1 Chupan ri ojier can tiempo, q'uiy mul xch'o' ri Dios chica ri kate't-kamama'; y antok xch'o' chica, xa'rucusaj ri profetas y q'uiy formas xa'rucusaj chi xch'o' chica. 2 Pero vacame chupan ri ruq'uisb'al tiempo ri ojc'o, ri Dios ja c'a ri Ruc'ajuol ri xucusaj chi xu'ej ri ruch'ab'al chakavach. Ri Dios pa ruk'a' ri Ruc'ajuol xuya-ve nojiel, y pa ruk'a' je' jaja' xuya-ve chi xu'on ri roch-ulief y nojiel ri ic'o chicaj. 3 Riq'uin ri Ruc'ajuol nik'alajin ri ru-gloria ri Dios. Ri Ruc'ajuol can junan riq'uin jaja'. Y ja ri Ruc'ajuol je' ri c'uayuon richin nojiel ri ic'o; y riq'uin ri ru-poder ri ruch'ab'al rutz'amuon nojiel. Jaja' xcon chi quire' xralasaj ri ka-pecados, y xc'astaj-pa chiquicajol ri quiminaki'. Y antok rub'anun chic nojiel re', xb'atz'uye' chicaj pa ru-derecha ri Namalaj Dios. 4 Ri Ruc'ajuol ri Dios más nem chiquivach ri ángeles. Y ri Dios xuya' jun rub'e' ri más rakalien que chiquivach ri ángeles. 5 Ruma ri Dios man jun b'ay ru'e'n cha jun ángel: Atre' ri at Nuc'ajuol, inre' niya' ac'aslien vacame. Y man jun b'ay je' ru'e'n: Inre' c'a ri Rutata'. Y jaja' c'a ri Nuc'ajuol. 6 Y antok ri Dios xutak-pa ri Ruc'ajuol choch-ulief, ri Dios xu'ej chica quinojiel ri ru-ángeles: Tiya' ruk'ij ri Nuc'ajuol. 7 Y chiquij ri ángeles jo'c nu'ej: Ri nu-ángeles cha'nin niqui'an ri nusamaj, ruma ni'an chica chi inche'l cak'iek' y inche'l ruxak-k'ak'. 8 Pero cha ri Ruc'ajuol, ri Dios nu'ej: Dios, atre' can richin nojiel tiempo na'an reinar, y pa ruchojmil na'an reinar. 9 Can altíra avajo'n ri choj, y man nika ta chavach nojiel ri itziel kax. Y rumare' inre' ri A-Dios nub'anun chava chi atre' más ncaquicuot que chiquivach ri nic'aj chic avach'il. 10 Y ri Dios xu'ej je' cha ri Ruc'ajuol: Ajaf, atre' pa rutz'ucb'al xa'an ri roch-ulief, y ri rocaj je' riq'uin ri ak'a' xa'an-ve. 11 Ri roch-ulief y ri rocaj can xca'q'uis, pero atre' man xcaq'uis ta. Quinojiel can xtiqui'an vieja, inche'l nu'on ri tziak. 12 Can xti'an quivach, inche'l ni'an cha jun tziak. Can xca'c'ax inche'l ni'an cha jun tziak ri man otz ta chic. Pero atre' man jun b'ay xcac'ax, y man xtiq'uis ta je' ri ac'aslien. Quire' xu'ej ri Dios. 13 Y ri Dios man jun b'ay xu'ej ta cha jun ángel: Catz'uye' pa nu-derecha hasta c'a xca'nya' ri av-enemigos chuxie' avakan. 14 Ri ángeles can i-espíritu y i-rusamajiel ri Dios. Y ijeje' nca'rutak ri Dios chi nca'quito' ri i-cho'n chi nca'colotaj.
