Santiago 4

1¿Chica nib'ano chiva chi itziel ntitz'at-ka-ivi' y c'o ayoval chicajol? Ri nib'ano chiva chi c'o ayoval chicajol, ja ri itziel tak kax ri nqui'irayij, y nicajo' nquixquich'ec. 2Ixre' altíra nqui'irayij ri kax ri manak iviq'uin, rumare' nquixquimisan chi nic'ujie' iviq'uin ri ntirayij. Pero man ntivil ta. Altíra ayoval nti'an, pero man ntivil ta ri ntirayij, ruma man ntic'utuj ta cha ri Dios. 3Y ntic'utuj cha ri Dios, pero jaja' man nuya' ta chiva, ruma ixre' man otz ta ri ntic'utuj. Ruma ixre' ntic'utuj xa richin nti'an ri nurayij ri i-cuerpo vave' choch-ulief. 4Ixre' ri ntivajo' ntiya' can ri Dios, ¿man ivata'n ta c'a chi xa ni'a ivánima chirij ri c'o choch-ulief, nik'alajin chi itziel ntitz'at ri Dios? Y chica-na chivach ri nrajo' ni'a chirij ri ic'o choch-ulief, can ntuoc-ka jun ru-enemigo ri Dios. 5¿O nti'an pensar chi ri tz'ib'an can chupan ri ruch'ab'al ri Dios man ketzij ta, ruma nu'ej chi rutakuon-pa ri Espíritu Santo chi nic'ujie' riq'uin kánima? Y ri Espíritu Santo altíra nkojrajo' y nrajo' chi jo'c ta ri Dios ri nakajo'. Quire' nu'ej chupan ri ruch'ab'al ri Dios. 6Y ri Dios q'uiy ri ru-favor nuya' pa kave'. Inche'l nu'ej chupan ri ruch'ab'al ri tz'ib'an can: Ri Dios itziel nca'rutz'at y man nca'ruc'ul ta ri niquina-qui' chi i-nima'k. Pero ri co'l-oc niquina', jaja' nuya' ri ru-favor pa quive'. Quire' ri tz'ib'an can. 7Tijacha-ivi' pa ruk'a' ri Dios y man tiya' lugar cha ri diablo. Xa quire' xti'an, ri diablo xtunumaj chivach. 8Quixjiel-apa riq'uin ri Dios, y jaja' je' xtijiel-pa iviq'uin ixre'. Ixre' ri nti'an pecado choch ri Dios, tich'aja' ri ik'a'. Ixre' ri caca' ic'u'x riq'uin ri Dios, tich'aja' ri ivánima. 9Tina' k'axuon riq'uin ivánima, quixb'isuon y quixuok' ruma ri i-pecado. Ixre' ri nquixtze'n ruma nquixquicuot riq'uin ri c'o choch-ulief, xa quixuok'. Ixre' ri altíra nquixquicuot choch-ulief, xa quixb'isuon. 10Co'l-oc tib'ana' choch ri Ajaf, y jaja' xtu'on chiva chi ix nima'k. 11Hermanos, man itziel quixch'o' chirij jun chic hermano. Ruma xa itziel nquixch'o' chirij jun chic, can chirij ri ru-ley ri Dios nquixch'o-ve. Y xa ixre' xti'ej chi jun ka-hermano man otz ta ruc'aslien choch ri Dios, nti'an cha ri ru-ley ri Dios chi man otz ta. Y xa quire' xti'an, k'alaj chi man nquixniman ta cha ri ley, pa ruc'axiel re' xa nti'an chi ix inche'l juez chirij ri ley. 12Ri ley re' ja ri Dios ri xyo'n-pa. Y jo'c jaja' nitiquir nkojrucol, y jo'c je' jaja' nitiquir nkojrutak pa k'ak'. Pero atre', ¿at chica atre' chi na'ej chi ri jun chic man otz ta rub'anun ri ruc'aslien choch ri Dios? 13Y vacame nivajo' ni'ej chica ri nca'e'n: Vacame o chua'k nku'a jun chic tanamet; nkojc'ujie' chire' jun juna', y nkojlak'o y nakach'ec miera. 14Chivach ixre', ja'al ri nti'an pensar. Pero man ivata'n ta ri chica xtib'anataj chua'k chi cab'ij. Ruma ri kac'aslien xa inche'l ri mukul ri nika-pa, nic'ujie' jub'a' y cha'nin niq'uis-el. 15Rumare' antok ixre' c'o ri ntivajo' nti'an, más otz ti'ej: Xa ri Kajaf xtuya' permiso chika y ojc'as, xtaka'an ri chica naka'an pensar. 16Pero ixre' xa man quire' ta nti'ej. Ixre' xa nti'ej chi xti'an nojiel ri nti'an pensar. Xa nti'an chi ix nima'k choch ri Dios. Re' man otz ta choch jaja'. 17Ruma ri rata'n ri otz, y man nu'on ta, xa pecado nu'on choch ri Dios.

will be added

X\