Hebreos 6

1Mare' kaya' can ri na'ay tak kax ri c'utun-pa chakavach antok xkanimaj ri Cristo. Vacame katija' kak'ij chi nakatamaj más chirij ri Cristo chi nitz'akat ri no'j kiq'uin, y mani chi nkojc'ujie' chupan ri na'ay tak kax ri c'utun-pa chakavach, inche'l antok x'e'x chika chi xtzalaj-pa kánima riq'uin ri Dios ruma ri itziel tak b'anab'al ri xa camic nuc'am-pa, inche'l ri tijonic chirij ri cukb'al c'u'x, 2inche'l ri tijonic chirij ri bautismo, chirij ri chica nic'atzin antok ri ancianos richin ri iglesia niquiya' quik'a' pa kave', chirij ri k'ij antok quinojiel ri quiminaki' xca'c'astaj-pa y chirij ri castigo ri man xtiq'uis ta ri xtuya' ri Dios pa quive' ri vinak ri man niquinimaj ta ri ruch'ab'al. 3Y quire' xtaka'an, xa quire' nrajo' ri Dios. 4Ri pa sakil chic c'o-ve ri quic'aslien, yo'n chic chica ri c'o chila chicaj y c'o chic ri Espíritu Santo quiq'uin, 5cata'n chic chi altíra otz ri ruch'ab'al ri Dios, y cata'n chic je' chi c'o ru-poder ri tiempo ri patanak chakavach-apa, 6xa niquiya' can ri Cristo, can man jun chic ri xtitiquir xtib'ano chica chi nitzalaj chic pa cánima riq'uin ri Dios y niqui'an ri nrajo' jaja'. Ruma jun ri nu'on quire', can inche'l nuquimisaj chic jun b'ay ri Ruc'ajuol ri Dios choch cruz, y nuq'uixb'iej chiquivach vinak. 7Kata'n chi jun ulief ri q'uiy job' kajnak paro' y nuya' jun utzulaj tico'n, ri c'o otz nuc'am-pa cha ri rajaf ri ulief, ri ulief re' c'o ru-bendición ri Dios paro'. 8Pero jun ulief ri jo'c itziel tak k'ayis y q'uix ri nipa choch, man jun nic'atzin-ve. Man otz ta nitz'iet, xa niparox roch y niyo'x can. 9Hermanos ri altíra nquixkajo', mesque quire' naka'ej chiva, ojre' kata'n chi man xtib'anataj ta quire' iviq'uin, ruma ojre' kata'n chi ri ic'aslien can niq'uiy riq'uin ri Cristo, y jare' ri nic'utu chi ixre' xixcolotaj yan chupan ri pecado. 10Ri Dios can choj-ve, y rumare' man xtumastaj ta ri samaj ri ib'anun-pa. Ri Dios rata'n chi ixre' can ntivajo' jaja', y can nik'alajin chi altíra ntivajo', ruma ib'anun servir ri nic'aj chic santos ralc'ual y c'a nqui'an servir. 11Y nakarayij chiva chi'ijunal chi can inche'l ntivajo' ri Dios vacame, can ta quire' xti'an hasta c'a chupan ri ruq'uisb'al k'ij richin ri ic'aslien, chi quire' xtiyo'x chiva ri ivoyo'ien. 12Nic'atzin chi ixre' jare' nti'an chi quire' man nipa ta k'oral chivij; xa tib'ana' inche'l niqui'an ri nic'aj chic ri quicukub'an quic'u'x riq'uin ri Dios y c'o qui-paciencia. Y ruma ijeje' quire' quib'anun, ri Dios nuya' chica ri herencia ri ranun prometer. 13Ri Dios can nuya-ve ri ranun prometer. Ruma ojier can, antok ri Dios xu'ej cha ri Abraham chi xtuya' ru-bendición paro'; can pa rub'e' jaja' mismo xu'on-ve jurar chi ketzij xtuya' ri ranun prometer, ruma man jun chic más nem choch jaja'. 14Y ri Dios xu'ej cha ri Abraham: Can ketzij ri ni'ej chava chi xtinya' jun nem bendición pan ave', y iq'uiy amáma xca'c'ujie', xcha' ri Dios cha ri Abraham. 15Y ri Abraham can xc'ujie' ru-paciencia xroyo'iej, y ri Dios can xuya' ri bendición ri ranun prometer cha. 16Antok ri vinak niqui'an jurar, can ja ri rub'e' ri Dios niquicusaj, ruma ja b'i'aj re' ri más nem ruk'ij, y antok niquicusaj ri b'i'aj re', can nca'nimax y man jun chic chica ni'e'x chica. 17Ri Dios xu'on jurar chi xuc'ut chiquivach quinojiel ri choj chica xtiyo'x-ve ri bendición re', chi jaja' man nuc'ax ta ri nu'on pensar y ri ranun prometer. 18Y c'o ca'ye' kax xu'ej ri Dios ri nik'alajin chakavach chi jaja' man nuc'ax ta ri ruch'ab'al. Jun, ri ranun prometer, y ri jun chic, ri ranun jurar. Y ruma ri Dios man jun b'ay nutz'ak tzij, mare' riq'uin nojiel kánima nakayo'iej-apa ri k'ij antok xku'a chicaj riq'uin jaja'. Y can kata'n chi jaja' can xtuya' chika nojiel ri ru'e'n chi nuya'. 19Y nojiel re' can nuya' ruchuk'a' kánima, chi quire' cof nkojpi'ie'. Y can inche'l nu'on ri ch'ich' ri ni'e'x ancla cha, ri choj cha nca'yukub'ax-ve ri barcos, can quire' je' kab'anun ojre'; can cof c'o kac'aslien riq'uin ri Dios y c'a pache' c'o-ve jaja' chicaj, c'a chire' oj-yukul-ve. Can kayo'n ruchuk'a' kánima chi can xku'a-ve chicaj, 20ruma ri Jesús c'o chic chire' riq'uin ri Dios y nuc'utuj bendición cha ri Dios pa kave' ojre'. Jaja' ri x'a na'ay chakavach ojre' y jaja' ri Namalaj Sacerdote ri c'o richin nojiel tiempo, inche'l ri Melquisedec.

will be added

X\