Hebreos 10

1Ri ley ri xuya' ri Dios cha ri Moisés, man ja ta re' ri utzulaj tak kax ri xtuya' ri Cristo. Ruma ri ley re' jo'c rumuch'uch'il nojiel ri utzulaj tak kax re'. Y rumare' ri chicop ri xa'yo'x choch ri Dios juna-juna' inche'l nu'ej ri ley, man xa'tiquir ta xa'calasaj-el ri qui-pecado ri vinak chi xa'jiel-apa riq'uin ri Dios. 2Xa ta sak xu'on ri cánima cuma ri chicop ri xa'yo'x, man ta nca'quiya' chic jun b'ay, y niquina' ta chi manak chic qui-pecado. 3Pero ruma xa juna-juna' nca'quiya' ri chicop choch ri Dios, nalka pa quive' chi ri qui-pecados man alanak ta el quiq'uin. 4Ruma ri quiquiq'uiel ri tuora y ri achij tak cabras man nca'tiquir ta nicalasaj pecados. 5Rumare', antok ri Cristo xpa vave' choch-ulief, xu'ej cha ri Dios: Atre' man navajo' ta chic chi nca'yo'x chicop y nic'aj chic kax chavach, rumare' xaya' nu-cuerpo chi xinuoc jun vinak. 6Ri chicop ri nca'quimisas chi nca'parox chavach, man nika ta chic chavach; quire' je' ri chicop ri nca'quimisas chi nca'yo'x chavach ruma qui-pecado ri vinak. 7Rumare' inre' xin'ej: Dios, inre' xipa chi ni'an nojiel ri navajo' atre', inche'l tz'ib'an can chuvij chupan ri vuj ri b'atuon roch (rollo). Quire' xu'ej ri Cristo. 8Na'ay, ri Cristo xu'ej cha ri Dios: Atre' man navajo' ta chic chi nca'yo'x chicop y nic'aj chic kax chavach. Ri chicop ri nca'quimisas chi nca'parox chavach, man nika ta chic chavach; quire' je' ri chicop ri nca'quimisas chi nca'yo'x chavach ruma qui-pecado ri vinak. Quire' xu'ej ri Cristo, mesque nojiel re' b'e'n can chupan ri ley ri xyo'x cha ri Moisés. 9Después ri Cristo xu'ej: Dios, inre' xipa chi ni'an nojiel ri navajo'. Quire' xu'ej ri Cristo cha ri Dios. Y quire' xq'uis ri na'ay pacto y pa ruc'axiel xc'ujie' can ri c'ac'ac' pacto. 10Ri Jesucristo can xu'on ri nrajo' ri Dios, antok xcon choch ri cruz chi xu'on sak cha ri kánima. Y jo'c jun b'ay xuya' ri ru-cuerpo chi xcon y rakalien richin nojiel tiempo. 11Ri sacerdotes ri ic'o vave' choch-ulief can k'ij-k'ij nca'quiya' chicop choch ri Dios ruma qui-pecados ri vinak. Pero ri niqui'an ijeje' man nitiquir ta nralasaj-el qui-pecados ri vinak. 12Pero ri Cristo jo'c jun b'ay xcon, y rumare' xa'an perdonar ri ka-pecados. Y antok xc'astaj, xb'atz'uye' pa ru-derecha ri Dios chicaj. 13Y chire' c'o-ve, royo'ien hasta c'a xca'yo'x chuxie' rakan quinojiel ri itziel nca'tz'ato richin. 14Ruma jo'c jun b'ay xcon, ri Cristo xu'on chika chi man jun chic ka-pecado choch ri Dios richin nojiel tiempo. Chi quire' xu'on sak cha ri kánima. 15Y quire' je' nu'ej ri Espíritu Santo chika, antok nu'ej: 16Xtalka ri k'ij antok xtin'an jun c'ac'ac' pacto quiq'uin ri vinak. Xtinya' ri nu-ley riq'uin cánima, y xtintz'ib'aj je' chupan quijaluon, 17y xu'ej je': Y man xtalka ta chic chinuc'u'x nojiel ri qui-pecados y ri itziel tak kax ri xqui'an. Quire' ru'e'n ri Dios, y jare' nu'ej ri Espíritu Santo. 18Y rumare' can k'alaj chi manak chic nic'atzin chi nca'yo'x chicop choch ri Dios ruma ri pecado, ruma ya x'an perdonar. 19Hermanos, vacame c'o che'l nkojuoc pache' c'o-ve ri Dios chicaj, chupan ri Lugar Santísimo, ruma ri Jesús xcon y x'in ruquiq'uiel kuma ojre'. 20Can xujak ri jun c'ac'ac' y c'aslic b'ay chakavach, antok jaja' xcon choch ri cruz. Xk'ach'itaj pa nic'aj y ca'ye' xiel ri tziak ri choj cha jachuon-ve rupan ri templo. Mare' vacame man jun chic nik'ato kab'iey chi nkub'aka c'a riq'uin ri Dios. 21Y ri Jesús jare' ri Namalaj Sacerdote ri c'o pa kave' ojre' ri oj ralc'ual chic ri Dios, 22rumare' ojre' ri kacukub'an kac'u'x riq'uin ri Jesucristo, man takaxi'ij-ki' nkujiel-apa riq'uin ri Dios; xa riq'uin nojiel kánima nkujiel-apa riq'uin, y can ta sak chic ri kánima chi quire' man jun itziel kiq'uin y can ta ch'ajuon chic otz ri ka-cuerpo riq'uin ri sak ya'. 23Y ojre' ri ka'e'n chica ri vinak chi kayo'ien ri xtuya' ri Dios chika, can siempre riq'uin nojiel kánima kayo'iej re', y man riq'uin ta caca' kac'u'x. Ruma ja ri Dios ri b'anayuon prometer chika, y jaja' can nu'on-ve ri nu'ej. 24Y kacanuj che'l nakatola-ki' konojiel chi quire' nakatamaj nakajo-ki' más, y chi quire' más nakarayij naka'an ri otz. 25Man timalij ic'u'x chi ntimol-ivi' pa rub'e' ri Dios, man ti'an inche'l niqui'an nic'aj chic ri man nicajo' ta chic nca'lka iviq'uin antok ntimol-ivi'. Pa ruc'axiel, xa nic'atzin chi ntimol-ivi', chi quire' ntiya' ruchuk'a' ivánima chib'il-ivi'. Y jare' ri más nic'atzin ruma ivata'n chi ya nalka ri k'ij antok xtipa chic jun b'ay ri Ajaf. 26Ruma quinojiel ri cata'n chic ri ketzij y quiniman chic riq'uin cánima, y niquiya' can ri Dios, xa man jun chic c'a xticon pa qui-cuenta chi nca'rucol chupan ri qui-pecados. 27Jo'c chic quiyo'ien ri k'ij antok xca'an juzgar ruma ri Dios y xca'b'aka chupan ri k'ak' pache' xca'b'aka-ve ri iru-enemigos ri Dios. 28Inche'l jun vinak ri man nrajo' ta nunimaj ri ley ri xyo'x cha ri Moisés, y xa ic'o ica'ye' o iyoxe' ri niqui'ej chi xu'on ch'o'j, man tijoyovax roch; can tiquimisas. 29Y xa quire', ¿man nti'an ta came pensar ixre' chi más nem ri castigo ri xtika pa quive' ri niquixak' ri rub'e' ri Ruc'ajuol ri Dios, y man jun rakalien niqui'an cha ri ruquiq'uiel, ri xb'ano chi xc'achoj ri c'ac'ac' pacto ri xu'on ri Dios kiq'uin, y ri xb'ano sak cha ri quic'aslien, y niqui'an chi man jun rakalien ri Espíritu Santo ri ruyo'n ri favor pa kave'? 30Y ojre' kata'n chi ri Ajaf Dios ru'e'n can: Inre' nquib'ano castigar, y inre' je' xquiyo'n ruc'axiel chica ri niqui'an pecado. Y chupan je' ri ruch'ab'al ri Dios ri tz'ib'an can, nu'ej: Ri Ajaf xtu'on juzgar ri rutanamit. Quire' ri tz'ib'an can. 31Juye' oc roch ri nika pa ruk'a' ri c'aslic Dios. 32Talka pan ive' ri sufrimiento ri xik'asaj antok ri ic'aslien c'aja' oc tic'ujie' pa sakil. Can altíra xi'an sufrir, pero can xicoch'. 33Ruma ixre' can ketzij chi xicoch' nojiel ri sufrimiento ri xik'asaj y ri tzij ri x'e'x chiva, y ri vinak can ja'al xa'ca'y chivij. Y man jo'c ta re' xi'an, ixre' can xixuoc je' cach'il nic'aj chic ri niqui'an sufrir. 34Xijoyovaj quivach ri xa'yo'x pa cárcel ruma rub'e' ri Dios. Y antok xmaj ri kax ivichin, man xib'isuoj ta xiya-el, ruma xixquicuot xiya-el. Ruma ivata'n chi xtiyo'x jun herencia chiva chicaj ri richin nojiel tiempo y re' más otz choch ri b'ayomal ri richin ri roch-ulief. 35Rumare' man tichup ri icukb'al c'u'x riq'uin ri Dios. Ruma c'o jun utzulaj kax ri nuc'am-pa chiva. 36Can tic'ujie' i-paciencia, chi quire' nti'an ri nrajo' ri Dios, y xa quire' xti'an, can xtiyo'x chiva ri ranun prometer ri Dios. 37Ruma chupan ri ruch'ab'al ri Dios ri tz'ib'an can, nu'ej: Ri Jun ri xtipa, can xtipa-ve. Xa cierca chic c'o-pa ri k'ij chi nipa. 38Ri choj chic ruc'aslien, can xtic'ujie' riq'uin ri c'aslien ri man niq'uis ta, ruma rucukub'an ruc'u'x viq'uin. Pero xa xquiruya' can, man xtiquicuot ta vánima riq'uin. Quire' nu'ej ri Dios. 39Pero ojre' man ojc'o ta chiquicajol ri niquiya' can ri Dios ri xa c'a chupan ri castigo nca'b'aka-ve. Ojre' xa ojc'o chiquicajol ri quicukub'an quic'u'x riq'uin ri Dios; rumare' kata'n chi nkojcolotaj.

will be added

X\