Hebreos 12

1Can iq'uiy ri xquicukub'a' quic'u'x riq'uin ri Dios ojier can. Ijeje' nkojquitz'at-pa y xquic'ut can chakavach chi quire' mismo nic'atzin naka'an ojre'. Rumare', kaya' can chica-na kax ri inche'l aka'n chikij y ri pecado ri nu'on chika chi nkutzak. Riq'uin ka-paciencia nakuc'uaj ri b'ay ri c'o chakavach. 2Katz'ata' siempre ri Jesús, ruma jaja' xu'on chika chi xkanimaj ri Dios, y jaja' je' b'anayuon chika chi vacame can kacukub'an kac'u'x riq'uin ri Dios. Y mesque q'uix chi jun niquimisas choch cruz, ri Jesús can xucoch' chi xquimisas choch cruz; ruma rata'n chi pa ruq'uisb'al can xtiquicuot, y vacame tz'uyul chicaj pa ru-derecha ri Dios, ri c'o nojiel poder pa ruk'a'. 3Titz'ata-na-pe' otz ri chica xu'on ri Jesús pa quik'a' ri pecadores; jaja' xucoch' nojiel, rumare' quire' je' tib'ana' ixre'. Ticach'o' nojiel, man quixcuos, ni man timalij ic'u'x. 4Itijuon ik'ij chi man chic ib'anun ta pecado, pero man ik'asan ta jun sufrimiento ri nquixruc'uaj pa camic. 5Ya imastan ri nu'ej chupan ri ruch'ab'al ri Dios ri tz'ib'an can. Ri ruch'ab'al can nquixrutijuoj inche'l nu'on jun tata'j cha ri ralc'ual. Ri ruch'ab'al ri Dios nu'ej: Atre' valc'ual, man ta'an chi man jun rakalien antok ri Ajaf Dios ncaruya' pa sufrimiento chi ncarutijuoj. Man tamalij ac'u'x antok ri Ajaf ncaruch'olij. 6Ruma ri Ajaf Dios nuya' sufrimiento pa quive' ri nca'rajo', chi nca'rutijuoj. Y nca'ru'on castigar ri i-ralc'ual chic. Quire' ri tz'ib'an can. 7Ticach'o' nojiel ri sufrimiento ri nuya' ri Dios pan ive', ruma jaja' nu'on chiva inche'l nu'on jun tata'j chica ri ralc'ual. Ruma ¿c'o came jun tata'j ri man nca'ru'on ta castigar ri ralc'ual chi nca'rutijuoj? 8Rumare', xa ri Dios man nquixru'on ta castigar chi nquixrutijuoj inche'l nu'on chica ri ralc'ual, k'alaj chi ixre' man ix ralc'ual ta jaja'; xa choj ix inche'l ri ac'ola' ri manak quitata'. 9Ojre' antok c'a oj ac'ola', ri katie-katata' xojquich'ey y man itziel ta xa'katz'at, xa can xa'ka'an respetar. Y vacame, ¿man más ta came otz nkojniman cha ri Katata' Dios ri ya'yuon-pa ri ka-espíritu, y nkojc'asie' richin nojiel tiempo? 10Ri katie-katata' xojquich'ey antok man otz ta xa'ka'an, ruma quire' xcajo' ijeje', pero man q'uiy ta k'ij xqui'an quire' chika. Ri Katata' Dios nuya' sufrimiento pa kave', pero después re' c'o xtakach'ec. Y jaja' quire' nu'on chika chi nkojuoc santo inche'l jaja', ruma jaja' can Santo. 11Can ketzij chi antok ojc'o chupan jun sufrimiento, man nkojquicuot ta, xa nkojb'isuon. Pero antok xojak'ax chupan y xkacoch' nojiel re', can c'o otz nakach'ec, ruma nu'on más choj cha ri kac'aslien choch ri Dios y nuya' uxlanien chika. 12Rumare', tiya' ivánima riq'uin ri Dios, chi quire' xtic'ujie' chic jun b'ay ivuchuk'a'; ri ik'a-ivakan je' xca'c'ujie' chic quichuk'a'. 13Can nic'atzin chi ntivuc'uaj jun b'ay choj, richin chi niquitz'at ri ca'ye' quic'u'x quib'anun riq'uin ri Jesucristo, ruma ijeje' man nca'tiquir ta nca'in otz, xa inche'l i-jacajic. Otz tib'ana' chi quire' ijeje' nquixquitz'at y niquiya' je' más cánima riq'uin ri Dios. 14Can titija' ik'ij chi nic'ujie' ri paz chicajol, y can sak ta je' ri ic'aslien. Ruma xa man sak ta ri ic'aslien, xa man xtitz'at ta roch ri Ajaf Dios. 15Can tib'ana' c'a cuenta-ivi' chi'ixvonojiel chi quire' man jun chivach man ta niril ri ru-favor ri Dios. Man tiya' lugar chi nca'uoc itziel tak kax chicajol, ri inche'l k'ayis c'ay, ruma nu'on tz'il cha nojiel. 16Ri man i-c'ulan ta man tiquicanuj-qui' chi niqui'an pecado. Y man jun b'ay ti'an cha ri kax ri patanak riq'uin ri Dios chi man jun rakalien. Man ti'an inche'l xu'on ri Esaú ojier can; jaja' c'o ta ri bendición xyo'x cha, ruma jaja' ri na'ay ala', pero man xyo'x ta cha, ruma jaja' xa jare' xuya' choch jun va'en. 17Y ivata'n chi antok jaja' xrajo' chi xyo'x ta ri bendición cha ruma ri rutata', man xyo'x ta chic cha y xalka paro' chi man otz ta ri xu'on. Y mesque xuok' xuc'utuj, pero man xyo'x ta chic cha. 18Ojre' ri kaniman chic ri Jesucristo, man chuxie' ta ri juyu' Sinaí xojb'aka-ve, inche'l xqui'an ri kate't-kamama' ojier can. Ijeje' can xquitz'at chi ri ruve' ri juyu' nic'at. Y xquitz'at je' chi ri ruve' ri juyu' k'aku'n rub'anun y najin jun nem cak'iek' y nca'k'ajan ráya. 19Ijeje' xca'xaj ri trompeta, y xca'xaj je' antok ri Dios xch'o-pa chica. Pero ijeje' xquic'utuj favor chi man chic tich'o-pa ri Dios chica. 20Can altíra xquixi'ij-qui', y man niquicoch' ta ri ni'e'x chica, chi xa c'o jun xtijiel-apa riq'uin ri juyu', ya sea vinak o chicop, can niquimisas cha ab'aj o cha lanza. Quire' x'e'x chica. 21Ri xtz'atataj paro' ri juyu', can altíra xib'inre'l xuya'. Rumare' hasta ri Moisés xu'ej: Can nquib'arb'uot ruma ri xib'inre'l, xcha'. 22Pero ojre' ri kaniman chic ri Jesucristo, chuxie' ri juyu' Sion ojc'o-ve, ojc'o chic cierca ri rutanamit ri c'aslic Dios; ri tanamet re' rub'inan Jerusalén y chicaj c'o-ve. Y ojc'o chic chiquicajol ri miles de ángeles. 23Ojc'o je' chiquicajol ri na'ay tak ralc'ual ri Dios ri tz'ib'an quib'e' chicaj. Ojc'o chic riq'uin ri Dios ri xtib'ano juzgar quichin quinojiel ri vinak. Y ojc'o je' chiquicajol ri man jun chic qui-pecado choch ri Dios antok xa'con-el, y choj quic'aslien x'an chica ruma ri Dios. 24Ojre' ojc'o chic riq'uin ri Jesús, ri nib'ano chi nca'b'aka ri vinak riq'uin ri Dios, y jare' ri jun c'ac'ac' pacto. Jaja' xcon y ri ruquiq'uiel ri x'in xu'on sak cha ri kánima, y ri ruquiq'uiel jaja' más rakalien choch ri ruquiq'uiel ri Abel ri xc'ujie' ojier can. 25Rumare' kab'ana' cuenta-ki', chi man taka'an cha chi man jun rakalien ri nu'ej ri Dios chika. Man taka'an inche'l xqui'an ri kate't-kamama' ojier can. Ijeje' ruma man xcajo' ta xqui'an ri x'e'x chica vave' ri choch-ulief, rumare' xka ri castigo pa quive'. Y xa ojre' man xtakajo' ta xtakaxaj ri ni'e'x-pa chika chicaj, más nem ri castigo ri xtika pa kave'. 26Antok ri Dios xch'o' paro' ri juyu', ri juyu' can altíra xsiluon. Pero vacame nu'on prometer: Xtalka jun k'ij antok xtinsiluoj chic jun b'ay ri roch-ulief, pero man jo'c ta chic ri roch-ulief xtinsiluoj, xa can xtinsiluoj je' ri rocaj, xcha'. 27Y re' ntiel chi tzij chi ri i-rub'anun jaja' ri c'o che'l xca'silos, xca'c'an-el, y jo'c ri man xca'silos ta xca'c'ujie' can richin nojiel tiempo. 28Rumare' kaya' tiox b'a' cha ri Dios ruma ruyo'n ri ru-reino chika ri man jun xtisiluon richin. Y rumare' kaya' ruk'ij ri Dios y kab'ana' ri rusamaj inche'l nrajo' jaja', ruma jaja' can nem. 29Ruma ri Ka-Dios can inche'l jun k'ak' ri nca'ruq'uis nojiel ri man i-otz ta.

will be added

X\