Hebreos 8

1Riq'uin nojiel ri ka'e'n-pa chiva, ti'ka pan ive' (tib'ana' entender) chi ojre' c'o jun Kanamalaj Sacerdote, y jaja' tz'uyul chicaj pa ru-derecha ri trono pache' c'o-ve ri Namalaj Dios. 2Y nisamaj chila chicaj, chupan ri ketzij rachuoch ri Dios, ri b'anun ruma ri Ajaf Dios y man vinak ta i-b'anayuon. 3Vave' choch-ulief, ri sacerdotes ri más c'o quik'ij quichin ri israelitas nca'quiquimisaj chicop y nic'aj chic kax ri niquiya' choch ri Dios. Jare' ri samaj yo'n chica chi niqui'an. Y rumare' ri Jesús can xc'atzin chi c'o je' ri xuya' choch ri Dios, ruma jaja' jun Namalaj Sacerdote. 4Y xa ta ri Jesucristo c'a c'o ta choch-ulief, man ta acunak Sacerdote, ruma ic'o sacerdotes ri i-rumáma can ri Leví ri nca'quiquimisaj chicop y nic'aj chic kax ri niquiya' choch ri Dios, inche'l nu'ej ri ru-ley ri Moisés. 5Ri jay pache' nca'samaj-ve ri sacerdotes re' y nojiel ri kax ri ic'o chupan, casi junan riq'uin ri rachuoch ri Dios ri c'o chicaj. Rumare' antok ri Moisés ya nutz'om rub'anic ri rachuoch ri Dios, ri Dios xu'ej cha: Tatz'ata' c'a; can nic'atzin chi na'an nojiel inche'l ri xinc'ut chavach paro' ri juyu', xcha' ri Dios cha ri Moisés. 6Y riq'uin nojiel re' can nakatz'at chi ri rusamaj ri Jesús más rakalien choch ri quisamaj ri sacerdotes quichin ri israelitas. Ruma ri pacto ri c'o vacame chiquicajol ri Dios y ri vinak, ja ri Jesús nib'ano, y chupan ri pacto re', más otz ri nu'on prometer ri Dios. 7Y xa ta ri na'ay pacto otz ta xiel, man ta xc'atzin chi x'an chic jun ruca'n pacto. 8Pero ruma ri kate't-kamama' man xqui'an ta nojiel ri nu'ej chupan ri na'ay pacto, rumare' man xka ta choch ri Dios; rumare' jaja' cof xch'o' chica y xu'ej: Xtalka jun k'ij, xcha' ri Ajaf, antok xtin'an jun c'ac'ac' pacto quiq'uin ri aj-Israel y ri aj-Judá. 9Y man inche'l ta ri pacto ri xin'an quiq'uin ri cate't-quimama', antok xa'nvuc'uaj chiquik'a' y xa'nvalasaj-pa chupan ri nación Egipto; y ruma man xqui'an ta ri nu'ej ri pacto re', rumare' inre' xa'nya' can, xcha' ri Ajaf. 10Y rumare', ri c'ac'ac' pacto ri xtin'an quiq'uin ri aj-Israel chupan ri k'ij re', quire' xtin'an cha: Xtintz'ib'aj ri nu-ley riq'uin cánima, y xtinya' je' chupan quijaluon. Inre' xquinuoc Qui-Dios, y ijeje' xca'uoc nutanamit. 11Y man chic xtic'atzin ta chi c'o jun nic'utu chiquivach ri ruvanakil, ni chiquivach ri rach'alal, chi nu'ej chica: Tivatamaj roch ri Ajaf. Ruma quinojiel vinak xticatamaj c'a noch, desde ri más co'l hasta ri más nem. 12Y xti'an perdonar nojiel ri itziel tak kax ri i-quib'anun, y man xtalka ta chic chinuc'u'x nojiel ri qui-pecados y ri itziel tak kax ri xqui'an. Quire' xu'ej ri Dios. 13Y antok ri Dios xu'ej: C'ac'ac' pacto, riq'uin re' xk'alajin chi ri na'ay pacto manak chic rakalien. Y jun kax ri manak chic rakalien y man chic nicusas ta, xa niq'uis.

will be added

X\