Galatas 6

1Hermanos, xa c'o jun hermano ri nika chupan ri pecado, ixre' ri ivuc'uan ri c'aslien inche'l ri nrajo' ri Espíritu Santo, akal quixch'o' cha, chi quire' nitzalaj-pa ránima riq'uin ri Dios. Y ixre' tib'ana' cuenta-ivi' chi quire' man nquixka ta chupan ri pecado. 2Y xa c'o chica ntik'asaj y ntina' chi inche'l jun aka'n nika chivij, can titola-ivi' chi ntivuc'uaj ri aka'n re'. Y riq'uin re', can nti'an ri nu'ej ri ley richin ri Cristo. 3Pero xa c'o jun nuna-ri' chi altíra rakalien, y xa man quire' ta, xa ruyuon jaja' nu'on-ka engañar-ri'. 4Chikajunal katz'ata-ka-ki' ri naka'an, k'alaj re' xa otz o xa man otz ta. Y xa ri naka'an, can otz, tiquicuot ri kánima. Y man nakatz'at ta ri nu'on ri jun chic. 5Ruma chikajunal nakuc'uaj ri kaka'n. 6Y ixre' ri nquixtijox riq'uin ri ruch'ab'al ri Dios, qui'ito' ri nca'tijuon ivichin riq'uin nojiel kax ri nic'atzin chica. 7Man ti'an engañar-ivi'. Ruma ri Dios man jun xtib'ano engañar richin. Ruma chica-na ri nutic ri jun, can jare' je' xtu'on cosechar. 8Mare', xa ja ri man otz ta ri nurayij ri ka-cuerpo ri naka'an, jare' xtuc'uan kichin chupan ri camic. Pero xa nakuc'uaj ri c'aslien ri nrajo' ri Espíritu Santo, xtuc'am-pa chika ri c'aslien ri man xtiq'uis ta. 9Y man kojcuos naka'an ri otz. Ruma xa man nkojtanie' ta chi naka'an ri otz, xtalka ri k'ij antok xtiyo'x ruc'axiel chika. 10Y rumare', antok nakatz'at chica-na vinak chi c'o ri nic'atzin cha, can kato'. Pero ri más nic'atzin chi nca'kato', ja ri junan kacukub'an kac'u'x riq'uin ri Jesucristo quiq'uin. 11Y titz'ata', can riq'uin nuk'a' ni'an-el ri nima'k tak letras ri nitz'ib'aj-el chiva. 12Quinojiel ri nicajo' chi ti'an ri circuncisión chiva, niqui'an quire' jo'c chi ca'tz'iet y ca'nimax chi niqui'an ri nu'ej ri ru-ley ri Moisés. Y man nicajo' ta niquitzijuoj chi nkojcolotaj jo'c ruma ri xcon ri Cristo choch ri cruz, ruma ijeje' man nicajo' ta niquik'asaj sufrimiento pa quik'a' ri vinak. 13Can b'anun ri circuncisión chica ri nca'e'n chiva chi quire' je' tib'ana' ixre'. Pero re' man nu'ej ta chi ijeje' niqui'an nojiel ri nu'ej chupan ri ru-ley ri Moisés. Man quire' ta. Ijeje' nicajo' chi ixre' ni'an ri circuncisión chiva, jo'c chi ca'tz'iet chi c'o quik'ij ruma ixre' nquixniman chica. 14Pero inre' man nivajo' ta chi niyo'x nuk'ij, inche'l niqui'an ijeje'. Inre' jo'c ri Kajaf Jesucristo ri xcon choch ri cruz ri niya' ruk'ij, y jaja' je' ri b'anayuon chuva chi inche'l xa ya xicon chiquivach ri itziel tak no'j ri c'o choch-ulief. Y ri itziel tak no'j ya xa'con je' chinoch inre'. 15Y ojre' ri jo'c jun kab'anun riq'uin ri Cristo Jesús, man jun chica nu'on xa b'anun ri circuncisión chika o manak b'anun. Ri nic'atzin y ri c'o rakalien, ja ri c'ac'ac' kac'aslien. 16Chica quinojiel ri quic'uan ri c'aslien ri xin'ej, tic'ujie' ri paz riq'uin cánima, y tijoyovax c'a je' quivach ruma ri Dios. Y chica je' ri ketzij israelitas ri rutanamit ri Dios. 17Y ri k'ij ri xti'a-apa, man jun chic ti'e'n más tzij chuvij. Ruma inre' can ic'o ratal ruc'uan ri nu-cuerpo ruma ri sufrimiento ri xink'asaj, ruma ri Ajaf Jesús. 18Hermanos, ja ta ri ru-favor ri Kajaf Jesucristo tic'ujie' riq'uin ri iv-espíritu. Amén.

will be added

X\