San Lucas 10

1Y antok b'anatajnak chic nojiel re', ri Ajaf Jesús xa'rucha' nic'aj chic i-setenta achi'a', chi xa'rutak-el chi caca' ri pa tak tanamet y nic'aj chic lugar pache' xti'ka-ve jaja'. 2Y ri Jesús xu'ej chica: Ri samaj can ketzij chi q'uiy; pero ri aj-samajiel xa man iq'uiy ta. Mare' tic'utuj cha ri Rajaf ri samaj chi ca'rutaka-pa más aj-samajiel chupan ri rusamaj. 3Y vacame nquixtak-el, xa ix inche'l ovejas ri nquixb'aka chiquicajol vinak ri inche'l utif. 4Man tivuc'uaj i-buolsa, ni man tivuc'uaj i-miera, y man tivuc'uaj je' jun chic par ixajab'. Y man quixpi'ie' je' chi nqui'an saludar ri vinak pa tak b'ay. 5Y chica-na jay pache' nquixuoc-ve, na'ay ti'ej chica: Ja ta ri paz richin ri Dios xtic'ujie' chupan ri jay va. 6Y xa chupan ri jay re' c'o jun niquicuot nquixrucusaj pa rachuoch, ri paz richin ri Dios xtic'ujie' riq'uin. Y xa manak, ri paz xa xtitzalaj-pa iviq'uin ixre'. 7Ixre' quixc'ujie-ka chupan ri jay ri pache' nquixb'aka-ve, titija' y tikumu' ri xtisipas chiva; ruma ri samajiel can nic'atzin chi nituoj. Y man tic'ax ri jay pache' xixuoc-ve na'ay. Xa chire' quixc'ujie-ve. 8Y quire' je' tib'ana' antok nquixuoc chica-na tanamet y ja'al nquix'an recibir, titija' nojiel ri nisipas chiva, 9y qui'b'ana' je' sanar ri nca'yavaj ri ic'o chire', y ti'ej chica ri vinak: Xa cierca chic c'o-ve-pa ri ru-reino ri Dios. 10Pero xa chupan jun tanamet pache' nquixb'aka-ve man otz ta nquix'an recibir, quixiel-el pa tak b'ay richin ri tanamet y ti'ej: 11Ri pokolaj richin ri tanamet ri c'o-el pa kakan, nakatota' can chivach, chi ntivatamaj chi man otz ta ri xi'an. Y tivatamaj je' chi xa cierca chic c'o-ve-pa ri ru-reino ri Dios, quixcha' chica. 12Y inre' ni'ej c'a chiva, chi chupan ri k'ij antok ri vinak xca'an juzgar ruma ri Dios, ri vinak richin ri tanamet pache' man xix'an ta recibir, más nem ri castigo ri xtika pa quive', que choch ri xtiyo'x pa quive' ri aj-Sodoma. 13¡Juye' ivach ri ixc'o pa tanamet Corazín! ¡Juye' je' ivach ri ixc'o pa tanamet Betsaida! Ruma xa ta chupan ri tanamet Tiro y Sidón xa'an ta ri milagros ri xa'an chivach, ri ic'o chire' xtzalaj ta pa yan ri cánima riq'uin ri Dios y xqui'an ta ri nrajo' jaja', quicusan ta chic tziak richin b'is, y quiyo'n ta chaj chiquij chi quire' nitz'iet chi nca'b'isuon. 14Pero antok xtalka ri k'ij richin ri juicio ri nu'on ri Dios, más nem ri castigo ri xtika pan ive', que choch ri xtiyo'x pa quive' ri aj-Tiro y ri aj-Sidón. 15Y ri ic'o pa tanamet Capernaum niqui'an pensar chi nca'a chicaj riq'uin ri Dios, pero xa man quire' ta, xa c'a chupan ri infierno xca'b'aka-ve. 16Y chica-na ri nquixra'xaj ixre', can inre' ri nquira'xaj. Y ri jun ri man nrajo' ta nquixru'on recibir, can inre' ri man nquiru'on ta recibir; y ri man xquiru'on ta recibir inre', man nu'on ta recibir ri takayuon-pa vichin. 17Y antok xa'tzalaj-pa ri i-setenta achi'a' riq'uin ri Jesús, altíra nca'quicuot, y xalqui'ej cha: Ajaf, ri itziel tak espíritus can xquinimaj katzij antok pan ab'e' atre' xojch'o' chica. 18Y ri Jesús xu'ej chica: Inre' xintz'at chi ri Satanás xtzak-pa chicaj inche'l nu'on ri ráya. 19Inre' nuyo'n poder chiva chi nquixtiquir chirij ri ru-poder ri Satanás, y mesque nquixpi'ie' pa quive' cumatz y alacrán, man jun kax xtiqui'an chiva. 20Pero ixre' man quixquicuot ruma ri itziel tak espíritus nquixquinimaj. Más quixquicuot ruma tz'ib'an ri ib'e' chicaj riq'uin ri Dios. 21Y chupan ri misma huora re' ri Jesús altíra xquicuot ruma ri Espíritu Santo; y xu'ej: Inre' tiox b'a' niya' chava Nata' Dios, atre' ri Rajaf ri rocaj y ri roch-ulief, ruma xavavaj ri utzulaj atzij chiquivach ri vinak ri niquina' chi q'uiy cata'n. Xa ja chiquivach ri vinak ri manak-oc cata'n, ri inche'l ac'ola', ri xac'ut ri utzulaj atzij. Can quire' Nata' Dios, ruma jare' ri xavajo' atre', xcha' ri Jesús chupan ri ru-oración. 22Y jaja' xu'ej je': Ri Nata' Dios nojiel ruyo'n-pa pa nuk'a'. Y man jun chic ta'mayuon in chica inre', xa jo'c ri Nata'. Y man jun je' ta'mayuon ri chica ri Nata', xa jo'c inre' ri in Ruc'ajuol, y ri choj cha xtinvajo' xtinc'ut-ve inre' xtiratamaj ri chica ri Nata'. 23Y ri Jesús xa'rutz'at ri ru-discípulos y jo'c chica ijeje' xu'ej-ve: Can ja'al ca'quicuot ri niquitz'at nojiel ri ntitz'at ixre'. 24Ruma ni'ej c'a chiva, chi iq'uiy profetas y reyes ri xa'c'ujie' ojier can tiempo, altíra xcajo' xquitz'at ri ntitz'at ixre' vacame, y man xquitz'at ta el. Xcajo' ta je' xca'xaj ri ntivaxaj ixre' vacame, y man xca'xaj ta el, xcha'. 25Y c'o jun maestro richin ri ley xpalaj-pa y ruma nrajo' nu'on tentar ri Jesús xu'ej cha: Maestro, ¿chica ni'an inre' chi quire' nivil ri c'aslien ri man niq'uis ta? xcha'. 26Ri Jesús xu'ej cha: ¿Chica nu'ej ri ru-ley ri Moisés? ¿Y chica ni'ka pan ave' atre' (na'an entender atre')? 27Y ri maestro xu'ej cha ri Jesús: Can tavajo' ri Avajaf Dios, tavajo' riq'uin nojiel avánima, tavajo' riq'uin nojiel ri ac'aslien, tavajo' riq'uin nojiel ri avuchuk'a', y tavajo' je' riq'uin nojiel ri ano'j. Y can inche'l ri navajo-ka-avi' atre', can quire' je' mismo tavajo' ri a-prójimo. 28Y ri Jesús xu'ej cha ri ache: Can ketzij ri xa'ej. Vacame c'a, xa xta'an nojiel re', xtavil ri c'aslien ri man niq'uis ta, xcha' ri Jesús cha. 29Pero ri ache re' xrajo' chi ntiel chi otz. Rumare' xuc'utuj chic cha ri Jesús: ¿Chica ri nu-prójimo? 30Y ri Jesús xu'ej cha ri ache: C'o jun ache ri alanak-pa pa tanamet Jerusalén y xulan-ka chi ni'ka c'a pa tanamet Jericó. Pero xa'b'a'iel-pa alak'oma' chirij pa b'ay, y nojiel xquilak'aj-el cha. Hasta ri rutziak ri rucusan xquimaj-el cha. Ri alak'oma' xa'a, pero altíra xquich'ey can. Ri ache xpoq'uie' can chire' pa b'ay casi quiminak. 31Y c'o jun sacerdote ri xxulan-pa chupan ri b'ay re', y antok xutz'at chi pac'ol ri ache pa b'ay, ja ri jun chic ruchi' ri b'ay xak'ax-ve. 32Y quire' je' jun ache levita, xxulan-pa je' chupan ri b'ay re'. Y antok ri levita re' xalka cierca ri lugar re', xutz'at ri ache pac'ol can, y ja ri jun chic ruchi' ri b'ay xak'ax-ve. 33Pero c'o jun ache aj-Samaria ri xxulan-pa je' chupan ri b'ay re', y antok xalka cierca, xutz'at ri ache ri pac'ol can pa b'ay, y altíra xujoyovaj roch. 34Rumare' xjiel-apa riq'uin, xutz'at chica rub'anun, xa'ruk'omaj cha aceite de olivo y vino ri pache' socotajnak-ve, y xa'ruxim cha tziak. Después ri ache aj-Samaria xuya-el chirij ruquiej y xuc'uaj c'a pa jun posada. Y xuchajij ri jun ak'a' re'. 35Chuca'n k'ij antok ri aj-Samaria ya ni'a, ja xralasaj ru-miera y xuya' can ca'ye' denarios cha ri rajaf ri posada, y xu'ej cha: Tab'ana' cuenta ri jun ache re'. Y xa man xcaru'on ta ri miera re', antok inre' xquitzalaj-pa, xtintoj chava nojiel. 36C'ajare' ri Jesús xuc'utuj cha ri ache: ¿Chavach atre', chica chiquivach ri iyoxe' achi'a' ri can inche'l nrajo-ka-ri' jaja', can quire' je' xrajo' ri ache ri xka pa quik'a' ri alak'oma'? 37Y ri ache re' xu'ej: Ja ri ache ri xjoyovan roch, xcha'. Y ri Jesús xu'ej cha: Vacame ca'in y ab'ana' atre' inche'l xu'on ri ache aj-Samaria. 38Y ri Jesús xutz'om chic rub'iey y xb'aka chupan jun aldea. Y chire' chupan ri aldea re' c'o jun ixok rub'inan Marta, y jaja' xu'on recibir ri Jesús pa rachuoch. 39C'o jun chic ixok rub'inan María ri quichak'-quinimal-qui' riq'uin ri Marta. Y ri María re' xtz'uye' chirakan ri Jesús chi nra'xaj ri nu'ej. 40Pero ri Marta xa man quire' ta xu'on. Jaja' xa rutz'amuon ch'u'j riq'uin ri ropísa. Rumare' ri Marta xjiel-apa riq'uin ri Jesús y xu'ej cha: Ajaf, ¿man natz'at ta came chi ri María in-ruyo'n can nuyuon choch ri opísa? Ta'ej cha chi quiruto' jub'a', xcha'. 41Pero ri Jesús xu'ej cha: Marta, Marta, atre' q'uiy ri na'an pensar y altíra b'anak avánima riq'uin ri av-opísa. 42Pero jo'c jun kax ri más nic'atzin y más otz, y jare' ri xucha' ri María. Y ri xucha' jaja', man jun xtimajo cha.

will be added

X\