Judas 1

1Inre' Judas, in jun ru-siervo ri Jesucristo y kachak'-kanimal-ki' riq'uin ri Jacobo. Nitak-el va carta va chiva ixre', ri ix-ayuon ruma ri Dios, y can sak chic ri ic'aslien. Ri Katata' Dios can ix-ruchajin otz, ruma jo'c jun ib'anun riq'uin ri Jesucristo. 2Ri misericordia, ri paz y ri amor ri nuya' ri Dios, niq'uiy ta más riq'uin ivánima. 3Hermanos ri altíra nquixvajo', can altíra vajo'n nutz'ib'an ta el va carta va chiva, ruma nivajo' ni'ej chiva chirij ri chica modo oj-colotajnak. Pero vacame nic'atzin ni'ej-el chiva chi tiya' ivuchuk'a' chi quire' man nquix'an ta engañar, y tib'ana' defender ri santo ch'ab'al ri xc'ut chakavach antok xkanimaj ri Jesucristo. Ruma ri xc'ut chakavach jo'c jun b'ay xjach chika ri oj santos ralc'ual, y manak xtic'axtaj. 4Ruma chicajol ixre' ic'o achi'a' ri niquic'ut ri man inche'l ta nu'ej ri ruch'ab'al ri Dios, y man ina'ien ta chi quire' niqui'an. Chiquij ri achi'a' re' can ru'e'n-pa ri Dios chi xtika ri nem castigo pa quive', ruma ri quic'aslien man otz ta choch jaja'. Ijeje' niqui'ej chi ri Dios altíra nkojrajo' y nu'on perdonar ri ka-pecados, rumare' man takaxi'ij-ki' chi nca'ka'an nojiel roch itziel tak kax, nca'cha'. Y ruma quire' niqui'an ri achi'a' re', niquic'ut chi man niquinimaj ta chi jo'c ri Dios y ri Jesucristo ri Ajaf ic'o pa kave'. 5Y vacame nivajo' ninataj chiva ri xu'on ri Dios ojier can. Ixre' ivata'n chi ri Ajaf Dios xa'ralasaj-pa ri israelitas chupan ri nación Egipto. Y antok i-colotajnak chic pa, ic'o ri man xcajo' ta chic xquinimaj, rumare' xa'ruq'uis. 6Y quire' je' xu'on ri Dios chica ri ángeles ri xquiya' can ri samaj ri ruyo'n pa quik'a' y xa'iel-pa chila chicaj. Vacame ri Dios i-ruyo'n chupan k'aku'n. Chire' i-yo'n-ve richin nojiel tiempo y quiyo'ien ri k'ij antok xca'an juzgar. 7Y quire' je' xu'on chica ri vinak ri xa'c'ujie' ojier can pa tanamet Sodoma y Gomorra y chica je' ri vinak ri xa'c'ujie' pa tak tanamet ri ic'o-apa cierca. Ri vinak re' xqui'an pecado, chi achi'a' chi ixoki' xquicanuj-qui' chi xqui'an pecado. Can q'uiy ri itziel tak kax ri xqui'an. Ruma ri achi'a' man xa'cajo' ta chic ixoki', xa quiq'uin yan chic achi'a' xa'c'ujie-ve. Y ri Dios xa'ruq'uis cha k'ak'. Y riq'uin re' nakatamaj chi chica-na vinak ri nuc'uaj jun itziel c'aslien, xti'a chupan ri k'ak' ri nic'at richin nojiel tiempo. 8Pero mesque ri achi'a' ri niquic'ut ri man ketzij ta cata'n ri xu'on ri Dios chica ri man xa'niman ta, xa quic'uan jun itziel c'aslien y niqui'an inche'l xqui'an ri vinak ri xa'c'ujie' ojier can. Xa inche'l nca'chic' ruma i-sachnak riq'uin ri quino'j. Can quijachuon ri qui-cuerpo chupan ri pecado, man nicajo' ta niquinimaj tzij y itziel nca'ch'o' chiquij ri c'o quik'ij. 9Ri achi'a' re' man niqui'an ta inche'l xu'on ri arcángel Miguel; ruma jaja' antok xu'on ayoval riq'uin ri diablo paro' ri ru-cuerpo ri Moisés, ni xa ta xu'on maldecir ri diablo. Jaja' jo'c xu'ej: Ja ri Ajaf xtich'olin chava, xcha' cha ri diablo. 10Pero ri achi'a' ri man ketzij ta ri niquic'ut, hasta itziel nca'ch'o' chirij ri kax ri man ni'ka ta pa quive' (man niqui'an ta entender), y ri kax ri ni'ka pa quive' (niqui'an entender) xa can niqui'an tz'il cha. Can i-inche'l chicop, ruma man niqui'an ta pensar otz. 11¡Y juye' quivach ri achi'a' re', ruma xa quic'uan ri itziel b'ay ri xuc'uaj ri Caín ojier can! Y niqui'an je' inche'l xu'on ri Balaam ojier can. Man nicajo' ta niquinimaj ri ruch'ab'al ri Dios ruma nicajo' niquich'ec miera. Y ri achi'a' re' niqui'an je' inche'l xu'on ri Coré ojier can. Ijeje' nca'yacataj chirij ri Dios, y ruma niqui'an quire', c'a chupan ri castigo xca'b'aka-ve. 12Ri achi'a' re' can k'alaj-ve chi itziel ri niqui'an, ruma antok ixre' ntimol-ivi' ruma ntivajo-ivi' y junan nti'an jun va'en, ri achi'a' re' niquiya' q'uix chivij ruma ri niqui'an. Pero xa i-inche'l jun tz'il chirij jun tziak, ruma xa ijeje' ri niquitzuk-ka-qui'. Xa i-inche'l ri mukul ri nca'k'alajin chi i-richin job', pero xa man jun job' niquiya', y xa i-uc'uan ruma cak'iek'. Xa i-inche'l chie' ri man niquiya' ta quivach. Man niquiya' ta chic quivach ruma i-c'ukun y inche'l i-quiminak chic. 13Ri achi'a' re', i-inche'l ri mar ri altíra ruchuk'a'. Can q'uix-q'uix nojiel ri itziel tak kax ri niqui'an; can inche'l ri espuma ri nalka chuchi' ri mar, can tz'il. I-inche'l estrellas (ch'umil) ri i-alanak chic el chupan ri quib'iey. Ijeje' xa can i-yo'ien chic ruma ri xakalaj k'aku'n, pache' xca'b'ac'ujie-ve chupan ri castigo ri manak xtiq'uis. 14Y ri Enoc c'o je' ri ru'e'n can chiquij ri achi'a' re'. Jaja' xu'ej can ri chica xti'an chica ri achi'a' re'. Y ri Enoc re' jun rumáma can ri Adán, ri xalax c'a chi siete (vuku') vinak chirij ri Adán. Ri Enoc re' ru'e'n can: Tivaxaj c'a, chi ri Ajaf xtipa i-rich'ilan-pa miles ri ru-santos ángeles, 15chi nca'ru'on juzgar y nca'ru'on castigar quinojiel ri vinak ri man quic'uan ta ri c'aslien ri nika choch ri Dios. Xa quic'uan jun itziel c'aslien y qui'e'n itziel tak kax chirij ri Dios. Can i-pecadores. Quire' xu'ej ri Enoc. 16Ijeje' nca'jasloj chirij nojiel, man jun b'ay niquicuot ta ri cánima riq'uin ri chica c'o. Jo'c ri itziel tak kax ri nika chiquivach. Ijeje' q'uiy tzij niqui'ej jo'c chi niqui'an chi i-nima'k, y nca'qui'an nima'k chica nic'aj chic vinak ruma c'o chica nicajo' chica. 17Pero ixre' hermanos ri altíra nquixvajo', man timastaj chiva ri b'e'n can cuma ri ru-apóstoles ri Kajaf Jesucristo chirij ri xca'b'anataj. 18Ijeje' qui'e'n can chi chupan ri ruq'uisb'al tak k'ij xca'pa vinak ri nca'tze'n chirij ri nu'ej ri ruch'ab'al ri Dios, y jo'c ri itziel tak kax ri niquirayij niqui'an. 19Y ja vinak re' ri nca'b'ano chica ri hermanos chi niqui'an división. Xa jo'c richin ri roch-ulief niqui'an pensar. Man c'o ta ri Espíritu Santo quiq'uin. 20Pero ixre' hermanos ri altíra nquixvajo', ri c'o chic iviq'uin ri santo icukb'al c'u'x, paro' re' quixq'uiy c'a chupan ri ic'aslien riq'uin ri Dios. Y tib'ana' orar inche'l nrajo' ri Espíritu Santo. 21Can quixc'ujie' c'a chupan ri amor richin ri Dios. Y tivoyo'iej-apa ri ru-misericordia ri Kajaf Jesucristo ri richin c'aslien ri man niq'uis ta. 22Y ixre' ti'ej ri ketzij chiquivach ri caca' quic'u'x, chi quire' niquinimaj. 23Nic'atzin chi nqui'col nic'aj chic choch ri k'ak'. Y nic'atzin chi ntijoyovaj quivach ri nic'aj chic. Pero nic'atzin je' chi tib'ana' cuenta-ivi' ixre', chi quire' man nquixtzak ta. Can itziel titz'ata' ri quitziak, ruma ri pecado aún re' tz'il rub'anun cha. 24Ri Dios altíra ru-poder chi nquixruchajij chi man nquixtzak ta chupan ri pecado, chi quire' man jun i-pecado antok xquixb'aka riq'uin, y altíra xtiquicuot ri ivánima antok xquixb'aka riq'uin. 25Jo'c jaja' ri Dios c'o y riq'uin jaja' c'o-ve nojiel no'j, y jaja' ri nicalo kichin. Y jo'c jaja' ri tiyo'x ruk'ij, ruma jaja' ri Namalaj Rey, y jaja' ri c'o autoridad y nojiel poder pa ruk'a', vacame y richin nojiel tiempo. Amén.

will be added

X\