San Lucas 13

1Y chupan ri tiempo re' ic'o nic'aj vinak riq'uin ri Jesús, y ijeje' xquitzijuoj cha ri xu'on ri Pilato chica nic'aj achi'a' aj-Galilea. Ri Pilato xa'ruquimisaj antok ja niquiya' ri chicop choch ri Dios, y ri quiquiq'uiel ri chicop y ri quiquiq'uiel ri achi'a' re', xa jun xu'on cha. 2Pero ri Jesús xu'ej chica: ¿Ixre' nti'an pensar chi ri achi'a' aj-Galilea re', quire' x'an chica ruma ijeje' más i-pecadores que chiquivach quinojiel ri aj-Galilea? 3Ni'ej c'a chiva: Man quire' ta. Pero ixre' vi xa man xtitzalaj ta pa ivánima riq'uin ri Dios y man nti'an ta ri nrajo' jaja', xa xquixb'aka je' chupan ri castigo pache' xa'b'aka-ve ijeje'. 4Antok xa'con ri i-dieciocho pache' c'o-ve ri estanque ri ni'e'x Siloé cha, antok xtzak ri torre chiquij, ¿ixre' nti'an pensar chi más i-pecadores que chiquivach quinojiel ri nic'aj chic vinak ri ic'o chire' pa tanamet Jerusalén? 5Ni'ej c'a chiva: Man quire' ta. Pero ixre' vi xa man xtitzalaj ta pa ivánima riq'uin ri Dios y man nti'an ta ri nrajo' jaja', xa can xquixb'aka je' chupan ri castigo pache' xa'b'aka-ve ijeje'. 6Y ri Jesús xutzijuoj jun parábola (c'amb'al-tzij) chiquivach, y xu'ej: C'o jun ache ruticuon jun mata víquix ri pa rulief, y xalka chuxie' ri chie' chi xalrucanuj roch, y man jun roch xril. 7Rumare' ri rajaf ri ulief xu'ej cha ri ache ri nisamaj riq'uin: Oxe' yan juna' in-patanak chi nalcanuj roch ri chie' re', y man jun b'ay ruyo'n ta jun roch. Rumare' más otz tachayo-el. ¿Chica xtic'atzin-ve la xa jo'c nuq'uis ruchuk'a' ri ulief? 8Pero ri samajiel xu'ej cha ri rajaf: Taya' chic can ri juna' va. Nic'ot-na ri ulief chuxie' y niya' na avuona chuxie'. 9Xa nuya' roch, otz. Y xa man xtuya' ta roch, c'ajare' tachayo-el, xcha' ri samajiel. 10Y chupan jun k'ij richin uxlanien, ri Jesús nuc'ut chiquivach ri vinak ri ruch'ab'al ri Dios, chupan jun sinagoga. 11Y chiquicajol ri vinak ri quimaluon-qui' chire', c'o jun ixok ri c'o dieciocho juna' tiyavaj-pa. Ri ixok re' luculic rij, y man nitiquir ta nipi'ie' choj. Ri ixok quire' rub'anun ruma jun itziel espíritu b'anayuon cha. 12Pero antok ri Jesús xutz'at ri ixok re', xrayuoj y xu'ej cha: Nuoya, vacame at libre choch ri ayab'il. 13Y xuya' ruk'a' paro' ri ixok. Y ri ixok ja xyukutaj ri rij y otz xpi'ie'. Y ri ixok xuya' ruk'ij ri Dios. 14Pero ri ache principal chupan ri sinagoga xpa royoval ruma ri Jesús xu'on sanar ri ixok chupan jun k'ij richin uxlanien; rumare' ri ache re' xu'ej chica ri vinak ri quimaluon-qui' chire': Ri semana ruc'uan vaki' k'ij chi nkusamaj. Y chupan ri vaki' k'ij re' quixpa chi nquix'an sanar, y man ja ta chupan jun k'ij richin uxlanien. 15Pero ri Ajaf Jesús xu'ej cha: Ixre' xa ca'ye' ipalaj. ¿Man came nqui'quir ta el ri iváquix o ri iquiej chupan jun k'ij richin uxlanien, richin nquix'a chi ntiya' quiya'? 16Ri jun ixok re' rumáma can ri Abraham, y ri Satanás c'o dieciocho juna' tuluc-pa. ¿Man otz ta came chi ni'an sanar chupan jun k'ij richin uxlanien? 17Antok ri Jesús xu'ej quire', quinojiel ri itziel nca'tz'ato richin xa'q'uix-ka. Pero ri nic'aj chic vinak niquicuot cánima, ruma ri Jesús nem samaj ri nu'on. 18Y ri Jesús xu'ej: ¿Choj-iq'uin junan ri ru-reino ri Dios? ¿Y choj-iq'uin ni'an comparar? 19Xa junan riq'uin ri ija'tz richin ri mostaza ri xutic can jun ache pa rulief. Antok xq'uiy, can inche'l jun nem chie' xu'on y ri chicop ri c'o quixic' niqui'an quisuoc chuk'a'. 20Y ri Jesús xu'ej je': ¿Choj-iq'uin ni'an comparar ri ru-reino ri Dios? 21Xa junan riq'uin ri levadura ri niruma-pa jun ixok y nuya' chupan oxe' medida harina y nuxol-ri' chupan nojiel, xcha' ri Jesús. 22Y ri Jesús xutz'om chic b'ay chi ni'a pa tanamet Jerusalén. Y nutzijuoj ri ruch'ab'al ri Dios pa tak nima'k tanamet y pa tak aldeas pache' nak'ax-ve. 23Y c'o jun ri xc'utun cha ri Jesús, y xu'ej cha: Ajaf, ¿man iq'uiy ta ri xca'colotaj? Pero ri Jesús chica quinojiel xch'o-ve, y xu'ej: 24Can titija' ik'ij chi nquixuoc chupan ri puerta ri co'l-oc roch; ruma ni'ej c'a chiva chi iq'uiy c'a vinak xticajo' xca'uoc chupan ri puerta re', pero man xca'tiquir ta xca'uoc. 25Y antok ri Ajaf xtipalaj-pa y xtalrutz'apij can ri puerta, ixre' ri maja' quixuoc riq'uin, xtic'osc'a-apa y xti'ej-apa: Ajaf, Ajaf, tajaka' ri puerta chakavach. Pero jaja' xtu'ej-pa chiva: Man vata'n ta pache' ix-patanak-ve. 26Y ixre' xti'ej-apa cha: Ojre' ri xojva' y xkakun ya' aviq'uin. Y pa tak b'ay richin ri katanamit, chire' xac'ut-ve ri ruch'ab'al ri Dios. 27Pero jaja' xtu'ej-pa chiva: Xin'ej yan chiva chi inre' man vata'n ta pache' ix-patanak-ve. Quixiel-el viq'uin, ruma ixre' jo'c itziel tak kax ri nti'an, xticha-pa. 28Y antok xqui'tz'at ri Abraham, ri Isaac, ri Jacob y quinojiel ri profetas ri xa'c'ujie' ojier can tiempo, chi ic'o pa ru-reino ri Dios; chire' xquixuok' y xtik'ach'ach'iej ivoray ruma xixc'ujie' can juviera. 29Ruma xca'pa vinak oriente, occidente, norte y sur ri in-quiniman. Ijeje' xca'b'atz'uye' chirij ri mesa pa ru-reino ri Dios. 30Y nic'aj ri ic'o pa ruq'uisb'al vacame, xca'c'ujie' nab'ayal y nic'aj ri ic'o nab'ayal vacame, xca'c'ujie' pa ruq'uisb'al, xcha' ri Jesús. 31Y chupan ri mismo k'ij re', ic'o nic'aj achi'a' fariseos ri xa'lka riq'uin ri Jesús, y xqui'ej cha: Catiel-el vave' cha'nin, ruma ri Herodes nrajo' ncaruquimisaj, xa'cha' cha. 32Pero ri Jesús xu'ej chica ri achi'a' re': Quix'in y ti'ej cha ri rey re', ri inche'l jun zorra, chi inre' c'a xca'nvalasaj itziel tak espíritus y c'a xca'n'an sanar je' ri nca'yavaj vacame y chua'k, y cab'ij xtinq'uis rub'anic ri samaj re'. 33Inre' nic'atzin chi ni'an seguir ri nub'iey vacame, chua'k y cab'ij. Can nic'atzin chi nquib'aka pa tanamet Jerusalén, ruma jun profeta manak che'l xticon chupan jun chic tanamet. 34Y xu'ej c'a chiquij ri vinak ri ic'o Jerusalén: Aj-Jerusalén, aj-Jerusalén, ¿karruma nqui'quimisaj ri profetas? ¿Karruma nqui'quimisaj cha ab'aj ri nca'rutak-pa ri Dios chi'icajol? Inche'l jun quitie-ac' nca'rumol ri ch'itak ral chuxie' ri ruxic', inre' q'uiy mul xinvajo' xixmol ta viq'uin, pero ixre' man xivajo' ta. 35Vacame ri ivachuoch xtic'ujie' can abandonado. Y ketzij ni'ej chiva chi man xquinitz'at ta chic, hasta c'a xtalka-na ri k'ij antok xti'ej: ¡Bendito ri patanak pa rub'e' ri Ajaf Dios! xcha' ri Jesús.

will be added

X\