Hebreos 7

1Ri Melquisedec jare' ri rey richin ri tanamet Salem y ru-sacerdote ri Namalaj Dios. Jaja' xb'aruc'ulu' ri Abraham y xuc'utuj bendición paro' antok ri Abraham nitzalaj-pa chirij chi xb'arub'ana' guerra quiq'uin ri reyes, y xch'acuon can chiquij. 2Y ri Abraham nojiel ri kax ri xralasaj-pa chica ri reyes ri xch'acuon can chiquij, jaja' xralasaj c'a ri diezmo riq'uin nojiel ri kax re' y xuya' cha ri Melquisedec. Y ri b'i'aj Melquisedec, nu'ej chi jaja' jun rey ri can choj nu'on gobernar. Y ruma jaja' rey richin ri tanamet Salem, re' ntiel chi tzij chi jaja' jun rey ri nuya' paz. 3Ri Melquisedec man k'alaj ta chi xa'c'ujie' rutie-rutata', ni man k'alaj ta je' chi xa'c'ujie' rate't-rumama'. Man k'alaj ta jampe' xalax y jampe' xcon. Y rumare' k'alaj chi jaja' sacerdote richin nojiel tiempo, inche'l ri Ruc'ajuol ri Dios. 4Riq'uin re' nakatamaj chi ri Melquisedec más nem ruk'ij choch ri kamama' Abraham, ruma riq'uin nojiel ri kax ri xralasaj-pa chica ri reyes ri xch'acuon can chiquij, ri Abraham xuya' ri diezmo cha ri Melquisedec. 5Ri ley richin ri Moisés nu'ej chi ri i-rumáma can ri Leví ri nca'uoc sacerdotes, can yo'n ri mandamiento chica chi ijeje' ri nca'b'ano recibir ri diezmo ri niquiya' can ri quivanakil, mesque ijeje' je' i-rumáma can ri Abraham. 6Pero mesque ri Melquisedec man rumáma ta can ri Leví, ri Abraham xuya' ri diezmo cha y ri Melquisedec xuc'utuj bendición paro' ri Abraham, mesque ri Abraham b'anun prometer cha ruma ri Dios. 7Y kata'n chi ri nic'utun bendición, más nem ruk'ij que choch ri nic'utux bendición paro'. 8Ri i-rumáma can ri Leví ri nca'b'ano recibir ri diezmo, xa nca'con-el. Pero ri Melquisedec ri xu'on recibir ri ru-diezmo ri Abraham, ni'e'x chirij chi c'a c'as. 9Y c'o che'l naka'ej chi antok ri Abraham xuya' ru-diezmo cha ri Melquisedec, xuya' je' pa quic'axiel ri sacerdotes ri i-rumáma can ri Leví ri nca'b'ano recibir je' ri diezmo, 10mesque maja' talax ri Leví antok ri Melquisedec xb'aruc'ulu' ri Abraham pa b'ay. 11Ri ley ri xuya' ri Dios cha ri Moisés, jare' ri xyo'x chica ri kate't-kamama' chupan ri qui-tiempo ri sacerdotes ri i-rumáma can ri Leví. Pero ri quisamaj ri sacerdotes re' man xa'tiquir ta xqui'an chica ri kate't-kamama' chi xiel ta el richin xa jun tiempo ri qui-pecado choch ri Dios, rumare' xc'atzin c'a chi xpa chic jun Sacerdote inche'l ri Melquisedec, y man inche'l ta ri Aarón. 12Y antok xa'c'axtaj ri sacerdotes, xc'atzin je' chi xc'axtaj ri ley. 13Ruma ri Sacerdote re' man rumáma ta can ri Leví. Jaja' xa rumáma can jun chic ache, y ri i-rumáma can ri ache re' man jun b'ay i-acunak sacerdotes. 14Y ri Sacerdote ri xpa, ja ri Kajaf Jesucristo, rumáma can ri Judá. Y ri ley ri xyo'x cha ri Moisés man nu'ej ta chi nca'uoc sacerdotes ri i-rumáma can ri Judá. 15Y antok ri Jesucristo xuoc Sacerdote, can xk'alajin chi jaja' man junan ta quiq'uin ri sacerdotes ri i-rumáma can ri Leví, ruma jaja' xa inche'l ri Melquisedec. 16Ri ley nu'ej chi jo'c ri i-rumáma can ri Leví nca'uoc sacerdotes, y ri Jesucristo xa man rumáma ta can ri Leví. Pero jaja' xuoc Sacerdote, ruma c'o ruc'aslien ri c'o ru-poder y man niq'uis ta. 17Inche'l ru'e'n ri Dios chirij jaja' antok xu'ej cha: Atre' ri Sacerdote richin nojiel tiempo, inche'l ri Melquisedec. Quire' ru'e'n ri Dios. 18Y rumare' xq'uis can ri nu'ej chupan ri ley chirij ri sacerdotes ri i-rumáma can ri Leví, ruma manak ru-poder y man xtiquir ta xa'rucol ri vinak chupan ri qui-pecados. 19Ruma ri ley man xtiquir ta xu'on chica ri vinak chi xiel ta el ri qui-pecado choch ri Dios. Pero vacame xa kayo'ien jun esperanza ri más otz. Ruma jare' nib'ano chika chi nkujiel-apa más cierca riq'uin ri Dios. 20Ri Dios xu'on jurar chi quire' k'alaj chi ketzij chi ri Jesús xuoc Sacerdote. 21Antok ri i-rumáma can ri Leví xa'uoc sacerdotes, ri Dios man xu'on ta jurar. Pero antok ri Jesús xuoc Sacerdote, ri Dios can xu'on jurar. Inche'l nu'ej chupan ri ruch'ab'al ri tz'ib'an can: Ri Ajaf Dios xu'on jurar y man xtuc'ax ta ri ranun pensar. Jaja' xu'ej: Atre' ri Sacerdote richin nojiel tiempo, inche'l ri Melquisedec. Quire' nu'ej ri tz'ib'an can. 22Rumare' ri Dios xucusaj ri Jesús chi xu'on jun ja'al pacto. Y ri pacto re' más otz choch ri xu'on quiq'uin ri kate't-kamama' can. 23Ri sacerdotes ri i-rumáma can ri Leví iq'uiy, ruma ijeje' xa nca'con-el. Y antok nicon-el jun, ja ntuoc chic can jun pa ruc'axiel. 24Pero ri Jesús c'o richin nojiel tiempo, mare' jaja' jun Sacerdote ri man nic'axtaj ta. 25Rumare' jaja' siempre nitiquir nca'rucol quinojiel ri niquinimaj jaja' chi nca'jiel-apa riq'uin ri Dios. Ri Jesús c'o ruc'aslien richin nojiel tiempo, y rumare' siempre nich'o' cha ri Dios pa qui-cuenta. 26Y otz chi xuoc Kanamalaj Sacerdote, ruma jaja' can Santo. Man jun b'ay xu'on jun pecado. Man jun kax itziel c'o pa ruc'aslien y man junan ta quiq'uin ri niqui'an pecado, y nem ruk'ij b'anun cha chila chicaj. 27Jaja' man nu'on ta inche'l niqui'an ri sacerdotes ri más c'o quik'ij ri i-rumáma can ri Leví. Ijeje' k'ij-k'ij nca'quiquimisaj chicop chi niquiya' choch ri Dios, na'ay ruma ri qui-pecados ijeje', después ruma ri qui-pecados ri quivanakil. Pero ri Jesús jo'c jun b'ay xcon choch cruz antok xujach-ri' pa ka-cuenta y rakalien richin nojiel tiempo. 28Ri ley ri xyo'x cha ri Moisés nu'ej chi ja ri i-rumáma can ri Leví ri nca'uoc ri sacerdotes ri más c'o quik'ij. Pero ijeje' xa i-vinak y manak qui-poder. Pero mesque c'o chic ri ley re', ri Dios xu'on jurar chi ja ri Jesús ri Ruc'ajuol ri xtuoc Namalaj Sacerdote, ruma jaja' man jun ru-pecado y can sak ruc'aslien richin nojiel tiempo.

will be added

X\