ri rutata': Táta, xin'an pecar choch ri Dios y xin'an nuch'o'j chavach atre'. Man otz ta chic na'ej ac'ajuol chuva. 22 Pero ri rutata' xu'ej chica ri rusamajiel: Tivalasaj-pa ri tziak ri más rakalien y tijala' ri rutziak. Tiya' jun anillo chuk'a' y tiya' ruxajab' chirakan. 23 Y tic'ama-pa ri váquix ri más ti'uoj y tiquimisaj; kab'ana' jun namak'ej y kuva'. 24 Ruma ri jun nuc'ajuol re' inche'l xcon-el chinoch, pero vacame inche'l xc'astaj chic pa. Sachnak-el chinoch, y vacame xtzalaj chic pa, xcha' ri rutata'. Y ja xtz'ucutaj-ka ri namak'ej. 25 Y ri huora re', ri nem ala' nisamaj pan avan. Y antok jaja' nitzalaj-pa y cierca chic ri rachuoch c'o-ve, xra'xaj chi c'o namak'ej najin. 26 Rumare' xrayuoj jun chiquivach ri siervos y xuc'utuj cha: ¿Chica x'an? ¿Y karruma c'o namak'ej? 27 Y ri siervo xu'ej cha: Ruma xtzalaj-pa ri achak' otz roch. Rumare' ri atata' xu'ej chi tiquimisas ri váquix ri más ti'uoj. 28 Antok xra'xaj quire', xpa royoval y man nrajo' ta ntuoc pa jay. Rumare' xiel-pa ri rutata', y nub'oche'j chi ntuoc pa jay. 29 Pero man xrajo' ta. Jaja' xa xu'ej cha ri rutata': Inre' q'uiy juna' in-samajnak aviq'uin y man jun b'ay man ta nuniman atzij. Pero man jun b'ay ayo'n chuva nixta jun cabrito chi ni'an jun namak'ej quiq'uin ri nu-amigos. 30 Y vacame atre' xaquimisaj ri váquix ri más ti'uoj, xa ruma xtzalaj-pa ri ac'ajuol ri xb'aruq'uisa' rajal ri nic'aj kax avichin quiq'uin ri rameras, xcha'. 31 Y ri rutata' xu'ej cha: Nuc'ajuol, atre' siempre atc'o viq'uin. Rumare' nojiel ri c'o viq'uin, can avichin atre'. 32 Pero ri achak', can inche'l xcon-el rub'anun-el chinoch, y vacame inche'l xc'astaj chic pa. Sachnak-el y vacame xalka chic kiq'uin. Y ruma jaja' xtzalaj-pa, can nic'atzin chi vacame nkojquicuot y naka'an namak'ej. Quire' xu'ej ri rutata' cha, xcha' ri Jesús.
