Santiago 1

1Inre' Santiago, jun ru-siervo ri Dios y ri Ajaf Jesucristo, nitz'ib'aj-el va carta va chiva ixre' ri ix quimáma can ri i-doce (cab'alajuj) ralc'ual ri Israel ri xa'c'ujie' ojier can, ri man ixc'o ta chupan ri ka-nación y xa nic'aj chic naciones iquiran-ivi'. Nitak-el jun saludo chiva. 2Hermanos, can tiquicuot ri ivánima antok nquixtojtob'ax riq'uin nojiel roch sufrimiento. 3Ruma ivata'n chi antok nquixtojtob'ax, a ver xa ketzij icukub'an ic'u'x riq'uin ri Dios, re' nuya' más i-paciencia. 4Y man jun b'ay tiq'uis ta ri paciencia, chi quire' nu'on jun samaj caval, niq'uiy ri ic'aslien y man jun chic chica xtu'on falta. 5Y xa c'o jun chicajol ri nuna' chi c'a c'o runo'j nrajo', tuc'utuj cha ri Dios, y jaja' man xtuc'aq'uiej ta xtuya-pa, y q'uiy xtuya-pa. Quire' nu'on quiq'uin quinojiel ri niquic'utuj cha, y man nich'olin ta nuya' chica. 6Pero nic'atzin chi cukul ruc'u'x riq'uin ri Dios antok nuc'utuj, y man caca' ta ruc'u'x nuc'utuj cha. Ruma xa riq'uin caca' ruc'u'x antok nuc'utuj, xa nu'on c'a inche'l nu'on ri ruve' ri mar ruma ri cak'iek'; ni'a cala, ni'a cala nu'on. 7Y xa quire' nu'on, man c'a tu'on pensar chi ri Ajaf Dios xtuya-pa cha ri nuc'utuj. 8Ruma xa caca' ruc'u'x nuc'utuj cha ri Dios, k'alaj chi caca' je' ruc'u'x riq'uin ri najin chub'anic. 9Y ri hermano ri manak-oc rakalien nuna', xa tiquicuot c'a ri ránima, ruma choch ri Dios can rakalien, ruma runiman chic jaja'. 10Y quire' je' ri hermano b'ayuon ri nuna' chi manak-oc rakalien, xa tiquicuot c'a ri ránima, ruma runiman je' ri Dios. Y xa man xtilayuj ta je' choch-ulief, xa inche'l ruse'j ri k'ayis. 11Ruma antok nipa ruchuk'a' ri k'ij, ri k'ayis nichakej-ka y cha'nin nitzak-ka ri ruse'j y niq'uis, mesque na'ay ja'al-oc nitz'iet. Can quire' je' jun b'ayuon. Jaja' xa cha'nin nicon-el y nuya' can nojiel ri rub'ayomal. 12Can altíra tiquicuot ri rucukub'an ruc'u'x riq'uin ri Dios y nucoch' ri sufrimientos ri nipa chirij. Ruma antok rucach'uon chic nojiel, ri Dios xtuya' inche'l jun ru-corona; ri corona ri xtuya' cha, ja ri utzulaj c'aslien ri man xtiq'uis ta. Ja c'aslien re' ri ranun prometer ri Dios chi xtuya' chica ri nca'jo'n richin. 13Pero xa c'o jun ni'an tentar, man tu'ej chi ja ri Dios xb'ano quire' cha. Ruma ri Dios man nu'on ta tentar jun y man jun nitiquir je' nib'ano tentar ri Dios. 14Y xa atre' nca'an tentar, re' xa aviq'uin atre' nipa-ve. Xa ja ri itziel tak kax ri nca'rayij, jare' ri nca'b'ano quire' chava. 15Y xa atre' naya' lugar cha ri itziel tak kax ri nca'rayij, chire' nipa-ve ri pecado. Y ri pecado ja ri camic espiritual xtuya' chava pa ruq'uisb'al. 16Hermanos ri altíra nquixvajo', man c'a quixsach. 17Ruma nojiel ri utzulaj tak kax, chicaj riq'uin ri Katata' Dios nca'pa-ve. Jaja' xa'b'ano nojiel ri ic'o chicaj ri niquiya' sakil y ri sakil re' nic'axtaj. Pero ri Dios man nic'axtaj ta. 18Y ruma ri Dios xurayij, xuya' jun c'ac'ac' c'aslien chika antok xkanimaj ri ruch'ab'al ri ketzij, chi quire' xojuoc inche'l ri na'ay tak cosechas choch jaja'. 19Rumare', hermanos ri altíra nquixvajo', inre' ni'ej chiva chi'ijunal chi tiya' ixiquin chi ntivaxaj ri ruch'ab'al ri Dios. Can tib'ana' pensar ri nu'ej, y c'ajare' quixch'o'. Y man tipa je' cha'nin ivoyoval. 20Ruma ri ayoval xa man nuc'an ta pa jun choj c'aslien inche'l nrajo' ri Dios. 21Rumare' tiya' can nojiel ri man sak ta y nojiel ri itziel tak kax y co'l tib'ana' choch ri Dios, y tinimaj siempre ri ruch'ab'al ri c'o riq'uin ivánima. Ruma ja ch'ab'al re' ri nicalo ivichin. 22Y man jo'c ta ntivaxaj ri ruch'ab'al ri Dios, xa tib'ana' je' ri nu'ej. Ruma xa ixre' jo'c ntivaxaj ri ruch'ab'al ri Dios y man nti'an ta ri nu'ej, iyuon ixre' nti'an-ka engañar-ivi'. 23Ruma xa c'o jun ri nra'xaj ri ruch'ab'al ri Dios, pero xa man nu'on ta ri nu'ej, can junan riq'uin jun vinak ri nutz'at-ri' pan ispieja, can nutz'at-ri' che'l titzu'n. 24Pero antok xa c'a jub'a' oc tutz'at-ri' pan ispieja, man nalka ta chic paro' che'l titzu'n. 25Pero ri nra'xaj ri ruch'ab'al ri Dios, y man jo'c ta nra'xaj, xa nunimaj y nu'on ri nu'ej, y man nuya' ta can, can ja'al xtiquicuot, ruma ri ruch'ab'al ri Dios can otz. Y nu'on chika chi oj libre y chi naka'an ri nrajo' ri Dios. 26Xa c'o jun ni'e'n chi runiman ri Dios y xa man nuk'il ta ri' riq'uin ri itziel tak tzij ri nca'ru'ej, ruyuon jaja' nu'on-ka engañar ri ránima. Y xa quire' nu'on, man jun nic'atzin-ve chi nu'ej chi jaja' runiman ri Dios. 27Ruma xa ketzij runiman ri Katata' Dios, nca'ruto' ri malca'n-ixoki' y ri mab'a' ac'ola', y man ni'a ta chic chupan ri itziel tak kax richin ri roch-ulief. Choch ri Dios, ri nca'b'ano quire', jare' ri ketzij quiniman jaja' y riq'uin jun sak c'aslien niquiya' ruk'ij.

will be added

X\