Hebreos 11

1Ri cukb'al c'u'x riq'uin ri Dios nu'on cha jun chi riq'uin nojiel ránima nroyo'iej ri xtiyo'x cha, y nu'on cha chi nunimaj, mesque man nutz'at ta. 2Iq'uiy chiquivach ri vinak ri xa'c'ujie' ojier can tiempo quire' xqui'an. Can xquicukub'a' quic'u'x riq'uin ri Dios, y ri Dios can xka choch ruma quire' xqui'an. 3Y ojre' ruma kacukub'an kac'u'x riq'uin ri Dios, kata'n chi ja ri Dios ri xb'ano ri roch-ulief y nojiel ri c'o chicaj. Y antok xa'ru'on, man jun chica xucusaj; xa jo'c xu'ej chi ca'c'ujie' y can ja xa'c'ujie'. 4Ri Abel ruma can rucukub'an ruc'u'x riq'uin ri Dios, rumare' ri xuya' jaja' choch ri Dios más otz choch ri xuya' ri Caín ri runimal. Rumare' xiel choch ri Dios chi man jun chic ru-pecado, y ri Dios can xka choch nojiel ri xuya' ri Abel choch. Y mesque ri Abel xcon, c'o ri xuc'ut can chakavach, ruma jaja' xucukub'a' ruc'u'x riq'uin ri Dios. 5Ri Enoc ruma rucukub'an ruc'u'x riq'uin ri Dios, rumare' man xcon ta, xa can quire' c'as xuc'uax-el chicaj y man xlitaj ta chic, ruma ja ri Dios ri xuc'uan-el richin. Pero antok c'a c'o vave' choch-ulief, can xk'alajin chi ri ruc'aslien can xka choch ri Dios. 6Can nic'atzin chi nakacukub'a' kac'u'x riq'uin ri Dios. Ruma xa man xtakacukub'a' ta kac'u'x riq'uin ri Dios, man jun b'ay nkojcovin naka'an ri nika choch. Y chi nkujiel-apa más cierca riq'uin ri Dios, can nic'atzin chi nakanimaj chi jaja' can c'o-ve, y chi xtuya' utzulaj kax chica ri nca'canun richin. 7Ri Noé ruma rucukub'an ruc'u'x riq'uin ri Dios, mare' xunimaj ri xu'ej ri Dios cha, chi c'o jun nem kax ri xtib'anataj ri choch-ulief, mesque maja' tutz'at ri nem kax re'. Ri Noé can xniman cha ri Dios y can riq'uin xib'inre'l xu'on ri jun nem arca inche'l jun barco, chi xa'rucol ri ru-familia. Y rumare' xb'ak'alajin-pa chi ri nic'aj chic vinak man otz ta xqui'an, ruma man xquinimaj ta ri Dios. Y ri Noé ruma xucukub'a' ruc'u'x riq'uin ri Dios, ri Dios xu'on cha chi man jun chic ru-pecado choch. 8Ri Abraham ruma rucukub'an ruc'u'x riq'uin ri Dios; rumare', antok xayox ruma ri Dios chi ni'a chic jun lugar ri xtusipaj cha, jaja' xniman cha ri Dios y x'a, mesque man rata'n ta pache' xtib'aka-ve. 9Y ruma rucukub'an ruc'u'x riq'uin ri Dios, rumare' xc'ujie' chupan ri lugar re', ri ranun prometer ri Dios cha; pero jaja' xu'on chi inche'l xa man richin ta ri lugar re'. Y rumare' xa chupan jay ri i-b'anun cha tziak xc'ujie-ve, y quire' je' xqui'an ri Isaac y ri Jacob, mesque chica ijeje' niyo'x ri lugar re'. 10Ri Abraham xu'on quire', ruma royo'ien ri jun chic tanamet más ja'al; ri tanamet re' man niq'uis ta y ja ri Dios ri xb'ano pensar che'l nu'on cha y ja ri Dios b'anayuon. 11Ri Sara ri raxjayil ri Abraham, can xucukub'a' je' ruc'u'x riq'uin ri Dios. Rumare' xunimaj chi ketzij ri xu'ej ri Dios, xyo'x ruchuk'a' chi xc'ujie' ral y can xc'ujie' ri ral, mesque jaja' manak ral alaxnak y xa aviela chic je'. 12Y rumare', mesque ri Abraham ch'iti mámix chic antok xc'ujie' ri ralc'ual, ri i-rumáma jaja' can iq'uiy xa'c'ujie', can inche'l ri estrellas (ch'umil) ri ic'o chicaj, y can inche'l ri sanaye' ri c'o chuchi' ri mar ri man jun nitiquir nijilan. 13Quinojiel ijeje' cukul quic'u'x riq'uin ri Dios, y quire' xa'con-el, mesque ri Dios c'a maja' tuya' ri ranun prometer chica. Pero ruma xquinimaj-el ri xu'ej ri Dios chica, can chi-naj xquitz'at-pa. Xquinimaj-el chi ketzij ri x'e'x chica. Y can xa'quicuot xquitz'at-apa ri xu'ej ri Dios chi nuya' chica. Y xqui'ej chi ijeje' man i-richin ta ri roch-ulief y xa choj nca'k'ax. 14Y ruma ri xqui'ej, can k'alaj chi quiyo'ien ri ketzij tanamet pache' xca'b'ac'ujie-ve. 15Xa ta c'a niqui'an pensar ri pache' i-alanak-ve-pa, xa'tiquir ta xa'tzalaj chic pa jun b'ay chiquij. 16Pero ijeje' quiyo'ien jun chic tanamet más otz, y re' ja ri c'o chicaj; rumare' ri Dios man niq'uix ta nu'ej chi jaja' Qui-Dios, ruma ranun preparar jun quitanamit ri pache' xca'c'ujie-ve. 17Ri Abraham ruma rucukub'an ruc'u'x riq'uin ri Dios, rumare' xunimaj ri x'e'x cha ruma ri Dios, chi tuquimisaj ri Isaac chi nuya' choch. Ri Dios quire' xu'ej cha ruma xrajo' xutz'at vi xa ri Abraham can ketzij rucukub'an ruc'u'x riq'uin. Ri Abraham can xuchojmij chi nuquimisaj ri Isaac choch ri Dios, mesque chirij ri Isaac ri Dios ranun promesas. 18Ri Dios xu'ej cha ri Abraham: Jo'c ri i-rumáma ri Isaac xtiquib'inaj chi i-ketzij i-amáma. 19Ri Abraham xu'on pensar chi xa ta nicon ri Isaac, ri Dios c'o ru-poder chi nuc'asuoj-pa chiquicajol ri quiminaki'. Y rumare' ri Isaac inche'l xcon y xc'astaj chic pa, ruma ri Abraham xuc'an chic pa ri ruc'ajuol. 20Ri Isaac ruma rucukub'an ruc'u'x riq'uin ri Dios, rumare' xu'ej can chica ri Jacob y ri Esaú, ri ica'ye' ruc'ajuol, ri chica bendiciones ri xtuya' ri Dios chica chiquivach-apa. 21Ri Jacob ruma rucukub'an ruc'u'x riq'uin ri Dios, rumare' antok ya nicon, xa'ru'on can bendecir ri ralc'ual ri José, y xuya' ruchuk'a' paro' ri ruch'ame'y antok xuya' ruk'ij ri Dios. 22Ri José ruma rucukub'an ruc'u'x riq'uin ri Dios, rumare' antok ya nicon, xunataj chica ri ruvanakil israelitas chi xtalka jun k'ij antok ri quimáma xca'iel-el chupan ri nación Egipto. Y xu'ej can chica chi tiquic'uaj ri rub'akil antok xca'a. 23Ri rutie-rutata' ri Moisés ruma quicukub'an quic'u'x riq'uin ri Dios, rumare' antok xalax, xcavaj ri Moisés oxe' ic'. Quire' xqui'an ruma ri Moisés jun ac'ual chula-oc titzu'n. Y ijeje' man xquixi'ij ta qui' choch ri rey Faraón, ri b'iyuon chi ca'quimisas quinojiel ri alab'o ri nca'lax. 24Y ri rumi'al ri Faraón xu'on inche'l ral cha ri Moisés. Pero antok xnimar-pa ri Moisés, xucukub'a' ruc'u'x riq'uin ri Dios, rumare' man xrajo' ta chic chi x'e'x ral ri rumi'al ri Faraón cha. 25Ruma xu'on pensar chi más otz nu'on sufrir junan quiq'uin ri ruvanakil, ri i-rutanamit ri Dios, que choch ri ja'al niquicuot chupan ri man otz ta ri man nilayuj ta y xa pecado. 26Y ri Moisés xucha' ri ru-sufrimiento ri Cristo, que choch ri b'ayomal ri xyo'x ta cha chire' chupan ri nación Egipto. Jaja' can rata'n chi pa ruq'uisb'al ri sufrimiento re', c'o otz ruc'axiel xtiyo'x cha, y jare' ri rutz'atuon chic apa. 27Y jaja' can rucukub'an ruc'u'x riq'uin ri Dios antok xiel-pa Egipto. Y man xuxi'ij ta ri', mesque ri rey yacatajnak royoval chirij. Ri Moisés siempre xucukub'a' ruc'u'x riq'uin ri Dios; inche'l can nutz'at ri Dios, ri man nitz'iet ta. 28Ri Moisés, ruma rucukub'an ruc'u'x riq'uin ri Dios, xu'on ri va'en richin ri Pascua y xu'ej je' chica ri ruvanakil israelitas chi tiquiya' quiquiq'uiel ri ovejas chuchi' ri cachuoch, chi quire' antok xtipa ri Jun ri nca'quimisan ri na'ay alab'o, man xca'ruquimisaj ta ri na'ay alab'o calc'ual. 29Y ri vinak israelitas ruma xquicukub'a' quic'u'x riq'uin ri Dios, rumare' xa'covin xa'k'ax chupan ri Mar Rojo. Xa'k'ax chucajol ri ya', inche'l xa pa chake'j ulief xa'in-ve. Y ri aj-Egipto xcajo' je' xqui'an quire', pero ijeje' xa xa'jiek'. 30Y ruma ri israelitas quicukub'an quic'u'x riq'uin ri Dios, rumare' antok ijeje' xquiya' vielta siete (vuku') k'ij chirij ri tanamet Jericó, ri muro ri c'o chirij ri tanamet re' xtzak. 31Chupan ri tanamet re', xc'ujie' jun ramera ri Rahab rub'e'. Jaja' ruma rucukub'an ruc'u'x riq'uin ri Dios, mare' xuya' qui-posada ri ica'ye' israelitas ri xa'lka chi xalquitz'ata' ri tanamet Jericó chalak'al; y mare' je' man xquimisas ta. Pero ri man xa'niman ta cha ri Dios, ri ic'o chupan ri tanamet re', xa'quimisas. 32¿C'o came modo nca'nnataj quinojiel ri vinak ri xquicukub'a' quic'u'x riq'uin ri Dios? Man nuya' ta tiempo chi ni'ej más; inche'l chirij ri Gedeón, ri Barac, ri Sansón, ri Jefté, ri David, ri Samuel ri profeta, y chiquij ri nic'aj chic profetas ri xa'c'ujie' ojier can tiempo. 33Ijeje' ruma xquicukub'a' quic'u'x riq'uin ri Dios, rumare' xa'ch'acuon chiquij nic'aj chic naciones, ic'o chiquivach ijeje' ri pa ruchojmil xqui'an gobernar, ic'o ri xqui'an recibir ri ranun prometer ri Dios chica, y ic'o je' ri xquitz'apij quichi' leones (coj). 34Ic'o je' ri man xa'c'at ta antok xa'yo'x pa k'ak'. Ruma xquicukub'a' quic'u'x riq'uin ri Dios, ic'o ri xa'colotaj pa quik'a' ri xcajo' ta xa'quiquimisaj cha espada. Ic'o nic'aj ri manak chic quichuk'a', pero ruma quicukub'an quic'u'x riq'uin ri Dios, ri Dios xuya' quichuk'a'. Xa'ch'acuon chiquij nic'aj chic ejércitos ri xqui'an guerra quiq'uin y xa'quitarariej-el. 35Ic'o je' ixoki' ri xquicukub'a' quic'u'x riq'uin ri Dios, rumare' ri Dios xa'ruc'asuoj ri quiquiminak. Ic'o nic'aj chic ri xa'yo'x pa tak sufrimientos ruma quicukub'an quic'u'x riq'uin ri Dios, y man xcajo' ta xquiya' can ri Dios chi xa'cuol-el, ruma cata'n chi niquila' jun c'aslien más otz, mesque xa'quimisas. 36Ic'o nic'aj chic ruma quicukub'an quic'u'x riq'uin ri Dios, rumare' xa'tze'n ri vinak chiquij y xa'ch'ay, ic'o xa'tz'am cha cadena (yariena), y ic'o xa'tz'apes pa tak cárceles. 37Ic'o ri xa'quimisas cha ab'aj, y nic'aj chic xa'kupex cha sierra. Ic'o ri x'e'x chica chi tiquiya' can ri Dios, pero ijeje' man xquiya' ta can. Ic'o ri xa'quimisas cha espada, ic'o ri xa'xulie-xa'jotie' ruma i-b'anun perseguir, y ruma manak quitziak, xa quij ovejas y cabras ri xa'quicusaj. Can i-puobra. Q'uiy sufrimiento xquik'asaj y q'uiy itziel kax x'an chica. 38Ri vinak ri man quiniman ta ri Dios i-altíra itziel, rumare' man otz ta chi xa'c'ujie' ri utzulaj tak vinak chiquicajol. Rumare' ri quicukub'an quic'u'x riq'uin ri Dios xa'xulie-xa'jotie' pa tak desiertos, pa tak k'ayis, y pa tak cuevas, ruma ri sufrimiento ri xquik'asaj. 39Quinojiel ijeje' can xquicukub'a' quic'u'x riq'uin ri Dios, y rumare' can xquicuot ri Dios quiq'uin. Y antok xa'con, c'a quiyo'ien ri ranun prometer ri Dios chica. 40Ruma ri Dios xu'on pensar chi nuya' ri jun bendición más otz chupan ri ka-tiempo ojre'. Rumare' junan xtiyo'x ri bendición re' quiq'uin ri kate't-kamama', ri can xquicukub'a' quic'u'x riq'uin ri Dios. Y quire' nu'on cumplir ri Dios ri nuya' chika.

will be added

X\