San Lucas 1

1Iq'uiy quitijuon yan quik'ij chi niquinuc' ruchi' niquitz'ib'aj ri kax ri xa'b'anataj chikacajol. 2Y can inche'l ri xtzijos chika cuma ri xa'tz'ato-pa pa rutz'ucb'al, can quire' xtz'ib'as. Y ri xa'tz'ato ri xa'b'anataj, can xquitzijuoj je' ri ruch'ab'al ri Dios. 3Y inre' je' nivajo' nitz'ib'aj ri xa'b'anataj. Can xintej nuk'ij xinnuc' ruchi' nojiel ri xa'b'anataj. Y jare' ri nivajo' nitz'ib'aj chava atre' namalaj Teófilo. Can chijujun-chijujun nitz'ib'aj ri xa'b'anataj desde pa rutz'ucb'al hasta c'a pa ruq'uisb'al, 4chi quire' nana'iej otz chi ketzij ri c'utun chavach chirij ri Jesucristo. 5Chire' Judea xc'ujie' jun sacerdote rub'inan Zacarías, y jaja' xc'ujie' quiq'uin ri jun grupo sacerdotes ri Abías rub'e'. Pa ru-tiempo ri Zacarías ja ri Herodes ri rey chupan ri Judea. Ri raxjayil ri Zacarías, Elisabet rub'e'. Ri Elisabet re' jun rumáma can ri sacerdote ri más c'o ruk'ij ri Aarón rub'e'. 6Ri ica'ye' re' can choj quic'aslien choch ri Dios. Ijeje' can niqui'an ri nu'ej ri ru-mandamientos y ri ru-leyes ri Ajaf Dios. Y man jun vinak nich'o' itziel chiquij, ruma ijeje' otz ri niqui'an. 7Ijeje' man jun calc'ual, ruma ri Elisabet manak ruxulu' alaxnak. Y ri ica'ye' c'o chic q'uiy quijuna'. 8Y antok ri Zacarías y ri nic'aj chic sacerdotes ri ni'e'x Abías chica, ja xalka qui-turno chi nca'samaj pa rachuoch ri Dios, 9paro' ri Zacarías xka-ve chi jaja' ntuoc chupan ri Lugar Santo chi nuparuoj ri incienso (puon), ruma ri qui-costumbre ri sacerdotes niqui'an sorteo. 10Y antok nuparuoj ri incienso (puon), quinojiel ri vinak ri quimaluon-apa-qui' juviera niqui'an orar. 11Y antok ri Zacarías nuparuoj ri incienso (puon), jun ángel richin ri Ajaf xuc'ut-ri' choch. Y ri ángel re' xpi'ie' lado derecha ri altar ri pache' niparox-ve ri incienso (puon). 12Antok ri Zacarías xutz'at ri ángel re', xsach runo'j y xpa xib'inre'l chirij. 13Pero ri ángel xu'ej cha ri Zacarías: Man taxi'ij-avi'. Ri Dios xra'xaj ri av-oración. Ri Elisabet ri avaxjayil xtic'ujie' jun ruxulu', y Juan ri rub'e' ri xtaya'. 14Y can xcaquicuot y iq'uiy vinak je' xca'quicuot ruma xtalax; 15ruma xtic'ujie' nem ruk'ij choch ri Dios. Man xtukun ta vino, ni nic'aj chic roch avarienta, ruma antok xtalax, nojnak chic pa ránima riq'uin ri Espíritu Santo. 16Y xtu'on chica iq'uiy avanakil israelitas chi xtiquinimaj ri Ajaf Dios y xtic'axtaj quic'aslien. 17Jaja' ri xti'a choch ri Ajaf Dios, y xtic'ujie' ri Espíritu Santo riq'uin y xtic'ujie' riq'uin ri poder, ri inche'l xc'ujie' riq'uin ri Elías, ri jun profeta ri xc'ujie' ojier can tiempo. Ri Juan xtu'on chica ri tata'j chi xca'cajo' ri calc'ual, y xtu'on chica ri man nca'niman ta tzij chi xtiquic'uaj jun choj c'aslien, inche'l quic'uan ri vinak ri choj quic'aslien choch ri Dios. Quire' xtu'on ri Juan chica ri vinak, chi quire' jo'c chic niquiyo'iej-apa ri Ajaf Dios, xcha' ri ángel cha ri Zacarías. 18Y ri Zacarías xuc'utuj cha ri ángel: ¿Che'l xtina'iej inre' chi ketzij ri na'ej? Ruma inre' in mámix chic y ri vaxjayil xa aviela chic, xcha'. 19Y jare' antok ri ángel xu'ej cha: Inre' Gabriel nub'e', ri inc'o choch ri Dios. Rumare' xirutak-pa aviq'uin chi nal'ej-ka ri utzulaj tzij chava. 20Y ruma man xanimaj ta ri xin'ej chava, xcac'ujie' can miem; hasta c'a xtalax-na ri avalc'ual, c'ajare' xcach'o' chic jun b'ay. Nojiel re' xtib'anataj-na-ve antok xtalka ri tiempo, xcha'. 21Antok ri Zacarías nitzijuon riq'uin ri ángel, ri vinak ri quiyo'ien-apa juviera xqui'an extrañar ruma man ntiel ta pa chupan ri Lugar Santo. 22Y antok ri Zacarías xb'a'iel-pa, man nich'o' ta chic; mare' ri quiyo'ien-apa xquina'iej chi c'o ri x'e'x-pa cha chupan ri Lugar Santo. Ri Zacarías xa cha ruk'a' nu'on-ve señas chica, ruma xc'ujie' can miem. 23Y antok jaja' xuq'uis can ri ru-turno chi nisamaj chire' pa rachuoch ri Dios, x'a chirachuoch. 24Y después ri quire' tib'anataj, jare' antok ri Elisabet ri raxjayil xc'ujie-ka encinta (embarazada), y rumare' man xiel ta pa b'ay vu'uo' ic'. Y ri Elisabet nu'ej: 25Vacame ri Ajaf Dios quire' nu'on chuva, chi man xquiq'uix ta chic chiquivach ri vinak ri nquinquiyok' ruma manak val. 26Y antok ri Elisabet ruc'uan vaki' ic' encinta (embarazada), jare' antok ri Dios xutak ri ángel Gabriel chupan jun tanamet ri c'o Galilea rub'inan Nazaret, 27riq'uin jun xtan María rub'e', ri ni jun choj-iq'uin varnak-ve. Ri xtan re' c'utun chic chi nic'ulie' riq'uin jun ala' rub'inan José. Y ri José re' rumáma can ri rey David. 28Ri ángel xuoc-pa ri pache' c'o-ve ri xtan, y xu'ej cha: ¡Tiquicuot avánima, ruma ri Dios pan ave' atre' xuya-ve ru-bendición! Ri Ajaf can c'o aviq'uin. Y chiquivach quinojiel xtani' y ixoki', atre' ri más bendición xyo'x chava. 29Y antok ri María xutz'at ri ángel y xra'xaj ri xu'ej cha, can xsach runo'j y xu'on-ka pensar karruma quire' x'an saludar. 30Entonces ri ángel xu'ej cha: María, man taxi'ij-avi', ruma atre' xa'an recibir ri ru-favor ri Dios. 31Vacame ni'ej can chava chi xcac'ujie' c'a encinta (embarazada), y antok xtalax ri xulu', ala' y JESUS ri rub'e' ri xtaya'. 32Jaja' c'o ruk'ij xtic'ujie', y xtub'inaj Ralc'ual ri Namalaj Dios. Ri Jesús jun rumáma can ri rey David, y ri Ajaf Dios can jaja' c'a ri xtuya' pa ru-trono ri rey David ri xc'ujie' ojier can, 33chi quire' xtu'on reinar richin nojiel tiempo pan ive' ixre' ri ix rumáma can ri Jacob. Y ri ru-reino man xtiq'uis ta, xcha' ri ángel cha ri María. 34Y ri María xuc'utuj cha ri ángel: ¿Chica c'a modo antok xtic'ujie' nuxulu'? Ruma inre' xa ni jun choj-iq'uin in-varnak-ve, xcha'. 35Y ri ángel xu'ej cha ri María: Ja ri Espíritu Santo riq'uin ri ru-poder ri Namalaj Dios ri xtika-pa pan ave'. Rumare' ri Santo ac'ual ri xtalax aviq'uin, can xtub'inaj Ruc'ajuol ri Dios. 36Y tavatamaj c'a chi ri Elisabet ri avach'alal c'o encinta (embarazada), mesque jaja' aviela chic ri niqui'ej cha chi manak ral alaxnak. Y vacame ruc'uan vaki' ic' encinta (embarazada). 37Ruma ri Dios man jun kax ri man ta nicovin nu'on. 38Entonces ri María xu'ej: Ja inc'o va, in jun ru-sierva ri Ajaf. Can tib'anataj c'a inche'l ri xa'ej chuva, xcha' ri María cha ri ángel. Y ri ángel xiel-el chire' riq'uin ri María y x'a. 39Jun jane' (jaro') k'ij después, ri María xuchojmij-el-ri' y cha'nin x'a pa jun tanamet ri c'o paro' jun juyu' richin ri Judá. 40Y antok xb'aka chire' pa tanamet, jaja' x'a chicachuoch ri Zacarías y ri Elisabet y xu'on saludar ri Elisabet. 41Antok ri Elisabet xra'xaj ri ru-saludo ri María, can xsiluon ri ral xuna'. Y ri Elisabet xnuoj ránima riq'uin ri Espíritu Santo, 42y rumare' cof xch'o', y xu'ej: Chikacajol ojre' ri oj xtani' y ixoki', atre' ri más bendición xyo'x chava, y quire' je' ri bendición c'o paro' ri aval ri xtalax aviq'uin. 43¿In chica ta c'a inre', chi xapa vave' viq'uin y nquina'an saludar, atre' ri at rutie' ri Vajaf? 44Ruma antok xinva'xaj chi xina'an saludar, can xinna' chi ri nuxulu' can xsiluon ruma xquicuot. 45Can ja'al caquicuot ruma xanimaj ri xu'ej ri Ajaf chava; ruma can xtu'on cumplir ri xu'ej chava chi xtalax ri ac'ual. 46Y ri María xu'ej: Inre' riq'uin nojiel vánima niya' ruk'ij ri Ajaf. 47Ri nu-espíritu niquicuot riq'uin ri Dios ri Nu-Salvador (caloy-vichin). 48Ruma ri Dios xirucha' inre' ri man jun oc vakalien, xa in jun ru-sierva. Y desde vacame, ri vinak xtiqui'ej chi can ja'al nquiquicuot. 49Ruma q'uiy nima'k tak kax ri rub'anun-pa chuva, ri nitiquir nu'on nojiel. Y ri rub'e' jaja' can Santo. 50Jaja' siempre nujoyovaj quivach quinojiel vinak ri nca'k'ax-el choch-ulief, ri niquinimaj rutzij y niquiya' je' ruk'ij. 51Can q'uiy nima'k tak kax i-rub'anun riq'uin ri ru-poder. Jaja' rukasan quik'ij ri niqui'ej pa tak cánima chi c'o quik'ij. 52I-rukasan nima'k tak gobernadores, y xu'on nem chica ri man jun oc quikalien. 53Ri nca'vijan, can xuya' nojiel ri nic'atzin chica; pero ri b'ayoma' xa choj quire' xa'rutak-el, man jun xuya-el chica. 54Jaja' oj-ruto'n c'a ri oj israelitas ri oj-rucho'n chi naka'an ri rusamaj. Man oj-rumastan ta can y rujoyovan kavach. 55Inche'l ri ru'e'n chica ri kate't-kamama' ojier can, ri ru'e'n cha ri Abraham y chika ojre' ri oj rumáma can jaja'. Ri Dios man jun b'ay xtumastaj ri ru'e'n. Quire' xu'ej ri María. 56Y ri María xc'ujie-ka jun la'k oxe' ic' riq'uin ri Elisabet, y después xtzalaj chirachuoch. 57Antok xalka ri k'ij chi nalax ri ruxulu' ri Elisabet, ja xc'ujie' jun ala'. 58Y antok ri iru-vacínix ri Elisabet y ri rach'alal xca'xaj chi jun namalaj favor ri xu'on ri Dios riq'uin chi xc'ujie' jun ral, can xa'quicuot riq'uin. 59Y ijeje' xa'lka chic riq'uin ri Elisabet antok xtz'akat ocho (vakxaki') k'ij talax ri xulu', ri k'ij chi ni'an ri circuncisión cha. Y ri vinak re' xcajo' ta xquiya' rub'e' ri xulu' inche'l rub'e' ri rutata', y xub'inaj ta Zacarías. 60Pero ri rutie' xu'ej: Man xtub'inaj ta inche'l rub'e' ri rutata'; xa xtub'inaj Juan. 61Y ri ic'o riq'uin ri Elisabet xqui'ej cha: ¿Karruma Juan navajo' na'an cha ri rub'e'? Ruma chupan ri a-familia man jun quire' rub'e'. 62Entonces cha señas xquic'utuj cha ri Zacarías, rutata' ri xulu', chi chica rub'e' nrajo' nuya'. 63Ri rutata' ri xulu' xuc'utuj jun ch'iti tabla y xutz'ib'aj choch: Ri xulu' xtub'inaj Juan. Y quinojiel ri quimaluon-apa-qui' xa'chapataj. 64Y jare' antok xch'o' chic jun b'ay ri Zacarías. Y can jo'c xch'o', can ja xuya' ruk'ij ri Dios. 65Y ri qui-vacínix xquixi'ij-qui' ruma ri xb'anataj chire'. Y ri xb'anataj, x'a rutzijoxic pa tak juyu' richin ri Judea. 66Y quinojiel ri nca'c'axan ri xb'anataj quiq'uin ri Zacarías y ri Elisabet, niquiyac pa tak cánima ri nitzijos chica, y niqui'ej: ¿Chica came xtirub'ana' ri ac'ual re'? nca'cha'. Ruma k'alaj chi c'o ri Ajaf Dios riq'uin. 67Y ri Zacarías, ri rutata' ri xulu', nojnak ránima riq'uin ri Espíritu Santo, mare' nu'ej ri chica xtib'anataj ri más chila-apa y xu'ej: 68Can tiyo'x ruk'ij ri Ajaf Dios kichin ojre' ri aj-Israel, ruma nkojrunataj-pa ojre' ri oj rutanamit, y nkojrucol. 69Ri Dios nuya-pa chika jun Namalaj Ka-Salvador (caloy-kichin). Y re' jun rumáma can ri David, ri jun ka-rey ri xc'ujie' ojier can y rusamajiel ri Dios. 70Ri Dios x'e'n chica ri santos profetas ri xa'c'ujie' ojier can tiempo, chi tiqui'ej chi xtuya' Jun ri xticalo kichin. 71Can ru'e'n-ve-pa chi xkojrucol chiquivach ri itziel nca'tz'ato kichin, y xkojrucol pa quik'a' ri man nkojcajo' ta, 72y ru'e'n chi nujoyovaj quivach ri kate't-kamama' ri xa'c'ujie' ojier can, y can nu'on ri xu'ej antok xu'on ri santo pacto. 73Can xu'on jurar cha ri kamama' Abraham chi nu'on cumplir, 74chi xkojrucol pa quik'a' ri itziel nca'tz'ato kichin, chi quire' man xtakaxi'ij ta ki' naka'an servir 75riq'uin jun choj y sak c'aslien choch ri Dios, ri k'ij ri nkojc'asie-el vave' ri choch-ulief. 76Y atre' ch'iti ac'ual, xti'e'x chava chi at jun profeta richin ri Namalaj Dios, ruma atre' xca'a na'ay choch ri Ajaf chi nachojmij ri rub'iey, 77y atre' ri xca'e'n chi ri Dios nu'on perdonar ri qui-pecados ri rutanamit chi nca'colotaj. 78Y re', xa ruma ri Ka-Dios nujoyovaj kavach y riq'uin nojiel ránima nkojrajo'. Rumare' nutak-pa ri Jun ri nalruya' sakil chika, ri inche'l ri k'ij xtu'on chikacajol antok xtika-pa chicaj. 79Ri Jun ri nalruya' sakil, xtuya' sakil chica ri ic'o pa k'aku'n y ri ic'o pa rumuch'uch'il ri camic, y xkojruc'uaj chupan ri b'ay richin paz. 80Y ri ac'ual ri xalax quiq'uin ri Elisabet y ri Zacarías, niq'uiy y quire' nic'ujie' ruchuk'a' ri ru-espíritu. Y pa tak lugares desiertos xc'ujie-ve, c'a xalka-na ri k'ij chi xutzijuoj ri ruch'ab'al ri Dios chiquivach ri aj-Israel ri ruvanakil.

will be added

X\