Santiago 2

1Hermanos, ixre' ri icukub'an ic'u'x riq'uin ri Kajaf Jesucristo ri c'o ruk'ij, inre' ni'ej chiva: Man ti'an cha jun vinak chi más ntivajo' choch jun chic. Xa tib'ana' chi ix junan ixvonojiel. 2Antok imaluon-ivi' chi ntiya' ruk'ij ri Dios, y ntuoc jun ache b'ayuon iviq'uin y ri b'ayuon re' c'o anillo de oro chuk'a' y utzulaj tziak rucusan, y ntuoc je' jun ache puobra y vieja tziak rucusan, 3y ixre' xa ja ri ache b'ayuon otz ntitz'at y ntiya' ja'al ruch'acat, pero man jun ruch'acat ntiya' ri jun ache puobra y pa ruc'axiel re' xa nti'ej cha: Capi'ie' chire', o nti'ej cha: Catz'uye' vave' pan ulief chikakan, 4can ntic'ut chi man ntina' ta ivi' chi xa ix junan chi'ixvonojiel. Xa can nti'an chi jun vinak más c'o rakalien choch jun chic, y jun no'j quire' can itziel. 5Hermanos ri altíra nquixvajo', tivaxaj ri xtin'ej chiva. ¿Man ja ta came ri i-puobra choch-ulief ri i-rucho'n ri Dios chi quicukub'an quic'u'x riq'uin y niquil ri utzulaj b'ayomal, y niyo'x qui-herencia pa ru-reino ri jaja', ri inche'l ranun prometer chi nuya' chica ri nca'jo'n richin? 6Pero ixre' ib'anun chica ri i-puobra chi manak cakalien. ¿Man nalka ta c'a pan ive' chi cuma ri b'ayoma' nti'an sufrir y ijeje' je' ri nca'chiririen-el ivichin pa tak juzgados? 7¿Man nalka ta c'a pan ive' chi ijeje' je' ri altíra itziel nca'ch'o' chirij rub'e' ri Jesucristo, ri e'n pan ive'? 8Chupan ri ley ri xuya' ri Dios ri Ka-Rey, tz'ib'an can jun tzij ri altíra rakalien; ri tzij re' nu'ej: Can inche'l ri navajo-ka-avi' atre', can quire' je' mismo tavajo' ri a-prójimo. Quire' nu'ej chupan ri ley. Y xa quire' nti'an, altíra otz. 9Pero xa ixre' nti'an cha jun vinak chi más ntivajo' choch jun chic, nquixka chupan ri pecado, ruma man ntinimaj ta ri nu'ej ri ru-ley ri Dios. 10Ruma xa c'o jun nu'ej chi nu'on nojiel ri nu'ej ri ley, pero xa c'o jun tzij ri c'o chupan ri man nu'on ta, k'alaj chi man nunimaj ta nojiel ri ley, y rumare' c'o ru-pecado. 11Ruma antok ri Dios xuya' ri ley, xu'ej: Ri at-c'ulan, man tavuc'uaj-avi' riq'uin jun chic. Y ri x'e'n quire', jaja' mismo ri x'e'n je': Man caquimisan. Y xa atre' man navuc'uaj ta avi' riq'uin jun chic, pero xa ncaquimisan, nik'alajin chi man nanimaj ta ri ru-ley ri Dios. 12Rumare', tib'ana' y ti'ej inche'l ri nu'ej chupan ri ley ri xuya' ri Jesucristo. Ri ley re' xu'on chiva chi ix libre chic y chi nti'an ri nrajo' ri Dios, y ja ley re' ri xtib'ano juzgar ivichin. 13Ruma xa man xtijoyovaj ta quivach ri nic'aj chic, ri Dios man xtujoyovaj ta je' ivach ixre' ri k'ij antok xca'ru'on juzgar quinojiel vinak. Pero xa xtijoyovaj quivach ri nic'aj chic, can xquixch'acuon, ruma ri Dios can xtujoyovaj je' ivach ixre' chupan ri k'ij re'. 14Hermanos, ¿chica nuch'ec jun ri ni'e'n chi rucukub'an ruc'u'x riq'uin ri Dios, y xa man nu'on ta ri otz? ¿Nicolotaj came jo'c ruma nu'ej chi rucukub'an ruc'u'x riq'uin ri Dios? 15Inche'l ta jun hermano o jun hermana ri manak rutziak y nrajo' ruvay, 16y atre' jo'c na'ej cha: Ca'in en paz. Xa tacusaj ri atziak y cava' otz. Y xa man jun kax xaya-el cha, man jun xc'atzin-ve ri xa'ej-el cha. 17Y xa atre' na'ej je' chi acukub'an ac'u'x riq'uin ri Dios, pero xa man na'an ta ri otz, man jun nic'atzin-ve ri na'ej; xa quiminak ri na'ej. 18Xa c'o jun ri xti'e'n: Atre' na'ej chi acukub'an ac'u'x riq'uin ri Dios, rumare' c'o utzulaj tak kax nca'an. Pero inre', xticha' ri jun re', jo'c ruma nucukub'an nuc'u'x riq'uin ri Dios, man jun chic chica nic'atzin ni'an. Pero inre' ni'ej cha ri ni'e'n quire': Inre', riq'uin ri utzulaj tak kax ri ni'an nic'ut chavach chi ketzij nucukub'an nuc'u'x riq'uin ri Dios. Pero atre', ¿che'l nac'ut chinoch chi acukub'an ac'u'x riq'uin ri Dios, xa man na'an ta ri otz? 19Atre' na'ej chi nanimaj chi jo'c jun Dios c'o. Re' altíra otz. Y quire' je' ri itzal tak espíritus can niquinimaj. Y can nca'b'arb'uot choch ri Dios ruma xib'inre'l. 20Altíra at-nacanic. Tatz'ata-na-pe'. Xa na'ej chi acukub'an ac'u'x riq'uin ri Dios y xa man na'an ta ri otz, man jun nic'atzin-ve ri na'ej; xa quiminak ri acukb'al c'u'x. 21Ri kamama' Abraham ri xc'ujie' ojier can, xuya' ri Isaac ri ruc'ajuol paro' ri altar chi nuya' cha ri Dios. Y rumare' ri Abraham xiel chi man jun chic ru-pecado choch ri Dios, ruma xu'on ri xu'ej ri Dios cha. 22Ri Abraham man jo'c ta xucukub'a' ruc'u'x riq'uin ri Dios, xa xu'on ri xu'ej ri Dios cha. Y rumare' k'alaj chi ketzij xucukub'a' ruc'u'x riq'uin ri Dios. 23Y quire', xb'anataj ri nu'ej chupan ri ruch'ab'al ri Dios ri tz'ib'an can, chi ri Abraham xunimaj ri Dios y rumare' ri Dios xu'on cha chi xiel chi man jun chic ru-pecado choch. Y ri Abraham x'e'x cha chi jaja' jun ru-amigo ri Dios. Quire' ri tz'ib'an can. 24Titz'ata' c'a, chi man jo'c ta nic'atzin chi nticukub'a' ic'u'x riq'uin ri Dios chi quire' ntiel chi man jun chic i-pecado choch. Xa nic'atzin je' nti'an ri nrajo' jaja'. 25Quire' je' ri Rahab ri xc'ujie' ojier can; jaja' jun ramera. Pero jaja' xuya' qui-posada ri ica'ye' achi'a' israelitas ri i-takuon-el ruma ri Josué y xa'ralasaj-el jun chic lado, y ruma ri xu'on, xiel chi man jun chic ru-pecado choch ri Dios. 26Rumare' ojre' ri kacukub'an kac'u'x riq'uin ri Dios, xa man naka'an ta ri otz, oj-quiminak y man jun nic'atzin ri naka'ej chi kacukub'an kac'u'x riq'uin ri Dios. Oj inche'l ri cuerpo ri man c'o ta chic ri espíritu chupan.

will be added

X\