Hebreos 2

1Y ruma ja ri Ruc'ajuol ri Dios ri más nem ruk'ij, rumare' nic'atzin chi ojre' kaya' kaxiquin riq'uin ri ruch'ab'al ri kaxan, chi quire' man nkukiriko ta. 2Ruma ri ch'ab'al ri xtzijos cuma ri ángeles can ketzij y ri vinak ri man xqui'an ta ri xqui'ej ri ángeles, xka ri castigo pa quive' chiquijunal. Can inche'l ri qui-pecado, can quire' je' ri castigo ri xka pa quive'. 3Quire' c'a je' ojre', ¿che'l nkojcolotaj xa ojre' man jun rakalien xtaka'an cha ri nem salvación (colotajic)? Ruma ja ri Kajaf Jesús ri x'e'n na'ay y ri xa'c'axan re', ijeje' xa'tzijuon chika ojre'. 4Ri Dios xuc'ut c'a chakavach chi ketzij ri xqui'ej ijeje' chika, ruma ijeje' xa'tiquir xa'qui'an señales y milagros riq'uin ri namalaj ru-poder jaja', y milagros ri man jun b'ay i-tz'atuon. Y xa'tiquir xqui'an nic'aj chic samaj riq'uin ri ru-poder ri Espíritu Santo. Quire' xu'on chica chiquijunal chi xa'covin xqui'an ri samaj ri xrajo' jaja' chi xqui'an. 5Ri Dios man xtuya' ta pa quik'a' ri ángeles ri roch-ulief ri xtipa chakavach-apa, ri choj chirij nkuch'o-ve vacame. 6Ruma chupan ri ruch'ab'al ri Dios ri tz'ib'an can, c'o jun ri b'iyuon can: Dios, ¿chica c'a oc rakalien ri ache chi nanataj? ¿Y chica je' oc rakalien jun ri xa riq'uin jun chic vinak alaxnak-ve chi nanataj? 7Xa'an cha chi ch'ute'n chiquivach ri ángeles; pero ri ache c'o ruk'ij y rakalien, ruma ayo'n paro' nojiel ri kax ri ab'anun. 8Nojiel ri ab'anun ayo'n pa ruk'a'. Quire' nu'ej chupan ri tz'ib'an can. Y antok nu'ej chi ri Dios ruyo'n nojiel pa ruk'a', man jun kax ri man ta c'o pa ruk'a'. Pero c'a maja' takatz'at chi nojiel c'o chic pa ruk'a'. 9Pero nakatz'at chi antok ri Jesús xc'ujie' vave' choch-ulief, x'an cha chi ch'ute'n ruk'ij chiquivach ri ángeles. Pero re' jo'c jub'a' oc tiempo, vacame nem ruk'ij b'anun cha. Y quire' x'an cha ruma xu'on sufrir y xcon. Ruma ri ru-favor ri Dios, xpa ri Jesucristo chi xcon kuma konojiel. 10Ja ri Dios b'anayuon nojiel ri ic'o, y nojiel ri xa'ru'on, richin chi niquiya' ruk'ij. Y ri Dios nrajo' chi quinojiel ta nca'a chicaj riq'uin jaja' y nic'ujie' ta quik'ij. Y rumare' ri Cristo xu'on sufrir. Y ruma ri sufrimiento ri xuk'asaj, can ketzij chi nca'rucol ri nca'niman richin. 11Ri Jesús nu'on sak cha ri kac'aslien; y ruma sak chic kac'aslien, oj ralc'ual chic ri Dios. Rumare' ri Jesús man niq'uix ta nu'ej hermanos chika. 12Can inche'l nu'ej chupan ri ruch'ab'al ri Dios ri tz'ib'an can, chirij ri Jesús: Inre' xtin'ej ri ab'e' chica ri nu-hermanos. Inre' xtinb'ixaj ri ab'e' quiq'uin ri niquimol-qui' chi niquiya' ak'ij. 13Y chupan je' ri ruch'ab'al ri Dios ri tz'ib'an can, nu'ej: Inre' nuyo'n vánima riq'uin ri Dios. Y nu'ej je': Vave' inc'o-ve, junan quiq'uin ri i-ralc'ual ri Dios ri i-ruyo'n jaja' chuva. Quire' ri tz'ib'an can chupan ri ruch'ab'al ri Dios. 14Ruma ri vinak c'o quiquiq'uiel y c'o qui-cuerpo, rumare' ri Jesús xuoc je' vinak. Jaja' xcon chi xuvulij ri ru-reino ri camic ri c'o pa ruk'a' ri diablo, 15y chi nca'rucol quinojiel ri niquixi'ij-qui' nca'con. Y ruma niquixi'ij-qui' nca'con, can nojiel tiempo ic'o pa ruk'a' ri xib'inre'l. 16Y can ketzij chi ri Jesús man xpa ta chi nca'rucol ri ángeles; jaja' xpa chi nkojrucol ojre' ri oj rumáma can ri Abraham. 17Rumare' xuoc vinak inche'l ojre', y xc'atzin chi xu'on quire', chi quire' xuoc Namalaj Sacerdote y chi nujoyovaj kavach. Can richin nojiel tiempo nu'on ri samaj re' choch ri Dios, chi ni'an perdonar ri ka-pecados. 18Y jaja' xu'on sufrir y x'an tentar, pero man xtzak ta. Rumare' jaja' c'o ru-poder chi nkojruto' antok nkoj'an tentar.

will be added

X\