Hebreos 9

1Ri na'ay pacto ri xu'on ri Dios quiq'uin ri kate't-kamama' xu'ej chica ri chica modo niqui'an chi niquiya' ruk'ij, y xu'ej je' chica chi tiquib'ana' jun rachuoch ri b'anun cha tziak vave' choch-ulief. 2Y ri rachuoch ri Dios quire' x'an cha: Chupan ri na'ay cuarto ri ni'e'x Lugar Santo cha, xc'ujie' ri candelero y jun mesa, y choch ri mesa xa'c'ujie-ve ri sagrada simíta. 3Y chupan ri ruca'n cuarto chirij ri nem tziak ri nijacho rupan, jare' ri Lugar Santísimo. 4Y chupan ri ruca'n cuarto re', c'o jun altar ri pache' niparox-ve ri incienso (puon), y ri altar re' b'anun cha oro. C'o je' chire' ri caja richin ri ru-pacto ri Dios. Y ri rij y ri rupan ri caja re' cha oro b'anun-ve. Chupan ri caja re' c'o jun nem jarro b'anun je' cha oro, y chupan ri jarro re' c'o ri simíta ri xka-pa chicaj rub'inan maná. Y chupan ri caja c'o je' ri ru-vara ri Aarón, ri xjotoyin-pa. Y ic'o je' ri ab'aj labrada ri pache' tz'ib'an can ri pacto ri xu'on ri Dios quiq'uin ri kate't-kamama'. 5Y paro' ri caja i-b'anun ca'ye' quichib'al ángeles ri ni'e'x querubines chica, quilic'uon quixic' paro' ri lugar ri pache' nitix-ve quic' chi ni'an perdonar pecados, y chiquicajol ijeje' nika-pa ri ru-gloria ri Dios. Pero vacame man xtaka'ej ta más chirij nojiel re'. 6Quire' b'anun cha ri rachuoch ri Dios. Y ri sacerdotes can k'ij-k'ij nca'uoc chupan ri na'ay cuarto, chi niqui'an ri samaj chi niquiya' ruk'ij. 7Pero chupan ri ruca'n cuarto, jo'c ri sacerdote ri más c'o ruk'ij ri ntuoc chire', y jo'c jun b'ay ntuoc chire' chupan jun juna'. Y antok ntuoc, nuc'uaj-apa quiquiq'uiel chicop chi nuya' choch ri Dios, ruma ri ru-pecado jaja' y ruma je' qui-pecados ri vinak. 8Antok c'a nicusas ri rachuoch ri Dios, man chica-na ta vinak nitiquir ntuoc-apa chupan ri Lugar Santísimo. Y riq'uin re' ri Espíritu Santo nuc'ut chakavach chi chupan ri tiempo re', maja' tik'alajin ri b'ay chi nca'b'aka ri vinak riq'uin ri Dios. 9Y nojiel re' c'o xu'ej chirij ri tiempo vacame. Ri chicop y ri nic'aj chic kax ri xa'quiya' ri vinak choch ri Dios, man xtiquir ta xu'on chica ri vinak chi otz ta xu'on cha ri quijaluon y ri cánima choch ri Dios. 10Ruma chupan ri na'ay pacto, jo'c xch'o' chirij ri chica niquitej, y ri chica niquikun, y che'l chi nca'iel sak. Jare' ri x'e'x chica chi tiquib'ana', pero re' jo'c chirij ri cuerpo xch'o-ve; y jare' ri b'anun-pa c'a antok xalka ri k'ij chi xc'axtaj nojiel re'. 11Pero vacame ya xalka ri Cristo ri Namalaj Sacerdote y jaja' xtiyo'n nojiel ri utzulaj tak kax chika. Ri rachuoch ri Dios pache' nisamaj-ve ri Cristo más nem y más ja'al, ruma man b'anun ta cuma vinak, o sea man richin ta ri roch-ulief. 12Ri Cristo jo'c jun b'ay xuoc para siempre chupan ri Lugar Santísimo chila chicaj. Pero man xuya' ta quiquiq'uiel cabras, ni quiquiq'uiel alaji' tak váquix choch ri Dios. Xa ja ri ruquiq'uiel jaja' mismo ri xuya' choch ri Dios chi x'an perdonar ri ka-pecados y chi xojrucol richin nojiel tiempo. 13Chupan ri na'ay pacto, antok c'o jun vinak ri man sak ta choch ri Dios, niquimisas jun tuora o jun achij cabra o niparox jun alaj váquix. Y ri ruquiq'uiel ri tuora o ri cabra, o ri chaj ri nic'ujie' can richin ri alaj váquix ri xparox, niquirax chirij ri vinak chi nu'on sak ri ru-cuerpo. 14Pero ri ruquiq'uiel ri Cristo más nitiquir nu'on. Ruma ri Cristo man jun pecado xu'on. Y riq'uin ri ru-poder ri Espíritu Santo ri c'o richin nojiel tiempo, jare' ri xb'ano cha chi xuya' rutzij chi xquimisas pa ka-cuenta richin chi nitiquir nralasaj ri pecados ri c'o riq'uin kánima y nu'on sak cha, ruma ri pecado xa camic nuc'am-pa. Y ruma quire' xu'on ri Cristo kiq'uin, rumare' vacame naka'an servir ri c'aslic Dios. 15Rumare' ja ri Cristo ri nib'ano chi nca'b'aka ri vinak riq'uin ri Dios, y jare' ri jun c'ac'ac' pacto. Y rumare' ri xa'yox ruma ri Dios chi nca'uoc riq'uin, can c'o ri xtiyo'x chica chicaj, inche'l ri ranun prometer jaja'. Y ri xtuya' chica man xtiq'uis ta. Y ruma ri Cristo xcon, mare' ni'an perdonar ri pecados ri xb'anataj antok c'a ic'o chupan ri na'ay pacto. 16Inche'l nu'on jun vinak, nu'on can jun vuj pache' nu'ej-ve can chi antok xticon, nojiel ri rub'ayomal ntuoc can richin jun chic. 17Y ri vuj ri ni'an can, man jun rakalien xa man quiminak ta ri b'anayuon ri vuj. Pero xa nicon-el, c'ajare' c'o rakalien ri vuj re'. 18Quire' je' antok ri Dios xu'on ri na'ay pacto quiq'uin ri kate't-kamama', can xcusas-ve ri quic'. 19Y antok ri Moisés ru'e'n chic chica ri vinak nojiel ri nu'ej ri ley chi tiquib'ana', después xb'aruc'ama-pa quiquiq'uiel ri alaji' tak váquix y achij tak cabras, y xuya' jub'a' ya' riq'uin. Y xucusaj lana quiak y jun ruk'a' ri chie' ri ni'e'x hisopo cha, y xuquiraj ri quic' xaluon riq'uin ya' paro' ri libro pache' tz'ib'an-ve ri ley y xuquiraj je' pa quive' quinojiel ri vinak ri ic'o chire'. 20Y xu'ej chica: Riq'uin ri quic' re' can nik'alajin chi ja xtz'ucutaj ri pacto ri xu'ej ri Dios chi naka'an, xcha' ri Moisés chica ri vinak. 21Y xuquiraj je' ri quic' chirij ri rachuoch ri Dios y chirij nojiel ri nicusas richin ri rusamaj ri Dios. 22Y chupan ri ley, jub'a' ma nojiel kax ni'an sak cha riq'uin ri quic'. Y xa man ni'in ta quic', man jun vinak ni'an perdonar ru-pecado. 23Inche'l xka'ej yan, ri rachuoch ri Dios ri xqui'an ri kate't-kamama', can inche'l ruchib'al ri rachuoch ri Dios ri c'o chila chicaj. Y ri rachuoch ri Dios ri xqui'an ijeje' y nojiel ri c'o chupan, xyo'x quiquiq'uiel chicop chiquij chi quire' ni'an sak chica y c'ajare' nca'cusas pa rusamaj ri Dios. Pero ruma ri rachuoch ri Dios ri c'o chicaj más c'o ruk'ij, mare' nic'atzin jun quic' ri c'o más rakalien choch quiquiq'uiel ri chicop. 24Ri Cristo man xuoc ta chupan ri rachuoch ri Dios ri b'anun cuma vinak, ri xa ruchib'al ri ketzij rachuoch ri Dios ri c'o chicaj. Jaja' c'a chicaj xuoc-ve, y riq'uin ri Dios c'o-ve y nich'o' cha pa ka-cuenta ojre'. 25Ri Cristo chila chicaj man nu'on ta inche'l nu'on ri sacerdote ri más c'o ruk'ij quichin ri israelitas vave' choch-ulief. Ruma ri sacerdote re' juna-juna' ntuoc chupan ri cuarto richin ri rachuoch ri Dios ri ni'e'x Lugar Santísimo cha chi nuya' quic' choch ri Dios, pero man ruquiq'uiel ta jaja' ri nuya'. Pero ri Cristo jo'c jun b'ay xuya' quic' y ja ri ruquiq'uiel jaja' mismo ri xuya' cha ri Dios. 26Ruma xa ta q'uiy mul xuya' choch ri Dios, q'uiy mul ta xu'on je' sufrir y q'uiy mul ta je' xcon xa-jan antok b'anun-pa ri roch-ulief. Pero jaja' man quire' ta xu'on. Jaja' jo'c jun b'ay xcon chi quire' xralasaj ri ka-pecados, y xa c'aja' chupan ri ruq'uisb'al tak tiempos xu'on quire'. 27Can b'anun chika ojre' ri oj vinak chi jo'c jun b'ay xkucon, y después xkoj'an juzgar. 28Y quire' je' ri Cristo, jo'c jun b'ay xcon chi xralasaj-el ri ka-pecados. Y xtalka ri k'ij antok jaja' xtipa chic jun b'ay, pero man richin ta chi nicon chic jun b'ay ruma ri pecado. Jaja' xtipa chi nkojrucol xa jun tiempo ri kayo'ien-apa jaja'.

will be added

X\