Hebreos 3

1Rumare', ixre' santos hermanos ri junan xojayox iviq'uin ruma ri Dios, chi nkojb'ac'ujie' chicaj riq'uin jaja', can titz'ata' ri Cristo Jesús. Jaja' ri ka-apóstol, y jaja' je' ri Kanamalaj Sacerdote ri kaniman. 2Ri Jesús xu'on c'a ri samaj ri xuya-pa ri Dios cha, inche'l xu'on ri Moisés. Ri Moisés xu'on rusamaj ri Dios y otz quic'uaxic xu'on chica ri ralc'ual ri Dios. 3Pero ri Jesús más c'o ruk'ij choch ri Moisés, ruma ri Jesús can inche'l jun ache aj-b'anoy-jay. Y kata'n chi ja ri ache aj-b'anoy-jay ri más rakalien choch ri jay. 4Ruma nojiel jay, vinak nca'b'ano, pero nojiel ri kax ri ic'o, ja ri Dios xb'ano. 5Ri Moisés jun utzulaj ru-siervo ri Dios, rumare' otz quic'uaxic xu'on chica ri ralc'ual ri Dios. Ri Moisés xu'ej can ri c'a maja' ca'b'anataj chupan ri ru-tiempo jaja'. 6Ri Cristo je' otz quic'uaxic xu'on chica ri ralc'ual ri Dios. Jaja' man choj ta oc rusamajiel ri Dios, inche'l ri Moisés, jaja' can Ruc'ajuol ri Dios. Y ojre' je' oj ralc'ual chic ri Dios, pero xa cof xkojc'ujie' chupan ri cukb'al c'u'x, y nkojquicuot nakayo'iej-apa ri k'ij antok jaja' xtuya' chika ri ru'e'n chi xtuya'. 7Ruma chupan ri ruch'ab'al ri Dios ri tz'ib'an can, ri Espíritu Santo nu'ej: Xa xtivaxaj ri ruch'ab'al ri Dios vacame, 8man ti'an cof cha ri ivánima inche'l xqui'an ri ivate't-imama' ojier can, antok xquiyac ri vayoval y xcajo' ta xquitz'at ri chica xtin'an ri pa desierto. 9Y chire' ri pa desierto ri ivate't-imama' ojier can, xcajo' ta xquitz'at xa can ketzij ni'an ri ni'ej, y cuarenta juna' xinc'ut chiquivach nojiel ri nquitiquir ni'an. 10Rumare' xpa vayoval chica ri xa'b'ano quire'. Y inre' xin'ej: Ri cánima ri vinak re' xa man viq'uin ta inre' c'o-ve, xa chiquij nic'aj chic kax b'anak-ve. Can niqui'an inche'l man cata'n ta ri utzulaj b'ay ri nuc'utun chiquivach. 11Y xin'an jurar ruma vayoval y xin'ej: Ijeje' man xca'uoc ta chupan ri uxlanien ri niya' inre'. Quire' xu'ej ri Dios. 12Hermanos, tib'ana' cuenta-ivi' chi'ijunal, chi quire' siempre ntiya' ivánima riq'uin ri Dios y man jun ta itziel kax riq'uin ri ivánima, chi quire' man ntiya' ta can ri c'aslic Dios. 13Nic'atzin chi k'ij-k'ij ntiya' ruchuk'a' ri ivánima chib'il-ivi', mientras c'a c'o tiempo. Quire' tib'ana', chi quire' man jun chivach xticover ránima chupan ri engaño ri richin ri pecado. 14Ojre' jo'c jun chic kab'anun riq'uin ri Cristo, ruma xkaya' kánima riq'uin antok xkanimaj. Pero nic'atzin chi ojre' man nakaya' ta can, y siempre kaya' kánima riq'uin. 15Ruma chupan ri ruch'ab'al ri Dios nu'ej: Xa xtivaxaj ri ruch'ab'al ri Dios vacame, man ti'an cof cha ri ivánima inche'l xqui'an ri ivate't-imama' ojier can, antok xquiyac ri rayoval. Quire' nu'ej. 16¿Chica c'a ri xayaco rayoval ri Dios, mesque caxan chic ri ruch'ab'al? ¿Man ja ta came quinojiel ri xa'iel-pa chupan ri Egipto, ri xa'cuol-pa ruma ri Moisés? 17¿Choj chica c'a ri cuarenta juna' xpa rayoval ri Dios? ¿Man quiq'uin ta came ri xqui'an pecado y xa'con can chire' pa desierto? 18¿Y choj chica xu'on jurar ri Dios chi man xca'uoc ta chupan ri uxlanien ri nuya' jaja'? ¿Man chica ta came ri man xa'niman ta? 19Ojre' kata'n chi ijeje' man xa'tiquir ta xa'uoc chupan ri uxlanien re' ruma man xquinimaj ta ri xu'ej ri Dios.

will be added

X\