Hebreos 5

1Quinojiel ri nca'uoc sacerdotes ri más c'o quik'ij chiquicajol ri israelitas, can nca'cho'x y niyo'x quisamaj chi nca'ch'o' riq'uin ri Dios pa qui-cuenta ri vinak y chi niquiya' choch ri Dios ri chicop ri nca'quiya' can ri vinak ruma ri qui-pecados, y niquiya' je' ri nic'aj chic kax ri niquiya' can ri vinak. 2Ri sacerdote ri más c'o ruk'ij nu'on pecar, rumare' jaja' nujoyovaj quivach ri vinak ri man cata'n ta chica nrajo' ri Dios y ri i-sachnak riq'uin ri niqui'an pensar. 3Y rumare', ri chicop ri nuquimisaj chi nuya' choch ri Dios, man jo'c ta ruma ri qui-pecados ri vinak nuya', xa ruma je' ri ru-pecado jaja'. 4Man jun vinak ri ruyuon jaja' ntuoc ri sacerdote ri más c'o ruk'ij, xa ja ri Dios ri nicho'n richin, inche'l xu'on cha ri Aarón ojier can. 5Y quire' je' ri Cristo, man ruyuon ta jaja' xuoc Namalaj Sacerdote y xc'ujie' ruk'ij, ruma ri Dios can ru'e'n chic cha: Atre' ri at Nuc'ajuol, inre' niya' ac'aslien vacame. 6Y man jo'c ta xu'ej quire' cha ri Cristo, xa xu'ej je' cha: Atre' ri Sacerdote richin nojiel tiempo, inche'l ri Melquisedec, ri sacerdote ri xc'ujie' ojier can. Quire' ri xu'ej ri Dios cha ri Cristo. 7Y antok ri Cristo c'a c'o vave' choch-ulief, xu'on orar y xuc'utuj cha ri Dios chi tuto' choch ri sufrimiento. Can rata'n chi ri Dios nitiquir nuto' choch ri camic. Jaja' can riq'uin nojiel ránima xu'on orar, y xuok' je'. Y ri Dios can xra'xaj ri Cristo, ruma ri Cristo ruyo'n ruk'ij. 8Y mesque ri Cristo can Ruc'ajuol ri Dios; riq'uin ri xu'on sufrir, xratamaj xunimaj ri Dios. 9Y ruma yo'n ruk'ij ruma ri Dios, jaja' can nitiquir nca'rucol richin nojiel tiempo quinojiel ri nca'niman richin. 10Ri Dios can xu'on cha chi xuoc Namalaj Sacerdote; inche'l ri Melquisedec ri xc'ujie' ojier can. 11Nakajo' naka'ej más chiva chirij ri rusamaj ri Cristo ri Namalaj Sacerdote, y altíra cuesta chi nikil rub'ixic chi naka'ej re' chiva, ruma ixre' c'a maja' quixq'uiy chupan ri ruch'ab'al ri Dios ri ivaxan-pa. 12Y ya ixre' ta ri nquixtijuon quichin ri nic'aj chic riq'uin ri ruch'ab'al ri Dios. Ruma q'uiy chic tiempo ri ix-tijuon-pa y c'a nic'atzin chi nquixtijox inche'l x'an chiva na'ay antok c'aja' xinimaj ri ruch'ab'al ri Dios. Can ix inche'l xulu' ri c'a nca'tz'uman y c'a maja' tiquic'ux vay. 13Jun xulu' ri c'a nitz'uman, maja' ti'ka paro' (tu'on entender) ri nu'ej ri ruch'ab'al ri Dios. Man rata'n ta chica ri choj c'aslien y chica ri man choj ta. Rumare' ni'ej chiva chi c'a ix inche'l xulu'. 14Pero ri ni'ka pa quive' (niqui'an entender) ri ruch'ab'al ri Dios, can i-inche'l ri i-nima'k chic ri nca'tiquir niquic'ux vay. Ijeje' niquicusaj ri quijaluon, rumare' cata'n chica ri otz y chica ri man otz ta.

will be added

X\