Hebreos 4

1Kaxi'ij-ki' choch ri Dios, ya que vacame c'a maja' kojuoc chupan ri uxlanien ri ranun prometer ri Dios chi xtuya' chika, can kab'ana' cuenta-ki' chi quire' man nib'anataj ta chi c'o jun chivach ri man xtitiquir ta xtuoc chupan ri uxlanien re'. 2Ruma ri utzulaj ruch'ab'al ri Dios ri xtzijos chika ojre', can inche'l ri xtzijos chica ri kate't-kamama' ojier can. Pero chica ijeje' man jun xc'atzin-ve ri utzulaj ruch'ab'al ri Dios, ruma jo'c xca'xaj, pero man xquicukub'a' ta quic'u'x riq'uin. 3Y ri Dios xu'ej chiquij ri man xquinimaj ta: Inre' xin'an jurar ruma vayoval y xin'ej: Ijeje' man xca'uoc ta chupan ri uxlanien ri niya' inre'. Quire' xu'ej ri Dios. Pero ojre' ri kaniman ri Jesucristo, can nkojuoc chupan ri uxlanien ri nuya' ri Dios. Y ri uxlanien re' xtiquir-pa antok ri Dios xu'on ri roch-ulief. 4Y chupan ri ruch'ab'al ri Dios ri tz'ib'an can, chirij ri uxlanien re' nu'ej: Ri Dios xuxlan chupan ri séptimo (chi vuku') k'ij antok xuq'uis rub'anic nojiel ri xu'on. 5Y ri Dios nu'ej je' chupan ri ruch'ab'al ri tz'ib'an can, chiquij ri kate't-kamama': Can man xca'uoc ta chupan ri uxlanien ri niya' inre'. Quire' nu'ej ri Dios chupan ri tz'ib'an can. 6Pero vacame c'a ic'o ri nca'uoc chupan ri uxlanien re', ruma c'a c'o che'l nca'uoc. Ri kate't-kamama' xca'xaj ri utzulaj ruch'ab'al ri Dios, pero ijeje' man xcajo' ta xquinimaj ri xca'xaj, rumare' man xa'uoc ta chupan ri uxlanien. 7Y antok k'axnak chic q'uiy tiempo, ri Dios xu'ej chic jun b'ay chi nuya' ri uxlanien chica ri vinak. Y xuya' pa ránima ri David ri tzij ri e'n chic ri nu'ej: Xa xtivaxaj ri ruch'ab'al ri Dios vacame, man ti'an cof cha ri ivánima. Quire' ru'e'n can. 8Y ri uxlanien re', man nich'o' ta chirij ri uxlanien ri xquil vave' ri kate't-kamama' antok i-c'amun-pa ruma ri Josué. Ruma xa ta quire', ri Dios man ta xu'ej chic jun b'ay chi nuya' ri uxlanien. 9Y rumare' kata'n chi c'a c'o jun chic uxlanien richin ri rutanamit ri Dios. 10Y antok jun acunak chic chupan ri uxlanien ri nuya' ri Dios, nuxlan je' riq'uin ri rusamaj, inche'l xu'on ri Dios, antok xuq'uis rub'anic nojiel ri xu'on. 11Can katija' kak'ij chi quire' nkojuoc chupan ri uxlanien re' y man taka'an inche'l xqui'an ri kate't-kamama' ojier can; ijeje' man xquinimaj ta ri ruch'ab'al ri Dios, rumare' man xa'uoc ta chupan ri uxlanien re'. 12Ruma ri ruch'ab'al ri Dios can c'as y can altíra ru-poder. Y más c'o roray choch chica-na espada ri ca'ye' lado c'o roray. Ruma ri ruch'ab'al ri Dios nitiquir ntuoc chupan ri ránima ri vinak, y chupan ri ru-espíritu, chupan ri b'ak y chupan ri pache' niquinuc'-ve-qui' ri b'ak, y nu'on juzgar ri chica nu'on pensar y nojiel ri nurayij ri ránima. 13Ri Dios b'anayuon nojiel, rumare' man jun kax ri nitiquir nravaj-ri' choch jaja'; nojiel k'alaj choch jaja'. Jaja' nutz'at nojiel, y choch jaja' xtakaya' cuenta. 14Ojre' ri kaniman c'o jun Kanamalaj Sacerdote ri acunak chicaj riq'uin ri Dios, y re' ja ri Jesús ri Ruc'ajuol. Rumare' man takaya' can, xa cof kojc'ujie' chupan ri cukb'al c'u'x. 15Ruma ojre' c'o jun Kanamalaj Sacerdote ri nujoyovaj kavach, ruma rata'n chi ojre' manak kachuk'a'. Y jaja' ja'al rata'n, ruma antok xc'ujie' vave' choch-ulief, can x'an tentar. Can nojiel ri ni'an chika ojre', x'an cha jaja' je', pero jaja' man xu'on ta pecado. 16Rumare' man c'a takaxi'ij-ki' nkujiel-apa más cierca riq'uin ri Dios, chi quire' jaja' xtujoyovaj kavach y xtu'on favor chika, chi quire' antok c'o chica nib'anataj chika, ja nkojruto'.

will be added

X\